SUICIDE-TE PATHIAN IN A NGAIDAM THEI DIAM?

Suicide bang ahia?

Suicide i chih chiang in mi khat in amah deihteelna zang a, tupmawng a amah leh amah a hinna kilaak/kithat chihna ahi.

WHO apan Staticstics khenkhat ana en masa ni:

• Kum khat sung in Mi 7,00,000 sang a tamzaw in suicide ziak in sihna tuak uhi (WHO, 2021)
• Suicide khat a ki hilhna (report) ah, mahni leh mahni kithahsawm (suicide attempt) mi 20 lam om hidan in leng mukhia uhi. (WHO, 2014).
• Khovel a sihtheihna tuamtuamte lak ah, suicide a sihna in masawn mahmah a, Malaria, HIV/AIDS, khua leh tui ziak a tuahsiatna (natural disasters); ziinliing, tuilet, huihpi leh adangdangte leh kidouna chihte ziak a mi si sang in, suicide a si kumteng in tam zaw hi (WHO, 2021).

NEST LAMKA in sum leh pai, tha leh zung hi’n pilna leh siamna tampitak seng a LAMKA a Suicide data ana kaihkhawm uh, kipahhuai leh thanuam huai tak in zat hon phalsak ua, huai leng ana en ni:

• Kum 2014-2021 kikal (kum 8 sung) in 144 suicide case ana om hi. Huai lak ah 109 pasal hi ua, 35 numei hi uhi. Kum 2022, Jan – December tan a ki record suicide 21 pha a, huai lak ah pasal 18, numei 3 ahi uhi.

Hichin en le’ng: WHO-te data pen Lamka leh singtangmite ah belh tuah ding bang hileng, mi khat suicide na ah, mi 20 in tum (attempt) zel ahihleh, kum 2022 sung in 21 mahni kithat omna lak a, 420 in tum chihna suak diing hi. Huai zahzah hikei leh leng, kha 12 sung a suicide a mi 21 sihna ah, suicide tum  bangzah a om dia? Hiai data apat i theihtheih ahihleh, singtangmi Khristiante i tawm tuk un suicide tam mahmah hi. Mimal tak in leng khaphang huai ban ah puaknat huai kasa petmah hi.

Mental Disorder/ Lungsimlam damlouhna nei teng in suicide/ mahni hinna kilaak tum lou uh ahihlai in, Mental Health/ Lungsim damtheihna toh kisai a i dinmun uh hoih law ngellou ahihdan leng i suangtuah thei uhi.

Mi’n bang ziak a suicide hih sek uh ahi dia?

Lungsim damlouhna / Mental disorders (depression, bipolar disorder, autism, schizophrenia, anxiety disorder leh adangdang), taksa damlouhna leh damtheihlouhna, khamtheih leh zu zongsatna (addiction) ziak khawng in mahni hinna kilaak sek uhi.

Stress tuamtuam (huaichu, sum leh pai a buaisiatna, lai sinna toh sepna lam a haksatna, relationship/mi toh kikal a haksatna – nupa hiam ngaihzawngte toh kikhenna, bawlsiatna/harassment leh simmohtak a ki engbawlna (bullying), numei-pasallam a bawlsiatna/sualluihna chihte thuaklah/puaklah ziak khawng inleng mahni kithat om sek uhi.

Banghiam haksatna leh buaina tuah guih ziak a impulsive/ ngaihtuahna pe sau man ngellou a kikhin guih a, mahni kithat mawk chih bangleng ana om uhi.

Lamka toh kisai a Suicide ziak taangpi, NEST LAMKA in ana kaihkhawmte:

1. Khamtheih hihziak.
2. Nupa kaal/ Ngaihzawngte toh kikal buaina
3. Innsung buaina
4. Kingaihsiatna lungsim
5. Sum leh pai a buaina

Tua hiai i gente lak a khat ziak chauh hi gige lou a, bangzah hiam ahihkeileh, avek a kigawm ziak khawng le hi utsek hi.

