Bible Tang: Jakob 4:8 Pathian naih unla, aman a hon naih ding. Nou mikhialte aw, na khutte uh silsiang un. Nou lungsim thuahnih neite aw, na lungtang uh siangthousak un.
Thumapi: Jakob, sa dan ah Jesu sanggampa’n gimthuakna ziak a Israel nam 12 dalhzakte kiang a a laikhak ahi. Laikhaktu in a hihna kithei chiang mahmah a, hichi’n hong kipulak masa hi. Jakob, Pathian leh Toupa Jesu Khrist sikha in, nam 12 dalhte chibai a buk hi. Hihna kitheichian loute’n a pai dingdan uhleh a sep dingdan uh buaipih mahmah sek uhi. Gamgi khen didan kichian nei thei taktak lou uh ahi. Jakob, a hihna a buailou, Jerusalem a Saptuam makailian khat in, gimthuakna ziak a saptuamte bawng-ek dengdalh bang mai a mun tuamtuam a taizak a omte ahihna uh kimangngilh a omte kiang ah a laikhak ahi. A omna mun chiat ua, a haichi tang bang a poukhia a, selkhe ding in lametna lianpi a neih lai in heutu makai ding gina omlouh ziak hia ama ngaihtuahna bang zoulou in gingtute ginna a lungvei, khovel rong kinuh bang gawp in om uh a, Pathian gamlaat in om uhi. Amaute hanthawnna leh ginna a ding kip ding a deihna in hiai bang laikhak amau a ding kia hilou gingtu tengteng (General epistle) a ding in hon gelh hi. Jakob laibu, Jesu’n mualtung a athugente toh kizuul mahmah leh niteng hinkhua a zuihpahpah dia hoih ngen ahi. Tutung in ahihleh I thupi pansan in points nih kia sau lou chikchik in kikum leng chi’n ko’n kum hi.
- Nou, mikhialte aw, na khutte uh silsiang un:
Pathian toh kinaitak a I khosakkhawm theihlouhna leh ikinaih theihlouhna uh ahihleh ei ah khelhna om ziak ahi. Ei ah khelhna in Pathian toh kithuahkhawmna(fellowship) hon susia a, hon kinaihsak thei kei hi himahleh I kizopna pen (relationship) kitan chihna bel hipahlou in. Pata, a tapa thumanlouh ziak in kihoutheilou ua, himahleh a ta hihna a bei tuanlouh bang in. Pathian toh kithuahkhawmtheih louh pen I khalam leh salam a ding a thil poi leh lauhuai mahmah ahi. Pathian toh kigamla te lungkimna, kipahna, tawldamna, khamuanna, nei thei taktak lou uhi. Pathian gamlat te tuh Jonah bang a buaina khukpi lam manoh a tumsuk deuhdeuh uhi.
Tangtawn Pathian in a Jawlnei tungtawn a Isarelte kiang a a gen bang in nang leh kei kiang ah hon gen hi, “Na khut uh na zak chiang un leng ka mit k’on humsan dia: ahi, tamveipi na thum chiang un leng ka ngaikhe kei ding: na khutte ulah sisan in a dim ngal a. Kisil unla, kihihsiang un; ka mitmuh phaklouh din na thilhihte uh a gitlouhna koihmang un; gilou hih tawpta un: Thil hoih hih kisinta unla; vaihawmna diktat zong un, nuaisiahna thuakte panpih unla, pa neiloute vai hawmsak unla, meithai thu gensak un” (Isai 1:15-17).
Khut niin, sisan suahna khut, guktakna khut, nekgukna khut, khelhna sepkhiatna khut toh Pathian pahtawi lailai ding I diam? Na khut in Pathian toh hon kigamla sak ahihleh Jesu sisan in silsiang inla, Khrist Jesu a nna hoih sem dia siam a I om bang in nna hoih semta ni. Khut niin in khalam damlouhna, phakna hon tun kia hilou mahni sapum a dia hoih hetlou natna, sihna tuntu ahi chih i theihsa ngoihngoih napi a la teitei, dawn teitei, kap teitei, semkhe teitei, sawk teitei nawn kei ni. Na khut taklam in a hon hihpuk leh, tankhia inla paimai in; na sapumpi a Gehenna a paisang in, na sapum a hiang khat manthat nang ading in a hoihzaw hi (Matthai 5:30).
- Nou lungsim thuahnih neite aw, na lungtang uh siangthousak un:
Lungsim thuahnih (double-minded) nei in a gen ut a katheih ahihleh lungsim bulbal neilou, lungsim det neilou, ginna kip neilou, ginlelh hatmi, zulhzau. Jakob in hiai bang mite hichi’n ana gen hi. Ginglelmi tuipi kihot huih mutleng leh sep bang ahi. Huchibang mi’n Toupa kiang ah bangmah muh kiging kei hen. Lungsim det neiloumi a thilhih tengteng ah a kip kei hi (Jakob 1:6-8). I Toupa Jesu’n hichi’n ana gen hi. “Kuamah in heutu nih nna a semkop theikei; khat hua in khat a it ding; ahihkeileh, khat gum in khat a simmawh ding. Pathian leh sum nna nasemkop theikei ding uh (Matthai 6:24). Gendan dang khat ah Pathian leh khovel it khawm, Pathian nna leh setan nna semkhawm chihna ahi. Gingtu tampite khosak dan ahi. Tulai gingtu tamtak te tuh duhamna sikha a I lut uhi. Sum leh pai zonna a siang leh sianglou khenlou, a hoih leh hoihlou khenlou, muhna ding ahihnak leh hoihsa vek, huailut pompom khami dandan a om zaw mah. Pathian in a kam apan hon sekhe khong ding a hon gamlat ding chih lauhuai mahmah hi. Bawlthei leh hithei kisa in om mahle hang I kiakna ding step khat lel in sam ahi chih kuan a thei a.
Jawlnei Isai in, Toupa’n, hiai mite’n a hong naih ua, a kam un leh a muk un a hon pahtawi ua, himahleh a lungtang uh kei a kipan in a gamla uh (29:13). Lungtang a angkawmsan a, lungtang niin leh kihhuai a I om in tuh Pathian I mu ngei kei ding uhi (Matthai 5:8). Lungtang kembit ding, khovel rong bang thei lak apan kepbit ding ahi. Paunakte 4:23, “Thanopna tengteng toh na lungtang kem in; huai a kipan lah hinna tuinakte a luang ngal a.”
Hebrew Bung 11 a ginna a mihangsante bang a ginna kiptak nei a, a pawtsan gam uh lunggulh leh ngai nonlou in, sawtlou chik daihding khelh nopsakna sang in Pathian min a gentheihna ana teel zaw ua amau a khelhna omte ana koihmang in kitaitehna kuhkaltak in ana tai uh a, ginna ana letkip paisuak bang un enle lungsim thuahnih neilou in, zulhzau lou in lungsim munkhat(single-minded) pu I lungtang tengteng toh Jesu nung ana zui in Jesu ah I ginna ana lenkip paisuak ni.
Thukhitna: Pathian naih ni, Pathian apan I gamla om lota uhi. I omna mun, I dinna mun, mun lauhuai ahi chih phawkni. Denchiang a kipekkhe zoulou a buaisetak a I om khak ding maban ahi chih thei ni hang! Pathian mai ah I khelhna i im zou kei ding, i khut in bang a sem a? i khut a bang rong abaang a? Na lungtang a han kihong bang mai ahi hia? Pathian I gamlat chiang in mahni dik kisakna, hoih kisakna, pil kisakna, kisaktheihna in i pumdim a I khalam mit a taw hi. Pathian toh ikinaih chiang in bel mukni pu ihihlam, khut sianglou ihihlam, leh lungtang sianglou ihilam ikithei a, panpih ngai ihih dan ikithei a, Pathian naih lou ngal damna ding omlou, Pathian naihlou ngal hinna ding om lou chih I ikithei hi. Asaph in, Ngai in, nangmah gamlat a omte a mangthang dek ua: a hon angkawm san peuhmahte na hihmangta ahi. Kei ading in bel Pathian naih a hoih hi (Sam 73:27, 28).
Pastor M. Thangkhenmung
January 24, 2022