John 3:16 in hon sinsak ahihleh, Pathian in khovel it mahmah a, A Tapa tang neihsun, Jesu Khrist ah huai itna hong semkhia hi. Pathian apan hiai thusuak ahihleh, thuchiam inleng zui hi; A Tapa gingta khempeuh mangthang lou kia hilou a, tangtawn hinna nei ding uh chih ahi. Hiaibang a siit leh behlap di omlou itna bukim' nnasep hamphatpihte i hi uhi. Khrist' hotdamna sang kichi i hih uleh, khongeingaitak a, tup leh ngim kichiantak nei a, niteng a Pathianthu sin leh hinpih dia kipekhia i hita uhi. Hotdam i hong hih nung unleng, i sa in ana ngeinasehsa sa utnate, mit utnate leh damsung thupinate (1 John 2:16) apat nikhat hiam, thakhat hiam thilthu in sianthousak pumluum kihi lou a, i gingtu hinkhua in a masawn kawmkawn a sianthousak semsem kihizaw hi. Piangthak chihziak a khial nawnlou di chihdan ahikei a, khelhna ziak a dahte leh khelhna huatbawlte i hong hih ding uh hita ahi (1 John 3:9 ; Kolossate 3:5 ; Romete 12:9). Niteng a mihinglui nengniam leh Setan khemna dou hinkhua i zat ding uh hong hita hi (Luke 9:23 ; Romete 12:1-2). Jacob 1:14 in hon hilh mahbang a, i utna lam chiat a hip leh piimang a omte i hi uhi. Sa utnalam zaw khelhna lam hi gige hi. Hiai thunuamlou hi mahleh, thutak ahihdan i kitheihmohbawl theih uh hilou ahi, Khrist hong pai nawn i ngak sung un.
Khelhna a suktuah a omte:
Hon suangtute Adam leh Evi in Pathian' thu manglou in ana puuksia ua, huai khelhna gu leh gau tungtawn a sihna dong i hong hita uhi (Romete 5:12). Khelhna toh i Nu sung a suktuah a om i hi uhi (Sam 51:5). Pathian dou ngam, Amah deihlou ngam, Amah mohpaih ngam, Meidiil zuanlel, genthei, chimoh, Pathian poimoh kisalou mikhialte leh Amah zon utna neilou zen a khelhna sal a tangte i hi uhi (Romete 3:7 ; Job 21:14-15 ; Galatiate 3:22). Samitna a dim i mihinglui pen omzia theisiam le'ng, JesuΓÇÖ nung i zuihna uah, pilvanna di'n hong phatuam ding hi. Mihinglui (Kolossate 3:9) genlang tam i hihman in, lungkiakhuai i sa kha thei hi, himahleh, i mihinglui pen Jesu Khrist ah siamthak a omlel ahihdan kitheisiamsak ut lua i hizaw hi (1 Peter 4:2 ; Romete 6:4 ; 2 Korinthte 5:17). PathianΓÇÖ itna Jesu Khrist ah hong kilangkhia tungtawn in khelhna thupha tawithei i hong hita ua (1 John 4:9-10), siamthakna hunlem piak in i hong omta uhi. Hitamahleh, hon thuzoh gigesa i pianpih khelhtheihna limsaklou leh Melmapa Setan khemna hat dou dia pan i laak det di uh hita hi (Galatiate 5:17 ; 1 Korinthte 10:13 ; Jakob 4:7). Mi nautaangte kia hilou in, saptuam makaite leh thaunilhna tangte leng Pathianthu a kiniamkhiak utlou samitna toh nungta den kihi vek hi (Romete 8:7). Hiaibang a hon thuzoh mihinglui hihna neite i hihman un, Setan in i hihna lui i sepkhiakdan pansan in, hon sual zelzel a, dou zoulou in i puukse nak uhi. Puuksiatna chiatchiat ah leng, midang tung a mei leh pa hihna (sexual) a gamtatsiatna in damsung daih ding in athuakte hi'n a takhialte hitaleh, puakgik guan tuak hi. Saptuam (denomination) in ordination a piak, saptuam mah in a nna a got (commissioned), thaunilhna tang Pathian nnasem pasalte lak ah amei-apa hihna toh kisai a huk leh bevenna (sexual immorality) ziak a puuksiatna iim vuallouh leh genlouh vuallouh in ei Singtangmi Khristiante khotaang ah leng hong kilaamkhe zelzel hi. Hichibang thil a hong tung ngeilou dia koih le i hikha maithei uhi. Himahleh, tung ngeilou di thil ahih sang in bangchik hiam chiang a hong tung di thil hizaw ahihdan i theih uh poimoh hi. Hiaibang thil hong tun chiang inleng, a takhialte puakgik guan mahleh, a thuakte (victim) liamna i haih theih uh hilou hi. A takhialte ahihleh, a tatkhelh ziak ua a gu leh gau thuak uh hilel ahi ua, a thuakte ahihleh, amau mohna omlou a, midang gitlouhna gu leh gau thuak ahi uhi. Takhialte awlmohna leh tungdingthakna i koih thupi kawmkawm un, a thuaktuteΓÇÖn damsung daih ding taksa, lungsim leh kha a liamna leh a pawn nasatak guan ahihlam haih lou in, pumpi a adamna ding uleh amaute i tunding nawn dingdan awlmoh zawk a i neih ding uh hizaw hi.
