Dai unla, Pathian ka hi chih thei un: nam chih lak ah pahtawi in ka om ding a, lei ah pahtawi in ka om ding hi. – Sam 46:10
I Tangteel lakkhiakna Sam 46na ahi. A tawn a i simsuak leh, tomchik a gen in, hiai Sam gelhtu in Israelte Pathian a kihumbitna uh leh hatna, mangbat lai a huh pahpahpa nai gige ahihdan hon gen masa hi. Pathian thilsiam thupitak tuipite bang ging honhon in phul butbut in, a kihawt thupi ziak in mualte liing duamduam mahleh, lau tuan lou ding uh ahihdan gen hi. Pathian siamsa thil leh khovel paidante leng kihot in, phuul in, liing zungzung mahleh, Pathian liing lou a, Amah tung a kingate adia bangmah lauhuai omlou ahihdan gen hi. Toupa, Jacob Pathian tuh Israel-te innsang (bitna) ahihna gen a, tungnunpen ahihna kawkmuh a, Ama’n amaute ompih ahihziak in, lauh louh diing ahihdan avel in gen hi. Amah Pathian tungnungpen ahihman in, Amah lemgeel toh kituak in, ahun hun in khovel hihsia a, poimoh asak chiang in kidounate bang leng dai vengveng sak zel ahihdan leng taaklang hi.
Hiai Sam gelh hunlai khawng in, Israelte leng meelma neihziak leh nelhsiah a a-om ziak ua buai hile uh akilawm hi. Huai phetlou in, khovel toh kichimat pah sekte ahi ua, khovel thil leh paidan buaipih luat ziak a thawm ngaihtak nei a ana buai sekte leng ahi uhi. Pathian in hiai Sam gelhtu tungtawn in, dai (khawl/kingaihtuah) a, Amah hatna leh ompihna a muang dia thu pia hi’n i thei hi. Amah Pathian tungnungpen ahihna ah, pahtawi a om diing ahihdan ngaihtak in ana kipuangkhia hi.
Kingaihtuahna (self reflection) hunlem:
Ei Singtangmi Khristiante leng, sa dan ah Israel-te hikei mahle’ng, Jesu Khrist’ nnasep zohsa ziak a, Pathian’ tate leh gouluahtute hihna thupitak tangte i hi uhi (John 1:12 ; Romte 8:17). Huai ahihman in, Abraham tungtawn a thuchiam tangkhate leh hamphatpihte i hong suakta uhi (Galatiate 3:9). Himahleh, khovel toh kichimat law kha zel i hihman un, khovel thilte leh paidan ngeinaseh pah zel in, Pathian’ tate hihna ah chituamtak leh khovel mial taanvaak diing a Toupa’n hon lamet i hihlam uh i mangngilh pah zel uhi (Romte 12:1 ; 1 Peter 2:9 ; Philippite 2:15 ; Matthai 5:16). Khovel thil a thil omdan thawm ngaih mahmahte ah buai vengvung in, Toupa lak apat i gammang gawpta uhi (Isai 53:6 ; 2 Timothy 3:2). I tulai dinmun uh i ngaihtuah chiang in, Toupa’n Israel-te thawm ngaih A sak bang a eite leng thawm ngaih hon sa lua ahi diam, chih lungsim ah lian mah mah hi. Dai (khawl/kingaihtuah) a, A hon lamet bang ngei a, Amah limsak leh ngaihven dia hon deih ahikei kuan i chi ngam dua?
Meiteite toh i buaina uh toh kisai i ngaihtuah chiang in, Toupa’n a phal ahi. I tuah khempeuh uh Toupa’n hon sawl ahihkei hial leh, Setan nnasep a khouh louh chihna ahi. Toupa’n hon sawl ahih chiang in, ei adia hoihna dia hon sawl ahi sek hi. Setan nnasep a khouh louh chiang in leng huaite tungtawn in ei hoihna di mah, a hunhun in hong semkhe zel hi. Pathian tungnungpen ahihziak in A ut leh thil hoih in A kipahtawi dia, A ut chiang in thil sia a i koihte uh tungtawn in leng kipahtawi lou tuanlou hi; Lei ah, namchih lak ah Amah leh Amah kipahtawi ahih man in (Sam 46:8-10). Ama’n A deihlam leh A lunggel bangbang in, A tup bang ngei in thil bangkim semkhe gige hi chih i thei uhi (Ephesate 1:11). Pathian lemgeel theisiam khol kei sek mahle hang, ei adia hoih hi gige ahi chih chiamteh tham hi (Romte 8:28 ; Jeremia 29:11; Sam 115:12). Job in ana gen mahbang in, “Ama’n hon hihlum mahleh, amah ka ngak lai ding: ama ah ka lampite ka kemhoih lailai ding hi.” chi thei khop a Pathian ah i ginna leh muanna i ngak diing uh ahi (Job 13:15).
