October, 2021 in Facebook neitupa, Mark Zuckerberg in a company (Facebook, whatsapp, Instagram leh social platform dangdang) a kigawm in Meta chih hita diing chi in puangkhiakna ana nei hi. Mabaan ah internet tungtawn a virtual reality (ataktak hilou lah ataktak bang a ngaih), metaverse nasatak a zat a hong om diing vaidawnna kawm a, a company min a tapsak chihdan ahi.
Metaverse bang ahia?
Metaverse kichi kammal ahihleh, Neal Stephenson in kum 1992 in science fiction laibu a gelh ‘Snow Crash’ kichi ah ana posuah masapen hi’n gen in om hi. Huai laibu a taangthu paidan ahihleh, mailam hun diing ah computer leh internet masawnna toh mihingte khosak khawmna thu ahi ; Khovel dinmun in lah siatlam manoh deuhdeuh, thil paidan lah diklou hiaihiai ahihman in, mihingte’n hiaibang a lametna bei leh beidothuai khovel taikhiaksan na dia metaverse zang uh chihdan ahi
Metaverse omzia ahihleh 3D virtual worlds (ataktak hilou, lah ataktak bangtak a kibawl computer leh internet a khovel tampi) kizomkhawm vek hi’n gen uhi. Metaverse in atup piipen ahihleh khotaang kizopna (social connection) awlsamsakna diingdan in Mark Zuckerberg inleng gen hi. Internet tungtawn a mabaan a khovel pumpi mun tuamtuam a mihingte kipumkhatna leh kigawmna di tupna a hiaibang a ngaihtuah ahihdan leng ana gen hi. Metaverse ah i hihna (identity), mizia (personality), lim (image), kum zah (age), amei hia apa hihna (gender) chihte ei duhthusamtak in i hihna (avatar) kibawltawm dia, innsung leh khotaang hinkhua leh khosakdan leng ei duhthusam tak in kibawl tawm theih diing chihdan ahi (facebook inle, i limlaak toh kituak in i avatar di hon bawltawmsak vele). Virtual (ataktak toh kibangthei pen dia bawltawm) leh augmented (muhtheihdia kibawlte ataktak bang a phawk semsakna) headset chihte thuahkawm a huai bawltawm khovel ah, i hihna kibawltawm (avatar) toh khosakna leh omtheihna chihdan in i theihsiam thei hi.
Metaverse om didan:
Metaverse ahihna bangtak a hong taksuahna di’n kum 10 bek luut lai di’n atheite’n gen uhi. Metaverse khat chauh omthei ahi a, a hong om chiang in bel, online khovel teng kankuah vek diing chi uhi. Tehkhina’n: Facebook, Instagram, Twitter, Linkedin chihdan tengteng leh online a gaming platform om tengteng zomkhawm vek thei diing chihdan hi’n i theisiam hi. Huaiban ah, metaverse in sumlam toh kisai (economy) in leng amah leh amah in kivaipuak dia, khovel taktak a hinkhua taktak ah hihna i neibang in number pansan (digital) in computer leh internet tungtawn in hinkhua neih theih diing chihna ahi. Metaverse ah lai sinna, nnasepna, kimawlna, van leina leh zuakna, mithak toh kimuhna leh sum zonna chihte, ataktak hinkhua a i hihsekte uh taksa a va hih sese ngainawnlou in, i innlum ah, i tutmun ah virtual/augmented headset chihte zang in kihihtheita diing hi’n gen uhi.
Facebook bang leng amah leh amah a metaverse hikhin a gen khenkhat leng om uhi. Facebook ah user-te’n avatar kinei chiat a, huai avatar tungtawn in facebook khovel ah khosaknadan khat kineithei hi. Facebook ah marketplace le om a, facebook zang midangte theih in kihou theih a, atuam in messenger tungtawn inleng mimaltak in kihou theih a, gaming lah om a, lungluutna kibangte kigawmna di group om a, mi leh ngaihdan hoih i sakte page lah zuih (follow) thei hi. Huai ban ah, veite leh ngaihdante phoukhiakna leh kikupna, khovel thuthang tuamtuam leh thu leh thilhih tuamtuamte genkhawm, sakkhawm leh saikhawmna di khawng bang in nasatak a zat in om tou zel hi. Metaverse i chih chiah, tua i gente dan, himahleh, lianzawtham leh ataktak toh kibangtheipen a phawkna, i avatar tungtawn a omtheihna hong hi diing chihdan ahi.