Pawngsual a omte'n a gu leh gau athuakna uh en ni:
1) Taksalam ah: Taksa a pawngsual leh pawngkhoih a omte'n zahmoh leh taksa mun tuamtuam ah liamna leh chikeh leh chipaat chihkhawng nei thei uhi. Natna hoihlou (HIV, Hepatitis B leh STD tuamtuam) khawng leng kilohsawn theih hi. Numei sualluih a omte adi'n deihlouh nau paina bang leng tun thei hi. Telsuimite gendan ngial bang inchu, naupang pawngsual a omte leh thanghuaitak a khoihkhak a omte'n kumlui natna (chronic diseases) khenkhat, lungphu hat (hypertention), lungtang natna (heart disease), thyroid buai, diabetes leh cancer nangawn neithei di hial in, agau thuak thei uh hi'n gen uhi. Hiaibang a taksa a soisakna ana tuak tengteng adiΓÇÖn (soisaklup a a omkei ualeh), a thuakdan uh a huaisiatdan dungzui hiam, amau lungsim paidan dungzui in, zu leh khamtheih-guihtheih khawng a kibualkhak chih bang baihsam hi. Laisinna leh nnasepna khawng ah leng dukdaktak a lungsim pethei ngellou inleng om theih hi. Akhente' adi bang in chu, nupa kaal a taksa a kipolhna natawm ah leng haksatna guan thei hi. Bangchibang in i chihleh, a taksa un hun paisa a sualluih a ana omna pen phawk thak zel thei ahihziak in.
2) Lungsimlam ah
Amau utna tellou a taksa a khoih thanghuai leh pawng sual a omteΓÇÖn amau kimohsa taangpi sek mawk uhi. Amaulam a huaibang a bawlsiat a aomna di ua banghiam hih uh hileh kilawm dan a mohsak khawng a ana om uh ahihziak leng ahi. Hiaibang a thuakte'n kingaihsiatna leh lauhthawngna lianpi nei thei uhi. Huaibang a thaanghuitak a aneu lai ua khoih a omte gen sek ahihleh, "Huaidan a aliante'n a neute a khoih di mawng uh sa kahi. Nuam sakei leΓÇÖng leng, a paidan mawng sa ing a bangmah gen ngamlou ka hi" bang chisek uhi. Tuabang naupangte'n a hong piching khiak chiang un, huaibang a kikhoih pen thanghuai ahihna bangtak in hon phawkkhia ua, a puaknat dibang tak un a khawnung in kiphawksak ngam pan uhi. Athuaktu himahleh uh, mahni leh mahni thanghuai kisa bang in om thei ua, mei leh pa a taksa a kigawmna bang huphulh bawl chih bang in leng om thei uhi. Alehlam ah lah, thanghuai kisak ziak in mei leh pa kikal ah thanghuaitak a kizatkhelhna bang nei thei uhi. Hiaibang a genkhe hetlou a mahni kia a ana thuakte adi'n lungsim natna tuamtuam (Depression, Anxiety, PTSD) leh mahni tangkhat kisakna (midang toh muangtak a kizopna neitheih louhna) leh lauhna khawng toh nungta den thei uhi. Mahni kingaihneepna (low self-esteem) khawng toh damsung in nungta thei uhi. Mahni kingaihneepna in amau mimal hinkhua ah masawnna di tampi a daal ban ah midangte toh akizopna tanpha uh buaisak ahihman in, a hinkhua uh ahoihloulam in saupi sukha thei mawk hi. Hiai liamnate mah pansan a Setan in nna sepna di hunlem ana suam zel thei lai hi. A thuaktute zumna di om hetlou himahleh, zumna leh mualphou kisakna liantak leng nei den ua, khotang hinkhua azat di bangtak unleng zang theilou uhi.
3) Khalam ah:
Sa, Lungsim leh Kha pumkhat ahihziak in, huaiteng thum lak a khat abuai leh adangtegel sukha lou thei lou hi. Mihing i hihna tak uh ahi a, pumpi a chidam manphatna kilatkhiakna khat leng ahi. Taksa a natna, liamna leh soisakna in lungsim sukha pah zel hi. Lungsim tungtawn a khalam thil kingaihtuah zel ahihna ah, mihingte'n gentheihna leh bawlsiatna i tuah chiang un, Pathian i bildoh pah zel ua, "Pathian in bangziak a hiaibang thil hon tuaksak ahi dia aw?" chi in. Hiaibang a miΓÇÖn thuaklua kisakna nei a kingaihsiatna thupitak in a pumtuam chiang in khalam ah leng bah pah zel uhi. Pathian in amau sese huaibang thil a tuahsak khawng theisiamlou leh pom theilou in, Pathian tung bang ah vuina liantak nei zel uhi. "Hiaibang thil huham ka tuahlai a Pathian koi ah om eita?", "Pathian in bang achia hichia hon bawlsete bangmah lohlou eita?" chih dotna haksa taktakte leh a dawnna leng nuamloupipi hong hi ahihman in, thil omdan pom haksa sa mahmah uhi. Pathian in amau humbittaak leh ittaak salou a koihna bang neithei ua, Pathian in banghiam a hihkhelh ziak ua A gawt hidan khawng in pom uhi. Hiaibang a pawngsualna leh pawngkhoihna tuakte'n amau leh amau niin kisakna bang neithei ua, amau niin akisak bang ua Pathian inle a niin a koih, ban ah limsak taak salou leh nawlkhin dan khawng in ngaihtuahna nei uhi. Amau leh amau mantaak kisalou lua leh lungsim ah naa lua uh ahihman in, Pathian muan didan le theilou ua, Pathian haamsiat dan khawng in kikoih sek uhi. Hin ningkitel leh lametna bei hileh kilawm khawng in kingaihtuahna nei uhi. A ginna uh buai mahmah thei a, Pathian in amau deihlou a, taisan dan khawng in ngaihtuahna dik hetlou neithei ua, Pathian naih theilou khawng in om sek uhi.
Mi nautaang in hiaibang a mei leh pa hihna a khelhna aneih chiang un, Pathian a kingalou mi khat gamtat chihdan in bangtan hiam in kitheisiam thei hi, himahleh Pathian nnasemte leh thaunilhna tang khenkhat hiaibang a puuksia a mitung a akhelhnate uh i zaak chiang un, azakha khempeuhte lungkiakna, lungbuaina, khasiatna, hehna leh dahna thuuktak in hon pumbuah hi. Thaunilhna tangte hiaibang a akhelhna un, saptuam mite lak ah taksa a thatdahna, lungsim ah mangbatna, dahna leh, khalam ah kiakniamna nasatak tun thei hi.
Sorkar daan leng zahtak ni:
Thuuktak a mahni ki-en ngamte'n i ki-et chiang un, samitna tampi muh di i nei ua, Saptuam heutute tel in midangte i en a lah, amaute leng samitna in ana vaihawm khum zel hi. Pathian lauhna leng nei nawnlou hileΓÇÖng kilawmtak in lam tuamtuam ah, i puukse thei zel uhi. Adiakkhol in, Pathian thaunilhte mei leh pa hihna a khial a hong om chiang un, police a ΓÇÿreportΓÇÖ hial di bang kiphal mawk lou hi. Athu pen akintheilam a bengdai leh aneutheipen a genfel pah i utdan uh ahi. Sorkar Daan in Pathian thaunilhte baanphasak lou mawk hang ua, Pathian mai ah bang i gen duam ah! Pathianthu mah pansan a ngaihdam pah di ahihdan uh leh amau tung a khamitna suah pah dia (a thuaktute leh athu ana zakha a ana pawnaa mahmah saptuammite) phutluihna khat om zomah hi. Hiai in athuakte' salam, lungsimlam leh khalam liamna thuksak semsem zaw hi. Sorkar daan in miteng huapkha ahihdan i pom uh poimoh hi. Mei leh pa hihna a khelhna pen sahkhawlam vai kia a khelhna hilou in, sorkar daan dungzui a leng daan bohsiatna thupitak ahihziak in, daan a kibotsiatdan dungzui a akituahpih gawtna leh liauna leng om hi. Pathian in leitung ah vaihawm thuneite aseh ahihziak in, amau thuthu a om ding in leng hon deih ahihlam kitheihmohbawl den di i duam (Romete 13:1)?
