Toupa Jesu Khrist a ginna leh lametna neite hi’n ginglou mi tam tak te hileh, niteng a i maituah uh a kibang toutou a om gige hi. Tuate tuh lungsim suangtuahna, ngaithuahna leh thil gelsiamna chihte, hih ding leh hihlouh ding, ahoih leh hoihlou khenkak theihna i neichiat uhi. Khenkhatte ahihleh pilna lam thu ah Pathian om taktak mah adiam aw, Jesu Khrist kia a hotdamna leh vangam luttheihna om taktak mah hihiam? chi in ginglelhna neihloh bang a om hi. Khenkhat lah a thiltuahte uh tungtawn bang in ginglelhna, Pathian om taktak ahihleh bang ziak a khovel siatna lak a hichi bang dinmun te hon maituah sak adiam aw, ahihkeileh bang ziak natna leh buaina tuamtuam te apan hon homdam pahpah theilou hiam? Bangziak a ken tua bangte maituah se kahi hiam aw? chi’n dotna bawl hial hikei mahleng ginglelhna i nei thei zel uhi. Tua bang a ginglelhna i neih theihte uh Pathian a i muanzohlouhna ziak uh ahipah diam? chih i ki-dotna ding uh hong hileh i chi hi.
Ginglelhna kichi leh gintaklouhna kichi thumal aki bang keihi. Johan 3:18 ah, “…..Kuapeuh amah gingta mohpaih in a-om kei a, amah gingta lou bel mohpaih in a-om khin hi; Pathian Tapa tang neihsun’ min a gintak louh jiak in.” Laisiangthou mun dangdangte ahleng ginlouhna kichi thumal tamtak ah akimu hi. (Johan 8:24; Hebrute 3:19; 2 Thessalonikate 2:12; Kilakna 21:8). Hiai te apa’n in gingtak louhna kichi tuh khelhna ahihdan a chian huntawk mahmah hi’n i theithei hi. A chihleh ginglelhna kichi pen tangtak a ginglelhna toh mekmat a khelhna ahi, i piangthak louhziak uhiam, Toupa a i gingtak louhziak uh ahi chithei ding i diam?
Ginglelhna kichi tuh gingtu Khristian te mahmah inleng niteng hinkhua a i phut touhtouh uh khat ahi. Laisiangthou mah pansan in tuate saulou i sim ding. “….Alanglang ah nehden in ka om ua, himahleh ningkitel in ka om tuankei uhi; mangbang (ginglel) in ka om ua himahleh ka lungke tuankei uhi.” – 2 Kor. 4:8.
“….Amah a muh un a bia ua; khenkhat in a ginglah uhi.” – Matthai 28:17.
Baptispa Johan hial leng anungzuite’n Jesu thil thupi hihte tengteng amah ahilh unleng, a nungzuite lak a minih a tel khia a, amaute Toupa kiang a hoh a, Johan in hongpai ding a chihpa na hi hia, ahihkeileh midang na hungaih lai diing ka hi uhia? chi a dong ding in a sawl chih, (Luke 7:18-28) sung ah i mulai hi. Hiai Laisiangthoute apa’n a i sinkhiat theih a i theihtheih tuh ginglelhna, mangbang a om theihna chihte Toupa a muanna neite’n leng neithei tham i hi uh chih i mu thei hi. Mi hangsan mahmah i chihte lauhna neilou bikbek uh ahi kei a, hangsan kichih ziak in lauhna om lou a hipah keihi. Tua mah bang in Ginna (faith) leng akibang hi. Toupa Jesu gingta te chih a om a, Khristian i kichih lai un i ginglelhna, mangbang a om theihna chihte neithei lou i hikei uh a; tuate i neihziak ualeng i ginna uh dengdel hiam, kipzou lou deuh ahi chih leng ahih pah zenzen keihi.
Hinkhua a thil zumhuai leh thil nuamlou i tuahte uleng a sia ahi vek zenzen keihi. Gingtu i hihna ziak ualeng hiai bang thilte tuak theimah i hi uhi. Tua bang dinmun i maituah theihlai un hiai te’n i ginna uh hon sukha hia? Ginglelhna leh lungnoplouhna hontung zel hia chih kitheih poimoh hi. Ka ginna bang ahia? Bang ziak agingta kahia? Bangziak a haksatna leh buai hunte a ginglel pahpah kahi hiam? Bangziak a kimuangmohnate nei ka hia? chihte i buaipih ding mah uh ahi. Hiaite buaipihna ding tan ale om theilou a, mahni om dandan a om khe nelnul i hih ding uh aluah huai zaw hi. Ginglelhna i neih semsem leh tuate’n i ginna uh hon hatsak semsem zaw hi. Bangziak in, ginna kanei kichi a lungmuangtak a om khelh sang in ginglelhnate neih a kithaman zaw hi. Hiai te’n Toupa muhsemna, Amah a muansemna leh kingaksemna ahon tung semsem hi. Etdan leh gendan dang en leng, Khristiante i kichih chiang un i ginna uh (Toupa Jesu Khris a i ginna) pen tan lel a hun sak khak ding a lauh huai pen mah hi. I ginna pen uh Amah a kingakna bulpi uh (a foundation) ahi chih thei in, adang tampi mahmah i hinkhua ua i hinkhiat pih ua i zuih ding uleh i zil ding uh, Amah deih bang a khosakna leh nungtakna a poimoh hi.
Niteng hinkhua a ginglelhna chihte maituah thei gige i hih ziak un, tuate bang hunte a panlak theih pahpah apoimoh hi. I ginlahnate uh kizumpihlou in tuate Toupa kiang a tung pahpah theileng i kideihsak ahi. I ngaithuahna tengteng uh eite genma a le athei Pathian in hon theihpihlouh ding khat mahleng a om keihi. Panpihnate ngen ni; Laisiangthou a pasal naupang dawimat hihdamna thu lungsim a hong om mahmah hi. Hiai naupang a damna ding in apa’n Jesu kiang ava naih nathu hong lang hi. “…Jesu’n a kiang ah, “Na hihtheih leh e, a gingtami ading in bangkim hihtheih ahi” a chi hi. Huchi in naupang’ pa’n khitui toh, “Toupa, ka gingta hi, ka ginlahna hon huh in” chi in a kikou khia hi. – Mark 9:23-24. Hiai naupang pa bang a eite leng Toupa kiang a i buainate uh i gen ngam ua i thum uh apoimoh hi. Abraham bang a kipahhun leh nopsak hunte vuak hilou a haksatnate i tuah lai ua leng Amah i pahtawi theih uh apoimoh hi. “….Pathian thuchiam ginglel in ginna tasam in a omkei a, Pathian a pahtawi hi. A thuchiam a lohching sakthei chih a gingtaa, a ginna a hongkip zawta hi.” – Romte 4:20-21. Buaina leh haksatnate i maituah ziak bang a ginglelhna i neih hun unleng Toupa ah muan teitei ni, a ziak asan pen a hun mahmah in theisiam keimahni. Himahleh Toupa’n tuate a thei hi, a ziak bel a i maituah louh a om kei; Aman bangkim athei hi chithei chiat ding in kisa ni.
Tuni’n i ginglelhnate uh ginglelhna tak mah ahi chithei atuate buaipih a nei a, hiaite tungtawn a Pathian a ginna leh muanna neihsem na a zang theichiat ding in simtute i kideihsak a, i thumna leng ahong hi hi. Toupa’n simtute a thute tungtawn in hon ompihin hon vualzawl hen! Amen.
Theihna bukim louh ziak a i gelh khelh omte i Toupa ngaihdamna i ngen hi. Bangkim ah Aman thupina tengteng tang hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing) 09th November, 2022| Weekly-Inspiration – 113)