Sum met bawlna leh kipolhkhawmna di’n:
Metaverse dan a kibawl platform tuamtuam bangleng ompanta hi’n gen uhi. Online game kimawldan (experience) bang leng tuitumpih theihtawp dia a bawl uh ahihman in, lungsim naaktak in kaitum a, kimawlna nopsaktuamna di’n a game a zat di van tuamtuam leitheihna bang developer-te’n bawl zel ua, hiaibang a van leh gou neih chihbang gamer-te’n paidan in neithei uhi. A kimawlte’n le a game a thil mannei aneihte uleh a level sang a tunnasa uh khawng zuak thei uh hihtuak hi. Tulai inchu, huaibang a van zuak leh leina di’n cryptocurrency (internet adia sum chituam) zangta uhi.
Metaverse hong om chiang in, game khat a lutna dia platform tuam chiat ngai nawnlou dia, game tampi platform khat ah kikankuah in omtheita diing chihdan hi’n i theisiam hi. A gaming experience tuitumhuai mahmah diing ahihna ah, khovel taktak a buai sang in, computer khovel ah tu sangmah in mite lungluut zaw diing uhi. Game khenkhat – Minecraft, Fortnite, PUBG chihte bang kimawlna kia hinawnlou a, lawm polhna leh mithak toh kimuhna bang suak zou hial hi. Kihuihkhiakna leh om chimthawina kia hitalou in hinkhua ah mun poimohtak luahsak in ngaihtuahna leh hun tampi piakna leh nnasep bang a neithei zen di’n mitampite’n gaming zangta uhi.
Khotaang kizopna azazaw a khansakna diing leh maban a technology lam a masawnna angvaanna dan in ngaihtuah kichi mahle uh, sum muhna, thilhihtheihna taklatna, mahni omzia kitheihna, kipahna leh hinkhua tup leh ngiim a zonna uh hizaw in ka ngaihtuah hi. Pathian in Amah thupina leh lamdanna suutna, theihna leh Amah biakna dia khuak lamdangtak toh hon siam ahihna a kilatna hi’n i thei hi. Himahleh, Pathian zonna leh Amah lam thil thupi leh kiseelte zonna a zangta lou in (Amos 3:7 ; Deuteronomi 29:29 Jeremia 33:3), Khovel thilte mah ah i tummang hiai hiai uhi. Setan in mit san gelgul, lei ka khakhe zualzual leh, a kii khawng toh, mel chizau huaitak a hong kilaak a hon khem sek hilou in, i mimal utnate, sa utnate, mit utnate, damsung thupina limte khawng in hon hiip a, hon piimang hizaw sek hi (Jakob 1:14 ; 1 Johan 2:16). Khovel pilna khang hat himahleh, Pathian limsak louhna leh Pathian theihlouh zaw haina ahihdan Bible in hon hilh hi (Romte 1:22 ; Sam 14:1 ; 1 Korinthte 1:20 ; Romte 3:10-12). Taangtawn meidiil (Matthai 24:25) omlam thei utlou ahih man un, Pathian omlam leng kitheilou lemsak ua, gingta utlou ua, Pathian in amau utnalam ah pekhia chihna ahimai hi (Romte 1:28-32 ; John 3:19). Romte 1:20 in hon hilh mahbang, Pathian in Amah om ahihdan a thilsiamte tungtawn a apuangzaak ban ah, Jesu Khrist khovel a hong pai a kipat in, tangthupha puangzaak dia thupiak a om Khristiante’n kum 2000 phial paisa a kipat in ana tangkoupih denta uh ahihman in thukhenna ni chiang in suanlam neithei kuamah a omkei diing uhi (Mark 16:15 ; Kolossate 1:6).
Mihingte lungsim paidan leh tulel khovel:
Mihingte khangthu a taangpi a etkikna ah, nek di zong tawm a buaina i khankhelh chiang un, neih-le-lam leh thil dangte ah i kisubuaithei pan uhi. Tenna di chauh in inn kinei nawnlou a, a cheina di ban ah, kholum chiang in Air Conditioner bang i zang ua, khovot chiang in electric heater bang zang in, leh thildang tampite anopthei pen a khosakna di’n i kiguan uhi. Mihingte’n i poimoh masakte uh; nek-le-dawn, silh-le-ten, innten-loutente kisubuchingta i hihman in, i lungsimte uh luah di thil dang i zong ua, nopbawlna leh nopsakna di mah hong pipen zel hi.