Gingloutute tawndan koppih Khristiante:
Lamka khopi ah, singtangmi tamzaw tham mahle hang, gingtu hilou nam dangte (Meiteite leh Vaite) toh leng khotaang ah i khosakhawm uhi. Khristian hinapi in, ginglou Meiteite chiindan leh tawndan khenkhatte’n hon hiip in hon tuum gawp maimah hi. Samitna uang gawp in, gingloute Maibi leh Maibate uh khawng, sum tampipi sung zen in i a ginna uh i va koppih maimah uhi. Khristian kichi a Dawi ai-san tampi ki omtel eive! Pathian mai ah i angkawmna uh a zumhuai hi! A tawndan khenkhat uh ‘Thaban Chongba’ khawng va en chihphet louh in a va thanuam pen khawng a va panh in i va kihel sosouh sek zomah lai uhi. Huai banh ah, ei singtangmite tawndan le hikhalou, Khristian thupiak le hikhalou khawng, Imphal phaizang a tengte kia hinawnlou in, ‘Chakkouba’ chi in, Khristiante lak natawm ah ei ngeinadan bang a koih hile kilawm in i hahbawl mahmahta uhi. Mou khenkhat a diing ngial in pasalte innsung a kisuanlahna tuntu suak zou hial hi; Ningol Chakkouba Ni a nawlam a ann ne dia a chialtu di neilou khenkhatte bang, a innkuanpihte’n nuaisiahna a zang in, kouna leh muhsitna a a zang pawl bang ki om zeuhzeuh hiteh veh! Hiai thil ahoihna khenkhat gen diing nei maithei himahleh, mou leh mou kaal ah leng kinuaisiahna tuntu ana hihdan i theih uh deihhuai mahmah ei ve!
Singtangmi Politician khenkhat tel in, ginglou Meitei Politician-te maipha zonna ziak hiam, amau lak a va tuam deuhse niamna a i ngaih ziak hiam in (Romte 12:1; 1 Peter 2:9;), gingloute thilchiinte khawng va koppih banah a milim biakte uh mai khawng a va kuun pawl bang om sek uhi. Thil houchik a i ngaihte uh lah Pathian zaakdah bangzahtak i hihkha di ua le?
Pathian’ Nam teel Israelte leng chituam dia Toupa’n asap ahih lai un, a tenkhawmpih uh, gingloute tawndan leh a pathiante uh a va koppih chiang un, Pathian thangpaihna sukha mahmah uhi. Eite leng, i theihsa chiat bang un, i kiim-kiang a gingloute tawndan koppih theite i hihman un, A Siangthou Pathian mai ah i kihhuai un i niin mahmah mai uhi. Ginglou Meitei-te’ nelhsiah leh nehden a i om uh bang leng Pathian in, kha leh sa ah “Khanglou un! Halhkhia un!” hon chihna ahi kha diam? (Romte 13:11; Isai 51:17, 52:1)
Galdou kawm in eimah a kivaipuak tuam utna in, thawm ngaihtak in, khovel vai ah i buaita uhi. Pathian i sam ua, i thuum ua, huaile, khalam masawnna lunggulhna lampang hilou in, melmate zohna diing leh amau apan bitna diing leh mahni kivaipuaktuam theihna diing chihte khawng i ngen ngutngut uhi. Meitei-te toh hichia i hong buai uh zaw, amau lak a pan khalam a om tuam dia Toupa’n hon sawlluihna a hizaw kha mai diam? “Ka mite aw, Hong omkhia unla, amau apat hong pawtkhia un” chi a hon sapkhiakna ahi kha diam? (Jeremia 51:45 ; Kilaakna 18:4 ; Jeremia 3:23). Adiak in Imphal lak a omte bang, inn-le-lou leh khosakna apat kizungkalhkhiak zen in gingtu hilou Meitei-te lak apat sapkhiak/sawlkhiak in i hong omta mawk uhi! Mi hunkhopte amau lak a va tuitum lua in amau tawndan leh paidan ban ah, lungput leh omdan natawm va koppih a om i hihziak un, sapkhiakna thupitak hong tung ahi chile’ng i genkhial kei maithei! Aziak bel, gingloute hindan kop zelzul a om nawnlou a, Pathian Tate hihna dungzui a i hin uh a poimoh luat ziak in. Tu apan gingtu lungsim i put ua, omdan leh gamtat hoih i pat kei uleh, kivaipuaktuamna ngah in lei ah lohching hial lengle, khalam a phattuamna omlou chihna hi diing di. Pathian mitmuh a lohsam leh phattuamna bei, hon sapna dawngkha lou leh hon deihna subunglou lou a, athawn a thuak i hihkhak diing uh lauhhuai hi (Matthai 6: 19-21; 16:26 ; 1 Korinthte 15:19).
