GINGTU DIKTAK KI-SUICIDE MAWK DI HIA?

0

Laigelh masa ‘Pathian in Suicide-te a Ngaidam Thei Diam? ah suicide toh kisai in WHO apan leh ei lak ngei ah NEST Lamka apan data etna i na nei hi. Huai ban ah Suicide toh kisai dotna tuamtuam theihtawp suah in Bible pansan ngetnget in a dawnna i na bawlte anuai a bang ahi:

Suicide bang ahia?
Suicide mi’n bangziak a hih sek uh a?
Suicide bangchi doudaal diing?
Khristian diktak in mahni hinna la mawk thei di hia?
Suicide te Pathian in a ngaidam thei diam?/Suicide te vangam akai duam? Khristiante tup leh ngiim a khial lai di maw?

Huaiban ah Khristiante kikhin thei kihi lou/Khristiante ‘give up’ thei kihilou ahihdante bang nouneel tak in i na gen khinta hi. Huaiban ah, Hotdam diktak suicide a si tam hetlou di ahi chih bang leng, laigelh masa mah ah i na gen khinta hi.

“Suicide te Vangam a kai duam?” chih dotna poimohtak lah haksatak hunkhop vei tak kana muta hi. Kammal khat hiam thu vual khat hiam a gen khit theih geih ana hihlouh ziak mahtak in, a dawnna laigelh in kana luikhia hi. Hiai Laigelh ahihleh, laigelh masa (Suicide-te Pathian In A Ngaidam Thei Diam?) mi’n hon kupnate uh thulu nih nuai ah nouneeltak a Laisiangthou pansan ah kupbehna ahi.

Chiamteh masak dia poimoh ahihleh, mihingte i sihdan leh sihziak in meidiil hiam vangam hiam hon tun di hilou a, hotdam i hih leh hihlouh in i tangtawn mun di geel hizaw hi. Hotdamna tang lou khat asih leh chu meidiil tung di ahi chih i thei uhi. Huaidan in, hotdam sa ahihnak leh chu asih dan hilou in, hotdam ahihziak in vangam kai diing hizaw ahi.

1) Kupna khatna “Gingtu taktak ki suicide lou di ahi, kisiik man lou di ahihziak in” chih kupbehna:

Matthai 5:28 ah i Toupa Jesu in, “Kuapeuh numei khelhpih utna toh en tuh, a lungsim in ang a kawm khinta chih k’on hilh ahi” chi hi. Hiai Bible chang mah pansan in kupbeh leng i ut ahi.

A omzia chu, lungsim a khial le a khial taktak toh kibang i hi uhi. Huchi ahihman in, mangbat leh chimoh tongkhong ziak a, lamet bei kisak hun khat a mahni kithah di ngaihtuah kha hunkhop i om ve uale, i va semsuah kei ua hiven. I kivel chet ngaap uleh, lungsim a khial veute i hikei ua hia? I khelhna uh i kiphawk louh uh le tampi om di’n i gingta hia? I khelhna teng uh kiphawk sipsip a, kisiik sipsip chih thil hithei di’n le i ngaihtuah hetkei hi. Huaidan a kiphawk sipsip a kisiik sipsip theilou/zoulou i hihziak ua, eimah kia a suakta zou mahmah lou i hihna ziak tak ua, Pathian hehpihna leh zahngaihna i tung ua tatsat lou a, Jesu Khrist sihna leh thohnawnna ah, om gige ahihdan i theihsiam uh poimoh hi. I bukim louh ziak mah ua Pathian i poimoh uh ahi. Ei kia a, Jesu Khrist panglou a suakta mahmah lou i hihna uh a chetna ahi. Achihleh, lungsim a i khelh laitak un siphut le, kisiik manna di hun kinei manlou bang hitaleh, hotdam i hihnak leh vangam kailouhna di bang a om? Huaidan a khelhna huaise mahmah ahih kawmkawm a suicide/mahni kithahna (tualthahna) i chih Toupa a dia ngaihdam theihlouh khelhna hilou ahi.

Himahleh i leitung hin sung a, gingtu piangthaksa i hihna ah, ei leh ei kithahna pen i nnasep tawp pen ahih di khawng uthuai mahmah lou zel ahi. Toupa toh i kimaituah chiang a, theihtawp suah in gimthuakna tampi toh kong tung i chih anuam zaw diam ahihke’h, na deihlouh bang in, khelhna huaisetak hih in na kiang kong tung I chih koi a ut huai zaw dia? “Na hihhoih e sikha hoih leh muanhuai” chih khawng zaak uthuai zaw lou di?

I na gensa mahbang in, en khelhna a le i na ngaih khollou, Pathian zakdah di tampi hihkha veu le i hihkha moh di uhia! Huaidan a i hihkhak uh khelhna ahihlam le i phawk louh uh chu koi ah, bangchi kisiik di? Gingtu khat in a gimthuakna thuak zoulou a, amah deihteelna zang a aki-suicide leh, tualthat hi a, a kisiik man leh manlou in thu paw lou a, hotdam ahih leh hihlouh in thu paw zaw hi.

Hiaiteng I gen nung a, vangam kaina dia kisiik man poimoh sa teiteite adia theihtuak khat om a, huai chu, suicide toh kisai in research a muhkhiak uh khat om hi ; Mahni kithah sawm a paisuak loute’n (suicide survivors) poi sa petmah ua, huaibang a kal asuan uh kisiik petmah uh ahihdan gen tam mahmah uhi.

Kupna khatna i khinta di’n Pathian hihna, A Pathian zia ana en zual le’ng; I biak Pathian mihing bang ahi kei a, ei khelhna in hon melhemsakte ngaihtuah bang a ngaihtuah leng ahi kei hi. A lungsim khekkhek leng ahikei hi. Hinna laibu a min kigelhsa kithaimang thei chihlah Bible ah kigenkha lou ahihziak in, hotdam diktak suicide omkhate leng vangam kai diing uh chihna ahimai kei dia hia? Pathian in Jesu Khrist ah hon iitna tangtawn daih a, Amah iitna apat bangmah in hon khen ngeingei lou diing chih Laisiangthou in hon hilh hi.

(Kilaakna 3:5 ; Malaki:3:6 ; Jakob 1:17 ; Nambars 23:19 ; Johan 10:27 ; Johan:10:28 ; Romte 8:35, 37,38,39)

  1. Kupna nihna “Gingtu taktak in suicide lou di ahi, haksat hun ah Pathian ah kinga zoulou chih omlou a, thuak teitei ahih ziak un” chih kupbehna:

Lungsim natna ataktak ahihdan suicide thawm ging i zaakte un a chian lel hilou hia?

Puuksesa khovel ahi chih i theihsiam ua i pomsiam uh poimoh mahmah ahi. Puuksesa leh akitamkham khovel bukim lou a, haksatna leh buaina tampi omna khovel ahi chih i thei uhi. Taksa a natna bukim omna khovel ahi chih le i thei ua, Toupa hong pai ni lap manlou teng chu, si teitei diing i hi uh chihle i thei uhi.

Nat leh sat ziak a si phut om sek mahle uh, ataangpi in natna neisa leh thuak ek khit nung a si khawng mi tamzaw uhi. Diabetes, BP buai, heart attack, stroke, hepatitis, T. B, cancer chihte thuak mualsuah zoulou in i Khristianpih tampite ana sita ve uale.

Taksa natna om ahi chih thudik ahihleh, lungsim natna leng omtham ahi chih thudik ahihdan i pom uh poimoh hi. Taksa natna neite thuak zou lou a site’n a mau deihteelna zangtheilou uh chih i thei hi. Lungsim natna nei te’n leng, amau deihteelna  zang a natna pen a kipiak uh hilou ahihman in amau deihteelna zang in, a lungsim natna uh paikhe thei mawk sek lou uhi. Lungsimlam natna nei a, Huchia amau deihteelna zang a sihna teel uh chih himahleh a deihteelna uh buai petmah ahi chih i theisiam hi.

Taksa natna tuamtuamte khovel puuksesa leh Eden khelhna gu leh gau ahih mahbang a, lungsimlam natna leng, Eden khelhna gu leh gau ahi chih pom theile hang, lungsimlam natna kep didan leh a damna di chih phet louh a, a doudaal didan le aangvan thei di i hi uhi. Lungsim natna omlam i pom utkei leh chu, piangthaksa suicide-te vangam kai di uh chih kipom lou di chihna ahi. Puuksesa khovel a taksa natna chikim om ahi chih i chian a, i pom ngal leh, lungsim natna om ahi chih bangziak a i pom utlouh eita?

Chiamteh dia poimoh khat ahihleh, i nat chiang hiam, hun mialtak leh hunbi haksatakte i tuahchiang ua, thil i muhdan uh buai sek inchin, ataktak toh kibang hetlou, thudik hi hetlou khawng ataktak leh thudik bang a gingta tinten leh pom in ki-om sek hi. Ei ngaihdan, muhdan leh phawkdan teng ki piisak mawk lou a, Pathianthu a kingak poimoh petmah hi. Gingtu piangthak kichi i hih uleh, Pathianthu a i kingak theihna di ua, tui a thil i ching sek bang ua, Pathianthu a i kiching diing uh ahi. Huaina dia Pathianthu sim a, suut a, sepkhiakna niteng hinkhua ah poimoh hi. Lungsim natna neite’n ngaihtuahna damtheihhuai leh ahoihlam ki pethei lou uh chihna ahi.

Huaibang lungput bawlhoihna dia akhenchiang a psychiatric damdoi poimoh hi. Psychiatric damdoi i chih natna chikhat damdoi mahbang a i koih theih uh leng poimoh hi. ‘Mihai damdoi’ khawng chi hang ua, a ne utlou tampi om mawk! Taksa a damlouhna nei te’n le damdoi ne utkei mawk leng bang chi di? Lungsim natna toh kisai ahih chiang a bang achia ‘ginna hatlou’ toh mekbelh naak I hi ua? Ginna hatlou ziak leh Pathian a kingak zohlouh ziak chi i hileh, Cancer, HIV/AIDS, Hepatitis, BP buaina, Diabetes leh natna tuamtuamte leng damdoi nelou in ginna in kinga suk le himai lou?

Suicide i chih chiah lungsim damlouhna toh kisai a omdan nanung (final symptom) chihna ahi. Puak zohlouh puakgik ziak a puuksiatna nanung chihna ahi (final collapse under unbearable weight). Dahhuai leh lungzinhuai petmah thil (tragedy) ahi.

Theih dia poimoh khat i gen zual diing hiai mun ah: Suicide toh kisai data tampi dungzui in, Depression (lungsim natna) a nei numei tamzaw tham mahle uh, depression ziak a suicide a si pasal tamzaw thamtham hi.

Hotdamsate’n melmapa Setan thei zek ni:

Gingtute’n hotdam i hih nung a chu, i hotdamna lau leh ling kawm a i sepkhiak diing uh ahihdan i lungtang ua i vom det diing uh ahi. Huai kawmkawm in, i melma Setan nnasepdan leng i theih poimoh lai hi. John 10:10 ah “Gu di, that di leh hihse di chauh” a lungtup eite tung a nei ahihdan i Hondampa’n hon hilh hi. 1 Peter 5:8 ah leng, ‘huumpi neelkai nek di zong’ bang a, mi nek siat di zong a vial vaakvaak ahihdan leng i chian nawn hi. Huaiban ah, John 8:44 in ‘zuaupa’, huaichu zuauthu sai siam penpen leh  ‘tualthatpa’ ahihdan hon hilh hi. I meelmapa’n eite tung a hichituk a mulkimhuai lungput nei in, huaisetak in gamtang mahleh, Toupa Jesu Khrist nnasep zohsa ziak in meidiil apat suahtakna kia hilou in, hiai lei hinkhua ah leng, Setan tung ah vualzoutak in i omthei uhi. Setan in i taksa leh lungsim ah douna nna hat taktakte sem mahleh, i Hotdamna uh hon suh theih himawk lou ahi. Toupa hoih hi!!

Toupa Jesu nnasepdan zaw hiaidan ahi daih hi; I  khelhna khenkhat a dia si ahi hetkei a, i khelhna tengteng a dia si ahi. A thohnawnna inleng, i khelhna khenkhat ziak a hon siamtan ahikei a, i khelhna tengteng apat hon siamtan hizaw ahi. Khalam a douna nasatak thuak Khristian khat in, a hatlou laitak a aki-suicide khak zenzen leh, Toupa Jesu Khrist sisan a tatsa ahihna bei tuanlou hi.

