KHASIANGTHOU OMPIHNA

0

Mi khenkhat in a testimony te uh a hon gen chiang un, ‘tuzan ka mang a huchi in a.. tuate ziak a huchi kahi’ chih bang, ahihkeileh ‘huai hi chia hong om inchin’ chih khong ziak leh thil dangdang mak pipi te tungtawn bang in Pathian ompihna, Khasiangthou houpihna dan a ahon genthei bang a om sek hi. Ahi a tua bang mite om dante va pompih vek lou i hi chi i hikei a himahleh tua bang thilte ah pilvang na ding tamtak a om hi. A hotdamna uh Pathian toh amau kikal hi zaw a ei va buaipih luat a va gengen a va demdem ding leng ahi khol keihi. Tua sang a poimoh zaw bel Pathian toh i kikal, bang dinmun ah i om a  chih ki et a poimoh zaw hi. Gingtute lak ah leng mi tamtak te’n Khasiangthou kichi om hia, om lou hia chih leng theipha banlou hileh kilawm in niteng hinkhua i zang uhi. Tua Khasiangthou kichi bang hi a, bang nna sem hiam chih i theihlouh ziak mah tak un ut dandan a omna, noptalna leh poisak neihlouhna atam mahmah hi. Pianthak na kichian neite a ding in Khasiangthou ompihna phawk lou a om ding chih pen i dinmun uh ki-et thak hun mahmah hi kha ding hi. Pathian a mithumte, Pa, Tapa leh Khasiangthou i hinkhua ua a om det ding ahi chih theichian thakthak leng i kideih sak mahmah hi. Pathian thu awi kichi a Khasiangthou theihsakna leh ompihnate nawl khinkhin i hih leh bel kibawl a ki etna ding tam mahmah ding hi.

Khasiangthou thu i gen chiang in ‘Nna hoih sepna, diktakna leh siangthouna chihte lungsim ah vom leng i ut hi. Nna hoih sem i chih chiang in tehkhitna enleng, Pathian deihdan a khosa a, ei adi leh midangte a dia thil phatuam leh hoih va hih zel pen Nna hoih sepna hong hi hi. Tua bang hih sang a siat theihna tuamtuam, ginom louhna bang, siangthoulouhnate leh Pathian deihlouh dan a va khosaknate in ei leh i kim-i-kiang ate a hon nawk a i Hotdamna leng a hon nawk kha mahmah hi. Laisiangthoute a i muh mah bang in thilhoih hih ding a Khrist Jesu a siam a om i hihdan mangngilh mahmah keileng i ki deihsak ahi. “….Thil hoih hihding a Khrist Jesu ah siam a om in, amah khutsuak i hi uhi; huai thil hoih hih i khosakna dan ding in Pathian in a bawlkhol ahi.” –  Epehsate 2:10. Leitung a i khosak lai mahmah ua thilhoih hih ding a siam a i om lai un, Pathian mahmah in Khasiangthou ompihna, a kithuahpihna leh venbitna i lak uah a hon sawl lai hi. Hampha lua hi hang! Toupa Min phat in om hen!

Chihleh bang chidan a Khasiangthou ompihnate theithei ding leh phawk khethei ding i hi hiam chih dotna hong om thei hi. I Toupa Jesu mahmah in gen chian i sa mahmah a tuate enleng, “….Ka gil a kial in, nekding n’on pia ua; ka dang a tak in, dawn ding n’on pia uh; mikhual ka hih in n’on zintun ua; Vuaktang ka hih in, puan n’on silhsak uh; ka chi a nat in, ka kiang a na hong ziak un,’ a chi ding hi” – Matthai 25:35-36. Hiai taang hoihtakin ngaihtuahnate piak in i hinkhuate uh enleng, panpih ngai a om i sakte bangzah vei i na nawlkhin khata a? Lungsim a i vei mahmah khenkhat te sepbuching theihna ding om lai in bangzah vei tuate i nawlkhin ale? Ahihkeileh thil phatuam ding leh thilhoih hih ding a hamphatna piak a i omlai in bangzah vei tuate i ut kei a? chih te lungsim ah hong suak hi. Hiaite chu Khasiangthou ompihna leh a honpi na khenkhat mit a i suangtuah theih leh i sintheih ding a i gen a hong hi zaw hi. Khasiangthou in michih hon houpih dan akibang vek sipsip keiding a, hiaite Ama honpi na ahi i chi khethei vek kei hi. Himahleh niteng hinkhua buai tak leh gimtak a i zat lai un bang lungsim i nei uh a, Pathian ompihna i phawk hia, thil hoih leh hoihlou ding chihte khenkhak theihna ngaihtuahna i nei hia chihte khong Khasiangthou pina ahong hithei gige hi.

