ANN NGAWL THUUMNA

I chang tel pen, i Toupa Jesu Khrist kampau ngei ahi. ‘Ann na ngolh ua leh’ achi kei a, ‘Ann na ngolh chiang un’ a chi hi. Ann-ngawl Thumna avangkim a i neih diing i Toupa’n hon lamen ahi chih chiantak in i changtel apat atheih theih hi.

Jesu Khrist’ Hotdamna sang ihih leh, Ann-ngawl thuumna hun pen i Nungzui Hinkhua a mun poimohtak len ahihlam i chiamteh kuul diing hi. Ei deihtelna zang a ann-ngawl thuumna hun zang ngeilou ihihleh, khalam a i muh diing tampi ki chaan diing hi

Kal khat ah khatvei/nihvei hiam, kha khat ah khatvei/nihvei hiam, kha nih dan a khatvei hiam, kha thum dan a khatvei hiam, kumkhat a khatvei/nihvei hiam bek zaw ann ngawl thumna hun zang thei le’ng manpha law diing hi.

Matthai 4:2 a i muh mahbang in, I Toupa Jesu Khrist ngei leng gamdai ah sun 40 leh zan 40 ann-ngawl thuumna zang in ana om hi. Amah ngei inleng ana hih, ei, Amah nungzuite’n leng huaibang a hihdiing a hon lamen ahihziak in, i hih diing uh ahi. Ann-ngawl thuumna hun zangkha ngei nailou te’n leng, zang pan thei ta le’ng chih iki deihsakthu iki chah ahi.

Nasepte 13:2 a i muh mahbang in, Sawltakte’n ann-ngawl thuumna a neihlai un, Pathian’ Aw chiantak in za ua, a dotna uh leng chian tak in dawnna ngah uhi.

Nehemia 1:4 ah, Nehemia in Judate leh Jerusalem tanchin leh dinmun hoihlou leh vuallelhhuai tak azaak in, lungsim giktak toh suun a, veina lianpi toh Pathian mai ah kap in ann-ngawl thumna ana nei hi.

Pathian mai vilna, Amai a kiniamkhiakna leh Amah a dia kilatkhiakna ah chihtakna latsatna di’n ann-ngawl thuumna Daniel leh Ninevi khawmite’n leng ana nei uhi (Daniel 9:3 ; Jona 3:5) 

Ann-ngawl thuumna hun zangkha sek te’n, banghiam salam vai a nget, ngiat leh lamet i neih chiang un, huchibang hun Pathian mai ah i zang sek uhi. Huaidan diing himah leh, huaidan diing kia hilou hi. Salam vai a deih ngetna hiam, deih ngiatna hiam a ann-ngawl thuumna zatlouh diing chih hikeimah leh, Pathian mai vilna, A mai a kiniamkhiakna, khelh kisikna ziak a ngaihdam ngetna, kipahthu genna, A aw i zaak ut ziak, Amah biakna a chihtakna i latsakna leh khalam vai ziak khawng bang inleng ann-ngawl thuumna zang nasa sem zaw lai leng, khalam vualzawlna i tan diing uh thupi petmah diing hi.

May 21, 2020/NH_06