Ei singtangmite'n i innsung hi'n, innsung leh khotaang kisaina di'n Innsung Dongta pansan in i kivaihawm zel uhi. Innsung buaina hi'n midang toh kikal a buaina i neih chiang un, innsung dongta kikaikhawm in lem kigeel khawm pah hi. Adiak a mei leh pa a khelhna (sexual misconduct) a om chiang a, i tenna gam daan om pen paikan zen in innsung dongta vai ah kihoulemna om zel hi. Dangka bangzah hiam, Nam puandum leh Vok tuuk bangzah hiam in atuamdam theihlouh liamna ahihdan i kitheihkhem mohbawl di uh hilou hi. Pastor/Upa tel in hiaibang a mi a khelh chiang un, saptuam nnasem ahihleh a sepna uapan tawpsak in om ua, ngaidamna piak in om ua, sorkar daan toh kituak a bangmah liau leh gawtna omlou hi. Saptuam member maimai ahihleh thunun in om ua, innsung dongta vai mah in kihoulemna om hi. Police ah FIR (First Information Report) pawluut chihbang om ngellou ahihman in, takhialte tangkhial zel dia zalenna pia kihimai ahi.
Hiaibang a takhialte thaunilh ahih uleh, khalam pate leh humbittute ahihna uah, amau hihna leh mohpuakna lehlam ah, migilou hihna leh vaulautu hong suak chiang un, saptuam leh khotaang ah gen zoh vuallou di'n lungkiakna leh lungziinna tampi tun hi.
Khalam a pate khelhna ahihziak mahtak in Toupa Jesu Khrist in a sisan a aleisa saptuamte thuuktak in liamsak leh bahsak hi. Hiaibang a Belampu Ngia asuak chiang ua, belaamte'n bitna koi ah zong di uh eita?
Pathian Sianthouna koppih dite:
Jesu Khrist ah, Khasiangthou a thop i hihman un, khemnate douzou zel dia lamet i hita uhi. Sa a omlai himahle hang Kha a thop i hihman un, Kha a om dia thupiak i hita uhi (Galatiate 5:16-17). I samitna toh hong ton utnate kilhden dia thupiakte i hi uhi (Galatiate 5:24). Pathian in A itna asuah didan tuam leh sangzaw leng omnawn tuanlou zen a, A Tapa Jesu Khrist tawn a hong tatkhiakte i hi uhi (Hebrute 10:26). Itna i chih phawkna kia hilou a, nnasep in leng zui gige hi. Pathian ngei leng itna ahihman in, Amah hihna mah melsetak a hekkawi a, meltuam suah Setan ahi. Huaiziak in, hamse dong mihingte'n itna siangthou tak mai chu amau khelhna leh nitdan dungzui in phawk ua, sepkhiakna inleng zui zel hi. 1 Korinthte 13:4-7 in itna omzia gen a, huaite ahihleh, a gige a sepkhiak di'n gen hi. Huchi ahihlai in, Pathian thaunilh mei leh pa hihna a khial inchu, Pathian itna semkhelou in, SetanΓÇÖ vanzat suak in Setan mah in a hekkawisa pen semkhia chihna ahi.
Thukhunlui khawng ah le Pathian itna leh humbitna (kulhbang) kiton gige hi (Ezra 9:9 ; Sam 68:5, 91:14). Saptuam makai khenkhat in Setan hekkawi itna pen deihtakna leh itna thaanghuai suaksak a, humbit lou in, liamna nasatak tun zaw uhi. Chiamteh dia hoih ahihleh, Pathian thaunilhte tel in kuamah khemna apat bit (immune) ki omlou hi. Hiai thudik theikawm a, Khrist a siamthak leh dembei ding a Pathian in hon sapna i sepkhiak zel ding uh ahi. Huaiziak a sa leh kha buahna tengteng a kipan ei leh ei i kisiangsak ding uh leh Pathian laudan siam kawm a sianthouna hihbukim ding a sap i hi uhi. Sianthouna lou a kuamaΓÇÖn Toupa mulou di ahihziak in (2 Korinthte 7:1 ; Hebrute 12:14). Jesu Khrist' hotdamna tangte i hih uleh, siamthak hita i hihman un, diktatna sal dia kipekhedite i hita uhi, huai in sianthouna hon tun ahihziak in (Romete 6:19 ; Ephesate 4:24).