Hiaidan a buaina leh haksatna tuamtuamte, akhen chiang a hong lompai zomah chiang a, sa leh lungsim na sa lua, puakgikte paw zou nawnlou a kithei, mangbang leh beidong tawpkhawk kisa, dinmun bawlhoih theih nawn dia gintaakna nei lou, damkhe zou dia kikoih nawnlou, lamet di bei vek dan a koih a, buaina teng a vengna dia sihna louhngal a dawnna omlou a koih a, mawk sih theihle hituan lou zel  ahihchia, sih teitei na di’n mahni deihteelna zang in mahni kithat/suicide sek uhi.

I theihsiam di ua poimoh ahihleh, sih ut hilou in, a naa bei henla, buaina veng leh chih luat ziak a huaibang a tawpkhawk a kalsuan hizaw sek uhi.

Suicide bangchi doudaal diing?

Suicide a sihna a tam tuk in, leh sihdan a mulkimhuai tuk in, a doudaal diingdan leng om tham hi. Lametna om ahi.

Kuahiam in huaidan lungsim pu a i theihleh, amau kia a omsaklouh di, ban ah, amau leh amau a ki hihlup/hihsiat theihna di ua vanzat theih thilte hepkhiak a, mun bit a omsak diing ahi.

Ei hi’n mi hitale uh, Lungsim Natna i neih leh, kepdam ahihtheihna dia panpihna zon huphurh hetlouh diing ahi. A poimohdan a psychiatry doctor va naih di, Laisiangthou pansan Counselor hoihtak ahihkeileh Pastor toh houlim diing ahi. Tua i gendan in, i poimoh chiang in panpihna la in, midangte leng kawkmuh theile, suicide doudaalna dia pan i laaktheih uh thupitak hong hi diing ahi.

Suicide doudaalna i chih, khotaang, innsung leh mimal ah panlaaktheihna i nei chiat uhi. Huaichu, Lungsimnatna leh Mahni Kithahna chihte toh kisai theihsiamna dia sinna leh sinsakna chihte i hah bawl uh poimoh hi.

A ngeu etna/ stigma lianlua ahihziak in, ei hi’n mi hitaleh, Lungsim Damlouhna toh kisai i theihsiamna leh ei mimal mahmah a i na tuahkhak leh mualsuah dante khawng genkhe zel le’ng, hiaibang tuah theih kia hilou a, damkhiak ahihdan ban ah, lametna om ahihdan midangte’n thei di ua, suicide doudaalna dia pan i laaktheih uh thupitak hong hi diing ahi.

Khristian diktak in mahni hinna la mawk thei di hia?

Hiai dotna “Yes/No” ahihkei leh “Hi/ i” chih a dawntan buk theih dotna hi’n i koih kei hi. Hiai puuksesa khovel ah, mihingte’n haksatna leh mangbatna chiteng i tuak ua, i tuah louhteng uh midangte tuah i mu uhi.

Khristian piangthak diktak atamzawte’n leng mangbat luat, haksat luat leh nat luat hun in, mahni kithah di lungsim/sih utna lungsim i neikha sam ve uale maw? I va semsuah kei ua chihthu ahi. Ahialah, Lungsim a khial le khial ahi chih i thei uhi (Matthai 5:28). Himahleh, ngaihtuahna tan a beisak leh atak a sepsuahna akibatlouhna chu, lungsim a i khelh chiang in, a taktak ah a gau va kithuak lou a, mite’n leng ei khelhna ziak in thuak lou uhi. Kithahna leh kithah tupna (suicide leh suicide attempt) sepsuah a a-om chiang in, a gu leh a gau tam a, innkuan, lawm leh vual, tanau-lainate leh khotaang naakpitak a a sukkhak genlouh in, gingtu dangte leng dahna leh lungbuaina guan hi.

Huai ban ah, mi a ki suicide chiang un, Lungphawngna (shock), hehna (anger), kisiamlouh tanna (guilt), mahni leh midang ngohna leh mohpaihna (blame and condemnation), lungsim natna (depression), mangbatna (anxiety) leh mahni kithah utna lungsim (suicidal thoughts/suicidal ideation) natawm midangte guan thei hi.

Huaiziak in, Khristian diktak in suicide a hih uleh, Laisiangthou in hon deihbang a i Khristianpihte adia phattuamna kinei hetlou diing a, iitna nnasep kisemkha hetlou diing chihna ahi. Gimthuakna tampi toh kuhkaltak a Toupa’ Kumpigam luut dia thupiak hingal a, mahni deihteelna zang a, i hinna i kilaak leh, Pathian thupiak nialtang geugau kisuak dia, Toupa mai ah bang i genta dia? (Matthai 5:16 ; Phillipite 2:3-4 ; 3 John 1:11; Ephesate 2:10 ; Hebrute 10:24 ; Nnasepte 14:22 ; 1 Peter 3:14, 4:1, 5:10)

Haksatna leh gentheihna chikim ei Khristiante’n kituak tham hi; a khen chiang a bang, Khristian loute sang a i tuah leh thuakte uh huaise zaw hi. Hiaibang hun a, mangbang tongkhong in, naa sa lua, ngaihtuahna dukdak neitheilou a, sih utna a dim in, ning kitel zaak in, kikhin dimdem in, kua hiam kiang a buaina va gen di lamlam le phawkkha lou a, panpihna omlou leh mulou dia kikoih ban ah, lamet bei kisa a, mahni deihteelna zang a, mahni kithat chih Khristian piangthaksa diktak himahleh, om thei hi. Om thei mahleh, tam hetlou/tawm law mahmah diing in i gingta hi. Huaiban ah, pilvanna dia poimoh nawn ahihleh, ‘Khristian diktak ki suicide chih omkha zenzen thei ahi’ i chih ziak a suicide dia ki kawkmuh i hi hetkei a, piangthaksa suicide a i na suun i iit leh ngaihte tangtawn mun diing toh kisai i kikhamuanna hizaw ahi.

Hiai puuksesa leh a kitamkham khovel mial ah, mihingte khialsa a piang i hihziak tak un, haksatna leh buainate i tuah di mawng uh ahihdan ei Khristiante’n i theisiam uhi. Hiaibang khovel ah, Pathian phawkkawm a, haksatna leh gentheihna tuamtuamte kizousak mailou a, Toupa min a thuak teitei a, kuhkaltak a pang diingte i hi uhi. Hinna hon petu Pathian ahi a, a kemtu ei i hi a, ei thu a lak mawk di hilou ahi (Genesis 2:7 ; Job 33:4). 

Huaiban ah, Toupa’n i sihni di ei deihteelna pang hetlou a hon sehkhawlsak i tuah matan ginomtak a, ginna toh, Amah toh kal suan khawm a, hiai khovel mial taanvaak tu a pang dia hon thupiakte i hihdan uh ki phawksak thak gige a, niteng a kipanthak zel diingte i hi uhi. Kikhin (give up) dia thupiak kihi himhim lou ahi (Hebrute 9:27 ; Matthai 5:14-16 ; Luke 11:33-36 ; Kahlate 3:22-23). 

Suicide te Pathian in a ngaidam thei diam?/Suicide te vangam akai duam?

Suicide i chih tualthahna ahi. Tualthahna i chih Khelhna huaisetak leh mulkimhuaitak ahi. Huai ziak in, Suicide amah vuak a khelhna chituam liauliau a koih mawk lou in, khelhna dangte toh koihkhawm le i etdan hong tuam kha diing hi.

Kilaakna 22:15, Ephesate 5:5, Galatiate 5:19-21, 1 Korinthte 6:9-10 a khelhna kigente pansan in, Dotna khat kidong le’ng; Tualthat te, Aangkawmte, Guta te, Thangpaihna a dimte, Zuaugen haatte, Mikhem haatte, Milim bete, Mi sutuah a, mi kituahna di deihlou, Kuamah toh kituaktheilou a thu saite, Numei-pasallam a thaangtatte leh nitna leh khelhna chikim a khialte Toupa’n a ngaidam thei diam? Hi, ngaidam thei e. PATHIAN in kisiikte Jesu Khrist ah ngaidam a hondam ahi chih i dawnna ahihleh chu, suicide-te le ngaidam diing chihna himai lou hia? Pathian’ ngaihdamna tangte hotdamte ahi ua, hotdam a omte chu vangam kai diing uh hiven maw? Huaiziak in, Khristian piangthak diktak ki suicide kha a om zenzen leh, Mark 3:28-29 in hon hilh mahbang a, “khelhna tengteng ngaihdam ahi dia, Khasiangthou hilhial gensia ngaihdam hilou diing” chih ahihman in, suicide i chih a huaisiat tuk a Khasiangthou gensiatna hi a theilou i hihman un, Vangam kai diing uhi. “Zenzen” chih kammal i zat ziak ahihleh, Khristian diktak mahni kithat chih tam di’n gingtat huai het kei hi.

Huai ban ah, 1 Korinthte 6:19-20 in hon hilh mahbang a, i pumpi Toupa hon piak, Kha Siangthou temple ahi a, i pumpi ua Pathian i pahtawi diing uh ahi. Bangziak i chih leh, man a leisa i hihtaak zia uh ahi a, Pathian a kihita ahi a, hon neitu Pathian hita ahi. Pathian hehpihna tungtawn a Jesu Khrist kipumpiak ziak a hotdamsa i hihman un, huai hotdamna sum leh pai in a lei zoh vual di hilou a, Jesu Khrist Sisan a leikhiaksa i hi uhi (1 Peter 1:19-20). Philippite 2:12 in hon hilh mahbanga a, huai hotdamna niteng a lau leh liingkawm a i hinkhiakpih di uh hita hi. Jesu Khrist min ziak a thuak a, thah a om i hihleh thutuam ahi a, ei leh ei kithah di chih Pathianthu in hon kawkmuh hetlou ahi. Hon sungluah Khasiangthou inleng theihtelna leh haatna hon guan lawtel kia hilou in, kithat di’n hon sawl het kei diing hi. Huaibang ngaihtuahna melmapa Setan apat ahi chih thei a, huaibang kheemna dou teitei dite i hihman un, Toupa kiang ah tai a, Pathianthute a kibulphuh a, pang diingte i hi uhi (Jakob 4:7). Setan zuau douna dia Pathian thu hing temsau hiamtuah sang a leng hiamzaw poimoh ahi chih thei in Pathian thu a dingkip leh kibulphuh kuul hi (John 8:44 & Hebrute 4:12).

Mihing i hihna uah, lungdon tawpkhawk leh thuaktheih vaal a sa, lungsim leh khalam natawm hon tokbuai thil i phutkhak chiang un, sih utna khawng, mahni kithah utna lungsim khawng va neih khak chih thil hithei mah ahi. Ahialah, atak a va semsuah diing kihi nawnlou ahi. Hiaibang lungsim khawng i neih khak chiang un, Toupa kiang ah hiaibang lungsimte neih nawnlouhna di khawng, kuhkalna khawng, thuak hatna leh hatna khawng thuum in, ngen zaw le’ng, Toupa kipahna kisukhazaw diing hi.

Khristiante Tup leh ngiim a khial lai di maw?

Pathian Hehpihna ziak a hotdamna i tan uh, khelhna dia phalna/right hilou ahi chih Romte bung 6 in hon hilh hi. Khialthei lai himahle hang, khelh chiang a kisiamtan mai lou a, khelhna hua a, dou dite i hita uhi. khial zel lai himahle hang, tup leh ngim a khial dite kihi nawn lou hi.

Tehkhina’n: Christian diktak khat in, “Zingchiang in aang kava kawm dia, Toupa kiang ka khelhna kipuang in ngaihdam ngen le’ng, hon ngaidam na di hiven” i chi thei duam? Chithei mawk lou e! Huaidan in, “Kei leh kei ka kithat dia, Toupa’n hon ngaidam na di hiven” chithei kihilou hi. Suicide i chih a hi phut in omkha thei zenzen mahleh, a taangpi a kisakkhawl leh tup leh ngiim a nei tinten a khelhna ahi. Khelhna dangte chu, i khelh chiang in, kibawl dik theihna leh asesa bawlhoihtheihna hunlem (chance) om hi. Suicide ahihleh, a zohna hitop mai ahihman in, Toupa mai zonna di hunlem om nawn lou hi. Toupa’n ei hinkhua di hon geelsaksa pom utlou a, ei deihteelna zang a Pathian nial tang ngam chihna kisuak diing ahihman in, thil mulkimhuai chihna ahi. Toupa’n ei kilimsak lou a, i Khros kipuak a, Amah nungzui dia hon sapdan a ki omkha het lou suak diing i hi (Luke 9:23 ; Matthai 25:23). Uthuai hetlou ahi.