Chimzen a omna hun kipia a, i lungsim leh kha’ adia hoih di ngaihtuahna – hinkhua toh kisai thil nuam ngelloute ngaihtuahna leh dotnate suangtuahna hiam, Pathianthu suutna leh Pathian buanna, khelhnate toh kisai a ei leh ei kimaituahna khawng a hun nuamloutak zat sang a, lungsim zaangkhai theipen a om teelzawte adi’n omna lamlam a i tawi gige smart phone tungtawn a, internet mah a va kibuk nuam zaw hi. Chim manlou a nopsakna a om kingeinasehte’n hinkhua a haksatnate maituah diing leng kingaplou pahpah uhi. COVID-19 hiileng ziak a kikhum bilchihna in online ah hun i zatdan leh zatzah uh naakpitak in tha guan hi. Metaverse om hial nailou ale hichituk a kideek haksa sa i hihna uah, Metaverse hong taksuah ngeingei leh zaw, khovel taktak, hinkhua taktak, mi taktakte toh kizopna, mohpuakna taktak leh gimthuakna taktak teel louh teel zaw mi tampi hong om diing un gintat huai hi.
Ei Khristiante adia pilvanna di tampi a omna ahihleh, ei kia tuam omna toh i sahkhua uh kituaklou hi. Mikhial tatsa dangte toh kikholkhawm, kithuumpih tuah, kihasot tuah, puakgikte kidawn zangkhai tuah, leh dahna hin kipahna a kikawmtuah dia thupiak i hi uhi (Jakob 5:16 ; I Timothi 2:1 ; Galatiate 6:2 ; Romte 12:15). Niteng hinkhua ah khawphawktak leh tup leh ngiim kichiantak thei a naa hoih sem dia Khrist’ sisan a tatsa i hi uhi (1 Peter 1:13 & 5:8 ; Ephesate 2:10). Hiai puuksesa, ataktak khovel ah Pathian thu toh kituak thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim leh phathuai thilte ngaihtuah dia chiil i hi uhi. I hih leh sepkhiakte uh i ngaihtuahna ua hong kipan ahihman in, i ngaihtuahnate uh Pathianthu toh kituak a i hei tam deuhdeuh di uh chihna ahi (Philippite 4:7 – 8 ; 1 Peter 2:11; Paunaakte 4:23). Eileh ei kilimsaklou a i Khros kipuak a, Jesu nung zui dia (Luke 9:23), khovel ah gimthuakna tampi pal a Pathian’ Kumpigam luut diing a sapte i hi uhi (Nnasepte 14:22).
Computer a khovel bawltawm ah hinkhua zatna chih chu i gindan uh toh le kituaklou himhim ahihdan i chiansemta di un ka gingta hi.
Technology in mihingte kizopna dausak:
Computer Technology nasatak in hong khang a, mobile internet bangleng mi nautang zat zoh di’n kimantak a muhtheih dia hong om toh kiton in, hinkhua zatdan leng chi tuam mahmahta hi. Social media tuamtuam leh online gaming-te ah hun kizangtam deuhdeuh a, huai a i sin leh muhte’n i lungsim leh omdante khekzou mahmah hi. I Laisiangthou sinsakna leh gingtute hin diingdan toh kituak thilte hilou a, khoveldan bang a ngaihdan leh omdante hizaw ahihziak in, gingtute adi’n pilvanna diing tam mahmah hi (Romte 12:2 ; 1 John 2:15-17; 1 John 5:19 ; Jakob 4:4). Mahni phone chiat a mimal khovel i neihte uh limsaklou zen a midangte toh kihouna leh kipolhna chihte kiam sot mahmahta ahihman in, kilainatna leh kitheihsiamna chihte bangleng dausak hi. Lockdown sung in online in kikhopnate bang kizang a, huaibang platform omte manpha mahmah ahihlai in, Biakinn sung a kithunun tak a taksa a kikhop khawmnate kan a manpha om hi’n ka theikei hi (Hebrute 10:5 & 24; Matthai 18:20 ; paunaakte 27:17). Tup leh ngim in phone leh gadget tuamtuamte koihkhiak zekzek i sin uh poimoh hi. I phone-te uh i etet kal un, i kiimkiang kikhawphawk lou a, ei hon poimoh midangte dahna, kipahna leh haksatnate phawkpih leh thuakpih diing in khongeingaihna leh lungluutna kiam a, kizopna leh kikholhkhawmna in hoihlam sang in siatlam manoh diing ahi chih i thei hi.
(Galatiate 6:2 ; Romte 12:10 & 15; John 15:12 ; Jakob 5:16)
“Khovel ka ning, Burma ah ka pem di!”:
Hiai kampau chiamnuihna sim in, khovel omdan leh dinmun ninhuaite kihepkhiaksan uthuaidan genna in zat in om sek hi. Innsung, khotaang leh khovel pumpi hitaleh, thil omdan chimtaakhuai leh lungkiakhuai sak ngoihngoih hun om tham hi. I va khektheih lah hilou, bawl thak theih lah hilou, dinmun leh thil omdan ningkitelhuai sa a mite leh dinmunte nawlkhiin theih himai leh chih lunggulhna neikhalou i om d’un i gingta kei hi. Huaibang a lungliapna leh kikhitna i neih chiang un, taikhiakna di leh kibukna di tuamtuam i zong zel uhi ; Zu leh khamtheih, numei-pasallam a thaangtatna ban ah, kum bangzah hiam apat in internet leh smartphone chihte hitaangpi hi. Ataktak gam a mite toh kikal bawlna leh dinmun nuamloute phut ngaplouna in, a lemlem thilte (adiak a internet) ah hon kibuksak ban ah, lungkimna leh lungtaina i zon gige uh leng dikloutak in hon pia hi.
Mahni kihutkhiak leh kitatkhiak theihna di, mahni ngei in sepkhiak a thil tangtunsak theihna di, mahni kia a kuamah poimoh lou a khosaktheihna, ei hoihsakdan a kibawlhoih leh kibawldikna di, ei lemtan dan a khosaktheihna, chimthawi di neih det utna, thathohna deihna chihte tengteng ziak in, mihingte tuam om utna leng lian hiai-hiai hi (Philppite 2:3 ; 1 Korinthe 10:24 ; James 3:16 ; Romte 15:2). Tuam om a, khovel leh mihing taktak leh dinmun haksatakte kitheih khembawlna ah lungsim leh khalam a khanna di himhim om di’n i ginta kei hi (Sam 133:1 ;1 Peter 3:8 ; 1 Korinthte 1:10 ; Ephesate 4:3 ; Kolossate 2:6-7). Hiai toh kizawitawn in, Kizopna himhim – nupa, lawmta, unau leh adangdangte – a haksat hun tam ahih chiang in, puahphatna di hiam leh kepbitna di’n mi kingiat theilou a, eimah in pan i laak ngai ahihman in, gim leh kisuuk peihlou in ki-om a, kizopna neih louh teelzaw chihbang avangkim in zaak di om om hi. Hiabang dinmun tam hiai-hiai ahihna ah, i Laisiangthou in hon sinsak bang a, i lungtang tengteng, i kha tengteng, i hatna tengteng leh i lungsim tengteng a Toupa, i Pathian i iit ding ahi a; Amah i iitna pen midangte i iitna leh khovel hoihloutak ah sianthouna a i latkhiaksak diing ahihna kisemkha lou diing kisuak hi (Luke 10:27). I ginna uh nnasep tellou a a si ahihdan thei i hihman un, pan laak didan i theih uh poimoh hi (Jakob 2:17 & 26).
Thukhitna:
Computer masawnna ziak in metaverse om lou inleng i hinkhua uah internet in sunglaitang mahmah a hihziak in, a tawppen a dia i geen theih ahihleh, internet a hun leh lungsim hichituak a i sen ngam ziak uh chu thil dang sang in mimal kibuaipihna mah hong hi ahi. Mimal kivawksanna (self-elevation), mimal kilungkimsakna (instant self-gratification) mimal chimthawina (self-entertainment) leh ataktak gam taihsatna (escape from reality) ahi. Gingtute ataktak gam a kikholhkhawmna leh kilimsaktuahna leh Pathian limsakna di natawm dausak gawp ahihna ah, Setan in computer technology leh internet siamtak a vanzat a azat ahi chih theisiam in, khongeingaihna, theihtelna leh khagah kidektheihnate gahkhiaksak poimoh diak hi (1 Peter 5:8 & Ephesate 6:2).
A tawpna di’n, metaverse leh sahkhaw dangte kibatna tak khat nei hi’n leng ka thei hi. Huaichu, ataktak gam a hinkhua buai leh haksa, natna leh gimthuakna khenlam a tuam omtheih nadan ahihman in, ei Khristiante gindan toh kikalh hong suak hi (John 14:17 & 16:13 ; 1 Timothi 4:1 ; 2 Korinthte 4:4).
Toupa’n simtute theihtelna leh kidektheihna hon pia hen, Jesu Khrist’ min in. Amen.
-Chingngaihlian Tunglut
November 12, 2022 / Article No. 30
(Laigelh toh kisai kupbeh nuam a omleh, Laigelhtu +919892316430 ah thuzaak theih diing hi)