A gam leh a diktatna zong masa leng, Toupa’n i poimohte hon iit lou hial diing hi. Zingkal a paak a nitaak a vul mai diing gamlak a Lily paakte natawm thupitak a zem ahihleh, ei A Tapa’ Sisan a hon leikhiaksate’ khovel leh salam poimoh Toupa’n thei lua hi. Huai kia hilou in, i poimohte hon pedia thu hon chiam hilai tel hi! (Matthai 6:25-34 ; Romte 8:32)
Khristian hihna kisuanpih mahmah a, sihpih ngap hial diing leng i tam diing. Himahleh, a taktak gam ah, kuhkaltak a, niteng a mahni khros pokawm a hinpih ngap i om tam kei zel hi. Biakinn thupitaktak a kilam sung ah, nalh taktak a kichei kawm a Pathian bekhawmte i hihlai un, gingtu hinkhua thupi ngellou leh etlawm ngellou tampi om hi’n kilang hi.
Patrick Henry in “It is when a people forget God that tyrants forge their chains.” ana chi. Amah, United States of America dinkhetute lak a politician khat leh gam adia Pa hihna ana lente lak a khat ahi. A gen omzia, “Nam khat in Pathian a mangngilh chiang un, vaihawmtu gilou in amaute’ siik kolbuhna diing in siik a seek pan hi” chi in let le’ng a chiang hi; A thugen leng a dik mahmag hi. Pathian mangngilh gawpta i hihman ua, Meiteite hon nuaisiah ban uah, huhamtak a hon nuaimang a tup pen uh Ama’ lam i ngatna dia Toupa’n hon phalsak ahi diam?
Haksatna i tuah chiang un, khamuanna thute i lunggulh taangpi uh ahi. “Bangteng hong hoih mai di”, “Toupa’n i gaal hon zohpih di ahi” chihkhawng i zaak ut pen uh ahihlai, i zaak di ua poimoh pente zaw, “Eilam ki en niuh” , “Kingaihtuah niuh” , “Pathian’ mai zong” ni”, “Pathian naih ni” , “Pathian buan ni” ,” Kisiik in kihei ni” chihte khawng ahi (Nnasepte 3:19, 17:27 ; Jakob 4:8)
Singtangmite Kipumkhat theih didan:
Pathian hing bia, Singtangmi nam tuamtuam Khristian khotaang a khosa i hi uhi. “Unau i hi uh”, “Hon suangtu khat ahi” chih gengen hinapi in i kituak taktak thei hetkei uhi. Gaal i neih ziak un, alou theilou in kipumkhat in i hong om sawm zel ua lah, ngaihdan tuam chiat nei in i hong om chiat zel uhi. I poimoh ngaih pente uh hong kibang thei lou zel a, mahni aangmasialna in hon pumtuam chiat a, banghiam i kisakna uh hong thupizaw chiat zel a, huchi’n khekhat a dinkhawm haksa i sa mahmah zel uhi. Dohkan khat a tukhawm a, genkhawm a, kingaikhe tuah a, ahoih di pen a kithukim theihna dia, kinial zek angaih lehleng kinial zek a, genkhawm teitei chih khawng i hihtheih lampang uh hikhollou abang hi. Khristian i hihna uh ahihleh, Biakinn sung kia a di hilou a, i social (khotaang) leh political movement te ah leng i dinsan leh pansan diing uh hizaw ahi. Hon suangtu kibang ahihna hiam leh nelhsiah a om i hihnate un hon kipumkhat sak taktak thei lou a hihman in, lampi khat omsun ahihleh, Jesu Khrist ahi. Khrist nnasepzohsa ziak a Pathian tate i hihna uh pansan a i kipumkhat kei ualeh, kipumkhatna diing lampi dang himhim omlou hi. Pathian’ tate i hihna uah, unau i hihna uah, Khrist sisan ziak a pumkhat i suahtheih kei uleh, i kigawmkhawmna di ziak uh thildang om nawn himhim lou hi. Khrist ah kigawmkhawm i sawm hamham diing uh aw! (Galatiate 3:28).
Pathian eilam ah pang hia?
Pathian eilam ah pang a, i gaal hon doupih in i koih uhi. Hoihtak in ngaihtuah mahle’ng, Pathian in dou dia hon sawl gaal hi masa hetlou ahi chih i theih uh poimoh kasa hi. Pathian dong chetchet a gamtang le i hi sam kei uhi. I buai ua, mangbatna in hon tuam a, i thuum ua, panpihtu nai gige ahih bang ngei in (Sam 46:1), i ngetna uh hon dawng zel zel hi (Sam 34:17). Amah Min ziak in Toupa’n hon humbit a, poimoh asak bangbang in hon panpih hi (Sam 106:8). Eilam ah banghiam guptaak i neih ziak hilou a, ei hoihna leh Amah i biakzoh ziak uh leng hilou a, Jesu Khrist ziak a, Amah Min ziak a hon gup hizaw ahi (Sam 109:21). Israel-te tung a Pathian a ginom ziak ahihleh, Israel-te hoihna ziak hilou in, a tung ua Athuchiam ziak hizaw hi. A MIN ziak hizaw hi (Isai 48:11; Sam 23:3 ; Ezekiel 20:9&44 ; Sam 31:3 ; Jeremia 14:7). Eite toh kisai a leng A MIN ziak a hon hum ahi: “Pathian eilam ah A pang” va chih gaihgaih a, kiphatsakna a i zat diing uh hilou ahi. I mangbang ua, i sam ua, Amah Min ziak in, Jesu Khrist’ tangthupha ziak lel a hon panpih ahihdan mangngilh kei ni.
Meitei-te pawng huat leh i kihuat-tuah-siak ua, a thulai gente khawng toh le i haw khawm suk uhi. Tulaitak a chu meelmate iit a, ei hon doute adia thuumsak (Romte 12:14) chih khawng i ngaituah ut lampang uh hilou hial hi. Amau hon huatdan leh zuau haatdan khawng chu, ahi di mawng eivoi, gingloute hive un! Eilawi omdan bang i chi uale? Pathian hing bia i kichi ua, i meelmate utoh Toupa’n hon tehkak bang hitaleh, i chituam luatna uh a mu tam diam? “Guta! Guta” chi in i kou ua, eilah i guta lou tuankei ua, “Hon thahdan uh a huham” i chi ua, enle amau huhamtak a i thah uh omlou tuanlou hi. Meiteite i huat tuk ua Pathian inle hon huatpih di khawng a koih hang ua, huai di khawng a thuum pawl bang leng i om uhi. Ei ngaihtuahdan a Pathian om mawk lou ahi! Dai (khawl/ kingaihtuah/Kipekhia) ni, Toupa mai ah!
I sanggamte numei nih vuaktang in, mualphou theitawp in lamlian azuihpih ua, i pawna in, i khase thei mahmah uhi. Ahia lah singtangmite’n numeite i nelhsiah lou tuan ua hia? Numei khat mohpaih huaitak in hong khosa a lah, hehpihna bei in, pasalte kouna thukhat hitaleh, numei dangte’n leng zahmoh kampau khawng in a kou zialzial ve uale maw!
Khristian khotaang hinapi in, numei tunga hiamgamna – Sualluih (rape), numei tung a khutkhakna, numei hihna ziak a nelhsiahna tuamtuam leh suk mualphouna chihte i hihthou ve uale! I gaalte’n mipi muh di’n, a langtang in a hih ua, video a ana kila khageih in, a hong kithehdalh (viral) leh, thil tung ngeilou tung, eilak a le i hihkhak ngeilouh uh gitlouhna/khelhna mah i bangsak uhi. Hiaidan a ka gen ziak in Meiteite gum hon hisak kei un! I khosakdan uh ki-etna di tham ching kasakdan genna ahizaw hi.
Thutanna bawltu dik Pathian ahi chih i thei uhi. Meiteite tung ah leng, gingloute ahih dungzui un, a kampau uleh gamtat dungzui un, diktat tak in Toupa’n amau vaihawmsak diing hi. Eite tung ah leng gingtu i hihbang un, i kamsuak uleh i gamtat dungzui un, hon thukhensak lou tuanlou diing hi. Gaal nei i hi ua, i kihum louh theihlouh uh himahleh, i gaalte tung ua i gamtatdan teng uh Toupa’n a haih omlou hi. Pathian kiang a thuumkawm zel a gaal dou i hihman un, i pilvan uh kuul a, ngaihdamna i nget zel uh leng poimoh petmah hi.
Toupa’n hon sapna zaw, salam gaaldouna ahihsang in Khalam gaal douna hiveh aw; Amah hotdamna taangthupha leh A thupina puanzaak hiveh aw! (2 Korinthte 10:3 ; 1 Peter 2:9). Nasepte 20:24 a i muhmahbang in, Toupa’n a tangthupha genkhia leh A Thu hinpih dia hon sapna semkhin phot leng, i hinman uh om diing hi.
BJP i vote zel ngam lai duam?
Meiteite toh i buai pat sawtlou nung in, ka sepna mun (YMCA Counselling Centre, Belapur, Navi Mumbai) a heutu lian khat in, i buaina thu uh toh kisai hon houlimpih hi. A thumasa dia hon gen ahihleh, “Nou Khristian kichi uchin ua, bang dia, BJPte na vote ching mawngmawng uh ahi hiam?” chi’n hon dong hi. BJP ticket a Khristian kichi politician-te a din uh khawng leh, BJP i vote ching khawng uh leng poi sa lua leh i na puaknat luat ahihman in, ka dawng didan kana thei zok kei hi. Bangziak a BJP ticket a ding i hi ua i chihleh; Lalna, hihtheihna leh politics a mavanna deihziak hilel hi. Bangziak a mipite’n BJP candidate vote i hua i chihleh, a party hilou in a mi a i vote ziak uh hi’n ka ngaihtuah hi. BJP in Phualpi Solkal ah vaihawmna tutphah hon luah a kipan, Khristiante nelhsiahna leh gawtna India gamsung ah uang sot mahmah chih phet lou in, Politics tungtawn a Hindute ngaihdan leh paidan nasatak a vawksang leh thehzaak hong hita hi. Awlawl in state sorkar hihna a luahnate uah, BJP lungput leh tup leh ngiimte hong kilangkhe hiaihiai hi. Manipur ah leng, huaidan mah in thil hong pai hi. Etsakna di’n, Manipur Sorkar (BJP Sorkar) tungtawn in ‘International Yoga Day’ zatna bang nasatak in hihhat in hong om hi.
India mi leh sa hihna ah, makai diing teel i mohpuak uh ahi. Khristian hihna pansan political party omlou ahihman in, Khristiante doudaal lou penpen i teel (vote) zel di uh chihna ahi. Khristiante’n Pathianthu (Bible) pansan a thil i et uh poimoh lua hi; i khovel leh khotaang vaite leng Bible mah pansan a i sai uh poimoh semsem ahihdan i tudinmun un pawkhe mahmah hi.
Thukhitna:
Israel Pathian i innsang leh bitna ahihman in, khovel leh i kiim-kiang liing in, phul butbut in i gaalte hat mahle uh, lauh diing bangmah omlou hi. Amah a kinga, A mite a diing in Toupa’n tawlngalou in nna sem gige ahihman in lung himoh kei ni (John 5:7). Amah beel tinten a, Amah muang a, Amah a i kingak nak uleh pautauhna diing omlou hi. Toupa’ hon ngaihtuahna piauneel sang a leng tamzaw ahihdan Bible in hon hilh hi. A hon ngaihtuahna manphatak ziak in, i buainate uleh, i lunghimohnate uh hon phawkpih lawtel kia hilou in, i lampi zuih lellelte uh leng hon zuihpih lou hetlou hi. Huaibang a hon ngaihtuah Pathian in ei a dia poimoh thil hon AMEN lou hetlou diing hi. (Jacob 1:2 ;Sam 139:17-18). Amah hatna leh ompihna ah tawldam ni e! (Sam 46:7&11 ; Matthai 28:20 ; Sam 28:7, 46:1)
Eite hon poimoh het lou leh ei tellou a leng Amah leh Amah kipahtawi gige Pathian ahi. Angel simsenlouhte’n a suun-azaan in chim hetlou in pahtawi den uhi. Bangkim tung a tungnung Pathian ahi! Jesu Khrist ziak in, Amah pahtawina a tan neikha leh dinmun bawlsak a om i hihlam uh kiphawk thak ni. “Dai unla, Pathian kahi chih thei un” a chih thei in, Amah pahtawina a kipumpiak thak di’n, simtute Toupa’n hon vualzawl chiat hen, Jesu Khrist min in, Amen! (Sam 71:14).
-Chingngaihlian Tunglut
October 16, 2023 / Article No. 33
(Hiai Laigelh ahihleh, laigelhtu phalna lou a suah (print) phal ahi kei. Hiai laigelh ahihleh, Ruth Messenger Sep-Oct, 2023 ah leng kisuah hi. Laigelh toh kisai a laigelhtu thuzaak ut a omleh 9892316430 ah thuzaak theih hi. )