Huchi ahihlai lai in, gimthuak di a sap i hihlam uh kiphawk gige in, haksat hun a  Toupa kiang ah i tai teitei diing uh ahi. I gimthuakna te uh athawn ahikei chih i theih ua, Pathian tate i hihlam uh kiphawk a, i hinna uh Toupa A laak masiah, gentheihna a dim in, haksatna a dim hitaleh, kuhkalna sin a, i thuak teitei di uh ahi. Hinna ichih a siangthou (sacred) a, ei i kipiak hilou a, ei deihteelna zang a i kilaak di hilou ahi.

(Jakob 5:7–11; 1 Peter 2:19–20; Hebrute 12:7; Romte 5:1-5 ; Genesis 1:27 ; Sam 139:13 ; Job 33:4)

Lametna i neih uh lenkip tinten ni:

Gingtute’n hun haksa i tuah hun un, Sam gelhtu in, Sam 43:5 ah ana gen mahbang in, “Ka hinna aw, bang achia kun nilouh? Bangachia ka sung a buai na hia? Pathian lamen in: amah ka hon phat ding ahi ngala, hon panpihpa leh ka Pathian” i chih tei sam diing uh poimoh lua hi.

Khrist Jesu i Lametna hing ahihman in khamuanhuai lua hi;

  • Lametna in hon kipaksak hi.

Hebrute 6:19 – Huai lametna tuh hinna sikkip in i nei a, muanhuai leh kiptak ahi, huai lametna tuh puanzak sung ah leng a lutta hi.

  • Lametna in hon mualphousak lou hi.

Romte 5:5 – Huan, lametna in tuh hon zahlaksak kei, huai Kha Siangthou i kiang ua hon piak pansan a Pathian itna i lungtang ua sun a a omtak ziak in.

  • Lametna in hatna thak hon guan hi.

Isai 40:31 – TOUPA ngakte’n zaw a hatna uh a thaksak nawn ding ua; muvanlaite bang in kha in a leng tou ding ua; gimlou in a tai ding ua; bahlou in khe in a pai ding uhi.

 

Kumpi David bang leng, eite bang a hinkhua buaitak leh khelhna sangpipi a ana kibual kha  himahleh, Pathian in “Amah lungtang pu mi” ana chi hi. Tomchik leh mawl chik a i theihsiamdan in, Kumpi David in Pathian a iit mahmah a, Pathian’ daante a ngaina a, Pathian a beel gige a, Pathian kiang ah a lungsimse teng toh leng a tai gige hi; Pathian toh kichimattak a om ahi i chithei hi. Eite’n leng Pathianthu ah kibulphuh in, kichimattak a om in, i hihna leh buaina, khelhna leh lungput hoihlou teng toh leng Amah kiang ah tai le’ng Ama’n Amah Thu toh kituak in i lungsim leh omdante honna bawl hoihsak zel diing hi.

Thukhitna di’n, ei gingtute’n i hih (gamtat) khempeuh Pa Pathian kiang a kipahthu gen kawm a Toupa Jesu’ Min a hih a, i sep khempeuh uh Toupa nnasem a kingai di i hihman un, Suicide i chih Toupa’ nnasepna ahihkeileh, Amah min suang a gamtatna hilou hial ahi chih i theih uh poimoh hi (Kolossate 3:17,23).

Toupa’n simtute theihsiamna thak leh navaakna thak toh hon vualzawl hen. Simtute lak ah suicide lungput neikha i om leh, Counselor/Pastor houpih poi sa kei ni. Pathian in huaibang lungput apat suahtakna Jesu Khrist min in hon pia hen chih ka thuumna ahi. Amen.

 

-Chingngaihlian Tunglut

March 10, 2023 / Article No. 32

(Hiai Laigelh ahihleh, laigelhtu phalna lou a  news/bulletin sutkhiak (print) a suah phal ahi kei.  Laigelh toh kisai leh laigelh zatna di toh kisai a laigelhtu thuzaak ut a omleh 9892316430 ah thuzaak theih diing hi)

Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment