LUNGTANG KEPDAN

Lungtang enchian Pathian’ tate i hihziak un, i lungtang uh hon kepsakdan a kipat i pialkhiat sawt luat chiang in agim leh tawl eimah kihi sek hi. Haksa sa hinazenpi inleng i pialkhiakna leh gammanna mun a om ngeinaseh baihlam mahmah a, huai a kipat paikhiak a Amah lam zot nawn diing lithuai chih om thei tham hi. Huaidan dinmun a om i hihlam Khasiangthou in mahni a hon kiphawksak hiam, kuahiam thugen leh kuahiam toh houlim na tungtawn a hon phawksak ahihleh, ‘ahimah ve’ chi a enleng Amah lam zuan a i kik pah ngal diing uh ahi. I kizekaisak sawt leh omze neilou a i gimthuakna sawt maimai diing chihna ahi.

Huchi’n Pathian kiang ah i hong kikta a, i taaksapte kia hilou in, i deih, i kipahna leh dahna, i hatna leh hatlouhnate teng leng Amah kiang ah kitun theita hi. I huchihtheihna pen Toupa toh i kichimatna ahi a, huai in mihing lungsim in atheihsiamzoh vuallouh ‘muanna’ a hon pia hi. I dinmun khenkhat ziak in mite’n vangsia leh hehpihhuai hon sa in, khawvel paidan a i tanlouh tuamte ziak in vuallelh huai hon sakpih mah le uh, huai mihing lungsim in a suangtuahzoh vuallouh Jesu Khrist tungtawn a Pathian’ ‘muanna’ in i lungtang hon kepbit sak ngeingei hi. Huchidan a Toupa’n i lungtang hon kepbitsak ziak in, hun haksa leh dinmun nuamlou i totkhak chiang inleng lungmuang takin, kipahthu bang gen thei zomah in ki omthei mawk hi. Mite’n lamdang sa zen ve uh! Jesu Khrist tungtawn a thilhihtheihna i ngahte uh thupithei hina maizen e maw!

Hichibang a Pathian thilhihtheihna i chepkhak chiang in, Pathian hoihna mah chiamkha i hihna i kiphawk hi (Sam 34:8). Pa hon iitna leh hoihna phawkkha a i hong om zel chiang in, Amah theihthuukna ahi chih i chian zel a, theih thuuk sem ki-ut hi. Amah kan omlou ahihdan hong chiang semsem a, Amah kibel tuntun hi. I thil tuahte leh i kiim-le-kiang a khovel dinmunte theisiam kei mahleng, Toupa’n haihlou ahi chih kithei siam a, Amah bangkim tung a vaihawmtu leh thutawp gen diing ahi chih thei in, Amah ah muanna ki-nga thei zel hi. Toupa’ hoihna leh vualzawlna sum leh pai in a lei zohlouh hiaite khawng ahi chih i hon phawk khiak chiang in, i hihtheihtawp suah utna tha got in ki-om zel hi. Bangkim ah Pathian thu toh kituak a hin thanopna lungtang Toupa’n hon pia a, damman leng om kisa hi (Paunaakte 4:23). 

Johan 16:33 ah i Toupa Jesu in buaina tuak diing mah i hihlam ana gen a, himahleh, Ama’n khawvel thuak mualsuah khin a hihziak in, eite’n leng Amah i neih ziak in lungtang leh kha ah ‘muanna’ nei i hihlam hon hilh hi. Huaiziak in Amah kia’h bangkim tun pahpah ni. Bangmah ah ki mangbangsak lou in, hon ompihnasate leh a ginom ziak in kipahthu gen kawm in thumna leh ngetna chiteng in ngen ni (Philippite:4:6). Huchileh ‘muanna’ neitupa’n i lungtang ah A ‘muanna’ hon kepbitsak nilouh diing hi.

June 04, 2020/NH_11