Kimohpuaktuahna poimoh:
Kimohpuaktuahna (accountability) i chih gingtute kikal ah poimoh mahmah hi. Hotdamsa himah leΓÇÖng, i samitna uh kilhlup di om gige ahihlam i kiphawk ban uah i kiphawkpihtuah di uh ahi. Kum sawtpi Khrist nungzui ana hita mahle'ng, mei leh pa hihna a khelhna khawng a puukthei ngei nawnlou di a kikoih mawk lou a, i kivengtuah di uh ahi. 1 Korinthte 6:18 in, ΓÇ£Kingaih taisanun. Mihing thil hihkhelh chiteng sapum pawlam ah ahi; mingaihhat in bel amah sapum tung ah thil a hihkhial hiΓÇ¥ achi hi. Adiakkhol a, saptuam makai khenkhat puuksiatna khawng iim vuallouh a hong kilatkhiak chiang in leng genkhiak khawng i kiphal kei nak uhi, himahleh Bible inchu mial thil hihte phoulaak dia hon deih ahizaw hi (Ephesate 5:11). Mial thil hih phoulaak ding chileΓÇÖng Saptuam (denomination) minsiatsak di lau i hikha thei uhi himahleh i hih di thei a i hihkei uleh Pathian mai a khial i hihman un, huai i lauh zawk ding uh ahi (Jakob 4:17). Mihing mai ah kiseel lengle Pathian mai ah bangmah kiseel zou tuan lou hi (Paunaakte 15:3 ; Job 3:21). Hebrute 4:13 in leng, thilsiam peuhmah ama mitmuh a lang lou himhim a-om kei; i tanchin tutna dingpa mitmuh ah bangkim vuaktang leh kihongsa ahihdan hon hilh hi. Denomination min siat sang a Toupa Jesu Khrist minsiatsak a om di i puaknat zawk ding uh ahi.
Sawltak Paul in, 1 Korinthte 10:12 ah "Huaiziak in kuapeuh ding a kingaihtuah pilvang hen, huchi lou in zaw apuk kha ding hi" chih taihilh lawkna pen ngaih mahmah hong suak hi. Hiaibang a puuksiatna hunte ah, mahni ki-enchian chiat in, pilvangtak a i TanpaΓÇÖ nungzui i hihlam kiphawk kawm in, khamite kimohpuaktuahna poimohna kilatkhiakna dan in ngai ni. Pathian hehpihna in kisiik dia hon sam kia hilou in, hon bawlhoih thak dia leng i kipumpiakkhiakna mah hon ngiat ahihdan i theih uh kuul hi.
Thukhitna:
Thil diklou leh khelhna i genkhiak chiang a, mi gensia kihi pahlou ahi. PathianΓÇÖ Thutak pansan a thudik genkhiak i hih di mawng uh ahi.
KhristianteΓÇÖ khovel a minthang mahmah Ravi Zacharias, Steven Lawson leh Phillip Yancey telawi leng huk leh beven ziak a puuksia ana himaimah uhi. Amaute'n a thugente uleh a laibu gelhte uh tungtawn in Khristian tampite khalam ah ana chawm mahmah himahle uh, hiaibang a gamtatsia a ana puuksia uh ahihman in, a ministry uh bangmah lou suah uhi.
Puuksesa khovel ahihman in, piangthaksa himah le'ng, hiai khovel a i omsung siamthakna leh sianthouna bukim tadihlou ding ahihman in khelhna in hon delh tawp ngeilou ding hi (Genesis 4:7). Taksa thak (Philippite 3:21) piak a i om ma chu, hiai khial thei leh khial veu taksa kihhuai pu kawmkawm a Khasiangthou in ei a sianthouna nna asep delh tuntun diing a nasatak a panla i hihman un thil awlsam hilou hi (Philippite 2:12). Jesu Khrist tatna saangte ading in nungzuihna hinkhua zaw kisiikna hinkhua leh mahni kilimsaklouhna hinkhua ahi chi i theih uh poimoh mahmah hi (Matthai 3:8 ; Luke 9:23). Khongeina tak leh pilvangtak a Khrist mitsuankawm (Hebrute 12:2) a hinkhua i zang i kichih kawm kawm a le khial veute i hi uhi. Sakeibaknei humham bang a nek diing zawng a vialvaak (1 Peter 5:8), Melmapa nnasep leh thaangkam ah awk kha zel i hihman un, vakhu bang a nunnem i hihkawm ua gul bang i pil ding uh ahi (Matthai 10:16)
Buaina (problem) leh khelhna (sin) himhim iim mang sang in, ahibangtak in gen khia in, hoihtak in saifel (resolve) thei zaw leng chu ahoih pen hi di ahi, i khelhna in hon zongmu teitei ding ahihziakin (Nambars 32:23).