Ei-leh-ei kigensia i hikei a I hihnate uh i kitheihna ding ua kigen zel i hi uh chih kon taklang hi. Saptuam sung mahmah aleng Khami tak a om tamtak a om a, himahleh polam a om chiang hiam, mite lak a om chiang in midangte khual louhna, hehpihna neihlouhna leh i mihingpihte liauliau leng itna mit a leng enlou tamtak i om theilai uhi. Khristian i hihziak hiam, Pathianni teng a i kikhopnate uh vuak hunsa a, hicia Pathian thu awi i hih khak ding uh lauh huai mahmah mai hi. Jakob in bang ana gen hiam, “….I Pathian leh Pa mitmuh a sabiak siangthou leh gilou panglou zaw, tagah leh meithaite a gimthuak lai ua veh leh khovel buahna banglou a kibawl zel ahi.” – 1:27. I Khristian hihna, i gingtute hihna pen hiai i Sabiak hiai Saptuam a i om ziak ahi pah kei hi. Bang chi’n hinkhua i zang a, mite lak a i om chiang in bang chi’n in om a. Panpih ngai a awlmoh ding omte lak ah bang chi’n pan i la a chih te’n i Khristian na a hon lak zaw hi. Hiai mah bang in Khrist Jesu a thilhoih hih ding a siam i mah bang un tuate’n ei mahmah hinkhua  ahong khek lumlet kia hilou a, i-kiim-i-kiang ate leng a khek ding ahi chih theisiam leng i deihsak hi.

Khasiangthou ompihna ziakin midangte awlmohna, lungsim a phawkna hong om thei zel hi. Pathian gam adia semdia miteng kuan khetheilou himahlehang michih i omna mun chiat uah Pathian in i hihtheih ding uh, Amah gam nasepna ding a hon gelsak gige hi. Tuate lak a thupi mahmah tuh thumna ahi. Kuahiam i lawm i vualte hiam, midang khat lungsim a hongsuak guih mawk chih bang a om hun om hi, huntam zaw a hichi i maituah chiang in tua nu/tua pa pe’n thumpih tuak ana hithei gige hi. Ahihkeileh amaute va thuzak a va houpih chiang in buaina haksa tak mai ana maituah laitak uh a hithei hi. Hiai mah tuh hiai laigelhtu keimah in kana tuahtouh zel ahihziakin hichi bang hunte’ in amaute houpih sawm pahpah theileng i kideihsak thu i gen hi. Hiai bang a i-lawm-i-vual te panpih ngai i muhchiang in bang chi hehnem ding leh bang gen ding ka diam chi’n patau keini, Toupa deihdan a om i hihnak leh Aman hon ompih ding ahi chih phawkni. Jesu’n bang a chi a, “…..bang thu ka gen dia? chi in lungkham kei un; na gen ding uh a huntak in a hon theisak ding hi. A genpa noumau na hi kei ding ua, na Pa uh Kha (Siangthou) in noumau ah a genzaw ding Hi.”  – Mathai 10:19b-20.

Tulai in Social Media i hah zat mahmah ua, alou theilou leng ahihziak chu a hong hi dia. Hiaite ziak a siat theihna gending chileng atam ding a, tuate sang in a hoihlam a i zat theihnate khatvuak enleng i chi hi. Hiaite tungtawn in Pathian thu share theihna ding kong lianpi a hon hong sak hi. A diak in WhatsApp bang ah contact te status te ka enzel a, Pathian thu post na a zang zou gige bang kamuh chiang in kakipahpih mahmah mai hi. Hichi bang a Pathian thu share theihna ding i neihlai ua bangziak a midangte kiang gen khelou ding i hidiam chih i kichouna khatleng a hong hi nawn hi. Midangte awlmohna toh Pathian thu i share khiat zel pen in manphatna tampi a mu leh a simtute lungtang a sem zel ahihdan phawk thakni. Hiai bang a platform hoih i neilai ua zatna diklou a i zat khak ding uh lauh huai hi. A hoihlam a Pathian thute mah buaipihna a zang khe chiat ding in kisa thak leng deihsakna thu i kikhak ahi.

Khasiangthou ompihna aw khatveivei nial khak a, va nawlkhin abaih lam hi. Bang hunte a tua bang a om i hiam chih i hon ngaihtuah chiang in, mahni angsung kia ding gelna bang a ngaihtuahna i neih khak chiang in Khasiangthou houpihna leh ompihnate i nawlkhin khasek hi. Ahihkeileh midangte i sang a lianzaw leh siam zawte zahtakna ziak bang a gentuak poimoh omte genkhe ngamlou chih hun om thei zel hi. Hichi bang hunte hongtung chiang in Khasiangthou kipi sak in Toupa thuthu chithei a thum in kisa khe teitei leng Aman hon ompih ding hi. Huchibang hilou a tuate i nawl khin gige pen thil lauh huai hong hi zaw hi. “Huchi in kuapeuh thil hoih ding thei a hih tuanlou zaw amah ading in khelhna ahi.” – Jakob 4:17

Tuni’n bang dinmun ah i om a, Khasiangthou ompihna leh houpihna aw te i phawk zel hia chihte ki etna ding in zang leng i ut hi. Hun kibichilh tak a niteng hun zang i hihna uah Pathian a dia hunpiak louh inleng niteng hinkhua i zang liam zungzung thei uhi. Mi tamtak te khosak na tuh tua bang hong hi a; tuate lak a eile i tel kha hia chih kivel tuak mahmah hi. Pathian adia hunpia lou a, Khasiangthou theihsaknate, a ompihnate i phawk hun uale tuate ngaihsak tuanlou a eimah utna lamlam a pai i hih khak ding thil lauh huaipi a hong hi ding hi. Toupa thute mahmah buaipih masak pen a nei in, Amah aw te za zaw thei gige ding kisa thak chiat ding in simtute i kingen hi.

Theihna bukim louh ziak a i  gelh khelh omte i Toupa ngaihdamna i ngen hi. Bangkim ah Aman thupina tengteng tang hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing) 19th October 2022| Weekly-Inspiration – 112)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment