TOUPA TOH BANGKIM AHITHEI

Thumna neih ding danle haksa sa mahmah ta, thadahna a dim hun leh hiai zaw chi a lungkiat vungvung a om hun i nei ngei hia? Lauh luatna ziakin ginlelh in i om ngei hia? Ahihkeileh, i thumthum nate dawng a om ahi chih chetna di le thei khe zoulou in beidong tak in i om kha hia? Chitaktak a gen ding chileng michih in bang lam hiam bek ah hichi bang hun i maituah khak uh a om ding hi. Hichi bang hunte ah Pathian a i lametna koi ah aom a chih hon ki-en chiansak zel hi.

Pathian adia bangkim hithei ahi chihtuh Khristian kichi tengteng in i gingta un i pom vek uhi. Himahleh hiai bang a gingtakna nei a tua bang a gengen hina pi’n bang hun hiam chiang in lauhna toh lungzing tak in i om thei zel uhi. (Hiai bang a om nate koi a hong kipan a, bangziak a tua bang a om i hihiam chih a theilou i om kei zel uhi.) I lamet louh bang ua thil hongpai chiang in Pathian a i muanna uleh i ginna taktak uh, i dinmun uh koi a om ahia chih honglang khezel hi. Miteng ki bangkim vek lou i hih ziak un atam zaw te buaina bel Pathian in hon ompih lou ding ahi chih hi zaw lou in, huchi khaleng chi a thil a tung nailou te hah ngaihtuahna in hon lungbuai sak zel hi. Buaina i tuahte uleh a thupilua sihna di khop a buaina chi a gending atam ding in i gingta kei a, himahleh haksatnate i tuah zek chiang un i nguai suk pah zel uhi. Nam dangte mizia thei sipsip lou i hihziakin eimah kigen zel leng, thil bangkim i hihna uleh i septe uah a nuamnuam ding kia i ut tel uhi. Sep a sep ding chih sang in bang chileh tua te ka mualsuah baih thei ding a chi in zoh pahna ding bang i zong sek uhi. Haksatna leh thuakgimnate lau i hi uhia ahihkeileh tuate vuallelhna a la i hi uhia le chih ngaihtuah a tham mahmah hi. Khopi a laisiam leh piltak a omte khong in ei singtangmite khenkhat om dan ana theilua uh ahihziakin ‘easy money’ sum tam nana leh sem lou a neihna ding zongte’ chi in hon thei na mah uh a, hiai bang a minloh theih ding in tampi tak bang i na om uhi. Ahi mahleng himailou ding hia tuate ziak mah in i gamsung uah thuhoih zak sang in thusia leh buaina toh hicia i om touhtouh uh!

Tuni’n leng Job tangthu genlou theilou i hihziakin amah tanchin ngaihtuah lehang, haksatna a tuah leh lungkhamna a maituah i theihchiat sa uh ahi. Hiai bang hunte inleng Pathian a amuanna nungtolh lou in ginomtak leh kuhkaltak in a om a; athuakgimnate tungtawn in Pathian adia bangkim hithei ahihdan amu chian semsem hi. A thugen nanungte a thugen i muhtheih tuh, “Thil bangkim na hihthei chih leh nang thiltup kham theih ahi kei chih ka thei hi.” – Job 42:2 chih ahi. Bangziak a hichi bang haksatnate tuak hihiam chih tuh Job buaina ahi kei hi. Tua naksang in a thiltuahte tungtawn in Pathian a aginna leh a lametnate a lian sem lai a, tuate ziakin a thuakgimnate leh ze-etna atuah tengteng a mualsuah hi. Job hinkhua apa’n in eite ki-en leng kingaihtuahna ding tampi tak om ding in a gingtak huai mahmah hi. Bangziak a thil houchikchik te a le lungkham sek i hiam? Pathian a muanna sang a bangziak a eimah thutum a thukhitna bawl a, thil hitheilou ding a thilteng ngaihtuah khasek i diam? Hiai bang a om mailou a Pathian a i lam-etnate uh ngak semna a nei a, Amah a muanna i neih sem uh apoimoh hi.

Jesu’n nungzuite kiang a ginna apoimoh dan agen bang in, eite’n leng tua bang ginna neih apoimoh hi. “…Chihtaktak in k’on hilh ahi, ankam tang khat bang ginna na neih uleh, hiai tang kiang ah, Hiai a kipan huai a pam ah va kisuan in, na chi ding ua, a kisuan mai ding; nou ding in hihtheih louh bangmah a omkei ding” a chi hi. – Matthai 17:20b. A poimoh penpen zaw bangkim a Pathian a muanna ngak ahi gige hi. Hiai bang muanna om louh chiang in thil hitheilou ding achi a ngaihtuah ding atam sek hi. Amah i Toupa ah bangkim nga in Amah muang photphot leng eite ading inleng hihtheih louh ding bangmah a om kei ding hi. Amah lou a hing zoulou ding i hih dan uh i theichiat uh a; a Laisiangthou thute’n khamuanna leh bitna hon chiamna leng i mu un I theichian mahmah lai uhi. Huchitan i theih nung ua bangziak a lunglel leh lungkia a om lailai ding i hia? Pathian I Toupa ah ginna nei in Amah ah ki nga ni. \"….ginglou kenla, gingta in” a chi hi. – Johan 20:27b.

Pathian a muanhuai ahih dan leh mihingte buainate khong bangmah tham ahihlouh dan Laisiangthou i simtam leh a kithei semsem hi. Leitung a haksatnate tuak lou ding i hikei uh a, tuak tham ding i hi uhi. Himahleh tuate bang chituk in tuak lehang leng Amah a muanna nga te’ a ding bitna om gige ding a, lametna om louhna munte ah leng Aman alampi ding hon gelsak in ahi theiding in hon lemgeel sak ding hi. I Pathian muanhuai ahihdan Laisiangthou mun bangzah hiam a i muhzual omte i sim ding.

Huan, Toupa’n a honpi gige ding a, mun keu ah leng a hon taisak ding a, na guhte leng a hatsak ding; tui a vak huan bang leh, tuinak nei kang ngeilou bang na hita ding hi. – Isai 58:11

Pathian ka hatna leh thilhihtheihna ahi a, Aman ka lampite a hoihkim in a bawl hi. – 2 Samuel 22:33

Nidang a ka kiang a Toupa hong kilang in, hichi in a chi: Ahi, it tawplou in ka hon it a, huaiziak in lainatna in ka hon kai hi. – Jeremia 31:3

Tuite na ngah tan lai un na kiang uah ka om ding a; luite na ngah tan lai un leng a hontum kei ding hi: mei a na pai tan lai un leng a honhul kei ding a; meikuang in a honliau kei ding hi. – Isai 43:2

Amen! Thupi theilua hilou maw! Lamsuk lamtou i tot hun un Pathian in honpi gige ding a, Aman i lampite uh a hoihkim in a hon bawl sak ding hi. Apoimoh pen zaw Amah ah i muanna Job bang in i nga hiam chih ahi ta hi. Tunia i kidot ut pen tuh, Pathian eilam a apan leh bang ahia hon zou ding? Amah eilam a pang gige sa hi a, ei Amah a i kinga na hia? chih ki enchiat ni.

Pathian eilam a apan leh kuan ahia honzou thei ding? – Romte 8:31b.

Pathian muanhuai ahihdan i theichian mahmah ta ua chihleh buaina i tuah hun un leh bangmah hithei nawnlou ding ahi chi a lungkham leh beidong tak a i om hun un bang chi’n i om ding ua? Hiai bang hunte hongtung chiangin Pathian a i muanna uh i bitsak sem ua i hatsak sem ding uh ahi. Sam laibute a i muh mah bang in, “…Ka lau chiang in, nangmah k’on muang hi.” – Sam 56:3. Kumpi David thumna bang in, “Toupa aw, zingsang in ka aw na naza zel ding a; Zingsang in ka thumna na ma ah ka gel hoih dimdiam ding a, k’on na hungaih zel ding hi.” – Sam 5:3

Tuni’n Pathian a muanna in bangkim hon hihsak thei ahi chih mangngilh het keini. Thum tamni hang, A Thu te simtam in theitam ni. Hiai te’n i buainate ua pa’n hon kembit sem ding hi.  Pathian deihdan in gamta in Amah lungtuak in om photphot lehang i tung ua thil haksa hi’n thil hongtung dingte hileh Aman hon ompih tawntung ding ahi chih a hon chiam hi. Tun’n ei bang chi’n i om a, muantak leh panpih takin i khosa hiam chi kivel thak chiatni.

“Huan eimah a semzel thilhihtheihna bang in, i nget leh i ngaihtuah tengteng sang a thupi zawtham hihtheipa kiang ngei ah, Tangtawn in suan tengteng tan in, saptuamte leh Khrist Jesu ah thupina om hen, Amen.” – Ephesate 3:20.

Toupa’n simtute hon vualzawl hen! Khalam a masawn semsem thei ding; A nuam ahaksa a Amah toh tonkhawm thei gige mite hi ding in simtute Toupa’n hon ompih chiat hen! Theihna bukim louh ziak a i  gen khelh omte Toupa ngaihdamna i ngen hi.

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

10^th August, 2022 | Weekly-Inspiration – 107