\"Pathian adi'n thil seelguk tuk thupina ahi a; himahleh thil zonkhiak kumpipate thupina ahi.\" - Paunakte 25:2 \"Hide and Seek\" kichi kimawl na chikhat, ei pau in \"Ki Buk Te\" i chih thoh uh hi. Hiai kimawl na tulai in naupang te'n leng nuam sa mahmah lai uhi. Ei singtangmite' a kimawl khalou i om lehleng i theih vek uh a gingtak huai hi. Tu i piching nung a i ngaihtuah leh huchitel in hiai kimawlna ah kipahna di om lou bang hi. Himahleh neulai khong in kipah in iki pahpih uh a, nuam leng i sa uhi. A ki seel te i va muhchiang in bang nuam kisa diak hi. A lehlam ah a kiseel lam a i pang khak chiang in muh/theih a i om ding ki lau mahmah in ki sel theih tawp in iki seel hi. Awle, hiai a tung a kimawl na tungtawn in sinkhiak ding zillai la leng i chi hi. Zillai ding point khat la leng chi a kon kisa a, himahleh hiai thu kon gelh lai in sinkhiak ding dang khat ka lungsim ah hong om beh hi. Tua tegel ahih leh:

• Pathian in ei a hihtheihna hon piak (a koih), a kiseel pen i muh chiang in bang ichi a?
• Pathian deihlouh thil i hih khak a, huai apat iki bawl dik pahlouh a, iki seel chiang in bang i chi om a? chih ahi.

Tuni'n zillai amasa pen en leng ka chi hi, adang khat pen hundang ah et ding in i sit ding. Mihing i tuam dungzui in thil hih theihna tuamtuam Pathian apat i tang uhi. Hiai hihtheihna i tangte uh leng ki bang vek lou hi. Khenkhat te midang sang a hih theihna sang zaw nei bang leng i om lotham uhi. Hiai bang thilhih theih na tuamtuam i neih lai un, bang ziaka midang a toh ki bang vek lou ade aw, Pathian in bangziak a ei apat thil hih theihna honpiak te zong ngailou a hon theisak pah mai lou ade aw? chi in dotna iki bawl ngei hia. Kei mahmah inleng tua bang dotna te atak in bawl kei mah leng lungsim ah kana nei kha zel hi. Himahleh hamphat huaitakin Pathian in hiai thil kiseel te Ama thupina ding a ei a hon koih ana hi zaw hi, huai te I muh khiat chiang in Pathian Thupina tampi i mu a. Ama itna i theihsem a i muhsem na ana hi zaw hi. Hiai bang thilhih theih na i muh khiat te'n Pathian hoihna, A thupina ei ah hon lang sak a, Amah toh ki naihsem na thupitak leh A thupina phuang zak na ding in a hon zang hi. Jesu'n leng gentehna in thu ana gen hi. Hiai gentehna thuguk theihtheih na chu eite'n leng i nei uhi. \"Huan, nungjuite a hongpai ua, a kiangah, Bangdia gentehna a thu gen na hia? a chi ua. Huan, aman a dawnga a kiang uah, vangam thuguk nou theih jaw phal ahi a, amau theih jaw phal ahikei. Kuapeuh a nei tuh piak behlap ahi ding a, a hau ding; himahleh, kuapeuh a neilou tuh, a neih sun leng laksak ahi ding. Huchi a hih jiakin a kiang uah gentehnain thu ka gen ahi; mu napiin a mu kei nak ua, za napiin a theih siam kei nak uh.\" - Matthai 13:10-13 Hiai khovel a i khualzin sung in Pathian in ei a hih theihna kiseel hon piakte zong mu thei a, hiai te tungtawn a Amah thupina pia a, i hinna a Toupa' mel langsak thei chiat ding in simtute tengteng hon vualzawl hen. - Thangginom Hangshing