Hinna ei leh ei i kipiak uh hilou ahi a, hon petupa’n Amah thupina kilatna dia hinna hon piak ahi (Romte 8:28). Hinna hon petu Pathian siangthou ahihman in, hinna i chih thil siangthou (sacred) ahi a, hon Petupa’n thil piak (gift) a hon piak ban ah, kem hoihtu (steward) di a hon piak ahi. I hinna uh kep bit leh i hinkhua uh Toupa adia siangthoutak a i zat diing uh, thilhoih hih dia mohpuakna (moral obligation) i neih uh leng ahi.

Genesis 2:7 a i muhbang in, A hu hon hatkhum a, hinna hon petu Amah ahi a, a lim kibatpih a, lauhuaitak leh lamdang pi a hon bawlte i hi uhi (Genesis 1:27 ; Sam 139:14). Lei taksa khialsa a piang i hih ziak un (Sam 51:5), lei taksa si dia, huai i lei taksa mah siamthaksa a kaihthoh hi diing ahi. Sihna tung a vualzou Toupa Jesu Khrist bang a taksa siamthaksa toh kaihthoh a kiom nawn diing kihi ahihman in, i lei taksa uh hihsiat hilou in, kepbit i mohpuak uh ahi. Hiai lei taksa mah Pathian in Khasiangthou tenna dia Jesu Khrist sisan a asianthousak ahihman in, Ama’n i hinna a laak kei ngal leh midang hi’n ei mahmah hita le hang, kuamah hinna laakna di tanvou/right piak a kiom lou ahi.

Eksodas 21:12-14 a leng i muh mahbang in, tup leh ngiim a mihing hinna lak a a-om himhim chiang a, a hinna latute hihlup diing chih Pathian thupiak ana hi ahi.

Khristiante a kikhin thei kihilou ahi (Christians cannot give up) :

1. Thuumna a kuhkal di:

Luke 18:1-8 ah i hondampa’n lungke lou a thum gige diing i hihdan uh hon hilh hi:

Kho khat ah thukhenmi khat a om a, huai mi’n Pathian a lau kei a, mihing leng a khawksa kei hi. A tenna khua ah meithai khat a om a; phu hon laksak in, chi’n, a kiang ah a hoh zihzeh hi. Thukhenmi ahihleh sawtkhop a ut kei a; himahleh, hiai meithai in va hihbuai zihzeh a gimhuai sa gawp ahihziak in, a ning kitel man in phu ana laksak khong hi. Toupa’n hiai gen tehna pansan in, thukhenmi diktatlou nangawn inleng meithainu’n a nget mun luat ziak a phu laaksak ahihleh, amah samte phu tuh Pathian in a laksak lawtel diing ahihdan ana hilhchian hi. Jakob 1:12 apat leng, kuhkalna gah thupidan ana gen hi; Khemna thuak teitei mi a hampha hi; ze-et a om nung in hinna lallukhu, Toupa’n amah itte kiang a a chiam a muh ding ziak in.

2. Jesu Khrist thukhenna tutphah:

Romte 14:10-12 in hon hilh mahbang in, Pathian thukhenna tutphah ma ah i vek ua ding diing i hi uhi. Huai hun chiang in, Pathian mai ah mi tengteng kikuun dia, lei tengteng leng Amah kiang ah a kipulaak diing chih Amah mah in hon chiam ahi. Huchi’n, i vek un Pathian kiang ah eimah tanchin i gen chiat ding uhi. Huai ban ah, 2 Korinthte 5:10 inle “Mi chih in, pumpi a thil hihte a sia a pha in, i hih bangbang a i muh chiat theihna di’n, Khrist thukhenna tutphah ma ah hihlat in i om vek ding uh ahi” chi in hon hilh hi.

Huai hun chiang in, Amah adia ginomtak a i hindan kigen diing hi (1 Korinthte 9:4-27; 2 Timothi 2:5). Thupiak Gol/The Great Commission (Matthai 28:18-20) i sepsuah dante khawng leng kigen diing hi. Huai ban ah,

Kheemna tung a vual i zohdan (Romte 6:1-4), leh i lei i suum zohdan (Jakob 3:1-9) chihte khawng leng kigen diing hi. I nnasep dungzui in, 2 Timothi 2:5, 2 Timothi 4:8, Jakob 1:12, 1 Peter 5:4 leh Kilaakna 2:10 a i muhmahbang in, lal lukhu tuamtuamte in pahtawi in ki om chiat diing hi.

3. Gimthuak di a sap i hi uhi:

Hiai puuksesa khovel ah ei deihteelna i zattheih hetlouh a uh tam ahihman in, huaibang te ziak in gimthuak di mawng i hi uh chih i pom uh poimoh hi. Khovel Pathian (Setan) thuneihna gam ahi a, hiai lei taksa ngei leng a khialsa a piang ahi. I piangthak nung uale khial kha veu sek lai i hihman un, mite khelh ziak natawm inleng i thuakna uh a tam mahmah hi (2 Korinthte 4:4; John 12:31 &16:11). Hiaibang dinmun ahihman in, thuakna leh gimthuakna a thawn in hon koihsak lou a, omzia neisak a, Amah khekhap I zuihna I chetna uh leng ahi (1 Peter 2:21). Gim tampi thuak a Pathian gam lut diing i hihman un, ginna ah i om gige uh kuul ahihdan Toupa’n a nungzuite ana hasuan bang in eite a di’n leng A thu a hing a, omzia anei hi (Nnasepte 14:22).

1. Khrist i lametna Khovel tan kia hilou: Suicide i chih Lamet beite khelhna ahih ziak in, Jesu Khrist i lametna hing ahihleh, bangziak a i lametna si di la? I lametna silou ahih leh, ei leng ei deihteelna zang a tup leh ngiim a lametbeite bang a i hinna uh i kilaak diing uh hilou ahi (Kahla 3:22-23 ; 1 Peter 1:3).

1 Korinthte 15:19 in hon hilh mahbang in, “Tu damsung kia a Khrist tung a lametna i neih in zaw mi tengteng dia mi hehpihhuai pen i hi diing hi”. Huaiziak in, ei hotdamsate i hihleh, mi hehpih huaite kihi lou a Pathian’ hehpihna tangte i hi uhi. Mi hampha i hi uhi. Hiai khovel ban ah, hiai lei hinkhua ban ah, Jesu Khrist sihna leh thohnawnna ziak in, Amah mah in taangtawn tenna diing honna bawlkhawlsak ahi chih i ginna toh lametna neite i hi uhi (John 14:3 ;1 John 2:25 ; Titus 1:2 ;John 3:16). 

I dam sung teng uh zaw, puuksesa khovel ahihziak in, kipeek (struggle) den diing kihi ahi. Poi teuh kei! Toupa iitna, hehpihna leh zahngaihna sung a buan leh suaI di, dou leh daal hi hang! Huaidan ahihman in, i kipeekna uah I kikhit (give up) louh diing uh ahi. Pang kenkun di himai. Huai i kikhit louhna uh Toupa’ lungtang i sutna uh leng ahi chih thei in, Philippite 3:14 a i muh mahbang in, ‘Khrist Jesu a Pathian sapna sang kipahman mu di’n phak chiamna’ i delh ngetnget diing uh ahi.

Thukhitna di’n; Haksatna leh mangbatna i tuah chiang un, khovel thilte leh khovel pilna ah kinga lou in, eite adia hoih deih gige leh Amah kiang mah a tai dia hon lamen Pathian kiang ah tai niuh maw, tai zihzeh niuh! I muan Toupa ah kinga zaw diing in leh A Thu hing pansan a kalsuan sunzom ngit-nget zel di’n i kihanthawn hi (Matthai 11:28 ; 1 Peter 5:7 ; Johan 16:33).

Simtute Toupa’n thathak hon guan henla, Amah deihbang a, thathak guantu leh ettontaak hi diing in, Toupa’n hon vualzawl hen, Jesu Khrist min in. Amen.

-Chingngaihlian Tunglut

February 14, 2023 / Article No. 31

(Hiai Laigelh leh asung a NEST LAMKA apan data kizangte, phalna lou a zat leh teisawn/suahkhiak phal ahi kei. Laigelhtu thuzaak ut a omleh 9892316430 ah thuzaak theih diing hi)