Bangkim A Kipahna

April 9, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 99na (April 9):
Mihingte kizopna a poimoh mahmah chu kithuzaaktuahna ahi. A nuam leh nuamlou, dahna leh kipahna, poimoh leh deih chihte kigentuah poimoh mahmah hi. Huai kithuzaaktuahna a omlouh chiang in i ki iitdan, kikhotuahdan, leh thil kisepsakdan natawm i poimohbang a kipiak louh hiam, ki piakkhelh thil baihsam ahi. Kithuzaktuahna a hoihlouh chiang in, ei gingtatthu lah dik hetlou suangtuahna (assumption) bawl a om pahpah inchin, huai suangtuahna dungzui a khosak baisam mahmah nawn hi. Huaibang a midangte lungsim di leh dawn didan (response) i na bawlsek te diklou taangpi ahihman in, amau thuzaak poimoh lawtel hi. Pathian toh kizopna hoihtak i neihna dia le kithuzaaktuah poimoh petmah hi. I haksatna, i thuakna, i dahna, i kipahna, i deih leh poimohte Toupa i thuzaak gige diing ahi. Huchia eilam i va kigen chiang in, Toupa’n Amah deihdan leng Athu pansan mah in bangchichi hiam in hon theisak a, ahuchilouh chiang in Amah mah in dinmun leh thil omdan hon kheksak zel hi.
Amah thuzaak lou a Amah lungsim di khawng bawl a, huai dungzui a Amah thumanna khawng nawlkhin a, ei theihsiamdan khawng a haihuaitak a i om chiang uale, theihtelna a hon pii ngetnget ziak in Pathian kiang kipahthu gen ni. I thuzaakna (thuumna) hoihtak a vaidawn leh ngaikhe gige Pathian tung ah i kipaak petmah hi.

Laisiangthou kawkmuhna: Paunaakte 18:2 & 13 , 15:28 ; James 1:9 ; Sam 19:14 ; Matthai 7:7-8 ; Phillipite 4:6-7 ; Isai 30:21 & 58:11.

April 8, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 98na (April 8):
Mihingte lungsim paidan suutte pawl in, tawlnga lou in suut tou zel uhi. I Laisiangthou a Sam gelhtu inleng giatna ah, "Mihing bang a hia, huchi tel a na limsak? Mihing tapa leng bang a hia, huchi tel a na veh?" ana chi hi. Lauhuaipi leh lamdangtak a bawl i hi ua, khuak thupitak toh bawl i hi uhi. Amah pahtawi dia hon bawl himahle hang, hon kolbuh bawl lou in, i deihteelna uh leh i ngaihtuahnate uh zang a, Amah Pathian thupi leh lamdang a kipuang dungzui a, Ahihna suut leh sin a, Amah be diingte i hi uhi. Himahleh, khelhna ziak in i lungsimte un ei utlam chiat ngaihtuah a, i pilnate un hon piimang a, Amah lou lamlam kidelh hi. A hotdamna i san nung inleng, khialthei taksa toh khelna dou gige i hihman un, mi adi'n ei peihna tan kan in kibuai peihlou a, mi dahna le ei kingaptan kan kidahpih peihlou a, mi kipahna leng ki haza hi. Huai ban ah, mi Pathian neihdan natawm haza thei leng i om uhi. Mi dinmun leh hong kipatna ziak khawng a huphurh leh muhsit Christian i hih uleh zaw, kivelthakna diing tam mahmah dia, i innvengte iitna ah kalsuankhiak kisaan leng poimoh diing hi.
Thuumnate leh kikhopnate ngaipoimoh mahmah lah mahni lemtangdan tan lel a Khrist a sanggamte iit i kichihlai ua leng, zahngaitak a thil hoih i hihtheihna dia hunlem hon bawlsak thathak ahihziak in Pathian kiang kipahthu gen ni. Pathian dohzohna leh lungkiak theihlouhna ziak inleng A tung ah i kipaak petmah hi.

Laisiangthou Kawkmuhna: Sam 8:4 ; Sam 139:13-14 ; 1 John 4:20 ; Mark 12:31 ; 2 Peter 3:9 ; Romte 15:15.

April 7, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 97na (April 7):
Hiai khovel hinkhua a bei toh kiton a ei toh kisai bei hileh chu, i sihnung di khual ngai lou dia, i suulnung leng khual ngai lou diing hiven. I suulnungte bang zaw, i iit leh ngaihte leh midangte adia gimna guantu lel suak a, ei toh kisai angaihtuahna ua omchiang a poisakna guantu lel i hihleh, i damsung hinkhua phatuam ngellou a zangkha kihi chihna ahimai diing hi. Huai ban ah, taangtawn a sitheilou kha nei i hihman un, i taksa sih nung chiang in, i kha si tuanlou dia, ni khattei Pathian mai ah i ding dia, hinna laibu a i min a kigelh leh gelh lou dungzui in i taangtawn mun diing (Meidiil ahihkeileh Vangam) ah sawlpai in kiom diing hi. Hiai thil thutak, khatveitei i maituah diing uh ahihman in, khophawk leh deihteel thei a, i taksa a damlai mah a, taangtawn i zatna diing mun i bawlkhawl poimoh hi. Ei Khristiante'n ahih leh bel, Sawltak Paul in agen mahbang a, i sih leh punna ahihna ding in, i hinna Khrist ah kibulphuh a i zattheih uh poimoh petmah hi. Hampha i hihdan uh phawkthak in, apoimohdan a panlaakna ah kibuaisak posa kei ni.
Pathian in eite suahtakna di'n siit khat leng neilou in hotdamna nna thupitak Jesu Khrist tungtawn a A sep ziak in Pathian kiang kipahthu gen ni. Khristian khotaang leh innsung a piangkha i hihman un, hotdamna tangkha dia dinmun bawlsak a i om ziak un Pathian tung ah i kipaak petmah hi.

Laisiangthou kawkmuhna: Hebrute 9:21; Sam 78:4 ; 2 Timothi 2:2 ; Kilaakna 3:5 & 30:15 ; Philippite 1:21 & 2:7; John 15:16.

April 6, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 96na (April 6):
Hamsiatsa khovel ah, kuamah kiang a genkhiak ngamlouh mimal khelhna neilou kua i om ua? Bangchituk in kisiik in, bangchituk in poisa le'ng le, hun paisa a lehkik a, va khekkik theihlouh ahihziak in damsung puakgik hong suakta hi. Pathian hing bete leh Pathian phawkkhaloute natawm hitaleh, khelhna leh thil diklou chih theihtelna kinei vek hi. Khelh ziak a, mahni kisiamtanlouhna (guilt) in mihingte ah tawldamlouhna, khamphangna leh ngaihtuahna kibichihna hon tun ahihman in, hinkhua zatdan leng tawlhuai mahmah thei hi. Ei Khristiante adi'n chu, i phawkdenna (memory) ah i khelhna mang ngeikei mahleh, ngaidam leh siamtan a ki om ahihziak in i khelhnate pomtheihna a navaakna i ngah ban ah, Pathian ngaihdamna bukim leng kipom a, hinna tampi leng kineitheita hi. I theih dia poimoh nawn khat ahihleh, i khelnate i mangngilh theihlouh ziak hiam, poi i sak luat ziak hiam leh agau i thuak ziak a Toupa’n hon ngaidam lou hilou ahi. Pathian in hon ngaihdam leh, siit khenkhat neilou in, avek in hon ngaidam siang sitset hi. Toupa hoih hi.
I khelhnate uh Pathian in hon ngaihdam ziak in, mohpaihna hinkhua hilou in, siamtansa hinkhua kizang thei ahihman in Pathian kiang kipahthu gen ni. Puakgik bei kei mahleh, Pathian in hon ngaihdam ziak in Amah toh ton a hinkhua i zattheih ziak un Pathian tung ah i kipaak petmah hi.

Laisiangthou kawkmuhna: Genesis 3:17 ; Kilaakna 2:5 ; 1 John 1:9 ; Hebrute 8:12 ; Sam 103:12 ; Danial 9:9 ; Romte 5:1-11.

April 5, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 95na (April 5):
Hinkhua a haksat luat chiang in, chihmoh ziak in sih utna kinei mawk hi. Khelhna ziak a kithuak ahi a, khelh man sihna leng hiai khialsa a piang taksa leh lungsim in dit pah sawm ahihziak leng hikha di'n ka gingta hi. Mihing ihihna uah, hiaibang kikhit utna lungput i neihte uh thil hithei mah ana hitham a, himahleh hiaibang lungput i neih chiang un, Toupa Jesu Khrist in khelhna man tengteng din khin vekta ahihdan i kiphawksak thak gige uh poimoh hi. A diktak in zaw, sih ut kihilou a, nat thuak haksa sa, puakgik pawlah leh dinmun pom theilou i hizaw sek uhi. Hiaibang lungput in nasatak a i lung kesak ahihman in, dinmun haksatakte phutna di'n tha leng kila theilou sek hi. "Sih ka ut!" chi ngamloute'n Vangam ngai i kichi zel uhi. Dinmun ahoih chiang a si utlou a, Vangam le ngai tuanlou i hih uleh, dinmun asiat chiang a huaibang lungsim nei i hihdan uh chiang hi. Huaiziak in, hun haksa ah dinmunte ahi dandan a pom in, Amah, i Pathian ah kingak kinken sin poimoh hi. Toupa'n hon piina lou leh hon phalsak louh himhim kituaklou ahi chi lungtang a vom kip in, Amah muang ni. Kilawmtak a A thupina hong semkhe diing ahi.
Hun haksa ah Toupa’n hon taisan tuanlou ban ah, Amah a kingak hon sinsakna leh Amah hong kipahtawina hisek ahihman in A kiang ah kipahthu gen ni. Haksatna ah kingaihniamna hon sinsak ban ah, A iitna leh kepna nasatak a hon phawksak ziak in Pathian tung ah i kipaak petmah hi.

Laisiangthou kawkmuhna: Isai 21:3 ; Jona 4:8 ; Job 6:8-11 ; Sam 34:19 ; 2 Korinthte 4:16 ; Hebrute 13:5 ; Romte 8:28 ; 1 Korinthte 12:9.

April 4, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 94na (April 4):
Khemna huihpite hon nung zel a, gimthuakna tuipi kihawt chi tuamtuam in avangkim in leng hon nawk zel hi. Eimah deihteelna i zat diklouh chiang a i thuak thukhat hileh, midangte deihteelna zatdiklouh ziak inleng i thuak tham uhi. I theihsa mahbang un, ei gingtute chu, "K'on taisan ngeikei di" chi a thu hon chiam Pathian toh ton i hi uhi. A tapa Jesu Khrist sisan a hon leikhia Pathian' Kha in hon makaih ihi uhi. Khovel mite theihsiam thil hilou mah ahihman in, i dahnate lak a lungkimna i muh bangleng thil lamdang (miracle) mahmah ahihdan haih hetkei ni. Mihingte hihtheih ban a thil thupitak mu a tangkhate i hihman un kipahhuai sawnsawn hi. Haksatna tuamtuam leh anuamlou tuamtuam i tuahte uh bangleng, ahihna bangtak in omzeneitak in sinna leh Pathian naihna in i zang zel thei uhi. Thil omdan hi'n i iitte omdan mihinglam ah theisiam zou lou in, lungbuai a i om hun le om mah tham mahleh, lungbuai ngeilou leh ahih di kichiantak a thei leh a hithei Pathian lam en tam in, Amah muan kisin le'ng, a hunhun in i mangbatna, dahna leh lauhthawngna te apat kisuakta a, Amah muanna ah lungmuang leh lungkim in ki omthei zel hi.
Hehpihtu leh hehnemtu Pathian nei i hihman un, A kiang ah kipahthu gen ni. Mihinglam a beidotna leh a tong khong tunna hun leh mun ah kipahtawi Pathian i neih ziak un, A tung ah i kipaak petmah uhi.

Laisiangthou kawkmuhna: Matthai 28:20 ; Hebrews 13:5 ; 1 Thessalonikate 5:18 ; 2 Korinthte 1:3 ; Sam 147:5 ; Isai 40:28 ; 1 Peter 1:6 ; 2 Korinthte 12 :9.

April 3, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 93na (April 3):
Hotdamsate adi'n chu, thil dangteng sang in, Pathian toh niteng a ton i buaipih pen diing uh ahita hi. Thil dangteng sang a i hih masakpen leh i koih thupipen di chu, buaina, haksatna hun natawm ah leng Pathian' thumanna ahi. Pathian nei in nei kei taleng le buaina pal thouthou di kihi ahi a, ei Pathian neite adi'n chu buainate tutna di kinei ban ah, buainate hon phawkpih kinei ahihziak in, khamuanna leng kinei hi. Mihingte'n buaina i neih himhim chiang un, ngoh di kizong sek a, mi i ngoh kei uleh, ei leh ei i kingoh ua, dinmun i ngoh kei uleh Pathian i ngoh zel uhi. Ngohna i chih mohpaihna ahi a, Setan a kipat hong kipan ahi chih thei in, huaibang hun ah huaibang ngaihtuahna leh lungput omte i na nawlkhiin teitei zel diing uh ahi. Huai kawm in i buainate pen Toupa’ iitna in a huamkhak sung mah a tuak i hihlam uh thei in, A hutkhiakna leh huhna i ngiat kawmkawm un, kuhkalna leh Amah muan sinna ahihdan i theih uh leng poimoh hi.
Pathian toh Jesu Khrist tungtawn a kizopna diktak i neih leh, i buai hun chiang a leng kisuanglah hetlou a panpihna ngen dia A hehpihna mangtutphah zuan thei i hihman un Pathian kiang kipahthu gen ni. Bangchituk in buai in, tuahsia in, thuakna in dim le'ng le, Toupa iitna a kipat bangmah in hon khenthei lou ahihman in Pathian tung ah i kipaak petmah hi.

Laisiangthou kawkmuhna: 1 Peter 1:6 & 12 ; Matthai 10:38-39 ; Matthai 6:33; Kilaakna 12:10 ; Hebrute 4:16 ; Romte 8: 38-39.

April 2, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 92na (April 2):
"Ka hihtheih sunsun, kon na thuumpih di" i kichisek uhi. Kal suan khiak theih zen pi, kal suan lou zen a thuumna piibawl i hihkhak uleh zaw, ei leh ei kikhem lel i hi diing uhi. Thuumna i chih thil thupitak ahihlai in, i thatdahna leh kithunun zohlouhna suanlam remchang dia zang suk mawk sek i hihleh Pathian khem zou tuanlou diing i hi uhi. Thuumna loungal i hihtheih dang omlou taktak mah ahihleh bel, i thuumnate uh tungtawn in bangchi hiamkhat in kikhekna eilam natawm ah leng om diing hi. Himahleh, i hihtheih omte i hih utlouh ziak a thuumna suanlam i hihleh, thuumna pen "hihtheih susun" chi a neptak suah i hihkhak diing uh lauhhuai hi. Bangteng hileh, lungtang enchian Pathian in i lungtang mah hon en chian ahihman in, kingaihtuah thuuk zek in, Khasiangthou in theihtelna hon piakdan in kal suankhe le'ng, Toupa’n mai ah kizumlou diing hi. Ginna i chih nnasep tellou a si ahihman in, nnasepna di'n eilam kilimsaklou a i Khros kipuak a Toupa Jesu Khrist nung zui diing i hi uhi.
Anuamlou khenkhat maituah di kingaplou ziak a ei lemtan bang a i hondampa nung zui i kichih chiang ua le, ginomtak a Amah deihlam a lungtang hei dia hon pii zel ziak in Pathian kiang kipahthu gen ni. Khros lampi nuam hetlou leh naa mahmah himahleh, Toupa Jesu Khrist in a zuihsa u zuih uh hilel ahih ziak in Pathian tung ah i kipaak petmah hi.

Laisiangthou kawkmuhna: Jakob 5:16 ; 1 Timothi 2:1 ; Ephesians 6:18 ; Luke 9:23 ; Sam 145:18; Jakob 2:14-17 & 24 ; 1 Thessalonians 5:17 ; 2 Timothi 1:7

April 1, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 91na (April 1):
Midangte thuakna, taksapna, natna leh suunnate i theihsiamdan khat uh om mahleh, eimah in i tuah keileh ahidantak theih haksa ahihziak in, amau dinmun a i va kibulhtuah theih leh, a dinmun uh theihsiamdan khat hong omthei pan hi. Mi i va theihsiamna di'n le eilam ah buaina venglou nei i hihleh leng mi adia va kisuuk leh mi va buaipih di'n kiomtheilou hi. Hiaidan a eilam a buaina suk fellouh (unresolved issues) i neih leh, ei sang a mi a enzaw di leh ei sang a mi koih poimohzaw dia thupiak a i omna uh sepkhiak didan om khollou dia, mi adi'n kiphatuam theilou diing hi. Mi adia phattuamna leh Pathian' iitna mite tung a latsakna mah hiven maw nna hoih sep dia thupiak a i omna i sepkhiakna uh? I innvengte ei leh ei i ki iit bang a iit dia thupiak a om i hihna uh i sepkhiakna hong hinawn hi. Khrist a i sanggamte i theihsiamna di'n chu ei pen kilimsak lou a i om theih leh, midangte kithuakpih, kipahpih, kidahpih, kinatpih leh kilungkimpih thei pan hi.
Buaina nei ngeilou a, khamuang den hiam leh kipaak den a omthei gingtu kuamah omlou i hihman un, hiaibang hunte a kithuah leh kithuumpih tuah dia thu hon pia Pathian kiang ah kipahthu gen ni. I Toupa Jesu ngei leng eite dinmun a kibultuahna dia lei taksa pu a hong khosa ahihman in Pathian tung ah i kipaak petmah hi.

Laisiangthou kawkmuhna: Hebrute 4:15 ; Matthai 7:12 ; John 15:12 ; Ephesate 4:32 ; Romte 12:15 ; Philippite 2:3 ; Mark 12:31; Luke 9:23.

March 31, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 90na (March 31):
I innsung mite hi'n, lawm-le-vual, innsak-innkhang, nna seppihte leh meltheih mahmah chihte khawng in sihna a hon tuah chiang un, sihna ataktak ahihdan i chian zel uhi. Mihingte adia khatvei sih seh ahihman in, ei ngei leng Toupa Jesu Khrist hong kik i lap man keileh, khatveitei kisi diing hi. Bangchihiam khat a i kizopkhakpihte'n sihna hon tuah chiang un, i ngaihnatna uh puang hileh kilawm sek hi. A damlai ua i ngaihnat bawl taktak le hikhollou phetlou a, amau tung a thilhoih i hih di natawm kisuum guigui khawng a om, lah a sih chiang ua khonung suun mahmah chih bang omthei hi. I damsung tomchik sung a ahun leh poimohdan dungzui a Toupa’n mi tuamtuam hon sawlte a damlai mah un, huhna poimoh a, a phattuampih theih lai un panpih leh limsak di'n kisuum hetkei ni. Huaiban ah, a kipahtheihlai un, tha a ngah theihlai un amaute i pahtatna hiam, i ngaihsanna hiam, i ngaihnatna hiam, ahihkeileh i hinkhua ahoihlam a sukha dia kampau leh gamtat a neihkhaknate uh va theihsak leng kisuum mahmah kei ni. Amau tung a i hihtheih thilte i na hihkhaklouh leh hih utlouhte ziak a khonung kisiik leh poisak phatuam lou ahihman in, eimah leh amau ngei leng i damkhawm lai un eilam bek ah a manphatna uh theisak di'n leh huhna pe di'n hunlem bawl ni.
Khrist a sanggam hon iittu diing ei adia Toupa'n ahunhun a hon piak mite ziak in Pathian kiang kipahthu gen ni. Pathian in ahunhun a atate hon gawmna ah Amah leh Amah hong kipahtawi zel ahihziak in A tung ah i kipaak petmah hi.

Laisiangthou kawkmuhna: Kolossate 3:13 & 16 ; 1 Thessalonikate 4:19 & 5:11 ; Hebrute 3:13 & 9:27 ; Ephesate 4:25 ; John 13:34.

March 30, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 89na (March 30):
Hinkhua a thil nuamlou taktak i phukha zel uhi. Akhen chiang in i iit mahmahte - zi hiam pasal hiam, ta leh nau hiam, sanggamte hiam omdan leh a thuaknate uh tungtawn inleng eimah inleng i na thuak ek sek uhi. Hiaibang thilte i teel diing hileh kiteel khollou diing ahihman in, zumpihna diing leng om tuanlou hi. I phuut khak thilte nuam hetloute ziak a honna zumpih mawk pawl om le uh leng, en zumna a i ngaih di hituanlou ahi. Kum 5 sung paita apat kuhkaltak a Toupa Jesu' nung zuih ka sinna apat ka sinkhiakte lak a khat chu, "maisah kisin leng a poimoh hun omzel hi" chih ahi. Gimthuak nasatak lak a le Toupa a kipahna ngahthei chih bang chu, vualzohna thupitak ahi a, khovel vai leh mihing hatna a zoh leh kep zoh vual diing hilou ahihman in, thilhihtheitak Pathian apat hong suak vualzawlna thupitak ahi chih i thei hi. Dahna hun a leng dah i kiphal diing ahih kawmkawm in, dahna dinmun haksatak lak ah kipakthei a om i hihleh, kisuanlahna diing omlou ahi a, kidahsak teitei diing chihna leng om tuanlou hi.
Jesu Khrist' tatna ziak a bangkim a kipahna sinthei i hihdan uh haih nawnlou a, lau hetlou a kipaakthei dia Pathian in hon kep man in A kiang ah kipahthu genni. Amah min a phatuamtak a maisahna hon piak ziak in Pathian tung ah i kipaak petmah hi.

Laisiangthou kawkmuhna: John 16:33 ; Romte 1:16 ; 1 Thessalonikate 5:18 ; Hebrute 10:13 ; Philippite 4:4 ; Galatiate 5:22-23.

March 29, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 88na (March 29):
A kumkum a Khristian hita, saptuam a leng kizang mahmah, mi theih leh ngaihnat mahmah, hilele aguuktak a khalam a khanna mu ngellou a, a langtang a mite pahtatna leh pahtawina khawng nuamsa lel i hihkhak diing uh lauhhuai mahmah hi. Ei Khristiante chu, i ginna uh puangkhiak, sepkhiak leh hinkhiakpih sahkhua ahihziak in, alangtang a leng min hon theih di uh ahih kawmkawm in, alangtang kia phatuam lou zel hi. A langtang a i hihkhiakte uh, Khrist sisan ziak a akisiamthak lungtang a hong kipat diing ahi. Kilimbawl in bangmahtan hon tunlou diing ahih ban ah omdan tawlhuai mahmah leng ahi. Khrist min suang kichi minhoih vanglak i hih uleh, ataktak in hinkhialpih ni hang. Lungsim paidan khekthei mahmah lou, thil omdan leh dinmun i dawndan (response) le khekthei lou, mahni angmasial ngei a angmasial lai, a remchang chiang a zuau gen sukmai zel a, ei tung a hoihte kia tung a hoih i hihleh, siamthakna taktak om nailou ahihziak in, piangthakna vel thak leng kuul diing hi. Melmate natawm iit di i hihlai a, ei hon iitte kia i iit leh bang phatuam? Phatuamlou tak a kikhristiansak i hih uleh, Khristiante min sesak maimai i hi uhi.
Mi tung a thil hoih i hih theih zen pi hih lou teitei a i om hun chiang ua le ei tung a hoihden ahihziak in Pathian kiang kipahthu gen ni. A zahngaihna leh dohzohna ziak inleng Pathian tung ah i kipaak petmah hi.

Laisiangthou kawkmuhna: Nahum 1:7 ; Luke 6:27 ; Luke 6:31-33 ; Kolossate 3:9 ; 2 Korinthte 5:17 ; Paunaakte 3:27 ; Sam 25:10 & 86:15.

March 28, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 85na (March 26):
Pathian ngaihtuahdan ei ngaihtuahdan kibang lou ahihman in, ei mihing lungsim in ahoih a i suangtuahte uh leh Aman ahoih a a suangtuah kibang lou chihna hipah hi. Pathian in A lemgeel toh kituak a hon phalsakte i tuah uh haksatnate pomsiam dan kisin pahpah a poimohna chu, i diah leh, kipomsiam utlou deuhdeuh inchin Pathian tung ah vuina di omhetlou pi vuina di kimukha zel hi. Amah lemgeel toh kituak thil himhim asia omlou a, Amah deihdan toh kituaklou peuhmah asia hizel hi. Thuakna himhim Toupa'n ei hoihna di leh Amah lemgeel toh kituak a thuneihkhum ahi chih i theih ua, Amah thupina di mah hong semkhe diing ahi chih i theihsiam leh, Amah muang a, Amah a kingakna leng ahi pah hi. Thil hoihlou i tuahte'n Pathian hon ngaisak, zongsak leh naihsak ahihleh, ahoih chihna ahi. Gentheihna leh haksatna himhim Toupa lam a hon hawltu a pang ahihleh kipahna a i ngaih diing uh ahi. Kuhkalna leh iitna tel in, sinlai tampi i laakna uh ahih ziak in, thuaknate athawn om hetlou hi. Lei ah i dinmun se mahleh, A hoih bukimna mun Vangam ah, Khrist in ei dia mun hon bawlkhawlsak lametna toh mailam nawt zel in kalsuan teitei ni hang.
Lei a chatvaihna leh thuakna tuamtuamte ziak a i dinmunte uh leh Khrist sisan ziak a Vangam a i dinmun diing uh kibang hetlou ahihziak in Pathian kiang kipahthu gen ni. Khovel mite kipahna toh ei kipahna kibang nawnta lou a, thuakna natawm ale kipaakthei dia hon pii ziak in Pathian tung ah i kipaak petmah hi.

Laisiangthou kawkmuhna: Isai 55:8 ; Paunaakte 14:12 ; Romte 8:28 ; Ephesate 1:9 ; Hebrute 9:15 ; Philippite 3:14 ; 1 Korinthte 13:13 ; Romte 5:3-5 ; John 14:3.

March 27, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 86na (March 27):
Pathian neihna leh nopsakna i mekbelh naak ua, huaiziak in, gingtu hinkhua ah ze-etna hong tun chiang in i theisiam kei sek uhi. Bible in, Khrist ziak a, Amah gingta kia hilou a, Amah vang a i thuak sam diing uh ei a dia phal hita ahihdan hon hilh hi. Jesu Khrist neite hi'n neiloute hitaleh, puuksese khovel ah thuakna neilou kuamah ki omlou hi. Jesu Khrist neite adi'n chu Amah min a i thuak vek uh hong hita hi. Himahleh, piangthaksa hile'ng le mial nnasep hiipna ziak a i deihteelna i zat diklouhziak a, khial hang a, huai i khelhna gau ziak a i thuaknate zaw Khrist min ziak a thuak kihi himhim lou ahi. Thei khial hetkei ni. I deihteelna i zat theihlouhna hun leh mun khenkhat a i thuaknate zaw, Toupa’n a phal chi in i na thuak kinken diing hi. Huai ban ah, i deihteelna i zattheihna ah leng, thutak gum in, i samitna leh banghiam ziak a eilam kimanzohlouhnate nengniam apoimoh hun a nengniam in, Toupa thumang dia i kithunun uh poimoh hi. Ei kilimsaklouh naa mahmah a, thuakna diktak leng ahi hi. Pathian a diing inleng gim namtui hi.
I tung a khialte tung a iitna i suah diing uh thil haksa ahihman in, A Khasiangthou thil hihtheitak toh hon thop ziak in Pathian kiang kipahthu gen ni. Eile mikhial pen i hihlai ua, ei adia hong si hiil hial ahihman in Jesu Khrist tung ah i kipaak petmah hi.

Laisiangthou kawkmuhna: Philippite 1:29 ; Luke 9:23 ; 1 Peter 3:19 ; 1 John 4:17 ; 1 Samuel 15:22 ; John 14:15 ; Paunaakte 21:3.

March 26, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 85na (March 26):
Khovel haksatna a dim ahi a, hiai haksatnate mah in Toupa' i bukna leh lametna ahihdan taklang hi. Khovel mite leh khovel thilte ah i tai a lah i bitna di taktak omlou ahihziak in, tunglam enlou theilou di'n ki-om zel hi. A haksat deuhdeuh leh, Toupa mel kilawm deuhdeuh ana hi ahi. Suangtuahna a Toupa thupina leh bangkim tung a atungnungna theih sang in, ataktak a sihna limguam khawng a hon piina apat chet thupizaw thamtham ana hidan ahi. Theory (a thu) a sin sang a practical (a hih) a sinna ahihziak in, i ban a velh leh i talgaak theih hial khop dia A thu napkipna hong suak hi. Thuaklah kisak luat ziak in, "Toupa'n hiaibang lawmlawm a haksatna a bang dia hon pii ahitel de aw?" chih dotna bang omkha lou theilou sek hi. Himahleh, Amah thu mah a kibulphuh a i omleh zaw, "Pathian aw, ngentel tak in hon en suak inla, ka lungtang thei in: hon chian inla, ka ngaihtuahnate thei in. Pathian aw, keimah ah lungtang siangthou tak siam inla; ka sung ah kha diktak siam thak nawn in" chi a kana thuumnate dawnna ana hi maimah hi.
Toupa sinsaknate zaw khovel thilte i theihsiam bang a salam lungsim a theihsiam zoh vual hilou ahihna ah, a deihbang sin i hihleh, Amah Kha ngeingei in hon piina chian i hihziak in Pathian kiang kipahthu gen ni. I thuaknate uh Amah batna dia hon heisak zel ziak inleng Pathian tung ah i kipaak petmah hi.

Laisiangthou kawkmuhna: Sam 46 ; Sam 71:5 ; Diuteronomi 6:8 ; Sam 51:10 ; Sam 139:23 ; Luke 14:27 ; Sam 119:71 ; 2 Korinthte 4:8-10.

March 25, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 84na (March 25):
Hinkhua zaw naa deuh a ahaksat tuntun hun tam hiveh aw. Haksatna huihpi khat in hon nawk a, Pathian in haatna hon pe zel a, kipal gaalkai zel hi. Huai khit chiang in, i gintaak hetlouh khat in hon khen suk ek zel hi ; "Kipal gaalkai zou di ahi na de aw?" chih khawng in, tongkhong ngaihtuahna bang in hon bawm a, himahleh, lamdangtak in kipal galkai zel hi. Hinkhua tawp tadih lou ahihziak in, tui kihawt lak i tung hun hong om zel a, "Tutung zaw ka kikhin mai di, ka gim gawp" i chih hun bang hong om zel a, himahleh, bang chichi hiam in, amasa sang a kuhkalzaw di'n Toupa’n hon pii gaalkai zel hi. Puuksesa khovel ah haksatna i tuah uh lamdang lou ahihdan i Laisiangthou inleng a veel in hon hilh hi. Khristian piangthaksate adi'n hiaibang gimthuakna i tuah chiang un, "Hiai gimthuakna lak ah Pathian koi ah om ade aw?" chih dotna neikha tampi i om di un ka gingta hi. Huaiziak in, huai dotna dawnna a haksa hetkei hi : Hiai gimthuakna lak ah Toupa’n hon ompih den ahihlam i kiphawksak thak zihzeh diing uh himai ahi. Gimthuak ziak a si mi tampi om mah uh ahi. Eite leng gimthuak zoulou a i sih hial uleh leng, Toupa min a si kihi mai ahi. I lametna khovel tan chauh hilou ahihman in, i taksa a sih nung chiang in leng, i lametna hing Jesu Khrist ah i kha tawldamtak in hingta diing chihna ahi. Lunglelhna di omkei. Mailam nawt zel ni.
Amah min a i gimthuaknate uh athawn khat le omlou a, Vangam ah i gou kikholkhawm ahihman Pathian kiang kipahthu gen ni. I taksa leh kha hihsethei Pathian in i kha hon hotdamsak ziak in A tung ah i kipaak petmah hi.

Laisiangthou kawkmuhna: Genesis 3 ; 1 Peter 4:12-13 ; Matthai 28:20 ; Hebrute 13:5 ; Zephaniah 3:17 ; Sam 23:4 ; Matthai 6:19-21 ; Matthai 10:28.

March 24, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 83na (March 24):
Pathian hoihdan chu, mi hoihloute tung ah leng hoih a, Amah beloute leh phawkloute tung natawm ah leng A hoihna suah hi. Huchi ahihman in, ei Khristiante adi'n chu, khovel theihdan in tuahse lengle, ei hoihna di'n Toupa'n nna sem gige hi. Khovel a i tuahsiatte ziak a Khrist ah Pathian' ta i hihna bei tuanlou a, hon iitna le beituanlou a, hinna laibu a i min kigelh le kithaimang thei tuanlou hi. Pathian zaw a muanhuai a, a ginom a, hon limsak gige hi. Ei ngaihdan a asia hi'n ahoih hitaleh, i tung a tung dia a phalte zaw, Amah iitna sung a ei hoihna dia i tuah uh hi gige ahihna ah, Amah lemgeel tangtung ahihziak in Amah thupina hi gige ahi. Salam leh khovel vai a dinmun hoih leh lohchinna chi tuamtuamte i theihsiamdan un hoih mahleh, ei a dia hoih hi gige tuan lou hi. Ei adia hoih chu, Jesu Khrist batna a khanna hi gige ahihna ah, i khanna diing un thil nuamlou tampi pal diing in leh nat thuakna ah leng hon pii zel hi. Dotna poimoh ahihleh, Khrist' min ziak in bangchituk a nuamlou pal leh nat thuak di'n i kiman ua chihthu hong hi diing ahi.
Ze-etna hunte ah puuksiat baihsam mahleh, hon kembit a, A khamuanna lamdangtak a hon tuam zel ziak in Pathian kiang kipahthu gen ni. Puuksesa khovel ah ahoih hi'n ahoihlou hitaleh, i tuahte tungtawn a kipahtawi gige ahihziak in, Pathian tung ah i kipaak petmah hi.

Laisiangthou kawkmuhna : Kahla 3:38 ; John 5:17 ; Isai 41:10 ; Sam 111:7 ; Sam 119:71, 89, 90 ; Sam 145:9 ; Matthai 5:45 ; John 14:27.

March 23, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 82na (March 23):
Tuni'n bangchi bang thu leh vai in hon dawn a? Thuhoih, lahoih, vai hoih ahihleh, Toupa tung ah kipah zaw thil haksa hilou diing hi. Himahleh, thuumna tampi toh thil lamet nei hiam, ngak nei hiam i hih ua, i lamet louhdan leh lungkiak huaitak a dinmun hong om a, dahna leh mangbatnate hon buak a, kipah didan thei kei le'ng le, Bible in hon hilh mahbang in, tuni TOUPA ni seh ahihman a nuam a i kipah diing uh ahi thouthou hi. I thuumna khenkhat hon dawng louh ziak a, hon taisan hi tuanlou hi. Thuumna dawnlouh vuallelhna a i ngaih diing uh hilou ahi, Toupa thu tangtunglou hilou tuanlou ahihna ah, Amah thu toh kituak a nnasem khia hi thouthou ahi a, Amah leh Amah kipahtawi hi thouthou ahi. A lemgeeldan theisiam lou in, a nnasepdan ahoihna di i mihing lungsim in mu kei le'ngle, Ama'n thil tengteng thei a, a theihna in tawp hun neilou a, bangkim tung a vaihawm a, hoih gige a, ei hoihna di ngaihtuah gige a, kuamah toh A thupina koplou hi. Khantawn Kumpipa, sitheilou, muhtheihlouh, Amah kia Pathian in A Thu toh kituak a nnasem gige ahihziak in, A kiang ah zahtakna leh thupina om hen, Amen.
I thuumna a dawnglouhte tungtawn ale A thupina puang ahihziak in Pathian kiang kipahthu gen ni. Dinmun haksa ah ei Amah adi'n ginom zou sek kei mahle'ng, Jesu Khrist ah eite a dia ginom gige ahihziak in i kipaak petmah hi.

Laisiangthou kawkmuhna: Sam:118:24 ; Romte 8:28 ; Jeremia 29:11 ; 1 Timothi 1:17 ; 2 Timothi 2:13 ; Isai 42:8 ; Sam 106:1 & 145:9.

March 22, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 81na (March 22):
Bangkim a kipaak di chih thilhih dia haksatak ahihziak mahtak a bangkim a kipahna gelh kahi zaw hi. I deihte uh thutuam hitaleh, poimoh a i kitheihte uh natawm tasam a i om Toupa’n hon phalsak pawl om hi. Kim-le-kiang ah dinmun leh mite tungtawn in, i bukimlouhna phawksak di'n nawk in ki-om zel ahihna ah, i hihna bangbang a lungkim chih zaw thil awlsam ahi hetkei hi. Awlsam keimah leh, thil hithei ahizel hi. Haksatnate ziak Pathian naih kihi taangpi ahihziak in, khenkhatte'n Pathian kiang ah haksatna ngen uhi. Ken zaw haksatna ka ngen kei a, haksatna ka tuah dia Toupa'n hon phalsakte le sikhop leh doukhop mahmah ka hihziak in, ahunhun in mualsuahna di'n haatna ka ngen zel hi. Hiai khovel ah mihingte' paidan toh kisai - zi leh pasal a kineihna, ta leh nau neihna, tanau laina leh iittu leh deihsaktu hauhna, neih-le-lam hauhna, damtheihna chihte i neih leh neihlouh dungzui ua kipahna uleh dahna i neihte uh khovel toh mangthang khawm di ahih ziak in kipahhuai kasa mahmah hi. Tulel a khovel mite'n i piibawl te uh om nawnlouhna gam - tangtawn hinna leh bukimna - Toupa kumpigam ngaklah huai hina maizen e!
Beidotna tawpkhawk i tuah chiang ua, Amah lametna hing ahihna ana kikhek tuanlou ahihna ah, i lametna beilou ahihziak in Pathian kiang kipahthu gen ni. Khovel in a thupina hon piaktheihte tang kim kei mahle'ng, Thupina gam a goutan thupitak in hon na ngak ahihziak in Pathian tung ah i kipaak petmah hi.

Laisiangthou kawkmuhna: 1 Thessalonikate 5:18 ; Luke 1:37 ; Philippite 4:13 ; 1 Peter 2:11 ; Ephesate 4:22-24 ; 1 John 2:16-17 ; 1 Peter 1:3-4.

March 21, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 80na (March 21):
Pathian in Amah a kipaak dia hon siam ihihziak un, kipahna delhna in mihingte i buai thei mahmah uhi. Kipahna i chih chiang in lungkimna, eilam a nuam hon sasak leh hong zaangkhai sak, tawldamtak leh lemna lungsim put neih chin i theisiam hi. Thil i hihte uh leh i lunggulhte uh leng, a tamzaw a kipahna leh lungkimna i zonna uh ahi. Huai kipahna leh lungkimna i lunggulh pen uh Pathian neihna a hong kipan di himahleh, eilawi in khovel thilte ah kidelh hi - sum leh pai, numei-pasallam a tat lekna, zu leh khamtheih leh social media leh online gaming addiction tel in, samitna tuamtuam sukbuchinna leh noptaalna te ah i zong ua, lah sawt daih taktak le a hi tuankei hi. kipahna delh in khovel thil tuamtuamte i dapkual ua, i beidot chiang un, Pathian kiang ah huai kipahna omkha di a lamen in, beidotna toh amah lam ah i kiheitheipan uhi. Khovel thilte ah bukim a kitheihna leh i hihna kitheihna mu himaizen le'ng, Pathian kizong lou dia, ki mangthai diing hi. Bangmah guitunglou, bukimlou leh mangbat man in Amah lam hon ngasak a, huai i suahtaatna uh leng ana hi daih hi. Kipahna muhna di'n Pathian zong lou in, Pathian zong masa le'ng, huai ah kipahna leng om hi.
Bangkim a kipaak dia hon thupiak bang a, haksat hun a le kipahdan hon siam dia hon pi zel ziak in Pathian kiang kipahthu gen ni. Lei taksa toh Thupina Gam thilte delh dia Jesu Khrist ah hon chingsak ziak in Pathian tung ah i kipaak petmah hi.

Laisiangthou kawkmuhna: Philippite 4:4 ; 1 Timothi 6:6-7 ; Kolossate 3:1-2 ; 2 Korinthte 1:17 ; 1 John 4:5 ; John 15:9-11 ; Sam 4:7 & 71:23.

March 20, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 79na (March 20):
Pathian' iitna, vualzawlna leh ngaihdamnate chihte i deih mahmah uhi. Himahleh, iittaak hilou, vualzawltaak hilou, ngaihdamna mutaak hilou i hihlam uh i kitheih masak kei ualeh, hiaite i tanvou kisa mawk di inchin, Pathian in A hih di mawng dan a koih di hang ua, kipahluatna di theilou a mangthaitak a omnilouh theih ana hi ahi. Pathian in thilhoih hon piakte i muh di mawng a koih i hih uleh, Amah i muhdan leh theihdan buai chihna ahi. Huaidan ahihleh chu, mihing i kimuantuah bang ua "Pathian ka muang" chi kihi khathei hi. Mihingte'n "K'on muang" i kichih tuah chiang un, i kilamettuahte uh subuching dia kimuang tuah i hisek uhi. Huaidan mah a, "Pathian muang" i kichih chiang unleng, i samitna toh salam deihte leh utnate hon sukbuchinsak dia Amah lamen leh muang kihi taangpi sek hi. Himahleh, Laisiangthou toh kituak Pathian muan omzia chu,
1) Eimah theihsiamna ah kingak louhna ahi.
2)Tuiluang kiang a sing phuh zungkai, kholum hongtung diing leng khawksa lou a, a nahte hing gige a ana om mahbang a hun haksa a le khalam tuipai a hingtak a om theihna ahi.
3) Tuiluang kiang a sing phuh zungkai, khokeu kum khawksa lou a, gah suang a kikhelsak tuan louh mahbang a, khalam a keuhun a tun chiang a le, khagah gahkhiaksak diing kikhelsak louhna hizaw hi.
Pathian in Amah muan omzia diktak hon sinsak zel ziak in kipahthu gen ni. Mihingte' lungsim neuchik in a suangtuah bang a gamtaang lou a, Amah thupina dia gamtaang Pathian tung ah i kipaak petmah hi.

Laisiangthou Kawkmuhna: Paunaakte 3:5 ; Jeremia 17:7-10 ; Sam 33:20, 37:4-5 & 56:3; 112:7 ; Isai 12:2 & 41:10 ; Romte 8:28.

March 19, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 78na (March 19):
Hinkhua lampi tawn a i pailai un, avangkim in ei deihteelna zat a tot diing lampi bang i tuak tou zel uhi. Himahleh ei deihteelna zat theihlouhna, tot louh theihlouh lah hi, a paikan didan hiam, velh didan hiam om tuan lou lampi hong kisial hun leng om sek hi. Huaibang a lamet hetlouh leh deih hetlou lampi i tot chiang un, i ginna uh hong buaipah zel hi. Pathian in hiaibang lampi khawng i zuih louh theihlouh dia hon koihsak bang khasiatna leh phatuam hetlou dia mahni kihehpihna leh kingaihsiatna in i zang zel uhi. Huaibang lungsim i put chiang un, Pathian in midangte sang a hon iitlou zaw, hon kemlou zaw leh gentheih hon phalzaw dan khawng a koih in tansia kisak tuamna bang i nei zel uhi. Bible in deihsaktuam neilou Pathian ahihdan a genkhit nung a le, en deihsaktuam nei dia Pathian i koih chiang un, Pathian ki ngaisang nawnlou hi. Mihing hi'n, thil hi'n Pathian hitaleh, i ngaihsangte mah hilou maw i biak uh? Amah ngeingei i biakna di'n, poimoh asak leh, Toupa'n ei mimal toh kituak dia kibawl (design) sese lampi hon sialsak ahi chih kei pomdan ahi. Omze neilou hileh, ei sese in i tuah chiitchiat te sese uh i tuak diing un ka gingta kei hi. I mangthai sang ua, thuak zek a i suahtak uh poimohzaw hi.
Amah lam a i kiheina di leh Amai a khukdin dia hon khen niamtu dia, gimthuaknate manphatak hon suahsak ziak in Pathian kiang kipahthu gen ni. Khentuam neilou Pathian ahihman in leng A tung ah i kipaak petmah hi.

Laisiangthou kawkmuhna: Job 36:15 ; Sam 119:67, 71, 75 ; Romte 2:11 & 5: 2-5 ; 2 Korinthte 1:8-9 ; Hebrute 12:6 & 13:5.

March 18, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 77na (March 18):
Khristian piangthaksa kichite'n i theihbuai naak uh ahihleh, hiai khoveldan bang a omthei kihi nawnlou ahi. Khovel ah ei gingtute kia kihuituam leh kikulkhum a gingloute toh kisukha hetlou dia Pathian in hon lamet kihi lou a, khovel omdan leh tawndan miallak ah i vaakna khuhmang lou a, midangte muh a vaak dia hon lamet i hizaw uhi. Pathian kumpi gam a Siampu namte i hihlam uh bangdia mangngilh naak i hi ua? I hihna diktak uh theilou zen di leh sia leh phatheihna hon kam di omlou zen a i lungtangte uh khauh gawp ahi hia ahihkei leh lungtang kikhek kha ngeinailou himhim lah Khristian kichi maimai khawng i hilel uhia? Khristian kichi ngal a gingloutute toh et khawm chiang a le theihkak theihlouh tel khawng chu Khristian kichi dah suk lengle, eimah leh i suante uh adi'n hoihzaw diing hi. Pathianthu sang a mahni ngaihdan leh theihsiamdan piibawl zaw dia i chapounate (pride) uh Pathian in haw lou di'n koih kei ni uh. Pathian in kisaktheihna hua a, mi kisatheite dou ahi. I khelh chiang a hon gawt lou a, hon nuai chimit lou chihziak in thumu kisa law dah in, A zahngaihna ziak liauliau a hawi a om a, kisiikna hun behlapsak i hihtheihna di ua, i thuak leh sihna di mun simmohhuai Khros a vuaktang a Toupa Jesu khailup a om ahi chih kiphawksak thak zaw niuh maw! Khovel mite thupil leh khovelmite tawndan khawng leh Pathian hing beloute 'rong' kut khawng a kibual hetlou a le, niteng khelhna i sual khop uh om gige ahihna ah, haina in ei-le-ei puakgik kigot kei niuh.
Pathian zahngiahna ziak a hih mangthai a omlou i hihman un, Pathian' ginomna thupitak tangkhate i hihziak un Pathian kiang kipahthu gen ni. "Hong paikhia un" chi a, khelhna sal a pat a iitna leh thupina a sapkhiak i hihziak un Pathian tung ah i kipaak petmah hi.

Laisiangthou kawkmuhna: Romte 12:2 ; Luke 8:16 ; 1 Peter 2:9 ; Ephesate 4:18 ; Paunaakte 8:13, 18:2 & 28:26 ; Kilaakna 18:4 ; Jeremia 51:45 ; 2 Korinthte 6:14 ; Galatiate 6:7-8 ; Kahla 3:22-23.

March 17, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 76na (March 17):
Niteng hinkhua i zatna uah, vai tuamtuam hiam, ahihkeileh, kibulpatthakna hiam khat khawng i neih chiang un, lamzang ngellou hileh kilawm a a om hun leng a om tham hi. Pathian thuzaak a Amah toh ton hinkhua zang i hihnak leh zaw lamzang keileng le, i phakna chiang, i din mun chiangchiang a Amah muan hon kisinsak ana hizaw sek hi. Ei ngaihtuah bang a ngaihtuah lou, muhlawkna leh theihlawkna neipa'n hon piidan leh pii didan thei chian lua ahihman in, A kawi deuh a hon pii ahihtaak lehleng Amah hon pii ahihnak leh, lauh diing a omkei hi. I gim leh i khawl zel dia, Amah pahtawina hinkhua toh kipahna toh, mailam nawt a kal i suan zel diing uh ahi. Phatuam hetlou leh manthainalam a lamzang sang achu genneitak a sianthounalam a lamkawi leh gimhuaitak himahleh Toupa hon piina mah ahih nakleh A thupina kimu diing ahihman in manpha lawtel hi. Lampi kawchiik i tot ziak a salam a sihna natawm i tuak hial lehleng, Sawltak Paul in achih bang a, "Kei a di'n zaw hin Khrist ahi a, huan sih leng punna ahi" i chih theih sam diing uh himai ahi. Lamzangtak a meidiil lampi a paipai i hihkhak diing uh lauhhuai zaw hi.
Hon taisan ngeilou dia, Jesu Khrist ah, thuchiam hon piak ziak in Pathian kiang kipahthu gen ni. Salam ah naa in, genthei in, zawng in, sihna natawm tuak hial mahleng le, tangtawn hinna Khrist ziak a, ei a hi thouthou ahihziak in Pathian tung ah i kipaak petmah hi.

Laisiangthou kawkmuhna: Sam 23:4 ; Job 31:4 ; Matthai 7:13; Isai 55:8 ; 1 Thessalonikate 5:18; Hebrute 13:5-6 ; Philippite:1:21.

March 16, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 75na (March 16):
Taksa a damlouhna, hatlouhna leh taaksapna chituamtuam i neihte'n hiai lei taksa sethei leh sithei ahihlam hon chiansak zel hi. Salam leh khovel vai ah hita hen aw, ei utdan leh deihdan mahni a i kipiaktheih uh tawm lua ahihdan avangkim a i chet zel ziak un, beidotna leh khavatna tampi leng hon tun zel a, kingaihsiat vongvong bangleng baihlam mahmah hi. Hiaidan a mihinglam a lunglelhna leh lungliapna neih zek poi hetlou hi. Himahleh, Toupa' iitna, hoihna, A thil hihtheihna, tungnungpen ahihna, bangkim Amah phallou a tung lou leh thutawp gen diing a thuneihna nei Amah kia ahihlam i hon theih chiang in, i kingaihsiatnate hon kikhek a, kingaihniamna hong suak hi. I dahnate leng kipahna hong suak a, i khavaatnate leng khamuanna hong suak zel hi. I hihtheih tawmlua ahihman in, eilam kisuanna di omlou i hihdan chetsak in i hong om a, huaibang a taihilhna in kiniamkhiakna hon aangvan sak thei zel hi. Pathian' Thupina i muhna di un, kiniamkhiak poimoh ahihman in, taksapna leh delhdenna i thuakte un hon kiniamkhiaksak keileh hon helsak diing hi. Nang koilam pen ah na awn a?
A iitna a hong zongmu a, A hehpihna a gouluahtu hihna hon pia a, a zahngaihna in hon hih chimit mailou Pathian nei i hihman un kipahthu gen ni. A tate adia thilhoih iitlou leh iitchiil hetlou Pathian tung ah i kipaak petmah hi.

Laisiangthou kawkmuhna: Job 1:20-22; Jeremiah 29:11 & 32:17 ; Jakob 4:16 ; Romte 12:3 Kahlate 3:22-23 ; Micah 6:8 ; Romte 8:32.

March 15, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 74na (March 15):
Khelhna gu ana mahmah hi. Hun paisa a eimah hiam leh mi kuahiam khelhna leh deihteelna zatkhelhna i mangngilh ngei nawnlouh di om hi. Kei na bat uleh, hiaidante i phawk khiak hunte a hon nuamlousak lawtel ahihman in, damsung a thuak di himai hi'n ka koih hi. Poikei. Khelhna hi'n a gaute ziak a dahna i neih man ua ngaihdamna leh hotdamna guitunglou chihna hi tuanlou ahihman in, tatsa leh siamthak a om i hihlam i kihilh zel poimoh hi. Huaiban ah, hun paisa a khelhnate va phorhsuah kholkei mahleng, hon delhphak hun uh omthei ahihna ah, mohpaihna toh hong tonkhawm sek zomah uh ahihziak in pitheihtel tak a, Toupa Jesu Khris't sisan a tatsa leh sawpsiang lellel i hihdan ei leh ei i na kiphawkthak sak zel diing ahi. Pathian in hon mohpaih lou ahih leh midang leh Setan hon mohpaihna in omzia neilou hi. Pathian i lam ah a pang leh mihing hi'n Setan hitaleh, kuamah in bangmah hon loh thei lou uhi. Jesu Khrist in a sisan a suahtatna leh zalenna hon leisak khin ahihziakin, huaibang toh kituak nuntaakna i tanvou ahi. Mohpaih a om lel na hi hia ahihkeileh Jesu Khrist ah Pathian iitna a om na hi hia?
Gimthuakna, lungngaihna, sawina, tam/kial, vuaktanna, lauhhuaina, temsau, sihna, hinna, angelte, lalnate, thil omlelte, thil hong om diingte, thilhihtheihna, saanna, thuukna, thilsiam dangte himhim hiam in leng, i Toupa Khrist Jesu a om Pathian iitna a kipan, hon khen thei lou diing ahihziak in Pathian kiang kipahthu gen ni. Hiaibang a lamdang leh ginom iitna a hon iit ziak in Pathian tung ah i kipaak petmah hi.

Laisiangthou kawkmuhna: 2 Korinthte 2:17 ; Matthai 5:3 ; Sam 34:18 ; Romte 8:1, 31 & 34; John 3:17 & 8:11 ; Kilaakna 21:4 ; Romte 8:35-36 & 38-39.

March 14, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 74na (March 14):
Khristiante'n haksatna i tuah chiang un, Pathian in hon gawtna hiam, hon thutankhumna hiam leh i tuhgah hon lousak dan a laak pahpah thil diklou ahihban ah vuallel kisakna lungput ahi. Pathian in, Jesu Khrist ah vualzohna hon pekhin ahihlam i lungtang ua i vom uh leng poimoh hi. Huaibang a mohpaihna lungput Pathian apat hong kipan lou hial diing hi. Huchi ahihlai in, hun paisa a i deihteelna i na zat diklouh ziak a agau hoihlou i thuak khak omkha thei tham hi. Huaite i thuak chiang ua le Toupa phalna - phalzah leh phaltan mah hong hi zel hi. Toupa'n a phal himhim chu, ei hoihna di hong hi gige ahi chih leng thei lehang vaal hetlou diing hi. Khelhna ziak a tuahsiatna, chatvaihna leh taaksapna tuamtuam i tuahte uh leng Pathian in A tapa Jesu Khrist' hotdamna i muhna di'n leh siangthouna nnasep in ei ah ma a suanna di'n zang zel hi. Haksatna neihlouh diing bang thil hoih a koih in, haksatna nei het lou bang a omthei hile'ng le, Amah bei in zaw thilhoih i chih teng leng khovel toh mangthang khawm diing lel ahi uhi. Huaiban ah, bangchituk in mi hoih in nnahoih sem le uh leng, Jesu Khrist hotdamna tangloute khempeuh zaw, khovel bei khit chiang in tangtawn gawtmun ah a pai diing uhi. Haksatna na tuahte Pathian naihna leh naihsemna di'n na zang hia ahihkeileh, Amah gamlatna di'n?
Khristiante'n haksatna i tuahte uh Toupa'n i hinkhua chiat uah kipahtawina a zang ahihman in Amah kiang ah kipahthu gen ni. Bangteng tuak zong le'ng, mial thuneihkhumna dinmun apat, i Toupa Jesu Khrist tungtawn a hon tankhia a, thupina gam ah hon pii lut ahihman in Pathian tung ah i kipaak petmah hi.

Laisiangthou kawkmuhna: 1 Peter 4:1-2 & 13 ; Jakob 1:12 ; 1 Korinthte 15:57 ; Sam 119:71 ; 1 Korinthe 10:13 ; 2 Timothi 2:12 ; Romte 8:17-18.

March 13, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 72na (March 13):
A kumkum a Khristian hita, biakna kikhop bangleng ngai poimoh, saptuam vai khawng a le mahni khamtawk a kal suankhia, thohlawm tuamtuam bangleng mahni khawmtawk a thoh sam himahleh sunglam a siamthakna taktak omlou a, khalam a leng khanna taktak neilou i hihkhak diing uh lauhhuai kasa hi. Laisiangthou in "thutak na thei di ua, thutak in hon suaktasak diing" achi hi. Laisiangthou (thutak) hilhchetna leh suutna khawng chimtaakhuai sa i hih uleh, i niteng hinkhua zatdan uah thutak a suahtaakna kipawkhe lou diing a, vaakkhe zou mahmah lou diing kihi ahi. Sunday School bang ihmutsuah huai sa a, ninhuai khawng sa a, thathoh huailou khawng sa i hih uleh, thutak theihna ah leng kibul pat nailou kihi kha diing chihna ahi. Biakna toh kisai bangleng tumging tuamtuam toh lasakkhawmna leh siam taktak a lasaknate khawng leh kisuklimna khawng tam henla, thugenna bangleng, salam damna thu khawng, khovel buainate apat suahtatna thu khawng leh vualzawlna thu khawng hitaangpi leh chu nuam leh thathohhuai kisa taangpi hi. A pawlam a hon navaaksak zual, hon thathousak hehu leh nuam hon sasak dite kia deih a, lungsung tawng a hon kingaihtuahsak a, hon kisuutsak a, kisiikna leh Pathian' deihdan a hin utna hon guan a, huai dia pan hon lasak ahihkei leh zaw, thutak theinailou kihikha diing hi. Thutak paakta Khristian na hi hia ahihkeileh nang nopsakna di buaipih Khristian na hizaw hia?
Pathian thutak a laibu a nei a, sinsaktu diing leng tasam lou a hon piak ziak in Pathian kiang kipahthu gen ni. A thutak tungtawn a miallak saltanna apat suahtaakna hon piak ziak in Pathian tung ah i kipaak petmah hi.

Laisiangthou kawkmuhna: John 8:32, 14:6, 16:13 & 17:17 ; Matthai 5:16 & 7:16 ; Ephesate 6:14 ; Sam 25:25, 86:11 & 119:105; Jakob 1:18 ; 2 Timothi 3:16-17.

March 12, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 71na (March 12):
Khristiante bangkim a kipaak dia thupiak i hi uhi. A zuih diing haksa sek mahleh, thil hithei ahihziak in huaibang a lungput nei di'n Pathian in hon deih hi. Bangkim a kipaak dia lamet himahle hang, dahna, hehna, lungzinna, mangbatna, khasiatna chihte neihlouh diing a thupiak kihi tuanlou hi. Mihing i hihna uah, dinmun tuamtuamte ziak in hiaibang a lungput tuamtuam phawk theih ahihdan Sam Laibu ah leng muhtheih tampi om hi. Kumpi David inleng A tapa damna di'n ann ngawl in, leilakte ah lum in, lungzingtak in ana om a, himahleh a tapa'n a sihsan tak in, huaibang lungput ah omden lou hi. Thoukhia in kihahsiang a, Pathian a biak sunzom hi. Elija ngei leng Jezebel in thah dia a vauna azaak tak in, gamdai ah taimang a, lunggim leh mangbangtak a om in ihmu hi. Huchi'n, angel in va phawng a, nek leh dawn diing pia in, maban thupitak neilai ahihman in ma sawn di'n sawl hi. Pathian in heh hun neih leng hon phalsak a, himahleh sawtpipi hehlou diing in hon hilh hi. Hiaidan a salam a dinmun tuamtuamte ziak a phawkna tuamtuam - adiak ahoihlou lamte i phawk uh Pathian in phal mahleh, huaibang lungput toh omden di'n hon phallou hi. Hiaibang lungputte a suahtakna i ngahna di'n Khasiangthou haatna hon guan a, akhenchiang in chu dinmun leh mite leng zang hi. Hiaibang dinmunte i tuah chiang unleng, Pathian toh Jesu Khrist tungtawn a kichimatna ziak in, i lungsungtawng a kipahna pen leng ana bei tuanlou a, i Hondampa ei a dia a sihna leng zuukkik hilou ahihchiang in dinmun hilou in thutak ah i kipahna kinga hizaw hi. Nang kipahna koih ah a kinga?
Jesu Khrist ah kipahna i neihleh, mi leh thilte'n hon kipaaksak di'n kingiat nawnlou a, hinkhua zatdan leng navaak ban ah, khalam khanna leng ahunhun a ki-aangvan thei ahihziak in Pathian kiang kipahthu gen ni. I kipahna khovel thil kikhek khekte a kinga lou a, a kikhekngeilou taangtawn daih diing i hotdamna ah kinga ahihziak in Pathian tung ah i kipaak petmah hi.

Laisiangthou kawkmuhna: Philippite 4:4-7 ; 1 Thessalonikate 5:15-18 ; 2 Samuel 12:16-23 ; 1 Kumpipate 19:1-9 ; Ephesate 4:26 ; 1 Korinthte 10:13.

March 11, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 70na (March 11):
Pathian' hauhsakna i tangkhakte uh i ngaihtuah chiang un, sum-le-pai leh neih-le-lam hitaangpi sek mahleh, huaite a i lei zoh vuallouh leh ei thu leh panlaakna ziak a i kipiaktheih louh damtheihna, damna, ahun leh poimoh bang a thil hong kilemfel geihgeihte leh ei adia kipezoutak a hong om mite hizaw hi. Hinkhua ah anuamlou sim leh anuam hetlou dinmunte i tuah chiang un, huhna leh huaina, khamuanna leh iitna i kiphamoh mahmah uhi. Huaibang a haksatna i tuah hun un, kipezoutak a hon panpihtu leh taksapna awng hutu di'n thil leh mite lem geihgeih bang in hong om zel hi. Sisan a kizopna i neihpihte thukhat hitaleh, mi tuam daih, khan vual leng hisamlou lah hon iittu di leh huhtu di i poimoh hun in tasam in hon omsak ngeilou hi. Nu leh pa om nawnlou leh omlouhna ah, i nu leh pa dinmun di hong luah diing hon pia a, sanggam numei hi'n saggam pasalte dinmun a dingthei diing leng, apoimohdan in hon pe zel hi. Hiaite khawng thupitak a, ahunhun a Pathian hauhsakna i chetna uh ahi. Eite panpihtu leh chingpa ahihna ahunhun a i chetna uh leng ahi. Lungtang a vom gige dia poimoh ahihleh, i lunggulh tengteng hon pe khin vek kei mahleh, i poimoh tengteng Pathian in thei a, ahunhun in huaite hon pekhin vek lou in om ngei hetlou hi. Huaidan in na chianta hia?
Kemtu, chingtu, panpihtu, guantu, khamuantu, ngaikhetu, hehpihtu, iittu leh ginom Pathian i neih ziak un, A kiang ah kipahthu gen ni. Pathian toh eite hon zomtu Jesu Khrist ziak in Pathian tung ah i kipaak petmah hi.

Laisiangthou kawkmuhna: Sam 23 ; John 16:33 ; Luke 12:7 ; Hebrute 13:5-6 ; 2 Korinthte 1:3 & 5:19 ; Phillipite 4:6 ; Matthai 6:8 & 31 & 32 ; Sam 33:20.

March 10, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 69na (March 10):
"I mel-leh-puam khek danglam theih hilou hilele i omdan khektheih" chih ka Nu hon na thuhilh ka vom dette khat ahi. Kikhekna i chih chiang in, ahoihlam a kikhekna chihna ahi a, thil haksa, leh man tampi piak ngai sek ahihziak in, ataangpi in kipeih lou hi. I tulel dinmun nuam hetkei mahleh, i ngeinasehsa ahihziak in, ahoihzaw dia kikhek khiakna diing inleng salam, lungsimlam hi'n khalam hitaleh, kal kisuankhe ngaplou sek hi. Dinmun, hihna leh mun thak a kingeinaseh pah a poimoh tuktuk in, huai i kingeinasehsa a pat masawn dia kikhekna aangvan louhna in leng lungsim hi'n khalam ah hitaleh, i khanna di daal zel hi. Ei Khristiante adi diak in bang zaw, kikhekna i gen chiang in, Jesu Khrist suun semsem dia kikhekna ahihna a, khovel paidan leh mihingte ngaihdan a ahoihlam a kikhekna sang a leng haksa zaw thamtham hi. Toupa'n hon sapna - mihingte hihtheihna tunglam a siangthou dia sapna - thupilua ahihman in, Khasiangthou panpihna toh lou a, salam vaitak a zoh theih diing leng hilou himhim hi. Sianthouna nnasep chu siamthakna leh bawlhoihna ahihziak in, i mihing lui kikhenchim kawmkawm a Pathian' deihbang a kilamthakna ahi. Huai diing in i kihong na hia?
Setan kumpigam leh mial lak apat, A Tapa Jesu Khrist sisan mantamtak a hon tankhia a, Amah vaak Kumpigam a tanmun hon piak ziak in, Pathian kiang kipahthu gen ni. Amah A siangthou bang a eite leng sianthouna a khang dia hon pii zel ziak inleng Pathian tung ah i kipaak petmah hi.

Laisiangthou kawkmuhna: Eklijiasti 3:11 ; 2 Korinthte 5:17 ; Nnasepte 17:30 ; Ephesate 4: 22-24 ; Kolossate 3:10 ; Sam 51:10 ; 1 Peter 1:16.

March 9, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 68na (March 9):
Pathian in Amah i teelna diing un deihteeltheihna thil hihtheitak in hon thuam hi. Khatlam ah Amah a om a, Amah a omnalam ah suahtatna leh taangtawn hinna om hi. Alehlam ah khovel lal, Setan a om a, Amah lam ah saltanna leh tangtawn mediil om hi. Toupa'n hiai i deihteelna uh, Setan natawm in hihlui hiam leh hon suksiatsak theihlouh di'n hon bawlsak hi - i utnalam leh i hatlouhnalam zang in bel thuzoh (influence) thei hi. Huaiziak in, teel kichiantak neilou a alaitak a omdan a i kitheih leh chu, Setan sal a taang kihi chihna ahi. Thutak leh thudik chu, Pathian a i hihkei leh Setan a kihi chihna ahi. Khialsa a piang i hihman un, Jesu Khrist hotdamna i tang nung un leng, Setan deihbang in ki-omkha guigui sek hi. Himahleh, a kipahhuai chu, huaibang a khelhna sal a i tanna pawnte leh gaute i damsung in, abaanbaan in Toupa'n hon hihsiangsak hi. Piangthaksate leng khial thei tham himahle'ng, khelhna kihua a, i khelh khak chiang a i dahluatna in khelhna kiamsak hiai-hiai a, kidekzohna kihau deuhdeuh a, ngaihdamna kipe pahpah theita a, kiniamkhiakna leng lamdangtak in kisuah thei zaw deuh zel a, "Toupa na thuthu hihen" chi in kipiakkhiakna leng tam deuhdeuh hi. Toupa iitna kiphawk thuuk deuhdeuh ahihman in, i chitlouhnate kiphawk in, a ching bukim Toupa Jesu Khrist ah kinga in, i Khros kipuak in, Amah nung zuihna ah, ei leh ei kilimsaklou in Khalam gah suangkhe di'n pan i lathak thei zeelta uhi.
Pathian leh thil hoihte teelzawk theihna dia ei leh ei kilimsak lou thei dia Khros thilhihtheina toh thop i hih ziak un Pathian kiang kipahthu gen ni. Hon hih lui lou a, A iitna a hon hiip ziak in Pathian tung ah i kipaak petmah hi.

Laisiangthou kawkmuhna : Deuteronomy 30:19 ; John 12:31 ; Jakob 1:14; Kilaakna 3:15 ; John 9:40 ; Romte 7:15 ; Sam 97:10 ; Paunaakte 8:13 ; Nnasepte 17:28; Kahla 3:22-23.

March 8, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 67na (March 8):
Numeite om didan leh numeite apat lametna khovel in a neihdan toh Khristiante'n numeite a lametdan uh theihkhen louh phialphial in om sek hi. Poi kasa. Evi khelhna ziak in numei hihna ah mohpaih leh mohsak in ki om toutou hi. Toupa'n Amah lim kibatpih a, numei hi'n pasal hitaleh, hon bawl ahihlai in, pasal khenkhatte'n numeite amau sang a nepzaw hileh kilawm in, nuaisiah bawl mawk uhi. Apoi mahmah chu numeite mah in a numeipihte uh numei ahihnatak ua banghiam ziak in musitsawn tei zel uhi. Hiaidan a numeite koihna leh omdan Khristiante lak ah leng muh di tam mahmah hi. Khrist nei i hihngal uleh, Khrist dungsuun a i khan diing uh ahi chih i kitheisak thak hi. Pite, Nute, Tekpinu, Sungu, Zite, Nungakte om didan leh numei naupangte om didan kigen tam tuk in Pute, Pate, Tekpupa, Sungpa, pasalte, tangvalte leh pasal naupangte om didan kigen tam in ka thei kholkei hi. Apoimoh zawk ziak leng hikha diing in ka ngaihtuah hi. Ahialah, Pathianthu theihna leh zuihna natawm ah leng nepzaw, hatlouzaw leh guitunglouzaw dia koih leh lamet a a omsek ziak ua, Laisiangthou toh kituak a numeite'n khanna mu taktak ngellou uh adiam chih bang ngaihtuahna ah lian sek hi. Khalam ah a khanna di ua hunlem mulou/suhsak a om uh hikha diing hi. Innsung leh ta-le-nau kepna ah leng numeite mohpuakna tamzawtham mahleh, siangthouna nnasep toh kisai inleng ahih di uh leh Pathianthu hing apoimohna uh nepzaw tuanlou hi. I theihsa mahbang un, nupi tampite'n, apasalte uh thulimlouh ziak un, mohpuakna a puakzoh louhtan natawm uh a liangzaang uah puaktheih-puakmoh in paw kuihkuih ua, a bah chiang un lah, mohpaih in omzaw naak zel uhi. Numeite mohpaihna sang in iitna phawksak, hatna gotna leh hasotna piak sintam le hang, i innsungte uh leng damtheihhuai mahmah di'n ka gingta hi. Pathianthu toh kituak mohpuakna a sepkhiakna diing unleng, Pathianthu hing ahihna bangtak in poimoh uhi. Numeite kiniamkhiakna, thumanna leh thunuailuut dia Pathian in adeihna pen simmoh leh nuaisiahna di hilou a, Pathian mai a i om didan uh lahna hizaw hi. Khotaang in numeite hihna a lamet bang hilou in, Pathian in Amah lau dia A lamen bang in, Pathian theihna leh lauhna, A iitna leh hangsanna ah khangtou di'n numeite hasot ni hang.
Pasal amah vuak a phalou a, panpih ngai ahihziak un, Pathian in numei a siam hi. Numeite panpihtu ahihdan genna dia thumal 'panpihtu' a kizat bang in Khasiangthou 'panpihtu' ahihdan genna inleng huai thumal mah kizang hi. Panpihtu hihna niamzawkna hilou a, bukimna ahi chih Pathianthu mah in hon hilh ahihziak in, Pathian kiang kipahthu gen ni. Numeite toh kisai hi'n, hinkhua i zat didan uh, i om didan uh leh i ngaihtuah didan uh pansan dia Bible hon piak ziak in Pathian tung ah i kipaak petmah hi.

Laisiangthou kawkmuhna: Genesis 1:27 ; Genesis 2:18 ; Galatiate 3:28 ; Ephesate 5:21 ; 2 Korinthte 3:18 & 5:17 ; Romans 12:2 ; Philippite 4:8 ; Ephesate 4:3 ; Colossate 3: 10 & 16 ; 1 Peter 1:14.

March 7, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 66na (March 7):
I theihsa mahbang un, thil hoih himhim i neihna di'n pan laak takzet poimoh hi. A manpha leh deih huai penpen Pathian toh kikholhkhawmna kichiantak deih lou lah i omkei di ua ; huai na dia pan laak leng peih ngai hiveh aw. A Thu i lungtang a i vomte i sepkhiakna di leh mangbat chiang a i buaisiat louhna di un Amah toh kichimatna poimoh hi. Huai di'n, thuumna hinkhua hoihtak a bawl poimoh masa hi. Thuumna i chih Pathian i houpihna ahihman in, kamsiam leh gensiam ngailou a, Amah pomtheih di zawng suangtuah a thuum leng ngailou hi. I lungtang theichianpa kiang a thuum i hihman in, i lungtang toh i hihna bangtak in thuum le'ng, Ama'n za lou hetlou hi. Thuumna himhim i neih chiang un, Pathian - siangthou leh thupi, thilhihthei leh zahtathuai, iitna a dim lah Amah phawk utloute tung a thangpai, hehpihna a dim lah mi kisatheite dou, zahngaihna a dim lah mikhialte thutankhumpa ahihlam phawk kawm in, kingainiam lungtang toh naih ni hang. A iitte kem a, khamuan a, taisan ngeilou a, amau a dia ahoih chauh lemgeelsak ahihlam leng phawk kawm lai ni. Bangkim siamtu, bangkim hihthei leh bangkim tung a vaihawm Pathian' hehpihna mangtutphah zuan a nasatak a ginna toh kal suankhiakna ahihman in, kisit hetlou in, lah kingaihniam tak in i thuum diing uhi. Thuumna i chih "hihtheih sunsun" hilou a "hihtheih thupipen" ahihman in, i ngaihtuahdan uh leng khek poimoh kha diing hi.
Jesu Khrist ziak a thuumna tungtawn a siangthou leh thupi Pathian houpih thei i hihziak un Pathian kiang kipahthu gen ni. Mi siangthoute thuumna ngaikhia ahihziak in Pathian tung ah i kipaak petmah hi.

Laisiangthou Kawkmuhna: Ephesate 6:18 ; Matthai 6:7 ; Romte 12:12 ; Sam 145:18 ; Paunaakte 15:29 ; Luke 18:1 ; 1 Thessalonikate 5:17 ; Hebrute 4:14.

March 6, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)- Chingngaihlian Tunglut

Ni 65na (March 6):
Niteng hinkhua toh hong ton zelzel haksatna i tuah chiang un Pathian i ngai diak uhi. Ahia lah, niteng hinkhua ah, Amah limsak ngellou leh Amah toh kizopna ahoihna dia pan le la ngellou i hih uleh chu, haksatna i tuah chiang un, i lunggulh bang un, A hon ompihna, khamuanna leh iitna i phawk kholkei diing uhi. Mangbat hun chauh a dia Pathian deih i hihleh zaw, Amah deih i hikei ua, Ama'n hon piaktheih ei phattuamna dite chauh deih i hizaw uhi. Huaidan a Pathian lametna nei a, Amah toh kizopna nei dan a kikoih i hih uleh, kivel chet poimoh mahmah diing hi. I buaisiat chiang ua Amah toh kichimattak a va om guih theih hilou ahihziak in, huaibang hun a i buailouhna di un, hun teng a kichimattak a om poimoh hi. Huai dia eilam ah pan i laak theihdan leh Amah i naih theihdan khat chu niteng a thuumna neih ahi. Ann nekma a thuumna i neihzualte bang uh hilou in, huntuam seh khiak khat nei a, ei kia a, i hihna bangtak a, bangmah ki-iim leng neilou a, Toupa kiang a eilam thu va kigenna thuumna poimoh hi. Huaibang hun ah, Athu toh kituak a niteng hinkhua a pan laak diingdan, khelh kiphawkna leh theihtelna tuamtuam leh adangdang, apoimoh bang in hon na phawkkhesak zel hi. Hiaibang thuumna hun bawl haksa sek mahleh, Pathian toh i kizopna bawlhoih petmah ahihziak in pan lathak ni in, niteng ahih hial kei lehleng, a mun thei pen in hihleng, Toupa toh i zopna leng kinai hiaihiai diing hi.
Thuumna poimoh i hihlam uh thei a, i Hondampa'n khovel ah hong pai lai in, i thuum diingdan natawm uh, hon hilh ziak in Pathian tung ah kipahthu gen ni. Thuumna tungtawn a Amah naihthei leh Amah toh kizopna bawlthei dia lem hon geelsak ziak in Pathian tung ah i kipaak petmah hi.

Laisiangthou kawkmuhna: 1 Kronikul 16:11 ; Ephesate 6:18 ; Jeremia 29:12 ; Jakob 5:13; Matthai 26: 41 ; John 15:14 ; Matthai 6:9-13.

March 5, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 64na (March 5):
Pathian in mihingte hon siam in Amah thupina kilatna dia hon siam i hi uhi. Amah toh kikholkhawm a, kinamnaih leh kizom dia hon siam i hi uhi. Amah lemgeeldan toh kituak a i omkei uleh, khovel thilte delh in lungbuai leh hawm tak in i om sek uhi. Himahleh, Amah lemgeel toh kituak a i om chiang un, kipahna, khamuanna leh omzia kitheihna i nei uhi. A iitna i phawkdan dungzui un i khamuanna un zung kai a, A kepna i phawkna un Amah muanna leh Amah a kingak na leng liansak zel a, A piina i phawkna un omzia nei a kitheihna hon guan hi. Hiaite tengteng i hon phawk tam deuhdeuh leh, Amah tung a i kipahna leng lian semsem hi'n i phawk uhi. Jesu Khrist tungtawn a Amah a kipahna, sunglam apat hong phuulkhia i neih chiang un, Amah phat utna leh A nna sep utna in i dim uhi. A phatna laate, phatna thuumnate'n i hinkhua ah phatna tamsak hi. Phatna i neih tam deuhdeuh uleh i hih ditak hihkha in kitheihna om hi. Huai in Pathian toh kichimattak a om i hihlam hon kiphawksak a, huai in ei leh ei kipahtattheihna leng hon guan hi. I kipatna Toupa mah, Amah adi mah, leh Amah thupina di mah a hon siam i hihman un, i hihna di bangtak a i om chiang un, ei leh ei leng i kipaakta theita uhi. Apoimoh sang a kipaakta chih hizawlou in, Jesu Khrist ah kimuanngamna ahi zaw hi.
Khialsa a piang, khial veu zomah i hihlai un, A Tapa tungtawn a hong zong mu a, Amah kiang i tun theihna dia A Khasiangthou a hon pii ahihziak in Pathian kiang kipahthu gen ni. Eite pahtawi in A thupina neuchik a leng pungsak tuanlou himahleh, eite pahtawina Jesu Khrist tungtawn a hon sansak ziak in i kipaak petmah hi.

Laisiangthou Kawkmuhna: Romte 5:8, 11:36 & 8:28 ; Isai 43:7 & 21; Ephesate 2:10 ; Kolossate 1:16 ; Mika 6:8 ; Sam 8:46 & 100:2-3 ; Romte 12:13 ; Jeremia 17:7.

March 4, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 63na (March 4):
Niteng hinkhua ah lungsim ah natna leh liamnate i tuak zel uhi. Thil huaise pipi i tuahte uh gen nep theih hilou ahihziak in, kap leh mauna tham thil i tuah chiang ua, ahihna bangtak a i phawk uh leng poimoh hi. Mi i suun chiang unleng, suunna hun neih i kiphal diing uh ahi a, huai mah bang in thil leh dinmun i mansuah/chaan chiang unleng suun i kiphal diing uh ahi. A naa zen pi, ki natlouhsak teitei sawm a, ki hai hangsan sak a, i thuakte kitheihmohbawl leh "khemkhem" chi hiam, kichihsak gige hiam i hih uleh, gim law mahmah diing i hi uhi. I ki-iip sawt luat leh, ki sung puakdarh toutou a, atawp chiang in depression (lungsim natna), anxiety (mangbatna) leh lungsimlam natna tuamtuamte neih kholoh theih hi. I dinmunte uh ziak a hiaibang a lungsim a thuakna om taangpi sek ahihziak in, dinmun ahoihlam a a kikhek dungzui in ngaihtuahna inleng thovenna lam manoh sek a, lungsim a natna leh liamna in leng damlam manoh zel hi. Himahleh, dinmun kikhek louh ziak a damkhe thei lou leh, dinmun kikhek nung natawm a damkhe theilou a om i omleh, diahdiah lou in leh lunglel lou in, panpihna zong di'n kisakhe ni. Panpihna i zon baih leh, i gammangna a kipat kiikna leh lungsim a liamna leh natnate apat damkhiakna leng baihsamzaw hi.
Gingtute'n i khelhna uh kipuangtuah a, kithuumsak tuah a, i puakgikte uh kidawn zaangkhai tuah diing a Thupiak a om i hihman un, panpihna zon i chih Pathian thu toh kituak ahihziak in, Pathian kiang kipahthu gen ni. Amah khoihkha in mutheikei mahleng, A Khasiangthou tenna gingtute tungtawn a A iitna leh khotuahna mu i hihziak un Pathian tung ah i kipaak petmah hi.

Laisiangthou kawkmuhna: Sam 34:19 ; John 16:33 & 17:15 ; Mark 2:17 ; Galatiate 5:13 & 6:2 ; Jakob 5:16 ; Romte 12:10 ; Ephesate 4:2.

March 3, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 62na (March 3):
Innsung leh khotaang ah mohpuakna tuamtuamte leh i sep leh bawlte tungtawn in, i hihna, mahni kipahtatna, poimoh a kitheihna, manpha kisaknate leh i hinkhua omzia i mu uhi. Huai ban ah, midangte toh i kizopna ah, iitna muhna leh piakna ah, kipahna leh nopsakna hon guan theite zonna ah leng i kisubuai uhi. Himahleh, a phatuam theipen in kizang in, a manphathei pen in ei hihtheih khamtawk in kisuuk in, i hihna, omzia, manphatna leh kipahna delh in niteng in buai mahle'ng, akisam leh hon bukimsak zou mahmah lou khat om hileh kilawm a kitheih hun, mi kisuut thuuk ngamte'n i nei uhi. I theih leh phawk khak ngei le hilou lah, khovel in hon piak theih le hituan lou khamuanna, lungkimna, omzia leh iitna lunggulhna i nei mawk uhi. Kipatna bulbal neilou leh omzia neilou a hichi om mai kihilou ahihziak tak in, khovel leh mihingte khel a om, Pathian hungaihna chang i hon thei ua, Amah zonna ah i hong buai theita ua, mangbangtak a ah Amah i sapna uh hon dawng hi. Mi khial pen i hihlai a A tapa iittak eite a dia hon pepa'n Amah lam a i kihei chiang a thei lawtel ahih ziak in, Jesu Khrist a hon zongmuhsa i hihna uh hon kitheikhe sakta hi. Huchi'n i hihna leh omzia i hong kitheita a, khovel thilte ah buailou theilou sek himahle hang, buaipih pen in Toupa Pathian i neitheita uhi. Toupa hoih hi.
Hithei liai leh Pathian limsak ut kiomlou diing a, huchia i haina ua mangthang diing i hihlai ua, Amah lou a bukimlou i hihlam hon kiphawksak a, Amah lam a hon kaih nai ziak in Pathian kiang kipahthu gen ni. Kipatna phung leh hihna mihinglam ah suantham neiloute adi diak in, Amah hon suangtu, i phung ahih ban ah, A ta hihna leh gouluahtu dia hon bawl ahihman in, Pathian tung ah i kipaak petmah hi.

Laisiangthou kawkmuhna: Sam 42:1 ; Romte 8:3 ; Jonah 2:2 ; Matthai 11:28-29 ; Romte 3:11; John 15:4-5 ; John 1:12-13 ; Romte 8:17.

March 2, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 61na (March 2):
Maituah di leh phut di haksatna, khat khit khat in, i tuak tou zel uhi. Himahleh, haksatna i meltheih leh mualsuah mun tuk un, ngeinaseh chih le omthei mahmah lou hi. Tua i tuak lellel uh haksatna omkei leh le haksatna dang i tuak di uh om thouthou di ahihziak "Poikei, hithei mah ahi" chih kisin poimoh hi.  I tuah louh di pi tuak kisa in, poi sakna in i dim sek ua, pom theihlouhna leh nawlkhin sawmna khawng in phatuam hetlou di'n i buai ek sek uhi. Huchia hihlou in, a phut mualsuahna lam ah buai zaw in, thuaktheihna leh sin di omte ana sin in, tha thak laakna dia kipahna di Toupa'n hon piakte ah ana kipaak zel le'ng, khalam kia hilou lungsim lam ah leng piichinna kingah diing hi. Hih haksat a i om chiang un, hoihloutak in 'kei' kichihna hong om pah hi; thuak tuam lua kisakna leh vuallel tuam lua kisakna chihte hong lian pah hi. I huchih chiang in kingaihsiatna in hon zui a, lungsim leh khalam ah khang theilou in ki om den sek hi. Kingaihsiatna hong om chiang in, ei ngaihtuahdan kia paipih lou in, a hihna bang tak in, a dinmun leh athu pen vel chian le, i kingaihsiatna pen kingaihniamna in hei theih zel hi.
Kingaihsiatna leh kisit theihna mun a saltanna a pat Toupa'n hon suaktasak ahihziak in, Pathian kiang kipahthu gen ni. A nuamlou leh haksatna i tuahte un Toupa mai a hon khukdingsaktu leh Amah sut semna dia kivelchetna vanzat ahihziak in Pathian tung ah i kipaak petmah hi.

Laisiangthou kawkmuhna: Romte 5:3-5 ; Philippite 4: 6-7; 1 Peter 4:12; Galatiate 5:1 & 13 ; Romte 6:22 ; Kolossate 3:12 ; 1 John 5:4 ; Jakob 1:2-3.

March 1, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 60na (March 1):
Gamsung makai di leh mipite sik leh taang a ding diing heutu kiteel chiang in, mimal deihteelna tanvou nasatak in i zangkhe zel uhi. Khenkhatte'n sum leh pai, si leh nai suah in midangte deihteelna natawm suhsak in, pan la uhi. Mimal deihteelna i tawi chiat pen uh thilhihtheitak in, makai dia hong kipekhete lak ah i deihpen teelna di'n i zangkhia uhi. I theihsa mahbang un, Khristian i hihna uh khovelmi dangte lak apat i chituamna uh ahi. I deihteelna zatna ah leng hon chituamsak sak pah a, ei ut zawng leh deihzawng teelna dia i mimal deihteelna zangthei kihi nawnlou a, A sisan mantamtak a hon leikhia, i Pu/Neitupa' Pathian deihdan toh kituak a i zatkhiak di uh hizaw hi. Theitel ni. Zan a makai di teelna a hangsantak leh awlmohtak a, deihteelna i zatkhiak mahbang un, tuni'n leng hangsantak leh awlmohtak in, eite leitung pianma a hon teelpa i teelna di unleng i deihteelna uh zang sunzom le'ng chihhuai lawtel kasa hi. Toupa deihdante teel thei i hi chih chiamteh ni! Eite mohpaihna saltanna apat hong tankhia a, mualphou huaitak a sihsia a Khros ah hong gupna Thutak tawisangna di'n leng thilhihtheitak in i deihteelna uh zang sam ni uh maw!
Eite'n i deihteelna un Amah teel hetkei mah le'ng, Jesu Khrist tungtawn a Vaak leh thupina gam gouluahtute dia Ama'n hon teel ziak in Pathian kiang kipahthu gen ni. Khasiangthou haatna toh Amah deihlamte teel zel thei diing a hon thop ziak in Pathian tung ah i kipaak petmah hi.

Laisiangthou kawkmuhna: Ephesate 1:4 ; John 15:16 ; 1 Peter 2:9 ; Isai 43:10 ; Romte 12:2 ; Galatiate 1:10 ; Matthai 6:2 ; 2 Korinthte 5:17 ; Romte 14:8.

February 28, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 59na (February 28):
Mihingte'n i ngeinasehna thilte akipat thil thak ah kiheikhiak haksa i sa mahmah uhi. Heutu leh makaitu teelna toh kisai diakdiak in, i maingalsa, mimal a i phattuampihsa leh apaidan uh i theihsate khawng mah teel thak zihzeh buaihuai lou pen in i koih uhi. Ngaihtuahdan, chiindan leh paidan nuam hetlou, ninhuaitak leh gimhuaitakte i ngeinasehsa uh ahihziak in, ahoih zaw diing a kikhekna aangvan di'n ngaihdan thak, kivaipuakna thak leh makai thak hong omtheihna di'n hunlem i pe utkei sek uhi. Thil kikhek di i deih leh eileng kikhek ngai ahihziak in, a man i piak diing zaw i kingeinasehsa hangsantak a koihkhiak ngamna ahihziak in aman tampi suak hi. Ahoihzaw a kikhekna dia lametna nei i hih uleh, Khristian vai tak in, deihteeltheihna tanvou leh kiteelna vai a mohpuakna i neihte uh diktattak a i zatkhiak diing uh ahi. I hihna uh mangngilh hetkei ni uh; Setan' sal a mial lak a, gentheitak a manthaina a, hihna leh omzia neilou a i omlai ua, A sisan mantam tak a hong leikhia a, hihna thak, dinmun thak leh omzia thak hon pia Jesu Khrist' Min sesak mahmah kei ni. I pu/hon neitu kikhekta ahihman in, i dinmun thak dungzui ua, i deihteeln uh zaleentak a Amah deihdan toh kituak a suahkhe dia leitung pianma a hon teel i hi uhi; A Tapa' Sisan mantamtak a hon leikhepa mel zong kawm in i gamtaang di uh ahizaw hi. Khristian kichihtheihna ahihleh, tanvou leh deihsaktuamna mantamtak ahihdan Toupa Jesu Khrist Sisan luangkang sipsip zen a Pathian in hon piak ahi. Huaibang a hihna thupitak nei a, Khasiangthou a chiamteh i hihziak un, Pathian mai ah zaw khovel mite lak a kilangsar mahmah i hi uhi. Khristian i hihna bang un, maikai di leng, bukim omkei mahle uh, Toupa deihdan toh kituak thei pen teel i mohpuak uh ahi. Khristian kichi i hihleh, i hih khempeuh uh Jesu Khrist Min a Pathian thupina dia hih dia lametna sangtak i tung uah kinga hi. I kam un "Khrist' Min in hiai ka hih" chikhe sese keileh leng, Khristian kichi i hih uleh, i hih khempeuh uh Khrist Min a hih i hihtaak man un, i hih dia kilawm lou leh i sia leh pha theihna hon kam zen leh kisuanglah zen a bangmah i hih uh ngailou ahi chih i theih uh poimoh hi.
I deihteelna uh zaleentak a i zattheihna di ua Setan natawm in hihlui a vaihawmkhum theilou dia hon bawlsak ziak in Pathian kiang kipahthu gen ni. Pathian tate leh A gouluahtute hihna dinmun manphatak leh deihhuaitak mai hon piak ziak in Pathian tung ah i kipaak petmah hi.

Laisiangthou kawkmuhna: Ephesate 4:1 ; Romte 12:2 ; 1 Korinthte 7:23 ; 1 Peter 1:18-19 ; Sam 11:7 & 25:8-10; Galatiate 5:16-26 ; Phillipite 4:8-9 ; 1 Timothi 1:19 ; Kolossate 3:5-17 & 24-25 ; Johan 1:12 ; Romte 8:17.

February 27, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 58na (February 27):
Mihinglam a sisan a kizopna i neih pihte himhim ei a ngeingei hi'n i koih uhi. Huaibang kizopna tawpsan theih hilou in i pom ua, amau tung ah mohpuakna leh kiphalna leng sisan a i kizoppih louh midangte sang in i ngai thupi zaw uhi. Pathian toh i kizopna uh Eden' Khelhna ziak in kitat in ana om hi. Himahleh, eite hon Siampa'n i tung ua a mohpuakna koihkhe thei ahihlai in, koihkhe hetlou a, A tapa Jesu Khrist' Sisan manphatak tungtawn in Amah toh hon zomkik hi. Tunia kiphawksak thak di thil i neihte lak uah, Pathian toh leng sisan a kizom i hihlam uh kiphawksak thak le'ng khalam masawnna ah hon panpih mahmah di'n i gingta ahi. Mihinglam a sisan a kizopna leng ki-awngsuut theihna thil hilou a koih a, apoimoh bang a, eilam a i hihtheih theih suah in, i mohpuakna leh iitna semkhe di'n nakpitak in pan i la sek uhi. Huaidan mah in, Pathian toh Jesu Khrist' sisan tungtawn a i kizopna uh, kizopna dangteng sang a manphazaw ahihdan i Toupa sisan luangdan in genkhin ahihman in, Pathian toh i kizopna in i lungtang leh gamtat bangchibang in hon sukha a chih avangkim a ngaihtuah dia poimoh hi'n i koih hi.
Pathian in Amah kipahna di leh Amah pahtawi dia hon bawl i hihlai un, Amah helsan leh engtat khum khawng a i omlai ua, hon hih chimit mailou a, A Tapa Jesu Khrist sisan a Amah toh kizopna manphatak hon bawlsak thak ziak in Pathian kiang kipahthu gen ni. Ei mikhialte tatkhiakna dia hawi khat leng neilou a, i phulouh iitna nna hong sep ziak in Pathian tung ah i kipaak petmah hi.

Laisiangthou Kawkmuhna: Genesis 2:17 ; 1 Timothi 5:8 ; Kolossate 3: 18-20 ; Kolossate 1:20 ; Ephesate 1:7 ; Luke 22:20 ; Romte 3:24-25 ; 1 Peter 1:18:19.

February 26, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 57na (February 26):
Khristian kichi tamtakte'n Pathian hihna leh a lemgeeldan pom haksa i sak uh hunkhop om hi. Huaite chu, dotna i bawlte uah hong kilangkhe sek hi: "Pathian hoih, iitna a dim leh bangkim tung a thunei ahihleh bangziak a khelhna, kidouna, haksatna leh natna chiteng a om phal a, bangziak a hichituk a i gentheih uh phal a?" chih in genkim vek kei mahleh, a taangpi genkha in i koih hi. Vangam bawltu Pathian i ngaihtuah chiang un nuam isa ua, Meidiil bawltu Pathian mah ahihlam i ngaihtuah chiang un nuam i sa kei mawk uhi. Nop salou lua in, Amah sik leh tang bang in i na kisuanglah sak uhi. Amah theiloute tung a A thangpaihna tung lellel ahihlam khawng, vak leh mial siam a, kituahna leh gilou leng siampa ahihdan leh ahoih hi'n ahoihlou hitaleh, A kam apat suak ahihdan Bible in hon hilh ahi chih thei ni! Pathian ahihna bangtak a pomlou a, eite pom theihdan toh kituak khawng a taklang teitei sek in, Amah sang a eite kikoih thupizaw a, eite lungkimna di leh zat changkang dia Amah om mah i bangsak sek uhi. Pathianthu ahihna bangtak a i pom diing uh ahi a, i ngaihtuahna uh leng Pathianthu ahihna bangtak a i pansansak diing uh ahizaw hi.
A thuthu a gamtaang, hoih asak bangbang a lemgeel ahihlai in, A lemgeelna ah, Amah thupina kia hilou in ei mihingte suahtatkna di leh Amah thupina koppih a i omtheihna diing un, theihsiamzoh vuallouh iitna a hon iit ziak in Pathian kiang kipahthu gen ni. Amah Pathian siangthou in ei khelhna a dim mihingte Amah toh kituak thak thei dia, Jesu Khrist tungtawn a hehpihna nna hong sep ziak in i kipaak petmah hi.

Laisiangthou kawkmuhna: Isai 45:7 ; Kahla 3:38 ; John 3:36 ; Ephesate 2:8 ; Romte 3: 24 ; Titus 2:11 ; Romte 5:8 ; 2 Korinthte 5:21 ; Johan 17:17 ; 2 Korinthte 6:7.

February 25, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 56na (February 25):
Khristiante'n thuumna hinkhua a poimohdan i theih tuk un, "Ka thuumna hinkhua lungtunhuai kasa" chi ngam i om di un ka gingta kei hi. Sa mi i hihman un, i thuum chiang unle i salam poimoh di uh kingen tam mahmah a, salam vai a haksatna apat hutkhiakna, dinmun kikhekna, nek-le-taak vai, sinnalam leh sepnalam a masawnna vai, salam a bitna, damna leh hinna chihte ngetna leh huaite ziak a kipahthu genna khawng hi taangpi sek hi. Ahi di mawng ahihlai in, a hi didan hikhin vek lou hi. Salam poimoh leh deihte ngetna leh kipahthu genna ban ah, khalam thilte'n leng i thuumnate uah sunglai i tangsak luat diing uh ahi.
"Na Thu mang di'n, utna hon guan in"
"Hon simmoh leh dikloutak a hon bawlte thuklou di'n kidektheihna hon pia in"
"Mi iitsiik lou di'n ka lungtang hon kepsak in ",
"Na Thu toh kituak a dinmunte maituah thei di'n hangsanna hon pia in "
"Ka kam kisuum thei di'n hon panpih in"
"Mi gensia leh hekse lou di'n hon veng in",
"Lungsim sia pulou di'n ka lungtang kem in",
"Ka tate nang deihbang a ka kep theihna di'n... "
"Ka zi/pasal adia Na Thu toh kituak a ka om theihna di'n....."
"Ka Nu leh Pa zahtat thei di'n...." chihte khawng i thuumnate uah hel tam thei le'ng, Toupa Pathian adi'n leng i thuumnate uh gimnamtui diing hi.
Thuumna ngaikhia a, A thupina dia hon dawng zel Pathian kiang kipahthu gen ni. Khalam poimohte hon pe thanuam Pathian i neih ziak un i kipaak petmah hi.

Laisiangthou kawkmuhna: Jakob 5:3 ; Paunaakte 15:8 ; 1 Johan 5:14-16 ; 2 Kronikul 6:21 ; Ephesate 1:18 & 6:18 ; Matthai 6:41 ; Romte 12:12 ; Luke 11:13.

February 24, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 55na (February 24):
Gingtute hinkhua haksatna leh nopna kigawm ahi. Niteng a i Hondampa nung zui ngetnget a i pai lai in, Bible sim lunglut theilou, khalam ngaihtuahna paisau thei lou, kipahna le om ngellou leh thuumna neih khawng leng pai ngellou - a pumpi a Pathian toh i kizopna bang dau hilehkilawm a phawk hun kiphukha zel hi. A khialthei taksa leh Khasiangthou hon piina kikangtuah den ahihziak in, gimna in hon pumbuah sek a, hiaibang hun i tuahte ziak in kimohpaih hetlou di'n pilvang ni in, lunglel in leng om kei ni. 'Thil hithei mah ahi' chi in, sinna hunbi a pom in, tutan a Pathianthu i na theihsate ana hinpih sunzom tou zel in, thuumna leng tawpsan hial lou in, khelh ngaihdam nget dite ana ngen sunzom zel in, ana om kinken le'ng, harkhiakna hun le hong tung zel diing hi. Toupa' n A tapa tungtawn a hon zong muh, A Khasiangthou tungtawn a hon chiamteh i hihman un, Amah lampang a ahih di ana hihlou leh hon letkipna ana kol hi hetlou ahi. Hiaibang a keu tak a om hun Toupa'n A phallouh a tuak kihilou ahihman in, ei hon limsak utlou hiam, hon gawt hiam leh i tuhgah hon lousak chidan a ngaihdan hon omkha sekte, Zuaupa a kipat ahi chih thei in, ina khiinkhe teitei diing uh ahizaw hi.
I thuum theihlouh chiang a le Khasiangthou in hon na mausak a, Pa taklam a om, gensaktu Jesu Khrist leng nei i hihziak un, hotdamsate adia gamdai a om hun a patauhhuai lou ahihman in, Pathian kiang kipahthu gen ni. I bah leh chauh hun a leng ginomtak a hon ompih a, Amah deihlam a hon pii teitei Pathian tung ah i kipaak petmah hi.

Laisiangthou Kawkmuhna: 2 Korinthte 1: 3-9 ; 2 Korinthe 4:7-10 ; Johan 14:24 ; Jakob 1:2-4 ; Philippite 1:6 ; Johan 3:16 ; Ephesate 1:13 ; Johan 3:44; Romte 8: 26 & 34.

February 23, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 54na (February 23):
Khristian i hihna mi'n hon theihna uh ahihleh, khagahte i suangkhiak ban uah i gimthuakna uah ahi. Khristian minpu maimai hilou a, Khrist nungzui taktakte zaw kongkawchiik a lut in, gimthuakna tampi lak ah kipaaktak in lampi kawchiiktak zawt uhi. Thil lamdang (miracle) leng ahi, dahna tampi toh kipaaktak a Toupa nungzuih di chihbang! Khovel haksatna - sihna, natna, zawnna leh gentheihna chi tuamtuam i thuakte uh kia gen kahi kei hi. Lampi kawchiiktak a Toupa nung i zuihna uh leh i zuih ziaktak ua i thuaknate uh gen kahi zaw. Zuauthu a ngoh leh tupluih a hihnat leh bawlsiatna i tuah chiang ua, i thukkik louhte uh bang, i tung a khial lah ngaihdam hon ngenlou i ngaihdamte bang, taksa utna i kideek tuntunte bang, i kam uh i kisuum tintente bang, mi'n hon hihnat chiang ua phuba laaktheihna hunlem i muh chiang ua le i limsaklouhte bang, iitsiikna meikuang hihmit a, mi masawnna leh hamphatna kipahpihna taktak toh i kipahpihnate bang, sou leh san zen a i heh chiang ua le kideektheitak a, i lungsim leh kimkiang dinmun i bawllem sekte uh khawng ngaihtuahthak mahle, salam utna chiteng limsaklouhna himai ahihziak in, gimthuakna leh i Khros puak leng ahi uhi. Pathian thilhihtheihna lamdangtak in ei ah asep chetna ahi a, A thupina i theihpih leh koppihna leng ahi. Khros' vualzohna chetna ahi.
Lei taksa pukawm a, salam utna chituamtuamte toh a puuksesa khovel hiipnate nengniam thei deuhdeuh dia Khasiangthou toh hon thop ziak in Pathian kiang kipahthu gen ni. Jesu Khrist batna a khang thei dia khelhna kolbuh hon suut sak a, dik hon tangsak a, siangthou hiaihiai dia hon bawl lellel ziak in Pathian tung ah i kipaak petmah hi.

Laisiangthou kawkmuhna: Galatiate 5:22-23 ; Matthai 7:13 ; Romte 5:3 ; Philippite 1:9 ; 1 Peter 2:21 ; 1 Peter 4:1 & 13 ; Luke 9:23 ; 2 Korinthte 4:17 ; Galatiate 2:20

February 22, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 53na (February 22):
Niteng hun buaitak leh hih di neilou a i zatna uah, Bible simna hun khat bek zang di'n i kichou ahi. Thulimlou tampi buaipihna in i hunte uh i zang khin ua, i poimoh masa Bible sim di bang sotsot in omkha naak hi. Huaiziak in, tuni sung in hun khat bek Bible simna ah hun pe di'n kisakhe ni. Pathianthu i chih i khalam ann ahi a, i khalam hiselna leh khanna dia poimoh ahi. I kha gilkial tak a koih i hihleh, i salam hinkhua a pawlawng in hoih mahleh, khalam keu tak hithei ahihman in, niteng hinkhua zatna ah leng, lungkimna taktak omtuanlou diing hi. Khovel haksatna leh mohpuakna tuamtuamte ziak in i lungsimte uh gik in, i ngaihtuahnate uleh hunte kibichilh mahleh, Bible chaang bangzah hiam bek sim a ngaihtuahna piakzekna di hun neilou lawmlawm dia buai kuamah i omkei uhi. Khalam niteng ann i nekkhei leh, khalam thagum leng kineilou dia, buaina leh haksatna hunte ah khalam thagum i suah di omlou dia, pang zou lou in ki omkha thei hi. Asia-apha khenthei lai a, i khawphawkna hoihlai ahih leh, Bible sim ngeilou in mi thugen leh thugelh (hiaite hon panpihtu ahi uh) chauh ah kinga kei ni. I ann tak Bible ahi a, mi neksa leh valhsa kia in kinga kei ni. Eimah ngei in i khalam ann i kinek chiang in, Toupa'n, A Khasiangthou tungtawn in Amahlam thil kiselgute theihsiamna leh theihthuukna ah hon pii zel a, i hinkhua leng sianthouna lam ah kihei khe hiai hiai hi.
Tuni i khalam ann nekkhop di muhtheihna di Bible, a bu a neiloute'n le mahni phone dungzui a app store chiat ah awlsamtak a download theih ziau a om ahihziak in Pathian kiang kipah thu gen ni. Hichituak a awlsam a Bible i neihtheihna di ahunhun a mite tungtawn a kipumpiakna, gimthuakna leh sihna natawm a A nna asep ziak in Pathian tung ah i kipaak petmah hi.

Laisiangthou kawkmuhna: Matthai 6:11 ; Matthai 5:6 ; Johan 6:50-51 & 55-56; Matthai 6:33 ; Hebrute 5: 12-14 ; Kilaakna 20:4.

February 21, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 52na (February 21):
Salam damlouhna leh lungsimlam liamna chihte i tuak zelzel uhi. Khamite khovel a tenglai i hihman un, Toupa toh i tonna hinkhua ah leng khemna leh gimthuaknate ziak in bah hun leh ginlelh hun chihte omthei tham hi. Gingtute adia ahaksatna diak chu, hiaibang a hun haksatak mai i tuah chiang unleng Pathian' thu manglouhna dia i dinmunte uh suanlam thei kihi hetlou hi. Hiaibang hun ah theihpihtu, thuakpihtu leh thuumpihtu i neih kei leh, khovel thilte ah puuksuk dia hon sawllui tuntun sek Melma Setan hat mahmah ahih ziak in, panpihna zong poi sa hetkei ni. Toupa Jesu, i Siampu Lianpen in i hatlouhdan i kitheihnate hon theihpih lawtel ahihziak in Amah kiang mah ah i dahna, haksatna leh mangbatnate tun in, taipih zaw ni, khovel thilte ah hilou in. Toupa kiang a i taina ah, Amah deihbang in, Jesu Khrist a i sanggamte hon taipih di i neih diing ahi chih leng i theih uh poimoh hi.
Panpihna i poimoh hun ua, A Hehpihna mangtutphah kisuanglah hetlou a i naih theihna di ua, khemna ana tuaksa, (khial bel khial hetlou) hon theisiam mahmah Siampu Lianpen Jesu Khrist i neih ziak in Pathian kiang kipahthu gen ni. A haatna in tawpna neilou ahihlai in, eite hatlouhnate hon phawkpih a, panpihna i ngahna di ua lem hon geelsak Pathian tung ah i kipaak petmah hi.

Laisiangthou kawkmuhna: Job 14:1 ; Johan 16:33 ; 1 Korinthte 10:13 ; Philippite 4:6-7 ; Johan 14:1 ; Romte 8:1-4 ; Hebrute 4:15-16.

February 20, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 51na (February 20):
Khovel pumpi a mihingte' paidan taangpi ahihleh, mahni hihna i kipomdan dungzui un i hinkhuate uh i zang uhi. Hihna tuamtuam i nei ua, huai i hihnate uh dungzui in mohpuakna tuamtuam i semkhe zel uhi. I hihna toh hong ton mohpuakna i sepkhiakdan dungzui un leng lungkimna, omzia kitheihna leh kipahna i mu uhi. Ei Khristiante leng khovel ah lei taksa toh khosa lai i hihman un khovelmite i hilai uhi. Himahleh, i chituam uh poimoh ahihziak in, i chituam theihna di un, i hihna leh omzia hong kipatna leh i kibulphuna chu Jesu Khrist a hotdamna i ngahna uah ahi masa pen hi. Jesu Khrist tatna ziak a, Pathian' tate i hihna bangtak un kipom le'ng, niteng hinkhua i zatdan uleh, i mohpuaknate uh i sepkhiakdan uh hong chituam diing hi. Chituamtak a Pathian' tate bang a i hin theihna di ua, thilhihtheitak, Pathian' Khasiangthou toh thop leng i hita uhi. Pathian' ta i hihna pansan a, pasal hihna, zi hihna, pa hihna, nu hihna, ta hihna, pi hihna, pu hihna, sanggam hihna leh adangdangte leng gen tel in, nekzonna nnasep leh khotaang a hihna leh mohpuaknate i sepkhiak diing uh hita ahi chih mangngilh pahpahte i hihziak un, ni thak mel mu a i omleh, i kitheih thaksak masak pen di ua poimoh masa pen ahi chih i kithei thaksak hi.
Bangmah hilou a mangthai diing lai, hihna kichiantak, deihhuaitak leh manphatak - Amah tate hihna leh A gou luahtute hihna, A Tapa iittak Jesu Khrist tungtawn a hon piak ziak in Pathian kiang kipahthu gen ni. A tate hihna tungtawn ua, chituamtak a, khovel midangte etton di leh A vaak langsaktute hidia teeltuam i hihziak un Pathian tung ah i kipaak petmah hi.

Laisiangthou kawkmuhna: Galatiate 3:26 ; Johan 1:12 ; Romte 8:14 ; Galatiate 4:7 ; 1 Johan 3:10 ; Ephesate 5:8 ; 1 Thessalonikate 5:5 ; Sam 118: 24-29 ; 2 Peter 1:12.

February 19, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 50na (February 19):
Tulai diakdiak in, ei Khristian minpu atamzawte'n i hih di uh thei zou mahmah lou hileng kilawm hi. Khovel pumpi hi'n i tenna gam hitaleh, a hunhun in thil hong kithang a, ahunhun in thil hong kipawkhe zel hi. Hiaidan a khovel thilte hi'n hunbi neitak a hun in hon puakkhiak thilte'n hon nawk chiang un, Khristian i hihna uh puansilh suahkhiak bang a suahkhe thei zel mah i bang uhi. Thil diklou leh khelhna ahi chih thei kawmkawm in, kitheilou lemsak teitei in i gamtang zel uhi. Huaitan a hunsak hile'ng thukhat, mahni'n diktat louhna leh khelhna a midangte le telsak teitei sawm chihte bang i mukha/theikha di un ka gingta hi. I hih di theilou leh i hihdi tan theilou a i om zelzul naak pen uh thildang bangmah ziak hilou a, i hihna uh i kitheihlouh ziak uh hi gige hi. I hihna i kitheihna dia le kingaihtuah leh kisuut leh kisui ngai zel a maw! I hihna i kitheihlouh chiang un, i hih di uh le kitheilou a, pansan leh kingakna di bulbal omlou in i om sek uhi. Asia-apha natawm khenthei lou hile hang kilawm in i sah gawpta uhi. Khrist' hotdamna hinsan leh dinsan a nei a, Amah suangpi kip tung ah i kingak kei uleh, khelhna huihpi leh siatna tuipi kihawt teng in hon nuai ek zel diing hi. Hehpihhuai khotaang i hihlam uh le kitheilou in i om ua adahhuai mahmah hi. Pathian deihlou i hih uleh leng, Amah deihna lungtang ngen in thuum ni uh maw! Kihei ni uh! Kisiik ni uh!
Lametna hing Jesu Khrist om ahihlam theihkha thei dia hun leh mun bawlsak a om a, Amah hotdamna tungtawn a Pathian hing toh kichimat theihna lampi hon bawlsak ziak in Pathian kiang kipahthu gen ni. Pathian' zahngaihna in a hon batphaklouh di zen a pialmang gawpta hinailou i hihziak un Pathian zahngaihna ziak in i kipaak petmah hi.

Laisiangthou kawkmuhna: Sam 50:16-22 ; Isai 33:13-14 ; Isai 28:16 ; Mark 1:15 ; 1 Korinthte 3:11 & 10:4 ; 1 Peter 1:3 ; Joel 2:3 ; Ephesate 2:4 ; Luke 1:50.

February 18, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 49na (February 18):
Khovel a mi lar taktakte - laasiamte, lemchiingsiamte, kimawlsiam mite leh adangdangte ngaihsan, etton leh biak in om uhi. A sepkhiak uleh a tangtunsak zohte uh ziak in mite lungsim naaktak in sukha ua, ngaihdan, lungsim put leh hin diingdan natawm amau mimal paipihte mite'n a koppihtheih hial khop di un mite zou thazoh mahmah uhi. Huaidan a mi ngaihsanna i neih chiang un, zumpih hetlou phetlou in, i engtatna di khawng unleng i zang zomah uhi. Mimaltak a hon theingei uh le hilou, i mimal hinkhua a lungtang toh hong kigolh a, ei buaina, natna, gimthuakna ah hon limsak pha leh panpih thei uh chihle hilou uh ahi. I samitna in a lunggulh khenkhat tangtungsaktu a pang uh ahihziak in, tomchik sung daih alemlem (fake) lungkimna hon pia uh hilel veh aw. Adiak khol in ei Khristiante leng, i theihlouhkaal ua hiaidan a milim biakna (idolatry) khawng, Pathianthu toh kituaklou ngaihdan leh hindante khawng in i hinkhua uah thuuktak a zungkaisak kha i hi uhia chih i chetna di'n kiveelthak zel poisa kei ni. Khovel (Setan) thilte mah buaipih pen a nei di i hi uhia ahihkeileh, Vangam (Khrist) thilte? Deihzawk teel theih hun beithei ahi.
Pathian in A Tapa iittak Jesu Khrist tungtawn a mimaltak a, iittak leh a tawpkhawk suah a hon sapna bangmah a ngailoute himahle hang, a zahngaihna ziak a i damsung leh i ngaihtuahna in thil a suangtuah theih sungteng a zekai omsaklou ahihziak in Pathian kiang kipahthu gen ni. Mualphou tawpkhawk leh huaisethei pen a ei thuakna leh sihna di mun a hong si i Toupa Jesu Khrist ziak in i kipaak petmah hi.

Laisiangthou kawkmuhna: 1 Johan 2:15-16 ; Kolossate 3:2 ; Jakob 4:4 ; Romte 5:8 ; Kolossate 3:5 ; Galatiate 3:13 ; 1 Peter 2:24 ; Isai 43:1.

February 17, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 48na (February 17):
"Bangziak a hoihna leh iitna a dim leh bukim Pathian in hichituk tel a haksatna i tuah uh phal a de aw?" chih dotna Khristiante lak ah tam mahmah hi. Dotna poimoh ahih ban ah, a dawnna i Laisiangthou in asuk-atou leh adung-avai in hon hilh hi. Sihna, natna, gentheihna leh ase teng hong kipatna chu Adam leh Evi puuksiatna (Khelhna) leh hoihna khatle neilou i melma Setan ahi. Pathian in siatna leh bukimlouhna khat le neilou hi - Amah hoih bukim a, eite tung a atup tengteng leng hoih gige ahihban ah, thil hoih tengteng Amah akipat hong kipan vek ahihlam i Bible in hon hilh hi. Khelhna leh Setan ziak a i thuaknate uh Toupa'n Amah naihna dia hon phalsak leh hon heisak ahizaw sek hi. Khovel haksatna leh khelhna lak a hon humbit lahlou Pathian in haksatna panglou a Amah naih a, Amah laudan sin di hile hang, haksatna leh gimthuak hon phal hetlou diing hi. Khovel in hon piak nopsakte tungtawn a Pathian naih leh Pathian lauh sin mi i theikha ngei uhia?
Haksatnate tungtawn a mahni kisuut thakna di, Pathian poimoh i hihlam i kiphawkna di, Pathian thupina leh haatna i muhna di, thuakzohna leh dohzohna i kisinna di, khalam a khanna leh Amah hon tatna toh kituak a manphatak a i hinna di ua ei ah leh eite tungtawm a A nnahoih sem ahihziak in Pathian kiang kipahthu gen ni. I gimthuaknate uh omzia neitak a, Amah muhna leh naihsemna dia thil manpha hon suahsak ziak in Pathian tung ah i kipaak petmah hi.

Laisiangthou Kawkmuhna: Sam 34:8, 86:5, 107:1, 135:3 ; Jakob 1:17 ; Romte 2:4 & 8:28 ; 2 Korinthte 4:17 ; 2 Timothi 3:2 ; Hebrute 2:10; 2 Peter 1:5-9.

February 16, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 47na (February 16):
Toupa Jesu Khrist thumanna ziak a Pathian' toh kichimattak a omthei i hihman un, i kipaak petmah hi. Bangkim a kipaak dia thupiak i hihman un, i kipahna phungpi zaw i hotdamna mah ahih ziak in, hiai thutak i kiphawksak thak gige uh poimoh hi. Bangkim a kipaak di chi i hihleh, sihna, natna, tuahsiatna tuamtuamte ziak a le kipahthu gen di i diam? Ka Nu sihnung sawt law lawmlawm lou in, ka suun saan laitak himahleh, "Toupa, ka Nu hinna na laak ziak in ka kipaak" chi in kipahthu kana gen hi. Haihuai sa kawm leh poisakna neilou hileng kilawm in leng kana kithei hial hi. Himahleh, bangkim a kipaak dia thupiak i hihdan uh mi khat in hon gen ziak a, theihtelna a kipat hihlou theilou (conviction) a ka kitheih ziak ahi. Aziak ahihleh, Pathianthu (Pathian) in chi hiven. Huaidan a kipahthu ka geen khit akipat in bangchi hiam in suakta kisakna leng kana nei a, maban a Toupa toh ton taktak hinkhua ka zatna di cheplawkna leng hong suak hi. Pathian thu toh kituak theihtelnate chu haihuai sim bang mahleh, i hihlouh theihlouh uh ahi. Amah thu toh kituak thumanna athupidan chu, Amah munailoute le hotdamna lam ah pii a, hotdamsate le, a nung i zuihna ah i lampial di hong veng a, hangsanna in hon thuam a, i deih mahmah uh kipahna leng hon guan hi.
Jesu Khrist' Thumanna ziak a suakta i hihman un, Khasiangthou thilhihtheihna toh, Amah suun sem dia thumanna mah ah hon pii zel ziak in Pathian kiang ah kipahthu gen ni. Mihing gam ah hiaibang a thumanna haihuai in, vuallelh huai in, zumhuai in, huathuai mahleh, Toupa deihdan ahi chih theihtelsak a i om ban ah semkhe dia haatna leh hangsanna i neih uh bangleng Toupa thupina i chetna ahihman in i kipaak petmah hi.

Laisiangthou kawkmuhna: Philippite 2:8 ; Romte 5:19 ; Hebrute 5:8-9 ; Johan 14:15 & 23; Luke 11:28 ; 1 Peter 1:2 ; Nnasepte 5:32 ; Jakob 1:22 ; Luke 9:23.

February 15, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 46na (February 15):
Siangthou leh diktat, dembei leh iitna a dim Pathian bete i hihziak un, mihinglam kia a i ki-et chiang un, ki-sitna in kidim zel hi. A Thu gelhkhiak leh counselling a ka kizatna bang ah leng kisuanlahhuai leh huphurhhuai kasak tuntun hun om tham hi. Himahleh, Jesu Khrist ah hon tankhia a, hon sapna leh zatna ahihziak in, keilam a kisittak a ka kikoih thupina koihkhia in, ka hih di hih zel di'n Ama'n hon pii zel hi. Mahni kimaituah a, i ki et thuuk ngam chiang in, ei vuak a (Khrist tel lou in) bangmah hilou, chitna leh hoihna, pilna leh diktatna, kilawmna leh kipahtat di leh kipahna di natawm neilou i hihman in, beidotna, lungkiakna, mahni ki mohsakna leh sih utna khawng in hon pumbuah sek hi. I kiimkiang i en a lah, ei bang ngen mi kimu a, mi a i muhpeihlouhte eimah ngei a le om ahihziak in leng tawlhuai sek hi. Hiaibang a lungliaptak a om hun omthei ahihban ah mial lak a omkhak zekzek poi hetlou hi. Ei ah leh mi ah lamet di thil hoih leh lungsungtawng a kipahna nei taktak lou i hihlam i hong kitheihkhiak ziak mahtak un Jesu Khrist hunteng in kipoimoh hi. Amah ah i suahtatna, lametna leh kipahna omlou himaizen leh, hiai laigelhtu leh a simtute bangzah hiam leng Pathianthu tungtawn in i kisutuahkha hetkei diing uhi. Pathian poimohtak a om chih mihing muhdan leh theihdan in vuallelh huai leh haihuai bang mahleh, i hihna di bangtak a omkha kihi zaw hi. Poi sak diing hiaizah lak ah, Pathian poimohna pentak poi sak diing in i koih hetkei hi.
I haatlouhna tak, i hihtheih nawnlouhna tak leh beidotna tak a Amah leh Amah ei ah leh ei tungtawn a hong kipahtawi Pathian i neih ziak un Amah kiang kipahthu gen ni. Eilam kikoihthupina hi'n kingaihsiatte hon khet chipsak a, Amah deihdan a, Amah thu toh kituak a hon piina dia hon delh peih Pathian tung ah i kipaak petmah hi.

Laisiangthou Kawkmuhna: Matthai 5: 48 ; Sam 96:9 ; Romte 3:10 ; Hebrute 4:16 ; 1 Johan 5:4 ; 1 Peter 5:6 ; Johan 15:5-6; Isai 48:17.

February 14, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 45na (February 14):
Pathian iitna thupidan leh theihzoh vuallouh a khamuanna hon tun ahihdan theikha a, huai a kibulphuh thei mite zaw, lei ah leng Vangam om didan chetlawkna piak a om hi un i koih hi. Pathian' Tapa Jesu Khrist, Vaan nuse zen a Leitung a mihing taksa puzen a, sukkhaktheih, muhtheih leh zaaktheih dia hong khosa a, A hinna eite tatkhiakna man dia hong piakna ah Toupa' iitna chiangtak leh haihvuallouh in taaklat in omkhin hi. Amah Khovel a hong pai lai in, mit a mu, bil a za leh khoihkha dia ana omte theihpihna en leng ginna toh i gingta hi. Mihingte'n i theihsiam didan un, mi diktat leh mi hoih khat adi natawm a sihna chih omkha thei mahleh, chiamteh tham om hetlou diing ahihlai in, Pathian siangthou mihing taksa pu a, migilou leh khelhna a dim mihingte adia hong si ahihdan Sawltak Paul in Toupa iitna hilhchetna di'n gentehna in hon hilh hi. Mikhial (Pathian deihlou) i hihlai in, i sik a Khrist a sihna ah Pathian in hon iitna langsak khin ahi chih khatvei gen lai ni. Hiaikan a iitna bukim leh dembei, tangtawn daih diing hizomah lai, iitna leh iitdan adang om nawnlou hi. Hiaibang A hon iit, Pathian min i phat ahi. Pawlawng a phawkna, mit utna, lungsim utna leh taksa utna suk buchinna di tan a kideihtuahna khawng iitna sa in lawm zaizai mahle'ng, zi leh pasal a kinei i hihngal keileh zaw, hiaibang a ki-iitna in ahoih sang in siatna tampi tunzaw sek hi. Banghiam deih muhna leh mahni phattuamna di kilamet tuah ziak a pawlawng iitna kilantuah lel khawng i hihleh bang chu, a khonung a kisiik tuntun na dia hon gamtaang saktu leng hisek hi. I hoih leh hoihlai a ki-iit, i hoihkei hiam leh i kisuksiat nung ua ki-iit nawnlou leltakte khawng hi hang e. PATHIAN IITNA a kilatna, Jesu Khrist mah buaipih tham pen a, buaipih masak pen in nei le'ng chihhuai law veh aw!
Toupa'n a iitna bukim a hon iit masak ziak chauh leh ziak chauh a, i zi leh pasalte hi'n, i nu leh pate hi'n, i sanggam leh lawmte hitaleh, iitna bukimloutak mai pia leh amau apat huaibang mah a iitna bukimloutak sang thei hilel hang. Toupa hon iitna, Jesu Khrist ah mu a tangkha i hihziak un Pathian kiang kipahthu gen ni. Khrist ah, Pathian hon iitna akipat bangmah in hon khen lou diing ahihziak in Pathian tung ah i kipaak petmah hi.

Laisiangthou kawkmuhna: Romte:5:6-8 ; 1 Johan 4:9 ; 1 Johan 4:19 ; Romte 8:35,36,38,39 ; Sam 40:11 ; Jeremia 31:3 ; Johan 3:16 ; Ephesate 2:4-5 ; 1 Korinthte 6:20 ; 1 Peter 1:8 ; 1 Korinthte 13:4-6 & 13 ; Isai 53.

February 13, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 44na (February 13):
Gingtute hinkhua ah, khalam gentaklouh a, salam a di natawm a poimoh niteng a i hih di ahihleh, THUUMNA ahi. "Pathian' Aw i zaakna ahihleh Bible ahi a, en Amah i thuzaakna ahihleh Thuumna ahi" chih in omsek hi. Khrist a siamthak a omta i hihman in, niteng hinkhua i zat diingdan Laisiangthou i pansanta hi. Khovel  tawndan Pathianthu toh kituakloute lak a kihemkhe dia haatna leh hangsanna, gimthuak hun a kipaakthei leh A thu leh thuchiamte a i kinga a, thumangtak a Adeihlam i sepkhiak theihna dia eilamthu leh niteng dinmun leh thil omdan i thuzaak zel poimoh hi. Thuumna i chih chiang in, bikhiah huntuam, kuamah leh bangmah hon subuai di omlouhna hun leh mun ah, i lungtang tawng apat ki-sit leh ki-siit omhetlou a, Toupa buanna, deih  ngetna, dahna, kipahna, lunggimna, lauhnate i genna hun leh i khelhnate i kipuanna hun ahi. Khristiante chu, Sahkhua dangte bang a, a hun leh mun sehtuam om, huaizah vei thuum di, thuum chiang a ngatna di lam om hiam leh banghiam chia kisakkhawlna leh kibawllem masak ngai sese sahkhua hilou hi. Toupa houpihna dia huntuam zattheih kan a manpha omlou ahihlai in, i huchih theihlouh kaal a leng, i omna peuh, hun khat peuh leh dinmun peuh ah Toupa houpih/thuzaak thei gige i hi uhi.
Toupa Jesu Khrist nnasep zohsa ziak a Amah toh kichimattak a omthei a, bangchiklai peuh a thuumna tungtawn a houpihthei leh thuzaak thei i hihziak un, Pathian kiang kipahthu gen ni. Mi siangthoute thuumna ngaikhia, zahngaihna a dim Pathian i neih ziak unleng i kipaak petmah hi.

Laisiangthou kawkmuhna: 1 Kronikul 16:11 ; Ephesate 6:18 ; Jeremiah 12:9 ; Jakob 5:13 ; Matthai 6:7 ; 1 Johan 5:4

February 11, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 43na (February 12):
Khristian i hihna uh kisuangpih mahmah kawm in, Khristiante hih dia kilawm hetlou vaihawmna leh vaisaite ah Pathian i kailuut zel uhi. Ei utnatan leh remchangna tan chauh a Pathian phawk i hihleh zaw, ei leh ei pathian lem i kibawltawm zok khawng himaimah diing hi. Ei hoihsakdan leh lametna toh kituaklou leh ei ngaihdan bawlsa kiptakmai toh kituaklou a mi bang a hong khosak chiang un, melma bawl in i na bawlpah uhi. Ei tung a hoihte kia tung a hoihthuk a, ei hon iitte kia iit thuk leh ei phattuampihte kia adia phatuam i hih uleh, Khristian kichi mahleng, tatkhiaklouh mikhial i hihdan i Laisiangthou in hon hilh hi. Pathianthu pansan a kivelchet poimoh kha inteh! Mi khialpen i hihlai a, Amah hon Siamtu Pathian deihlou a, salam nopsakna a kibual a, "Pathian omlou himai leh" chi a, khelhna saltang lai hong tatkhiakna dia a hinna hong pia hitel ahi. Amah tatna gingta a, A min Khrist tam a, Khristian i hihna uh suang i hih uleh, i hoihna di mun uah hoih kisuum lou in, mi tung a hoihna i suah theih dizen khawng gaaktan hetkei ni. Lungtang enchian Pathian ahi.
Lungtang khauhtak toh khelhna saltang a omlai, eite tatkhiakna dia athawn hiilhial a, A Tapa Jesu Khrist hon piak ziak in Pathian kiang kipahthu gen ni. Ei suakta ta i hih aleh, ei dinmun lui a omlelte tung ah hehpihna leh zahngaihna suah dia Amah kumpigam toh kituak mohpuakna leh lametna siangthou hon pia Pathian tung ah i kipaak petmah hi. 

 

Laisiangthou kawkmuhna: Paunaakte 3:27-29 ; Luke 6:32-33 ; Matthai 5:44-46; Romte 12:1-18 ; 1 Samuel 16:7.

February 11, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 42na (February 11):
Hotdamna i chih eilam a sep leh panlaakna omlou ahihziak takin, i muhna leh Toupa' nung i zuihna ah leng beidothuai di leh lauh diing om hetlou hi; Amah ei a nnasep hoih panpa'n Jesu' ni tanpha a zoukim vek diing ahihziak ahi. Khovel puuksesa ah, khelhna ziak in saltanna leh chatvaihna tuamtuam ah awkkha tampi i om uhi. Haksa sa kawmkawm a Pathian deihlouhna leh phawklouhna a om ngeina seh leng tampi i om uhi. Tuabang a om a, lametna bei hileh kilawm leh bangmah phatuam di om nawnlou hi awmtak a omkha i iitte - lawm leh vual, tanau-laina, u leh nau, nu leh pa nei omkha i om uleh, thil zumhuai in ngai kei ni. Amaute thuumsak i mohpuak uh ahi a, i mangbatna i va tutna Pa bangkim tung ah thunei ahi chih thei kawm in, thuumna ah pan la zom zel ni. I iitte hotdamna dia i thuumnate uh zaklouh hi hetlou ahi chih thei in, lungkiak chiang inleng, kipan thak zel ni hang. A kum a thuumsakta, lunggimpih leh tawlpih mahmahta a, amau a kikhekna omnai tuanlou phetlou a, kikhek ngeilou di uh hileh a kilawm ziak ua lungkiakna nei i hihleh leng, thuumsakna tawpsan tuankei ni. I thuumsakte lam ah kikhekna i muh tadih kei leh le, i thuumnate Toupa'n A zaaklouh, theihlouh, phawklouh leh limsaklouh hituan hetlou baan ah, semlou hetlou ahihman in khamuang in om ni.
Hehpihna, zahngaihna, iitna leh thilhihtheihna tawplou nei Pathian in, A tatsa mi siangthoute thuumna ngaikhia ahihziak in Amah kiang kipahthu geen ni. Mite adia i thuumnate tungtawn a Toupa'n eimah mah ah leng kikhekna leh Amah naihsemna hon tun ahihziak in i kipaak petmah hi.

Laisiangthou kawkmuhna: Philippite 1:6 ; 1 Thessalonikate 5:18 ; Matthai 10:29-31 ; Philippite 4:6-7; 1 Peter 3:12 ; Sam 66:18-20.

February 10, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 41na (February 10):
Toupa Jesu Khrist nung i zuihna a hihlouh dia poimoh mahmah chu, hun paisa va suut kikkik ahi. Jesu Khrist ah siamthak hita i hihman in, i phawkdenna (memory) ah hotdam i hihma a i khosakdan mang nawn lou diing om tham hi. Hun paisa a manthaina lampi tawn a i omlai a tuahsiatna leh khelhnate khawng ziak a i tulel hun ah ahoihlou lam a geen neisak i hihleh, hun paisa a kisukbuai a phattuamlouhdan chetna leng hipah ahi. I nunglam etkikna i neih chiang in zaw, Pathian in "Manthatna kokhuk a kipan, buannawi diadua a kipan a hon khai khetou a, suangpi tung ah i khe hon ngasak a, tullel kalsuante hon hihkipsak" dan khawng suutna in zang lel ni hang. Lot zi bang a thil ngeina sehsate, theihsiamsate leh hinkhaw lui toh kiguizopna kiplua neihkhak di lauhhuai mahmah hi. Nunglam en a lehngat naak i hihleh, "Toupa hon piidan ah lungkim zoulou kahi hia?" chih dotna kidot hong poimoh kha diing hi. Nunglam et in mailam hon musak lou a, tulel dinmun a douna hoih i douna leng buaisak hi. Huaiziak in, mailam nawt di mawng a sap i hihna uah, mailam nawt theilou zen a hun paisa leh hun hong pai dite ah kisubuai i hihleh ei leh ei lunggim kiguan i hih baan uah, Pathian Kha piilouhna lamlam a pai kihi kha thei hi.
Ei a dia A hinna hon pepa, Sianthouna lampi a hon pii di'n muanhuai a, Amah i kingakna suangpi ahihziak in kipahthu geen ni. Khelhna khovel hoihlou ah Vangam lampi zui i hihman un, i lampaina ah mipil bang a pilvangtak a, i hun neihte manphathei pen a, i zattheihna dia Khasiangthou a hon thuam Pathian tung ah i kipaak petmah hi.

Laisiangthou Kawkmuhna: Isai 43:18-19 ; Luke 9:62 ; Sam 40:2 ; Philippite 3:15 ; Ephesate 5:15-16 ; 2 Korinthte 5:17 ; Kolossate 3:10.

February 9, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 40na (February 9):
Hinkhua ah haksatna tampi pal a i omlai un, haksatna ngen tuak chih zen le i hisam kei uhi. I thuaknate uh nep koih theih hi hetkei mahleh, haksatna hon tun mite leh dinmunte gimtak a lenkip a, lianpen sak i hihleh, Toupa'n hon hehnemna, panpihna leh lem hon bawlsakte haih khak baihsam hi. Ahuchih leh, Toupa'n i buainate hon buaipih lou in kikoih dia, hon taisan khawng kisa kha diing hi. "Bangkim ah kipaak un" chih thupiak haksatakmai ngiat a om i hihziak un, haksatna ah leng thumangtak a i kipah diing uh hitel ahi. Hiaibang a thil haksa leh hihzoh vuallouh hileh kilawm hih dia hon ngiat "Bangchi Pathian le ahitel de aw?" chih beidot ziak a dotna neikha ngei hunkhop i om di un ka gingta hi. I theihsiam di ua poimoh chu, haksatna tuak chihziak a, Toupa thupiakte zui lou thei kihi tuanlou a, thumangtak a i zuih thouthou di uh hitel ahi. Haksatnate suanlam remchang a neithei kihi lou eive. "Kei ka om na vele, hon muang ve!" hon chi bangkim thuneihkhum Pathian nei i hi uhi. Ama'n A tate hon theihpihlouh khat le omlou ahihziak in, eilam a i hih dite ana hih in, i sin dite ana sin le'ng, Ama'n A nna thupitak a sepkhiakdan theilua hi. Amah adia haksa khat le omlou a, Amah phaltan leh phalzah kan inleng haksatna kituak hetlou hi. Hotdamsate Toupa toh ton i hihman in, i hinkhua ah banglam peuh ah Amah leng kidaih chihna ahi.
I haksatnate ei kia buaina hinawnlou a, Amah buaina leng hita ahihman in Pathian kiang ah kipahthu geen ni. Haksatna i tuah A phalte tungtawn a Amah suun dia kikhekna ei ah leh ei tungtawn a midangte ah A thupina hon musak phetlou in, haksatna hun ah le kipaakthei dia hon pii ziak in Pathian tung ah i kipaak petmah hi.

Laisiangthou kawkmuhna: 1 Thessalonikate 5:8; 2 Korinthte 4:17 ; Luke 14: 17; Romte 5:3 ; Jeremia 32:27 ; Sam 23 ; Matthai 8:23-27.

February 8, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 39na (February 8):
Eite hon Siamtupa'n, mimaltak a chituamna nei chiat in hon siam a, banghiam khat siamna toh leng hon thuam hi'n i theisiam hi. Siamna nei tuamtuamte lak a laasiamte leh tumgingsiamte enhuai kana sa gige hi. "Eng ke'n" chih thupiak a om i hihchiang un, ka enna asuah chiang in, englou di'n ka kithunun sek a, kei siamna hon piak dungzui a Toupa'n hon sapna leh zatna lam ah ka ngaihtuahna ka heikhe zel hi. Laasak ka thanuam tuk in asanglam leh a niamlam zou hetlou ka hihziak in laa a Pathian pahtawina ah, ka lunggulh bang in ka hihzou kei a, huai in hon dahsak sek hi. Laasiamte hi'n tumging siamte hitaleh, a siamna uh Pathian in Amah phatna dia a thopna ahihman in huaibang siamna nei a Pathian adia zangkhatheite chu vualzawlna tung a vualzawlna tangte ahi uhi. Himahleh, laasiam teng in Pathian a phat louh phetlouh un, phawk leng a phawkpha kei uhi. Lei ah adam lai un mite ngaihsanna, biakna, zuihna, ettonna, zahtatna leh a sihni uh leh sihnung natawm in phatawina tampitak mu uhi. Himahleh, Pathian adia zatlouh siamna zaw khovel tan lel leh hinkhua tomchik tan chauh daih ahi. Ei gingtute'n chu, taangtawn hun tawpngeilou di om ahi chih i theih ziak un, i siamna, pilna leh hihtheihnate uh a zatna di diktak a zangkhe di'n Khasiangthou' thilhihtheihna i tang uhi.
Pathian phawkloute chu thutuam, Pathian theikha, Khristian innsung a piang a, Khristian khotaang a khangtou a, siamna leh hihtheihna hon piakte Amah phatna dia hon piak bang a zangkhathei i hihleh kipahthu geen ni. Toupa'n siamna hon piakte phetlouh a, siamloutak a theihtawp suah panlaaknate bangleng Amah min a gimnamtui thil lat bangmai a hon pomsak ahihziak in leng i kipaak petmah hi.

Laisiangthou kawkmuhna: Eksodus 35:10 ; Ephesate 2:10 ; Jakob 1:17 ; Sam 33:2 , 47:6-7, 96:2, 105:21 ; 1 Korinthte 12:5-6 ; 1 Peter 4:10-11 ; Romte 1:20.

February 7, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 38na (February 7):
Eite hon hotdamna dia Toupa'n ei panpihna poimoh lou ahi chih i thei a, bangchi hiam a ei panlaakna pang lou ahihziak mahtak in, i pianthak khit chiang a A nungzuihna leng Amah haatna mah pansan ahi. I damsung ahihkeileh Amah hong pai nawn matan ginomtak a Amah toh ton dia hon piitu leng Amah ahi nawn zel hi. Pathian in ei bangmah hon ba lou ahihziak in, Amah tung ah vui veu mahle'ng i theihlouh luat ziak uh ahizaw hi. Pathian in Mosi a houpih chiang in lawmta kihoudan a houpih hial di khop in kichimat mahleh uh, Mosi in thil ahi di mawng leh A tanvou didan in Pathian in bangmah hihsak hetlou hi. Toupa toh ton i chih Amah hon piidan a ton ahi. Huchi ahihlai in, ei phatuamna di, hoihna di theilua ahihman in, Amah lemgeel toh kituak a, hon piizel dia i kipiakkhiak di ahizaw hi. Mosi in kum huaizah Israelte gamdai gam ah gimthuakna tampi toh pii mahleh, Toupa'n gamchiam Kanaan musaklou hi. Enle, "Ke'n huaitan na thuthu in ka om a, kei le huai n'on hihsak di ahi" chi thei mawk kihilou hi. Pathian akipat thil khenkhat i tan di mawng a koih a, ngiat thei mawk lou i hi. Ngaihtuahna thuukpai sak mahle'ng, Jesu Khrist tungtawn a A hehpihna hun ahi chih sawltak Paul kiang a ana genmahbang in, eite adi'n leng A hehpihna (hon tatna/hotdamna) huntawk ahi a, vuina di himhim neilou i hi uhi.
Hotdamna hong semkhetu amah ahi a, Hotdamna hingsakdentu leng Amah ahi. A ginom ziak in, Amah thupina di'n atawptan in eileng ginom dia hon pii diing ahihziak in Pathian' kiang kipahthu geen ni. A Khasiangthou a chiamtehsate i hihman un, Amah lak apat bangmah in hon kaikhe lou diing ahihziak inleng, Pathian tung ah i kipaak petmah hi.

Laisiangthou kawkmuhna: Eksodus 33:11 ; Deuteronomi 32:51-52 ; Ephesate 2:8 ; Philippite 2:13 & 1:6 ; Romte 8:28 ; Johan 10:28.

February 6, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 37na (February 6):
Avangkim a kiza zeuhzeuh chu, "Biakna toh kisai program - Kikhopna, seminar leh gospel camp chihte, tamthei lua" chih ahi. Hiai toh kisai a i ngaihdan uh bawlhoih dia hoih kasak a om hi. Hiaibang a Pathianthu kisinna, Pathianthu buaipihna leh Pathian zonna ninhuai zen dia program nei hinazenpi a le hichituk a tatsia, lungsim sia, khang mahmah lou leh harhthakna omlou ahihleh, hiaibang thilte sailou bang hile hang bang suak tel di i hi ua? Sin di leh hon sinsaktu di i neihlouh di khawng uh thil lauhhuai leh mangbathuai hidi'n ka ngaihtuah hi. Pathian leh Athu khentheih ahikei chih i thei uhi. A Thu gen di, tangkoupih di leh gelh di, i neihlai khawng uh Toupa hon ompihna a kilatna ahizaw hi. Tulai in Thugen tamlua, azuihna tawmlua chi in i phun naak uhi. Himahleh, Athu puangkhiakna, genkhiakna, tangkoupihna koihdap theih thil hilou hi. Dakkal khat sung ah thugentu in a genkhiakte lak ah, kikhawmte mi bangzah hiam in Amau khalam khanna di leh lungtang kikheksak di khalam ann baak khat bek ana muh uleh, manpha lua himai ahi. A thu kikhekngeilou leh lui ngeilou ahihziak in khovel leh tullel dinmun toh kituak toutou lai hi. Laisiangthou pansan ngetnget a sinsakna leh thugennate khawng tehpih di neilou gou manpha ahi chih thei ni maw! Pathianthu dukdaklou tak a i theih leh, dukdaklou tak in kizangkhe diing ahi. Dukdakta a theihna dia Laisiangthou pansan ngetnget sinsakna poimoh mahmah ahih ziakin, i zaak tam leng poimoh hi.
Khelhna ngeinasehsa sapum toh Athu i theih zah zangkhe zou mahmah lou i hihlai un, A thuaktheihna leh zahngaihna ziak a, awl awl a khanna lam manoh thei a i om ziak un Pathian kiang kipahthu geen ni. Pathian' thutak a bu a neihthoh phet hilou a, ginomtak a hon sinsak leh hilhchian di i neihte ziakin Pathian tung ah i kipaak peetmah hi.
Laisiangthou kawkmuhna: Mark 16:15 ; Matthew 28; 19-20 ; 2 Peter 1:12-21 ; 1 Peter 3:15 ; 2 Korinthte 5:20 ; 2 Timothi 2:15; Ephesate 4:11-12 ; 1 Korinthte 1:17 ; Matthai 9:37-38 ; Matthai 10:7

February 5, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 36na (February 5):
Hotdam a i om theihna di ua Pathian' lemgeeldan ka ngaihtuah chiang in kei khamtawk in Amah ka ngaihsangtha leh iittha a suak ngoihngoih sek a, kipahna in ka dim zaak sek hi. Amah tellou a tei ut a, khelhna leh kisaktheihna a dimte, manthaina lam zuan lel a, dinmun setak a om i hihlam uh kitheilou i omlai un, eilam ah a lungput hoih thouthou hi. A hoih ziak in A tapa iittak leh neihsun ei migiloute suahtakna di'n hong pia a, hotdamna bukimtak in, eilam a i hih di khatlel le omlou, hong sepsak hi. Ei leh ei i kipiak theih hilou a, A hehpihna nnasep ginna toh thil thawnpiak i na pom di hilel ahi. Ei hih di khat le tellou a, eilam a ngiat khat le omlou a hotdamna a thawn a hon piak ahi; I lungsim uh hon theisuak dimdem ahihziak in, ei hih di khat khawng om a hotdamna i muh di uh hileh, kisuang law mahmah di hang a, Amah nnasep teng bangleng ei sep dan in kisuh ut phial di'n ka gingta hi. Himahleh, i theihsiam di ua poimoh chu, a thawn a hon piak hotdamna sepkhiakna dia chu gimthuakna leh ei kilimsaklouhna man i piak ngai ahi. Huai himahleh, ei kia a semkhe dia hon lamen lou a, Amah toh i sepkhiak di hong hi thouthou ahihziak in i lung a lel kei a, i lung amuang zaw hi Amah i muan ziak in.
I nget hetlouh uh hotdamna hon piak ziak in Pathian kiang ah kipahthu geen ni. Sih chilh zen a hong ki pumpiak a, hong kibungkang sipsip a hon tankhia a, i mualphouna diteng, i dahnate, natnate leh khelhnate Amah kisuan a, Pathian thangpaihna ei tung a kibungkhe di lai Amah hong kidoh ahihziak in, Jesu Khrist ziak in i kipaak petmah ahi.
Laisiangthou kawkmuhna: Jeremia 29:11 ; Romte 3:10-12 ; Ephesate 2:8-9 ; Johan 3:16 ; Philippite 2:8 ; 1 Peter 2:24 ; Isai 53:5.

February 4, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 35na (February 4):
Jesu Khrist hotdamna ziak a kipahna i neihna tungtawn in, i niteng hinkhua ah ahidandan a kipahdan kisin zel hang. Ei hamphatnate leh dinmun hoihte ziak a kipahna zaw, a siamlou pen inle kisin dan kithei hi. Himahleh ei tan hoih ngellouh lai a, mi tanhoih leh vualzawlnate ziak a kipahpih taktak theihna nei i hihleh, Khasiangthou in thupitak a ei ah sem ahi chih i chetna ahi. A pawlawng a, i kam in a kipahpih bang in, i lungtang ah i kipahpih taktak hia chih chu, ei leh ei i ki-enchian ngam le'ng, i lungput kithei mai diing hi. Hiaibang a mahni kichetna chih khawng thil zumhuai hilou a, thil vuallelhhuai leng hilou hi. Jesu Khrist tungtawn hilou a, khovel thupil, mihingte lungsim paidan theihna leh sahkhaw dangte tungtawn a lungsim leh khalam a navaakna toh hinkhua zatna diing in leng mahni hihna bangtak a kimaituah poimohdan gentam deuhdeuh in hong om hi. Mahni kivel chet i chih Pathianthu toh kituak thilhoih ahi a, Pathian' iitna, hehpihna leh zahngaihna kia hilou in, Amah ngei toh i kichimatna ah leng hon panpih petmah hi. Mi adia kipaak theilou i hihtak leh leng, Khrist ah lunglelhna di omtuankei hi; Pathian kiang ah i hatlouhnate leh khelhnate ziak a thupha tawi in, kiniamkhiak in, Amah deihbang a i lungtang hon kheksak di'n i ngen thei gige hi. Pathian hoih ahihziaktak in Amah deihbang i nget chiang in hon pe zel hi.
Thil hoih, Amah deihbang toh kituak hon deihsak a, i nget chiang a le hon iit hetlou phetlou a hon piak thanuam ahihman in, Pathian kiang ah kipahthu geen ni. Thil hoih thei a, i hih utlou leh hih zohlouh lai a le'ng, hih utna leh hihtheihna nget theihna dia Jesu Khrist tungtawn a lampi hon bawlsak ziak in leng i kipaak petmah hi.
Laisiangthou kawkmuhna: Romte 12:10 &15 ; 1 Korinthte 12:26 ; Philippite 2:3 ; Sam 139: 23-24 ; 2 Korinthte 13:5 ; Matthai 7:11 ; Hebrute 4:16 & 13:21.

February 3, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 34na (February 3):
Gingtute kipahna i chih Khasiangthou in hon sungluahna pawlam natawm a muhtheih dia phuulkhia ahi a, ei ah Khasiangthou' gah khia i hihlam ei leh ei i kichetna leng ahi. Kipahna di khovel thilte ah leng i mu tham a, himahleh, kipahna diktak; tawpngeilou, dinmun leh mi a kingalou kipahna zaw, Pathian a kipat chauh ahi. Pathian ah kipahna i theihsiamdan bangleng lam tuamtuam a salam a hon vualzawlna tungtawn a thil hoih leh mi manpha i neihte ziak khawng hitaangpi hilou maw, khalam thilte sang a? Pathian' hoihna leh vualzawlna tangkha kisate kipahna leh midang sang a tanhoih lou zaw leh vualzawlna tangkhalou zaw a kikoihte kipahna leh kipahdan kibang hetlou hi. Himahleh, i kipahna uh a hong kirualna chu Pathian apat kipahna i muhna uah ahi. Gingtute kipahna diktak zaw Pathian in hon iitdan a tawpkhawk a A latsakna, JESU KHRIST' HOTDAMNA ah ahi. Jesu Khrist hotdamna ziak a Pathian toh kilem a, huai hotdamna tungtawn a salam leh khovel vai a leng Toupa'n hon sehsakdan dungzui a vualzawlna leh tanhoih tang i hizaw uhi. I kipahna phungpi i theihchet nakleh, ahi bangbang in kipahna leh kipahdan kisiamta hi.
A tuahse deuh leh a gimthuak zaw deuh zaw ki-om law tham ahi. Himahleh, huaite tungtawn a Pathian thupina muzel i hihziak un, a gimthuakzawte'n Pathian thupina leng mutam zaw chihna ahihziak in Pathian' kiang kipahthu geen ni. I thuaknate uh athawn a koihlou a, Amah sut semna di leh Van a i gou dia hon kholkhawmsak ziak in Pathian tung ah i kipaak petmah hi.
Laisiangthou kawkmuhna: Galatiate 5:22 ; Romte 14:17 & 15:13 ; Philippite 1:25 & 4:7 ; Romte 5:1 ; John 14:7 ; Jakob 1:2-4.

February 2, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 33na (February 2):
Khristiante sahkhua ahihleh, hinkhiakpih sahkhua ahi. I ginna pen nnasep in a zuih zeuhzeuh diing hilou a, niteng hinkhua a i zatkhiak theihtawp a i zat diing uh ahi. Ginna tellou a nnasep hoih i chih khoveltan lel daih a, gingloute natawm in niteng a ahih uh ahi. Huan ah, gahkhe dia hotdam i hihman un nnasep tellou ginna leng ginna si ahitop mai ahi. A zui zoulou ngen i hihlai un, i hatlouhna suanlam a nei gige i hih uleh, ei hihtheihna a kinga hikha diing i hi. Kei tel in, A thu geenkhia/gelhkhia a taangkou pawlte le, ka zuih zoh sang ua ka genkhiak uh tamzaw thamtham gige ahi. Zuih zohlouhna suanlam a mahni omom a om mawk leh haatlou pipi a pan la teitei chihzaw kibang hetlou eive. I zoh di uh hileh, i Hondampa hong sih ngai hetlou diing ahi. I zohlouh ziak mahtak a Toupa Jesu hunteng in ki poimoh tuntun a, A' nnasep zohsa a kinga a omlel hi hang. Kei ngial bang inchu, huih ka poimoh tuk a poimoh hi in ka kingaihtuah hial hi. Huchituk khop a poimoh hi mahleng, ka theihtawp ka suah zohlouh ni le tam hi. Ka tung ah zahngai ahihziak in, mohpaihna hilou in, tawmna leh kingaihniamna hon guan zaw zel hi. Huchi in, niteng in Jesu Khrist diktatna leh nnasepzohsa a kinga in, A mel zong di'n Pathian' i haatna hon guan zel hi. A mel zong a niteng a buaina pen, hinkhiakpihna leng himai ahi.
I chitlouhna uh leh guitung zoulou i hihna uh hon theilua himahleh, A zahngaihna ziak in A tapa tungtawn in diktat in hon pom phetlou in, A thupina ei ah leh ei tungtawn a gahkhiakna a puanzaak a a-om ziak in Pathian kiang kipahthu geen ni. Eite'n Amah i poimoh lam uh i theihlouh lai uale, Amah mah in, Amah lam a hon kaihnaina dia pan laak hong suah masak ziak inleng Pathian tung ah i kipaak petmah hi.
Laisiangthou kawkmuhna: Jakob 2:17 ; 1 Korinthte 1:30 & 6:9 ; Romte 5:1 & 8 Romte 14:23 ; 2 Korinthte 12:9 ; Philippite 2:13 ; Sam 105:4.

February 1, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 32na (February 1):
I Laisiangthou in, vualtungtuangte sang a vualtungtuang zawte i hihdan uh hon hilh ban ah, vualzoutak a hinkhua zang di'n hon hanthawn hi. Hat hehu gige di chihna hikei mahleh, a poimoh bang a Pathian khut ah kinga ngamlou a, khalam a thagum suah zou mahmah lou a, ei theihsiamdan leh i dinmunte a kinga kha pahpahte hi hang. Haksatna i tuahte geen nep sawm i hih het louh lai in, haksatna i tuah chiang un poisakna, dahna leh tawl kisakna a dim in i zoi gawp sek ua, Toupa haatna ah kinga zoulou in bahsia bang in i omkha naak uhi. Gimthuaknate ahi di mawng ahi chithei in, a douna leh mualsuahna lam ah buai le'ng, vual lel lou in kiom deuh diing hi. Pathian in thil i tuahte hon got hi gige kei mahleh, i tuahte hon phalsak ahisek hi. Aman hiai dinmun nuam hetloute athawn in koih lou a, ei hoihna di mah in, Amah min thupina di'n semkhe gige hi. Ei theihsiamna a kinga lou a, Amah muan i kisin chiang in, A nnasep thupi muh di om gige hi.
Mi diktatte abuaina ua pat hunkhe sipsip dia kichiam Pathian in, Jesu Khrist diktatna ei a dan a pom ahihman in, A kiang ah kipahthu geen ni. "Nang thuthu hihen" chithei dia kipiakkhiak theihna leh Amah muanngamna nna thupitak leh vualzohhuaitak ei ah A sep zel ziak inleng Pathian tung ah i kipaak petmah hi.
Laisiangthou kawkmuhna: Romte 8:37 ; Sam 34:19 ; Galatiate 2:20 ; Genesis 50:20 ; Nnasepte 14:22 ; Paunaakte 3:5-6 ; 1 Johan 5:4-5.

January 31, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 31na (January 31):
Mihingte i paidan uh khat ahihleh, kuahiam khat in banghiam hon piak chiang in, piakthuk utna kinei hi. Mi'n hon phat chiang un leng, amau le phat thuk utna kinei hi. A hoih i muh chiang a piakthuk utna i neih bang un, mi'n thil sia hon piak chiang unle kipethuk ut zel hi. Mi'n hon hihnat uleh, i hihnaa thuk ut a, mi'n i kiang ah khuahiamkhat hong gensiat uleh, ut khollou pipi inleng, ana kuppih teitei di kisa khasek hi. Kuahiam in kuahiam dang khat i kiang a hong gensiat leh, amau gum di leh, a mi gensiatpih di'n hon lamen kha thei uhi. Huaibang dinmun a i om chiang un, a hong kum pen i zahtat hiam, kizopna a kinaihpih ahih diak leh bangchu, gup louh leh kuppih lou a om di kisuanlahhuai hial hileh kilawm bang in omthei hi. Banghiam got a i om chiang a, bat neidan a i kingaih ziak uh hidi'n ka gingta hi. Himahleh, i theihsiam di chu, va kup/gup sese ngailou ban ah, nuamsaklouhna di thil hihetlou ahi. Huai didan a bat kuamah neilou hive hang aw! Ei Khristiante a di diak in, i Laisiangthou in, "iitna loungal kuamah bangmah ba kei un" hon chi ahihziak in, Khasiangthou in Bible pansan a theihtelna hon piak toh kituak hetlou thilte thukkik dia kuamah bangmah ba lou i hi chih chiamteh vaal hetlou diing hi.
Thilhoih teelzawthei dia Khrist a siamthak a om i hihtaak man un, huaibang a Pathian nna thupitak leh vualzoutak a sem dia tatkhiak leh hatna got a om i hihziak un Pathian kiang kipahthu geen ni. Pathian in hon sapna toh kituak thilte teelna dia i deihteelna uh Khasiangthou haatna toh zangthei i hihziak unleng Pathian tung ah i kipaak petmah hi.
Laisiangthou kawkmuhna: Romte 12:2 & 9 ; Romte 13:7-10; Ephesate 4:2 & 2:10 ; Galatiate 5:22-23 ; Philippite 4:8.

January 30, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 30na (January 30):
Nehemia 9:3 ah "Huan a mun uah a ding ua, TOUPA a Pathian uh dan laibu sung ah ni khat a a seh lina teng a sim ua; a seh lina teng thupha a tawi ua, TOUPA Pathian uh a beta uhi." chih i mu hi. Israelte Babulon a saltang a omlai teng Jerusalem a tungkik nung uh ahi a, Siampu Ezra in Pathianthu (Mosi Daan bu) simkhiakna hon nei hi. A huchih chiang in, Israelte'n Pathian mai a chinglou ahihdan uleh Pathian ana taisan ahihdan khawng un hong kiphawk ua, kisiikna a dim in, kap in mau uhi. Huchia hong om chiang un, Nehemia in a kiang uah, "Pai unla, thau ne unla, a khum dawn unla, amah a dia bangmah bawlkhol a omlou kiang ah tantuante khak un: tuni lah i Toupa uh a dia ni siangthou ahi ngal a: dah kei unla; TOUPA kipahna lah na hatna uh ahi ngal a" ana chi hi. Toupa toh kilemta ahihman un, Pathian thu theih utna leh Pathian maipha zon utna a dim ahihziak un, suun nitum in, ding kawm in Pathianthu ngaikhia a, thupha tawi peih hial in hong om uhi. Eite le kisiik a Toupa kiang i kiik chiang a, Toupa kipahna tungtawn a A ngaihdamna leh vualzawlna i muhte ah haatna kimu zel ahi chih sinlai i lathei hi. Jesu Khrist tungtawn a kilem in, i khelhnate ziak in dah mahleng, mohpaih a omnawnlou i hihziak in kipaak dia hon deihbang in kipahna kiteel zel theita hi. Amah Pathian theih utna leng kihau deuhdeuhta hi.
Pathian Biakna "kikhop sawt theilua/ thugen sawt lua" chi a i phunphun lai un, huaibang a Biakkhawmna hun manpha Toupa'n hon pe lailai phet lou in, tatsatlou a A Thu hon hilhchian diing Pastorte leh Upate hon piak lai ziak in kipahthu geen ni. Kisiik a Amahlam ngate himhim, bangchituk in ana pialkhe sau mahle hang, hon ngaidam a, hon na paakta Pathian tung ah i kipaak petmah hi.
Laisiangthou kawkmuhna: Nehemia 9:1- 3 ; Nehemia 8: 9-12 ; Nnasepte 2:28 ; 3:19 ; Luke 15:10; Sam 34:22 ; Romte 8:1.

January 29, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 29na (January 29):
Pathian in mihingte mahni kia a khosa dia hon siam i hikei uhi. Khristiante adi diak in, Khrist sapum i hihna ah kahiang tuamtuam, hon sapna leh zatdan kibang kei mahleh mimal a Amah thupina dia hon pii zel kawm in, akigawm in Amah bekhawm leh Amah thupina dia kikawmtuah dia hon deih i hi uhi. Mi toh kituaktak a khosakkhawmna dia chu, ei sang a mi thupi koih zawk diing, mi a et zawk di, ei hoihna di zong lou a, mi a dia hoih zon zawk chihte poimoh mahmah hi. Ei pen kikoih dau zawk chih thil haksapi ahi a, himahleh i sin diing a poimoh ahi. Khotaang ah mite toh i kipolhkhawmna ah thutuam hitaleh, i khosakkhawmpih innsung mite tung ah i lungsim put leh gamtat ah i kikoih dau zaw hia, koih dau zawkei hia chih kisuut thak le'ng thil vaal hi hetlou diing hi. Mi khenkhatte, inn pawlam ah siam mahmah uh a, mite adi'n phatuamtak in om ua, himahleh, mahni innsung ah innkuante awlmoh ngellou leh innkuante toh kichimatna neithei hetlou chihbang omthei hi. Mahni innsung chiat ah kisuuk masa lou leh mahni innsung a dia pan la masa lou in pawlam mite leh pawlam thil buaipih kei ni.
Khovel bukimlouhna lak ah iit di leh iittu di innsungmite i neih ziak un Pathian kiang ah kipahthu geen ni. Mahni innsung mi hi geih lou, sisan a kizopna i neih pih le hilou, himahleh, hon iit a, enle i iit di mi i neihte ziak in leng Pathian tung ah i kipaak petmah hi.
Laisiangthou kawkmuhna: Philippite 2:3-4 ;1 Korinthte 10:24 ; 1 Johan 4:9 ; 1 Timothi 3:5 ; 1 Timothi 5:4 & 8 ; Matthai 12:50.

January 28, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 28na (January 28):
Eimite ahihleh lungsim geenkhe pahpah loute i hi uhi: dahna, kipahna, hehna, utdan leh nuam i sak louhte khawng uh genkhiak i siam kholkei uhi. I ki-iidan uleh, i kipahtatnate natawm leng i kigen kholkei uhi. "Ki iitna leh kingaihna khawng kigengen ngailou athei mai uh" chih ngaihdan nei kitam mahmah hi. Khovel damsung tomchik ah, i iitte kiang ah "K'on iit, k'on ngai, ka kipaak" chihte gen thasial luatna di omlou ahi, thasialna di thil hiaizah lak ah. Amau leng hiaite i gen ana paakta lou hetlou uhi. Ki-iitna leh ki-pahtatna i kigentuahna in, i kizopna leng hihkip diak hi. I Pathian ngei inleng eite hon iitdan thilhih (Eite tankhe dia A tapa hon sawl) a alatsak kia ah hun sak hetlou hi. I Laisiangthou ah, avel avel in leh thu a geen theihdan teng inleng "K'on iit" chih gen mun mahmah hi. Eite Amah lim kibatbit a hon siam, Amah dung suun dia, khelhna in hon piimang nung a, Jesu Khrist tungtawn a A iitna a hong zongmu Pathian in eite hon iitdan kia hilou in, hon khotuahdan, hon hawmthohdan, hehnemtu ahihdan leh eite a dia om ahihdan kisuum hetlouh in Bible ah thu tampi in hon hilh a, A tapa tungtawn in A geente niteng in semkhe gige lai hi.
Ama'n hon iit masak ziak a, tuni a i iite kiang ah "k'on iit" chithei di leh lam tuamtuam a amaute i pahtatdante geen thei dia eile hing leh dam a om a, amau le hing leh dam a om ahih uleh, thuzaak ni in, Pathian kiang ah leng kipahthu geen ni. Hunlem leh hun manpha i neihkhawm laite khawng ziak in Pathian tung ah i kipaak petmah a, mangthaisak mai lou in, amau hon thuzaak masak sese uh ngaklou in, iitna leh pahtawina thu gen di'n, ei a pantu in i pang thei hi.
Laisiangthou kawkmuhna: Isai 43:4 ; Jeremiah 31:3 ; 1 Korinthte 13:4-7 ; 1 Johan 4:18-19 ; Romans 8:35 & 38-39; Johan 3:16 ; 1 Peter 4:8 ; John 15:12.

January 27, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 27na (January 27):
Mari leh Martha taangthu a tomkim in gen le'ng; Huai hun leh dinmun ah, Toupa Jesu Khrist leh a nungzuite Mari leh Marthate unau inn ah a va tung uhi. Innleng hunkhoptak nei ahihziak un, Martha pen in nek leh taak di khawng leh zinte khualna in buai pah hi. A sanggamnu Mari bel Toupa Jesu khebul a tu in, A thugente ngaikhia in om hi. Huchi'n, Martha in Toupa kiang ah, "Toupa, ka sanggamnu'n kei kia nna sem diing a hon khiat khawk salou na hi maw? Hon huh di'n sawl ve" ava chih leh, Toupa’n "Martha, Martha, thil tampi na ngaihtuah a, buai nei ve; thil khat kia a kul ahi ; Mari in tan hoih a teel a, huai tuh laksak ding ahi kei" chi in ana dawng hi. Hiai unau tegel apat i sin uh ahihleh, Toupa amasazaw a koih diing ahi. Sa a omlai i hihman un salam thilte buaipihlouh theihlouh ahihziak in, huaite le i buaipih di mawng uh ahi zel hi. Salam poimohnate Pathian deihbang a buaipih thil hithei ahi chih ahi i gen utpen chu. I sep khempeuh ah, Toupa nnasem in kingai leng kipaaktak in kisem dia, ei hih bang leh ei hihzah hihloute tung ah le lungsimsia kipu lou dia, i ngaihtuahnate le a phatuamlou di'n khaatna lam in paitam lou deuh dia, mi heek khawng in le kibuai lou deuh dia, kipahna di bei zen in mi omdan ana kigimpih lou deuh diing zaw hiven.
I hih khempeuh Amah iitna leh lauhna lungtang toh i hihnaak leh Amah adia hih a hon pomsak ziak in Pathian kiang ah kipahthu geen ni. Hun tuam Amah toh zat leng poimoh ahihman in, huaibang hun di neilou zen a khovel thilte ngen a buai ngai hiallou dia i poimoh uh (deih hilou) hon piak ziak in leng Pathian tung ah i kipaak peetmah hi.
Laisiangthou kawkmuhna: Luke 10:38-43 ; Kolossate 3: 23 ; Matthai 6:26 & 33 ; 1 Timothi 5:15 ; 1 Thessalonikate 4:11.

January 26, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 26na (January 26):
'Republic' i chih chiang in, amau leh amau a kivaipuak gam, mipite'n amau deihteelna zang a amau ai-oh a makai leh vaihawmtu di a kiteel uh chihna ahi. Republic gam ah i tenkhak geih uh bang ngeinadan a la mawk lou in, Toupa'n hon kepna leh Amah lemgeeldan ahihlam theile'ng, kipahna chang kithei diing hi. Tulel in i tenna gam leh khua dinmunte a hoihlua chihna di tamkei mahleh, niteng hinkhua a nek-taak zonna, khotaang khosakna leh biakna, leh vaihawmtute teelna ah, ei deihteelna zangthei in i om taangpi uhi. Pathian in Jesu Khrist ah hiaibang dinmun eite adia lem hon sakpih ahihman in, nek-taak zonna leh khosakna ah, biakna ah leh vaihawmtute teelna ah, Pathian phawktak a, ei deihteelna i zat diing uh ahi. Khristian min thupitak pu i hihsam ua, Khrist' saptuam a member hihna hiam, makai hihna hiam leh mohpuakna nei i hihngal uleh, ei ai-ohtu dia vaihawmtu diingte, ei mimal deihteelna zang a i teel di uh ahi. Pathian hing bete khosak didan, Laisiangthou in hon hilh mahbang a, Khasiangthou tungtawn a Laisiangthou pansan a, theihtelna i neih dungzui un, gam vaihawmtute teel hun hong tun chiang in leng, Khrist gim nam i hihtak man un, a kan-aval a gamtat louh i sawm hamham di uh. I hih khempeuh Jesu Khrist min a hih i hita uh chih niteng in kiphawksak thak ni uh maw!
Gam zaleen a teng a, i tenna gamsung ngei ah leng, sahkhua ziak a gingtute soisakna husa ging kiza sek lak ah, mimal biakna leh Biakkhawmna ah ei deihteelna zangthei in i om uhi. Hiaite ziak in Pathian kiang kipahthu geen mahmah ni. Khasiangthou hasot mimal deihteelna tungtawn a, Hotdamna saang a, hotdamna nnahoih semkhethei zel ihih ziak un i kipaak petmah hi.
Laisiangthou kawkmuhna: Sam 84:11 ; Phillipite 4:19 ; 2 Korinthte 9:8 ; Matthai 6:33, 10:38-39, 22; 37-40; Ephesate 2:10; Johan 14:26 ; Kolossate 3:17.

January 25, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 25na (January 25):
Dinmun nuam hetlou i tuah chiang hiam, ahihkeileh kuahiam toh i kikal a buaina khawng i neih chiang in, i hehna genkhiakna di leh hon ngaikhetu di neih thil manpha ahi. Hon ngaikhiak kia hilou a, ei pen hon mawk gup lou a, Pathianthu toh kituak a thil omdan hon etchianpih a, thulai hon genpih ngam di neih bang chu gou manpha nei kihi mai ahi. Kipawng gup in hoihna sang in siatna hon tunzaw sek hi. Mihingte kilametdan ahihleh; i nu leh pa hiam, i zi leh pasalte hiam, i u leh naute hiam leh i lawmhoih mahmahte'n dik in dikkei le'ngle hon gum di un kilamen mawk hi. Huaidan a kilamet thil dik hilou ahi. Pathian thutak ahihziak in, thutak leh thudik mah i gup diing uh ahi, i ki iit uleh. Pathian toh i kizopna ah leng Toupa'n a Tapa sisan mantamtak in hon lei khia a, hon gumta hi. Himahleh, khelhna hih dia hon gup hi nawnlou a, hon gupna Athu toh kituak a semkheta dia hon lamet i hizawta uhi. Ei hoihsakdan teng a om zel dia, huai chiang a Pathian in hon gum zel dia koih i hihleh, koih khial diing i hi. Hon iit ziak mahtak in hon pawng gup lou dia, hon sawi zaw lai diing hi.
Ei mikhialte gumpa hih diing poisalou a, A Tapa Jesu Khrist tungtawn a, ahoihzaw a, Amah deihlam a kibawlthak theihna dia nithak hon musak a, hunlem thak hon bawlsak zel ahihleh kipahthu geen ni. Khrist ziak a lawmhoih leh sanggamhoih i neihte ziak inleng Pathian tung ah i kipaak petmah hi.
Laisiangthou kawkmuhna: Paunaakte 27:5-6 ; 1 Korinthte 15:33 ; Job 42:10 ; Hebrute 12:6 ; Ephesate 2:10 ; 2 Timothi 2:15 ; 1 Korinthte 13:6

January 24, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 24na (January 24):
Pathian akipat salam leh lei vualzawlnate i deih man lel khawng a, Pathian bia i hihleh, gingloute Pathian biak dan a, mahni phattuamna di chauh a bia kisuak diing hi. Huchi i hihleh, Pathian hing bia kihi khalou diing hi. Kisuutthak a poimoh leh kisuutthak di himai ahi. Khristiante kibulphuhna chu, Pathian in hon iit mahmah ziak in, mangthai lou a, tangtawn hinna i neitheihna di un, A tapa tang neihsun hon piak i gintakna ahi. A tapa tungtawn mah in, i poimoh bangkim leng hon pezel hi. Theihkhamlouh kawlgit khatlel leng lei a akiak chiang a thei a, i lutang a samzang omzah theitupa'n i hinkhua ah thil houpen a i ngaihte natawm hon theihpih hi. Hon khotuahna i muh sekdante lak ua thupi ka sak mahmah ahihleh, Khrist a sanggamte, eilam a bangmah lamet leh ngiat le neilou a, amaulam a kisuuk leh kisen poisa hetlou a, apoimohdan a hong kipekhe top di, ahun leh mun dungzui in, Toupa'n hon pezel hi. Jesu Khrist ziak a vualzawlna i tante lak ua, tantuan a simtheih chu Pathian iitna i muhna midangte ahi uhi - manpha petmah ahi uh. Paakta niuh, pahtawi niuh.
Pathian' iitna mimaltak leh bikhiahtuam tak a tangkha a, a khotuahna leh kepna deihhuaitak mai midangte tungtawn a tangkhate i hihziak un kipahthu geen ni. A iitna mah pansan a, iitna kipetuah di leh kikeemtuah dia eite ah nna thupitak leh manphatak asep ziak inleng kipaak petmah hang e.
Laisiangthou kawkmuhna: Matthai 10:29 ; Johan 3:16 Johan 13:34 ; Sam 23 ; 1 Peter 5:7 ; Johan 10:11 ; 1 Johan 4:19 ; Isai 46:4.

January 23, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 23na (January 23):
Midang toh i kizopna; nupa kaal, unau kaal, lawmta kaal hi'n midang himhim toh i kaal ah kithuzaaktuah poimoh hi. Hon houpihdan uh hiam, a thil hihdan un ei hon nuamlousak a om leh, "N'on huchih chiah nuam salou kahi", "Na huchih chiang a dah ka hi" chih di i ngamlouh ziak a mawk thuak chihbang thil omthei ahi. Hiai i chih ziak a i hih dia kilawm leh i mohpuaknate apat kihemkhe dia ki kawkmuh i hi hetkei hi. I gen ut pentak chu, nuam i sak leh saklouh, i ut leh utlouh, haksa i sak leh saklouhte kigentuah poimoh hi. Kizopna ahoihna di'n kithuzaak tuah poimoh petmah hi. Bangmah i gen keileh, khatte'n ana thei khollou ua "hi na'nteh / himailou di hia" chih in khin suk mai uhi. Hiaidan a mihing kikal kizopna ah kithuzaaktuah apoimoh bang a, Pathian toh kithuzaaktuah leng poimoh petmah hi. I haksatna, i kipahna, i ginlelhna, i hatlouhna, A iitna i phawkdante teng, A tung a i kipahdante khawng leh adangdang i va kuplouh chiang in, Aman atheih veksa himahleh, eilam in kineel theilou hi. Huchih chiang in Amah lungsim di kibawlbawl a, Amah hihna bangtak a theihbeh sang in ei gintakdan khawng kipaipih naak sek hi (Bible sim leh thuumna nei ngei ngelloute huchi sek uhi).Thei chian ngellou i hihchiang in, Amah suk kipah di leng i hinkhua ah amasapen di'n kineithei khollou diing hi.
Amah Pathian toh kithuzaaktuah a i omtheihna di ua thuumna tungtawn leh A Laisiangthou tungtawn a dinmun lemtang hon bawlsak ziak in, Pathian kiang kipahthu geen ni. A Khasiangthou tungtawn a Athu toh kituak a, Amah deihbang theithei phetlou a, i theihte semkhethei dia, thilhihtheihna thupitak hon piak ziak inleng i kipaak petmah hi.
Laisiangthou kawkmuhna: Kolossate 4:6 ; Ephesate 4:15 & 25 ; Sam 19:14 ; Paunaakte 16:24 ; Matthai 7:7-8 ; Philippite 4:6-7.

January 22, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 22na (January 22):
Khristiante hinkhua a chituamna mahmah chu, Jesu Khriat ah bangkim ah (asia-apha, anuam-ahaksa, hauhna-zawnna) kipaak di'n eite hon siampa'n, hon deih hi. "K'on taisan ngeikei di" chipa'n hun haksa leh anuam ah hon taisan ngei lou hi. Kumpi David in, "Sihna liimguam tawn mahleng, gilou himhim ka lau kei diing, nang ka kiang ah na om ngal a" ana chihbang in, sihna liimguam, damlouhna kawkhuuk, gimthuakna tuipi kihot lak ah leng Toupa'n hon taisan ngeilou hi. I omna peuh ah, i dinmun khempeuh ah, i haina mun ah, i puukna mun ah, i chapouna hun ah, i lungsimsiat hun ah, khelhna ahihlam thei ngoihngoih a i va hih teitei hun ah, i hih di thei gegu a i hihlouh teitei hun ah le Toupa'n hon ompih hitel ahi, hotdam i hihnung a chu! Ngaihtuahthak mawngmawng ni! Hiaibang a ginomna leh iitna koi ah mihing gam ah i mu ngei ua e? Mihingte i ki iitdan un mong anei a, dinmun leh ziak le anei hi. I kam un i ki-iitna uh puang in, i theihtawp in ki iit mahleng, i ki huat ni/hun (nupa kaal, unau kaal leh kizopna dangte ah leng) om law thamtham hi. Pathian iitna phawkkha di'n pan lathak niuh maw, manpha law mahmah ahi! Thupi lua ahi. Deihhuai law mahmah ahi.
A kikhek ngeilou Pathian in, Jesu Khrist' kipumpiakna tungtawn a, ziakneilou leh ei hih masak di om hetlou a, iitna lamdang leh tulngeilou a hon iit ziak in kipahthu geen ni. Khovel a hon iit pen, i Nu leh Pate'n bangziak hiam khawng a hon taisan/nawlkhin thei uh ahihlai in, Pathian inchu, bangchiklai peuh ale hon iit den a, hon taisan ngeilou ahihziak in i kipaak petmah hi.
Laisiangthou kawkmuhna: 1 Thessalonikate 5:18 ; Ephesate 2:10 ; Sam 23:4 ; Hebrute 13:5 ; Sam 27:10 ; Isai 49:14 ; 2 Timothi 2:13 ; Romte 8:38-39.

January 21, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 21na (January 21):
Mi omdan hoihlou leh deihteelna zatdan diklouh ziak a suknat a i omna thu ah geen theih i nei tawm mahmah hi. Mi'n dikloutak a hon ngohna, hon geen siatna, mi toh hon tauhtuahna leh hon engbawlnate khawng uh, amau deihteelna ahi a, i va hihtheih luat omlou hi. Ei thugen leh houlimna ngaikhe di le hilou a, a lungsim ei va kheksak theih le hituanlou ahihleh chu, daihsan mai kisin bang leng khalam a duaina leh piichin kisinna hizel ahi. Bangchibang teng a suknat a om in, dikloutak a bawl in om mahle'ng, i dawndan (response) pen Pathianthu toh akituah thouthou di hong hizel ahi. Hiai geih ahi ei gingtute hon kamtu leh hon chituamsak. Ei phawkdan leh utdan a thil omdan dawng thei kihi nawnlou a, Pathianthu toh kituak a thilteng maituah leh dawng diing kihita ahi. Thil haksa mahmah himahleh, Toupa toh, thil hithei ahi. Hihnat a om i hihziak mahtak in, i natna hon hihdam sak di'n hon hihnate leh khovel thilte lamen lou in, hon hihdam taktak thei Pathian kiang mah zuan ni. Hiaibang a i thuaknate Van ah i gou kholkhawm ahi chih leng chiamteh ni.
Mi'n a deihteelna uh azat diklouh lai ua, thil hoih hih diing a Jesu Khrist ah siamthak a om i hihna uah, Khasiangthou haatna toh thil hoih sepkhiakna dia, ei deihteelna pen i na zat theih ziak in Pathian kiang kipahthu geen ni. Lungtang kikham leh lungsim a hihnat a i om chiang ua, hon hehnem a, hon damsak zel Pathian i neih ziak un leng i kipaak petmah hi.
Laisiangthou kawkmuhna: Matthai 5:43-48 ; 1 Peter 3:9; Mark 11:25 ; Matthai 19:26 ; Sam 147:3 ; Sam 30:2 ; 2 Korinthte 1:3.

January 20, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 20na (January 20):
Mihing lungsim i chih, bangmah ngaihtuah lou a, a hawm a koih chih omtheilou hi. Khophawktak a, tup leh ngim a mahni kivelchetna a lungsim sen i utkei leh midang leh thildang limsakna ah kisukbuai in omkhanaak hi. Mahni kingaihtuah a, kivel chet chih thil haksa leh gimhuai mahmah ahi; ahoih lua muh di sang in, asia leh kibawlna di kimu taangpi sek ahihziak in. Ahia lah, hiai khovel ah thil gimhuai lou bang a om? Khovel pilna leh lungsim paidan suut minthang taktakte natawm in mahni kivelchian a, i hihna bangtak a i kimaituah chiang in kikhekna omthei pan hi chih thupil leh thu poimoh ahihdan tangkoupih uhi. Ei gingtute adi diak in, khalam hinkhua i kibulpatna di'n le mahni kivelchian a, Toupa'n hon muhdan toh kinaitheipen a ei leh ei i kimaituah ngam chiang in, Pathian toh Jesu Khrist ah i kilem theita hi. I nungzuihna hinkhua ah leng i khanna di'n mahni kivelchet a kimaituah ngamna mah hong poimoh toutou hi. Eimah a thil pahtathuai i muh di tam ngellou ahihna tak in, Pathian hehpihna, iitna leh zahngaihna athuukdan kichian semsem hi.
Niamchik leh mangthai di hilou a, taangtawn tan khawngpha dizen a saangtak leh vualzohna hinkhua nei dia hon sap ziak in Pathian kiang kipahthu geen ni. Mahni kisuut a, kimaituah a, i hihna bangtak, demna di ngen a iki muhbang a hon mu a, himahleh, ahoihzaw a hon khek zel a, a siangthou dia hon bawl lellel Pathian tung ah i kipaak petmah hi.
Laisiangthou kawkmuhna: Kahla 3:40 ; Luke 14:28 ; 1 Korinthte 13:5 ; Paunaakte 4:23 ; I Samuel 16:7 ; 2 Korinthte 2:4 ; John 4:14.

January 19, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 19na (January 19):
"Khristian ka hi" kichi i hihleh, i hinkhua tup leh ngim piipen chu, Pathian pahtawi ahi. I neih-le-lam, sum-le-pai, siamna-le-pilna, cheettheihna/thuzohtheihna (influence) chihte Pathian in Amah pahtawina dia hon piak ahi; ei a hilou a, Amah a hon kepsak chihna ahi. Leitung leh asung a thil om tengteng TOUPA a ahi a, eite natawm A tapa Sisan a hon leikhiaksa i hi uhi. Khovel ah bangmah i luutpih kei a, bangmah pawtpih lou diing i hihziak in, hiai khovel a i omlai mah in, hiai khovel a neih leh lam, hihna leh hihtheihna hon piakte A kumpigam leh A mite lamna leh tungdingna dia zat diing ahi. Huchileh, hon thil kepsakte Amah thupina di mah a zangkha hi di hang a, i hinkhua athawn a zangbei mai lou kihi diing ahi. Huaiban ah, Amah pahtawina a i zat leh zatlouh dungzui in, taangtawn i zat didan leng geel diing hi. Amah deihdan i hih chiang in Lungkimna leh Khamuanna in zui gige ahihman in, Amah deihdan buaipih taangpi a i neih leh lungkim leh khamuang in ki-om taangpi diing chihna leng ahi. Lungkimna leh khamuanna nei mite ahihleh, "kipahdan siam" i chihte ahi naak uhi.
Bangkim hon piakte piakkhiakna ah lungkimna om hi. Piakkhiakna i chih Amah dungsutna hi a, Amah suun thei dia dinmun hon bawlsak ziak in, leh semkhethei dia Khasiangthou a thilhihtheihna hon piak ziak in Pathian kiang kipahthu geen ni. Hiai khialthei leh khial veu taksa toh pahtawina bukimloutak Jesu Khrist ah hon pomsak ziak in leng, A tung ah i kipaak petmah hi.
Laisiangthou kawkmuhna: Sam 24:1 ; I Timothi 6:7 ; Kilaakna 14:12 ; Romte 2:6-8 ; 1 Peter 4:10 ; Jakob 1:17 ; Luke 11:28.

January 18, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 18na (January 18):
Khristiante'n ahunhun in kihanthawnna i poimoh mahmah uhi. Ki hanthawn tuah di, kilamtou tuah, kipanpih tuah leh kithuumpih tuah a om dia Pathian in hon deih mah i hi uhi. Damlouhna leh haksatnate i tuah chiang ua i kihanthawn dante uh pilvanhuai khathei hi. Pathian muanhuaidan i kikawkmuh ua, Amah ah i kikhamuan kawmkawm un "Pathian in hon hihdam di ahi", "Pathian muang lechin, dam di nahi" khawng i kichi toihtoih uhi. Pathian hih di leh hihlouh dite thei maw, en? Kihai khamuansak sawmna a kihai khemkhem i hi kha di ua! Huaisang in, Athu toh kituak in, "Na damna di'n Pathian kiang ah naakpitak in kana thuum uh", "Pathian adia ahaksa omlou ahi", "Pathian in bangkim hihthei ahi", "Toupa'n hon ompih ahi" chihte a i kikhamuan diing uh hizaw ahi. Pathian muan i chih, ei deihdan leh lamet leh lunggulh teng hon hihtaangtungsak dia lametna leh ngiatna hilou a, Aman ei a dia hoih di leh Amah min thupina dia hong semkhe zel di A muanngamna ahizaw hi. Huaiban ah, ginna i chih thilhih tellou a si ahihziak mahtak in, "Apoimoh k'on hihsak theih om hia?", "Hihtheihtheih hih dia mansa kahi" chihte khawng phatuamtak a kihanthawndan thupitak ahi.
Eite hon khotuah a, eite hoihna di chauh deih a, i haksatna leh mangbatnate thei a, i khituite chiamteh Khamuanpa Pathian i neih ziak un kipahthu geen ni. Hehnemtu leh hihdamtu, thuumnate ngaikhia a dawng zel Pathian tung ah i kipaak petmah hi.
Laisiangthou kawkmuhna: 1 Thessalonikate 5:11; Hebrute 3:13; Ephesate 6:18 ; Paunaakte 3: 5-6 ; Sam 112:7 ; Johan 14:1 ; Jakob 2:15-18.

January 17, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 17na (January 17):
Khristiante adi'n chu, hunlem (chance) leh vang (luck) dungzui a thil kituak hilou a, bangchichi hiam a bangteng hong mawk lem geihgeih (random) chih omlou ahi. Gingloute'n huaidan khawng di'n gingta mahleh uh, ei Pathian hing bete'n zaw, bangkim tung a vaihawm leh thil tengteng tung a thuneitu theihlouh leh phalna lou a bangmah tung lou leh taksuah lou ahi chih i thei uhi. A mite hoihna di chauh deih a, a hoihthei pen a, Amah lemgeel toh kituak a bangkim tup neitak a semkhe gige a, A thupiak leh makaihdan dungzui a, ahunhun a, thilteng Ama'n hon lepfelsak sek ahizaw hi. Hinkhua i phaakna chiang leh dinmunte dungzui a mi i tuahkhakte, i lungsim leh hinkhua paidan kikhek thei di zen a ahoihlam a hon sukha mite, Pathian i naihna a hon tawsawnte leh, ahunhun a, i poimohdan a sum leh pai, panpihna chituamtuam leh panpihtu di mi hong om geihgeih chihte khawng leh thil omdan hong kituakkha geihgeih chihte khawng eite hon siamtu leh A tapa Jesu Khrist tungtawn a hong zongmu Pathian lemgeeldan leh Vaihawmna nuai a, pha asak bang a tung vek ahi hi.
A hoihna, A thuakzohna leh A migitna tatsatlou a, A mite tung kia hilou a, Amah gingtaloute tung natawm a luangsak den, Pathian hoih leh Pathian hing in A mite dia hon teel ziak in kipahthu geen ni. A hunhun a, mite tungtawn a, A iitna leh khotuahna hon phawksak zel ziak in Pathian tung ah i kipaak petmah hi.
Laisiangthou kawkmuhna: Romte 8:28 & 11:36 ; Isai 46:10 ; Jakob 1:17; Ephesate 1:11 ; Philippite 2:13 & 4:19 ; Sam 23 ; Hebrute 13:6.

January 16, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 16na (January 16):
Khristiante'n i hinkhua uah gamgi kichiantak neih poimoh ahihdan i thei chiat di un i gingta hi, a kitheilou lemsak i hihngal kei ualeh maw? Khristian hiloute natawm inle amau gindan dungzui a, hih di leh hihlouh di, hih di tan leh hihlouh di tan kitheih uhi. Achihleh, ei Khristian kichite'n bangchibang in gamgi i bawl in, i zuun ua? Ei hoihsakdan hiam, mi hon muh soih louhna di khualna ziak hiam, khovel paidan taangpi in ahoih leh asia akhendan dungzui hiam a gamgi bawltawm baihsamtak ahihlai in, huaidan di himawk lou ahi. I gamgi geeltu leh zuuntu diing Pathianthu ahi, adangdang geensuk-touh ngailou in. Hiai khovel tawndan leh nopsakna in a hiip mahmah, khialthei leh khial veu taksa haatlou toh om i hihman un khongeingaihna poimoh hi. A hunhun a "i! / No!" chi a gamgi kichiantak neitheita dia Pathian' hehpihna, i Toupa Jesu Khrist tungtawn a piak kihita ahi. I lei taksa haatna leh lungsim tupna lel a kihemkhia a, kikem siangthou a, gamgi kichiantak bawlthei i hihlouh ziak mahtak un, Pathian' Khasiangthou thil hihtheihna leh pilna toh thop a om i hi uhi.
A hehpihna, Jesu Khrist' tungtawn a tangkhate i hih baan ah, Amah sianthouna hon pia a, eite khelhna amah leh amah kisuan Jesu Khrist ziak in Pathian kiang kipahthu geen ni. Khovel a om kawm a, Vangam lungsim pu a, sa utnate nawlkhiin zel thei di a Khasiangthou tungtawn a thilhihtheina piak a om i hihziak un Pathian tung ah i kipaak petmah hi.
Laisiangthou kawkmuhna: 2 Korinthte 6:14 ; Titus 2:11-12 ; 1 Peter 2:11 ; Galatiate 2:20 ; Philippite 4:13 ; 1 Peter 2:24; Johan 14:16-17.

January 15, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 15na (January 15):
Kam a Pathian' vualzawlna leh hoihna gengen kawm a kiim-kiang a thilte ziak a phunphun, ahihkeileh mi soisel di zonthoh hileh kilawmtak a niteng a khosakna ei Khristiante lak a kithang mahmah hi. I pianthak ma a i paidan leh siangthou dia siamthak i hihnung ua i etdan leh sindan kibangthei mawk nawnlou hi. Lungkimna i chih sin a sinthoh ngai ana hi ahi. Dahna di a leh dah theilou a, kipahna dia le kipaak theilou hizawlou in, thil omdandan dawlsiam a omtheihna pen lungkimna ahi. Hun leh dinmun hoih a kilungkimsak chih khawng nuam lua ahihlai in, mi khenkhat huchibang dinmun ah leng lungkimna neithei hetlou in om uhi. Lungkimna neitheiloute ahihleh mi hehpihhuai tawpkhawk ahi uhi. Nek-le-taak, silh-le-ten leh niteng khosakna di natawm a taaksapna chiteng toh omte'n lungkimna neikei le uh leng, awmtak ahihlai a, lungkimtak a hinkhua zangthei mi tampi om uhi. Lungkimna i chih neih-le-lam leh dinmun ah kinga lou a, Pathian neihna ah kinga zaw hi.
Jesu Khrist tatna a kinga lungkimna neithei dia hon kep ziak in Pathian kiang kipahthu geen ni. Lungkimna i chih khalam piichinna, Pathian haatna a kingakzohna ahihziak in, Amah a kipat i tantuan ahi chih i theih ziak in Pathian tung ah i kipaak petmah hi.
Laisiangthou kawkmuhna: 1 Korinthte 10:10 - 11 ; 1 Peter 2:23 ; Kolossate 3:8 ; Ephesate 4:29 ; 2 Korinthte 5:17 ; 1 Thessalonikate 5:16-18 ; Kolossate 2: 6-7; Philippite 4:12

January 14, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 14na (January 14):
Salam hi'n lungsimlam ah damlouhna i tuah chiang un damna manphatdan i thei ua, damlou mah i hihlam kipom in damna di'n pan i la uhi. Thil himhim ahihna bangtak a i pom chiang in, adawnna leh pan laak didan zon pat theih pan hi. Huaidan in, Toupa Jesu Khrist tatna, sihna leh thohnawnna manpha i sakna dia, eipen i dinmun hoihlou, tatkhiak ngai, khelhna sal a taang a meidiil zuanlel i hihlam kithei utlou a, kipom utlou i hihleh, hotdamna manphatna kithei khollou diing hi. I damna leh hinna ei i kipiak theih hilou ahihziak in, A zahngaihna mu a nithak mu i hihleh, hotdamna zonna ah kipanthak ni. A nung i zuihna ah leng hih dite hihtheihna ngen in kuhkalna sin poimoh hi. Haksatna bei tuankei mahleh kipahna le beituanlou hi. "Mi diktatte a mangbatna tenteng lak uapat Toupa'n hunkhia" chih hitel ahihziak in, hon hutkhiak i ngak di himai ahi. I ngak sung ua phun leh kingaisia a i omlouhna dia i hihtheih uh ahihleh, i gimthuaknate kia ngaihtuahna akipat kihemkhia a, a thawn a thuaklou dia ngen a, hon sinsak utte muthei di'n khalam navaakna ana ngen le'ng phatuam mahmah di ahi. Damna leh hutkhiakna i nget kawmkawm a, "Nang thuthu hihen" chih i kisinna dia hun nuamloute i zattheih leh, khalam masawn dia vualzawlna tang kihimai ahi.
Tuni'n, mi diktatte abuaina ua pat hunkhe sipsip dia kichiam ahihman in Pathian kiang kipahthu geen ni. "Nang thuthu hihen" chithei dia kipiakkhiak theihna nna eite tung a A sep ziak in Pathian tung ah i kipaak petmah hi.
Laisiangthou kawkmuhna: Sam 34:17 ; Luke 22:42; Sam 3:5 ; Malachi 3:6 ; Kahlate :3:22-23; Matthai 6:10.

January 13, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 13na (January 13):
I neulai ua kipat, i kiim-kiang a mi tamzawte hihdan a puuk i ngeinasehsa uh ahi. Mi tamzawte hihdan etton di chih pen alou theilou thil dan in kikoih a, pawlpi a om i hihna, pawlpi in hon theihtupna leh pawlpi tungtawn a mimal hihna nei a kitheihna i neih ziak un, pawlpi (saptuam/khotaang) a om hih diing i kilawp uhi. Mite'n i hihnabang a hon pom di uh deih in, , mite lungtaisak i ut uhi. Mi pampaih a omdi lauhna ziak in, mi omdan teng toh kituah i sawm uhi. Hiaibang paidan ngeinaseh gawpta i hihziak un, Pathian toh ton a i paina natawm akipat pialkhe ngam zen a mite omdan toh kituak di'n hon hei zel hi. Pathianthu toh hiaibang paidan akibatlouhna chu, Pathianthu in mi tawmchikte chauh in a muhtheih uh kongkawchiik ah luut di'n hon sawl hi; hiai kongkawchiik leh lampi kawchiiktak in hon tutna diing 'Hinna' muhna dia chu i nopsakdan leh ngeinasehsa baan a paikhe dia kingaap ngai ahihziak ahi. Huchi ahihtak man in, mitamzawte lam a va belhna pen kongpi lian toh kizom lampi zatak leh dawlzoutak, mi tampitakte adia luuttheihna ahi chih haksa vak nawnlou hi. Huai kongpi lian in, zon ngailou lampi zatak leh kidaihtak leh i siam mahmah uh, mahni utna sukbuchinna chihte khawng in hon hiip hi. Himahleh, i theihsiam di ua poimoh chu maw, hiai lampi lian in manthaina leh tangtawn mohpaihna hon tun diing hi.
Tuni'n, miteng huamkhalou kongkawchiik chabi, huai chu, Khrist, hon piak ziak in Pathian kiang kipahthu geen ni. Hinna sing omna hon tun diing kongkawchiik a lampi kawchiik zuihtheihna dia, A Khasiangthou tungtawn a thilhihtheihna leh pilna hon piak ziak in Pathian tung ah i kipaak petmah hi.
Laisiangthou kawkmuhna: Matthai 7:13-14 ; Galatiate 1:10 ; Romte 12:2 ; 1 Johan 2:15 ; Ephesate 2:2 ; Jakob 4:4 ; Kilaakna 22:1-2.

January 12, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 12na (January 12) :
Pathian ahoih hi. Hunteng a hoih gige ahi a, Amah kia ahoih hi. A mite tung a A lungput leng ahoih gige phet hilou in, A lungput hoih pen ahoih theipen in semkhe gige hi. Ama'n kuamah mangthai di adeih kei a, mihingte thuakgimna ah leng a kipaak hetkei hi. Hoih law mahmah inchin, mikhial i hihlai natawm ua, eite adia si dia A tapa iit mahmah hon sawl hitel ahi. Eite tung ah ahoih lai in, hinkhua a i thiltuahte uleh, ataktak gam a haksatna i tuahte un, A hoihna pompih theilou zen di'n kipahtheihlouhna hon guan zel hi. Pathian hoih tawp ngei lou ahihlai in, khovel thilte a i kilawpna uh leh i thuakgimnate uh ziak in eite'n kipahna i tawpsan ua hiven. Kipahna i neih ngel kei leh chu, Pathian hoihna ginglel/gingta zoulou hang a, Pathian bang thukhenkhum mawk! "Pathian thukhen khum i hi" kachih leh, uang lua non sa kha maithei, himahleh, Pathian in a hih leh hihlouh, a hih di leh hihlouh di gen zatzat in i omkha geuh kei ua hia? Huchi khawng maimai ahihlai in, A hoihna tungtawn in, A hehpihna zingteng a hon musak in, Amah toh i kikal lepfelna di leh Khrist ah eite tungtawn a nnahoih A tup i sepkhiak theihna di'n hunlem thak piak in i om zel uhi.
Tuni'n, A hoihna tungtawn a A iitna, hehpihna leh zahngaihna ziak in Pathian kiang kipahthu geen ni. Ei mikhialte Amah nna hoih semdia, Jesu Khrist a hon siamthak ziak in i kipaak peetmah hi.
Laisiangthou kawkmuhna: Sam 86:5 ; Jeremia 29:11; Matthai 10; 29-31 ; Ezekiel 18:23 ; 2 Peter 3:9 ; Ephesate 2:10; Kahlate 3:22-23.

January 11, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 11na (January 11):
Dinmun na tuahte lak ah, thuakzoh louh hileh kilawm dia na phawk na palkha sek hia? Huaidan a thuak theih vaal thil kituak taktak sek mah ahi. I iitte i mansuah ua, i thil neih manphate i mansuah ua, achaang in, khovel thilte delhna ah ei leh ei natawm leng i kimansuah sek uhi. Hiai mansuahte'n dahna leh suuna beitheilou hon guan sek ua, nikhat lel leng thuakbeh zounawnlou diing khop hial a kiphawkna bang hon guan sek hi. Himahleh, lamdangtak in, huaibang a thuakzoh vuallouh di haksatnate ziak in i bei hial kei uhi. Huchi in, i suahtaktheihna uleh ei leh ei kikepbit theihna i neihte un, duaina/dawlzohna i theihngei hetlouh, i neihlam uh hon kiphawkkhe sak zel uhi. Toupa' Thu in lauhuaitak leh lamdangpi a, thilteng Siamtupa khut ngei a, bawl i hihlam uh hon hilh hi. Eite hon Siamtupa'n thuaktheih val thilte thuak zou dia duaina/dawlzohna toh hon siamkhawm kia hilou in, hiai thilte akipat khanna mu a, A tapa dungsuun dia kikhek lamdangtheihna di'n A khasiangthou toh leng hon thuamta hi.
Tuni'n, A tangtawn iitna, A tupluih hoiha leh A thupina lamdang phawkkha dia hon bawl ziak in kipahthu geen ni. Ei hoihna di leh Amah thupina dia khemna leh ze-etna a bawl ziak inleng i kipaak petmah hi.

Laisiangthou kawkmuhna: Sam 8:4 ; Sam 139: 13:14 ; 2 Korinthte 1:8 & 4:8-9 ; Matthai 24:13 ; Romte 5:3-5 ; Romte 8:28.

January 10, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 10na (January 10):
Pathian in mihingte Amah kipahna dia hon siam i hi uhi. I nu sung a hon phankhawm lai in, Amah 'taaksapna' toh hon phankhawm ahi chih i muhtheihna chu, mihingte'n ei tung a om thilhihtheihna nei biak di kizong a, ei hihtheihna chou a aom chiang a, hon panpihtu leh humbittu diing khat kizong hi. Hiai thudik khawng ziak le hingei di'n ka ngaihtuah ahi, kumte apat sahkhua leh ngaihdan tampi hong kiphuhkhiak ziak. Hiaite khawng ziak mahtak in pathiante' min in thil tampi sepsuah in omtou zel a, mihingte'n hiaite tungtawn in omzia kitheihna leh pathian toh kigaakkhawm a kitheihna mu uhi. Hiai mah ahingei diing inleng ka gingta ahi Pathian toh mimal a kizopna i neih chiang ua i muh uh. A diktak in Khristiante chu, i hih khempeuh uh, kampau hi'n gamtat hitaleh, lungtang tengteng toh Jesu Khrist min a Pathian adia i hih diing uh ahi. Himahleh, i theihtel di ua poimoh chu, hehpihna ziak a ginna tungtawn a hotdam i hi ua, a tawp chiang a, omzia nei pen diing ahihleh Pathian min a thil hihte leh omzia kitheihna kia hizawlou a, i Lal leh Hondampa dia Jesu Khrist sang a, Pathianthu manna ah i hinkhuate uh i na zatnate uh khawng hong hilel diing hi.
Tuni'n, i khovel nnasepte tungtawn A Pathian nna semthei dia lem hon geelsak a, i nnasepte Jesu Khrist ah manphatak hon suahsak ziak in Pathian kiang kipahthu geen ni. Khovel mite hiaizah lak ah, Jesu Khrist ah, eite hon teel ziak in i kipaak petmah hi.
Laisiangthou kawkmuhna: Sam 139:13 ; Kolossate 3:17 & 23-24 ; Matthai 7:1 ; Ephesate 2:8-9 ; Johan 14:15 ; 2 Korinthte 5:9-10 ; 1 Peter 2:9.

January 9, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 9na ( January 9):
Khristiante'n Pathian vualzawlna taangkoupih nuam i sa mahmah uhi. Himahleh, midangteng lak ah kipahdan siamlou pawltak i hi uhi. Khotaang omdan ah i phun ua, khaw omdan ah i phun ua, traffic omdan ah i phun ua, Pastor thugen dakkal khat a vaal leh i phun ua, biakna kikhopna ah laa akisaknon leh le i phun zel uhi. Pathianthu in avel in, bangkim a kipahna leh lungkimna sin di'n thu hon pia hi ; salam a vualzawlna i tan hun leh khalam a masawnna i neih chiang kia uh hilou in. Jakob Laibu in houh, ze-etna chituamtuam i tuah chiang nangawn ua kipaak diing in hon sinsak hi ; ze-etna Toupa'n hon etchetna dia A gelkhiak ahi a, khalam a thagum, khalam pichinna leh 'khalam vualzawlna chiteng' hon piakte zat khiak taktak a om ahihna diing leng ahi. Akipatna thilte natawm a kipahna geen theilou i hih uleh, bangchin ze-etna a kipahthu geen thei di'n khansak in om di ua?
Tuni'n, gimthuak hun a leng kipahthu geen thei dia thilhihtheihna hon piak ziak in Pathian kiang ah kipahthu gen ni. Setan dou theihna leh Jesu Khrist ah kipahna i teel theihna dia khalam a i poimoh bangkim toh hon thop ziak in i kipaak petmah hi.
Laisiangthou kawkmuhna: 1 Thessalonika 5:18 ; Jakob 1: 2-4 ; Philippite 4:4 ; Jakob 5:9 : Philippite 2:14 ; 1 Peter 4:9 ; Jakob 4:7 ; Ephesate 1:3 ; 1 Peter 2:2 ; Hebrute 5:14.

January 8, 2022

(Ni khat khit ni khat zel a, ni 365 sung kipaak dia chouna)
- Chingngaihlian Tunglut
Ni 8na ( January 8):
Khelhna ataktak ahihziak mah in, meidiil i chih a taktak mah in om a, kuang lellel hi. Meidil i chih, mi kisiikloute leh Jesu Khrist sisan a tatlouhsiahte adia kikhamkhol Pathian' thukhenna ahi. Meidiil om diingdan i suangtuahthei diing uhi. Aziak chu, hiai hinkhua ah meidiil' a thuakgimna i chiamkha chiat diing un ka gingta hi. Meidiil i chih chiah, na hun zatte lak a huaisepen leh dahhuaipen nuaih 10 (theihsiamna dia tehnadan khat a k'on zat ahi) a punsak toh kibang chi ni. Himahleh, Pathian iitna ahihziak in, eite adi'n Vangam - Amah omna leh A mangtutphah a A tutna mun ; i Hondampa'n eite adia hon na thuumsakna mun leh eite adia mun hon na bawlkhawl sakna mun, i luuttheihna di'n leng lem hon geelsak hi. Vangam i chih chiah, na phawkkhak hun nuam pen leh na suangtuahna a ahoihthei pen na kipiak nuaih 10 a punsak toh kibang chinawn ni. Huan ah, huai tunna diing mun tegel in amau zia dungzui in zotna lampi a kineih tuak ua; huai mun tegel zotna lampi ahihleh nakpitak a gimthuakna leh akheng-aval a haksatna tam hi. Huchi ahihziaktak in, mahni haksatna tantuan diing kiteel chiat di'n eimah theihtelna chiat ah kinga in i omta uhi.
Tuni'n, natna leh khelhna om nawnlouhna Vangam lutthei dia Jesu Khrist ah lem hongelsak ziak in, Pathian kiang kipahthu gen ni. Jesu Khrist ah A iitna bukim tungtawn a Amah thupina koppih dia gouluahna hon piak ziak in Pathian tung ah i kipaak petmah hi.
Laisiangthou kawkmuhna: Kilaakna 21:8; Matthai 10:28 ; Matthai 13:50 ; Kilaakna 4:2 ; Matthai 5:12 & 19 ; 1 Korinthte 15:50 ; Joshua 24:14-15 ; Diuteronomi 30:15 ; Ephesate 1:4.

January 7, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 7na ( January 7):
Khristiante'n Laisiangthou sim a, i ngaihtuah ngitnget diing uh zaw hiven. Laisiangthou i theihdan a dik poimoh petmah hi ; Khasiangthou' haatna toh niteng hinkhua a zatkhiakna ngai ahihziak ahi. Theihdan adik kei leh zatdan leng diklou dia, huai in lamdik apat hon pialkhesak sek hi. Himahleh, theihna pen zatkhiak louh ahih chiang in, kisaktheihna suak zel hi. Kisaktheihna in puuksiatna hon tun zel si maw! Huaiziak a theihna toh hinkhiaknapihna aton helhel poimoh petmah hi. Hehpihna ziak a hotdam a omte adia chu thildang teel di om nawnlou a, Pathianthu pansan a ngaihtuah leh hin diing hita mai hi. A Thu pansan a hinna dia, i lungtang ah A Thu in nna asep i na aangvan a, i na kiminna pen i na zuih pah diing ahi. Jesu Khrist a i hotdamna thilthawn piak himahleh, nungzuihna pen 'ahihleh' chih leh 'hilele' chihte toh hong tonkhawm hi. Hiaibang a nungzuihna a hihmasak di hiam a tonpih di hong paikhawmte i hinkhiakpih theihna di'n Toupa'n A Khasiangthou haatna in hon thuam khin hi. Hiai a i nungzuihna toh hong ton i chihte ahihleh, i kibulpatna himahleh mihing theihna leh pilna khumkhel thilte ahihziak in, athupizaw theihtelnate semkhethei di'n hon thuamta hi.
I hinna di leh i hin diingdan i theihna dia A Thu awlsamtak a muhtheih dia a omsak ziak in Pathian kiang ah tuni'n kipahthu gen ni. Khasiangthou tungtawn a Amah thu toh kituak a ngaihtuahna hinkhiakpih thei dia haatna hon piak ziak in i kipaak petmah hi.

Laisiangthou kawkmuhna: Sam 119:15 ; Romte 10:17 ; 2 Timothi 3:16-17 ; Matthai 7:21-23 ; Johan 16:17; Luke 16:10 ; Phillipite 2:13.

January 6, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 6na (January 6):
Eden puuksiatna ziak in i tenna khovel ah siatna, buaina, suunna leh lungtang kikham chihte in tawp hun nei ngeilou hi. Huchi ahihleh, mite'n nattheihna kiamsakna di ahihkeh, hiaibang a hinkhua a thil khauhtakte apat taikhiakna di'n bang khawng a zang zel ua? Sapum in a phawktheihte in nuamtaal ua, ngaihdan hoih taktakte buaipihna ahihkeileh omzia neitak a buaina ahihkeh khamitna khawng delh zel uhi. Hiabangte delhna in hinkhua leh gimthuakna ah omzia nei a phawkna pia hi. Hiaite tengteng lak ah khamitna delhna kithaman pen hi in mite'n thei uhi. Aziak ahihleh, khamitna in natna leh gimthuakna ah huhna pia hi. Himahleh, khamitna dangteng sang a Khristiante khamitna achituamna chu, gimthuak leh taaksapna hunte a lungsim in leng a suangtuah vualluah Pathian apat iitna, kipahna leh lemna muhna dia phuutluih a gaakna ziak a banghiam thil hih leh nasep hoih ngai tuanlou hi. Gingtute tup leh ngiim chu, kipumpiak khiak sipsipna ah Pathian pahtawi ahimai hi - gaak leh phuutluih ziak hizawlou in, A Tapa mihing hihna leh Pathian hihna tungtawn a hotdamna hon piak ziak ahizaw hi. Huai hotdamna in Amah deihdan a kipeke sipsip di'n sunglam apat hon khekta hi.
Tuni'n Jesu Khrist ah Amah kipahsakna di leh A mai zonna dia lunggulhna thak hon piak ziak in Pathian kiang kipahthu gen ni. I Toupa Pathian in A tate a hon pomna ah A agape iitna chiilouhtak a hon piak ziak in i kipaak petmah hi. 
Laisiangthou kawkmuhna: 1 Peter 2:10-11 ; Tita 2:11-13 ; 1 Johan 2:15-16 ; 1 Johan 3:1; Galatiate 3:26 ; Sam 105:4; Philippite 4:4-7.

January 5, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 5na ( January 5):
Mihing leh thilte i mansuah chiang un i suun ua, himahleh, Toupa iitna in hon kembit ahihziak in i beidong tuankei uhi. Hiai hinkhua ah, i lametna leh in ginna kingakna hon chiansak diing dinmun tuahkhak in leng hong om veu sek hi. I lametna leh ginna lah bangkim a kipaak dia thupiak toh omkhawm ahi ngal si. Dinmun haksatak i tuah chiang ua leng, apoimoh leh khitui toh leng kipahna kiteel zaw hi; Aziak chu, i kipahna pen dinmun ah kinga lou a, Pathian iitna, A Tapa leh i Hondampa thumangtak a A kipumpiakna ah kinga zaw hi. Huihpi'n hon nuai sek mahleh, huihpi lak ah leng hon taisan tuanlou ahihdan thutak i kihilh uh leng poimoh hi. Huihpi lak ah ahi dai dide a Amah Pathian ahihlam i sin uh. Huihpi siamtu Amah ahi a, huihpi leh tuipi kihawte'n A thu mang uh ahi chih chiamteh ve ni. Ze-etna i tuah chiang ua i theih di ua poimoh chu, a iitna sung ah Jesu Khrist batna a khanna dia gimthuakna hon phalsak ahizaw hi. Ze-etna i chih Pathian thutankhumna dan a pom pah lou in, sianthouna nnasep poimohtak ahihdan theih zawk diing ahi. Huihpite hong nung zel heh aw! En bel, lungsim tengteng toh Pathian muan i na teel zaw zel diing uhi.
Tuni'n, hun chiangkuang  ngellou lak ah hi'n khemna leh ze-etna lak a hi'n, dinmun hon hihna thilte lak ah hitaleh, Amah muan utna leh haatna hon piak ziak in Pathian kiang kipahthu gen ni. Huihpi lak a i ginomlouhsan chiang a leng Amah a ginom gige ziak in i kipaak petmah hi.

Laisiangthou kawkmuhna: Sam 136:26 ; Habakuk 3:17-18 ; 1 Thessalonikate 5:16-18 ; Sam 46:10 ; Jakob 1:12 ; Paunaakte 3:5 ; Romte 5:3-5.

January 4, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 4na (January 4):
I kiim-kiang khawvel ngaikhia a, enkhia i hihleh chu, kum 20 vel paisa akipat in taksa damtheihna leh muhtheih a latdan kiphawksakna piibawltak in khovel tawndan in paizia khat hon nei hi. Nalh di, namtui di, nek hoih nek di, thil hoih hih di, zahtathuaitak a om di, khotaang ah min leh dinmun neih di, mi tamzawte painalam a pai di leh thil kikhekte ana aangvaanna chihte khawng a hinkhua hoihtak a zatna piibawl takzet in hong om hi. Hiaite tengteng a gingdan leh alatdan hoih in, khovel paidan in hoihsakpihna in namkipna bawl mahleh, athuukzaw a en a, i ngaihtuahna i piak leh, pawlawng, bawltawm leh hun tawmchik daihdiing lel thilte ahi uhi. Puaknathuaitak in, Khristian kichi tamzawte bangleng, hiai khovel paidan ah tuahluut in om uhi; midangte pahtatna leh ngaihthupina delh in, thei gegu hiam ahihkeileh lah theihlouhman hiam ziak in khovel paidan leh tawndan dungzui  in kibawllem pahpah zel mai uhi. Khristiante bel khovel a pat sapkhiak, khovel tawndan a kibawllem lou dia thupiak, Toupa Jesu Khrist a sapna toh kituak a Pathian' Thu mang leh i taangtawn Vangam ziak a gimthuak dia thupiak i hi uhi.
Tuni'n, hiai khovel ah om kawm in, i taksapum ngei toh leng Amah dungsuun dia Khasiangthou' thilhihtheihna piak a i omziak in Pathian kiang ah kipahthu geen ni. Khasiangthou' thilhitheihna tungtawn a, niteng a Amah teelzaw leh ei adia A hin banga, Amah adia hin theihna i neih ziak un i kipaak petmah uhi.

Laisiangthou kawkmuhna: Jeremia 10:2 ; Eksodas 23:2 ; Ephesate 5:11 ; Jakob 4:4 ; Romte 12:2 ; Paunaakte 1:15 ; 1 Peter 1: 14-15 ; Luke 9:23.

January 3, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 3na (January 3):
Hinkhua i palkhakte ziak in, a beithei ngeilou di'n ei ah thil khenkhat omden thei mawk hi. Huaiziak a, huaibang thilte toh khosak khawm sin kawm a huaibang thilte ziak a, i tulel hinkhua omdan leh paidan i buaisak louh diing ahi. Huai dia kikhektheihna, i hun paisate hi'n a hong tung nailoute a lauhna sang a thil hihtheizaw kipoimoh hi. Jesu Khrist' nnasepzohsa chauh ah, huai a lui apat a thak a kikhek lamdang theihna dia thil hihtheihna om hi. I hun paisa a nitna leh natnate'n i hihna gen mahleh, Jesu Khrist ah sianthouna leh damna lamet diing om hi. Jesu Khrist ah i hunlui leh thil luite mangta a, thil siamthak i hong suakta uhi. Hun liamsa a thil khenkhat i koihkhiak theihlouh a omleh, Pathian naihna leh Amah sutna a khanna dia i zat diing uh ahi, Amah taisatna leh gamlatna a zat diing hizaw lou in. Hun paisa enkik a, khelhnate ziak a mahni kimohpaih veu chih Setan deihdan ahi chih thei ni. A sisan a hon tatsa ahihziak in, Amah nungzui dia kisa khia i hih ngal leh, nung heihei lou di'n thu hon na pe veh aw, i Hondampa ngei inleng! I hihzawk diing uh ahihleh, i tulel a kibulphuh a, Khasiangthou haatna toh taangtawn a dia a beingeinawnlou diing Vangam adia panla dia i kiphawksak thak gige diing uh ahi.
Tuni'n, Jesu khrist tungtawn a i khelhna hon ngaidam kia hilou a, theinawn lou a, mailam hun a lametna hon piak ziak in, Pathian kiang kipahthu geen ni. A zahngaihna bei ngeilou tungtawn a zingkaal teng a kipatthak theihna hunlem mu i hihziak un, i kipaak petmah hi.

Laisiangthou kawkmuhna: Luke 9:62 ; 2 Korinthte 5:17 ; Matthai 6:34 ; Ephesate 1:3 ; Isai 43:18 ; Philippite 3:13-14; Genesis 19:26.

January 2, 2022

BANGKIM A KIPAHNA:
(Ni khat khit ni khat zel a, ni 365 sung kipaak dia chouna) - Chingngaihlian Tunglut

Ni 2na (January 2):
Kumthak lopna thawm bang dai gawpta in, ngeina dan bang in ni painawn zelta mah bang hi. Ahihalah, kumthak ni nihn ni pen kumthak ni sang in a manphatna neepzaw tuanlou hi. Huaimah bang in, ei leng kum thak ni nihni in ki neepzaw tuanlou hi. Niteng siamtu Pathian ahihziak in, niteng in i kipaak diing uhi. Mi khenkhatte adi'n kumthak toh kiton a thupuukna thak laak himahleh, mi khenkhatte adi'n thupuukna omsate hihthakna leng hidiing hi. Thil hoih ahi. Khelhna in hon luah gige a, i lungtang uh khemhaat leh hoihlouhna a pumdim himahleh, hoih utna nei in, thilhoih leh ahoihzaw deihna i nei uhi. A sitheingeilou tupguhna toh Khasiangthou a thop i hihtaak ziak un, thil dangteng sang in Pathian toh i kizopna uh delh diing in hasot in i om uhi. Taangtawn vai diing toh kisai khual diing i nei uhi. Himahleh, taangtawn vai diing khualna hun di'n ni simtham lek i nei uhi.
Tuni bawltu Pathian kiang ah kipahthu gen ni. Tuni toh kiton a Amah toh i kikal geelfelna dia hunlem hon pia ahihman in i kipaak petmah hi. Ni thak ahih toh kiton a, ei ah leh eite tungtawn a, Amah lemgeelsate hong taksuak ahihziak inleng i lungdam hi.

Laisiangthou kawkmuhna: Sam 118:24 ; Sam 90:12 ; Sam 51:5 ; Jeremia 17:9 ; Romte 7:15; Sam 119:2 ; Matthai 5: 14-16.

January 1, 2022

BANGKIM A KIPAHNA:
(ni khat khit ni khat zel a Ni 365 sung kipaak dia chouna) - Chingngaihlian Tunglut

Ni 1na (January 1):
Pathian' zahngaihna in kum thak vaidawn a, A hehpihna ziak in a paitou lel hi. Amah Pathian siangthou, thangvan sang ah A mangtutphah ah tu a, eite i hih lebel khelhna toh lei ah tualniamtak in i om uhi. Eite'n Amah lam ah i khut i van theihna du'n mihing suak zen in hong domsang hi. Mihing in hong piang a, mihingte khosak bang in hong khosa a, mihingte sih bang inleng hong si hi. Hichituk a siangthou Pathian in ei mikhialte toh mimaltak a kizopna nei ut ahi chih thutak i lungsim mawltak in, suut pat diingdan leng thei seng lou a, thil lamdang ahihman in ngaihtuah seng diing leng hilou hi. Pathian' iitna thuukdan, zatdan leh sandan theih sawm dia i kipat chiang inleng, lung aphuai zen in a thupina kihtakhuai mai hi. Pathian kuhkaltak, a thuchiamte a ginom i nei uhi. A thuchiamte a kepbit ziak in, eite siamtanna di'n,  A gen bang ngei in ana thounawn hi. Huchi ahihziak tak in, Amah hongpai nawn i ngak kawm in, Amah leh Amah A kipahtawina ah eite hoihna diing leng seem kawm ahi chih lametna i nei hi. A chih bang ngei in leng hong painawn ngei diing hi.
Tuni'n, siit khat leng neilou a, A khut eite lam a hong vaan ziak in Pathian tungah i lungdam hi. Taangtawn akipat taangtawn tanpha iitna ginom toh chiil hetlou a hon iit ziak in A tung ah i kipaak hi.

Laisiangthou kawkmuhna: Kahla 3:22-23 ; Nambars 23:19 ; Romte 3:10 & 23, 8:28; Sam 2:4 ; Kilaakna 4:8 ; Jeremia 31:3.

Book Appointment