Hauhsaknate, minhoihnate’, gou leh sum-leh-paite’ nei a, pilna siamna leh dinmun sang tatak neite tuh mi lohchinte dan in i ngai sek uh a, i thupi ngaih thei mahmah uhi. Hiaite zaw khovel paidan leh etdan ahi zaw hi. Toupa mitmuh a mi lohchingte zaw Amah nungzui muanhuaite, a thu a kinga ngitnget te, bangkim a Amah a kinga mite ahi zaw uhi.
Midangte’ hoihna ziak a hotdam a om ding i hi kei a, i hotdamna tuh Toupa leh ei mimal kikal ah a om zaw hi. Insung mite hoih na ziak, nu-le-pa hiam mi kua hiam TOUPA a akingak zoh ziak hiam in mahni mah leng Toupa toh kilemlem dan a ana kingaihtuah in, lungmuang tak a om khak ding thil om thei ahi a, lauh leng a lauhhuai mahmah hi. I hotdamna bang ahia, i ginna bang ahia chih mahni a i kitheihchet a poimoh hi.
Jesu Khrist’ Hotdamna i sang ua, Amah nung i zuihnung ua haksa i sak nak uleh i hih ngamlou utuh midangte mai a i ginna va gen khiat, i gupna va puang khiat chih bang ahihkeileh Toupa hoihna a thupina i dong a i muhte uh midangte’ tung a va gen sawn chihte’ i ngam kei uh a, ut leng i ut kei sek uhi. Biakinte kai mah in, Toupa phat in dingkhe mah lehang tua bang hunte aki hong chiang in kipaktak a gen ding leh a ding khe ding atam kei hi. Sawltak Paul in bel Tanchinhoih Toupa a amuh a adongte’ genlou hileh ka tung agik hi ana chi hial hi. “….Tanchinhoih gen mah leng kisaktheihna ding ahi kei hi. Hihlouh theihlouh ka tung ah a kinga ahi; Tanchinhoih gen keileng ka tung gik ding ahi” – 1 Korinthte 9:16. Midangte tung a Toupa akipat i muhte i gen khiatte’n midangte ana houpih thei ahi chih phawk thakthak ni. Nang leh kei tungtawn a Pathian in nna thupi tak midangte tung a sem thei ahi chi mangngilh lou in, midangte tung ah, i lawm-leh-vualte tung ah, i kiim-i-kiang a omte lak ah hitaleh a hunhun a mite kiang a genkhe ngam ding in kisa thak chiat ni.
“….Ahihleh, a gintaklouhpi uh bangchi’n a lou ding ua? A thu a zaklouhpi uh bangchi’n a gingta ding ua? Thuhilhmi omlou in bangchi’n a za ding ua? Sawl ahihkei uleh bangchi’n thu a hilh ding ua? “Thil hoih tanchin kipahhuai tunte khe kilawm natel e!” chih gelh bang in. – Romte 10:14-15.
Nungzui hinkhua a michih in haksa i sak uleh i buai na mahmah utuh ngakzohna leh kulkalna ahi. I neih louhlouhte uh i lunggulh uh a, i hih theih louh lamlam te uh i deih uhi. I khosaktheihna ding un i hih theih lam chiat uah naaktak a pang in i tai zel uhi. Khenkhatte hih theihna sang bik nei bang, khenkhatte khosakna niam zaw deuh bang, khenkhatte insung nuam ah leh khenkhatte khosakna haksa tak a khosa bang i om uhi. Michih hinkhua zat dan a kibang vek kei hial chih i theichiat uhi. Himahleh i pai na ding uh a kibang khat a om a, tua tuh michih in i pelh theihlouh uleh denciang a i maituah ding uh ahi. Tua tuh i tangtawn mun ding uh ahi. “…..Huaiziak in huchitel a theihpihte, meipi thupi umsuak a i om thei in, hon hihnok peuhmah leh khelhna eimah a belhte koihmang ni, huan i ma ua kitaitehna ding om ah kuhkaltak in tai ni. Jesu, i ginna siampa leh hihkippa, a ma a kipahna om ziak a zahlaknate ngaineu a Kros a thuakpa, Pathian mangtutphah taklam a tupa, Amah lam en in.” – Hebrute 12:1-2.
I Toupa nung i zuihna uah Amah deih bang a om gige thil haksa pi ahi a, himahleh tuate i kizohsak louh uh a i vualzoh uh a ngai hi. Pathian thu awi i chi hia, Pathian deihdan a om ding chih bang nuamtak a ngai hileh kilawm in mitamtak i om uhi. Gingtu hinkhua a sung thu taktak ah zaw ana nuam gige lou hial ahi chih i kiphawk sak thakthak uh a poimoh hi. Tua bang a hihlouh chiang in haksatna leh buaina te’n hon zuih chiang in i lunglel kha pahpah uh a Toupa Toupa bang i chi ua, bangziak a chi in dotnate bang i nei khasek uhi. Nuam i sakluat chiang un lah Toupa leng phawk manlou in i utteng uh, i deihteng uh buaipih in Amah a dia hun leng pe manlou in hinkhua i zang liam zungzung zel uhi. Hiai ah i gen ut pen bang hiam i chihleh i tangtawn mun ding uh gel a leitung a om lel i hih dan uh mangngilh kei ni. Leitung khosakna ah i mohpuakna uh om mah hi, tua te tuh i nek ding uh, i silh dingte uleh i khosakna dingte uh i ngaihtuah uh a poimoh hi. Himahleh hiaite a pi pen a nei a, i tangtawn mun ding uh ngaihtuah a nei masa lou a i om ding uh a lauh huai mahmah hi. Bangkim Toupa khut a nga in, Amah deihdan a om in khosa photphot leng ngawl lou leh tasam lou a hon koih lotel ding ahi chih mangngilh kei ni.
Marathon kitaitehna a atel ding mite tuh a ma a kisa kholsa, niteng a ana tai gige mite, nek-le-dawn a leng kidek thei mite banah, mahni kithunun mite ahih dan uh i thei hi. Hiai bang a omlou mite thakhat thu a marathon va tai ding hile uh khatna ala kei hial ding ua, bah in a puk sepah ding uhi. I Khalam tangtawn dinmun leng tua kitaitehna marathon bang a teh ahihziakin, hiai tuh i gingtu hinkhua ua i hin dingdan uh toh a kibang hi. Mahni kithununna, kulkalna leh khelhna apan i kihei uh a ngai hi. “Khelhna eimah a belhte koihmang ni..” Gingtu ka hi chi a khelhna sal a i om theih lailai le zaw i hotdamna leh Pathian toh i kikal i kivel chet thak uh a poimoh mahmah ding hi. Khelhna nei kawmkawm inleng Toupa gam nna sem in i khosa theih tham hi, himahleh hiaite thei ni; kilanglou ding a selguk theih leh iim guk theih a om kei a, i hih khempeuh toh Toupa mai a denciang a ding diing i hi chih thei ni. (Hebrute 4:13) I tanchin tunna dingpa mitmuh ah bangkim vuaktang leh kihongsa ahi hi.
Toupa hongpai ni di ngak a niteng hun i zatna uah Laisiangthou thute a i kibulphuh gige uh a poimoh hi. I Khalam ann uh Laisiangthou thute sim lou leh en manlou a i om chiang un hon susia thei ding khovel ah a tam mahmah ta hi, i utlouh pi uh va hih khak theihna leh melmapa Setan nasepna a va lut khak a baih lam mahmah hi. Gingtute hin dingdan taktak zaw Toupa a om gige a, hunteng (khawlni omlou a) a thu te aki diah nom gige ding ahi chih hiai a pan inleng i theithei hi.
I tangtawn munding ua i kitaitehna uah kuhkalna a poimoh pen hi. I gen taksa mah bang in gingtu hinkhua taktak zaw nuam gige lou a haksat hun om tham ahi chih i theih a ngai hi. Ngak zohna, thuak zohna a poimoh hi. (1 Korinthte 13:4-8) Itna in a dohzou a bangkim a thuak teitei hi a chih mah bang in. Kulkalna toh niteng leh hunteng a Toupa deihdan a om toutou ding hang a, denciang a Toupa hongpai ni chiang a a mai a i kisuanglah na ding uh tawm hiaihiai ding hi. “Huan itna leh thil hoih hih a kitokthou ding in i kingaihtuah ding uhi. Khenkhatte hihdan bang a i kikhopnate uh tawpsanlou in, kihanthawn chiatni; ni hongnai hulhul a na theih un kihanthawn tuah sem un.“ – Hebrute 10:24-25.
Pathian mangtutphah taklam a tupa, Jesu lam en gige in hiai kitaitehna a kuhkaltak in i tai zel ding uh. Amah tungtawn in hatna, damna i ngahthei gige uh a, i mangbat hun un, i dah hun un Amah kiang i tun’ thei gige hi. Eimah deihdan a thilteng hong om pahpah leh om gige ding chih ahi kei hi. Toupa’n i tung a pha a sak bangbang i hoih na dia hon tungsak hi zaw hi. Bangkim a nuam leh haksat hun a Toupa kei thu hilou in, nang deih bang hong hi zaw hen (Luke 22:42) chi thei chiat ding in Toupa ah kinga ni. “….a tawptan a thuakngap peuhmah, huai mingei hotdam in a om ding hi.” – Matthai 24:13.
Tuni’n simtute khat-le-khat kihanthawn tuah zel ni, a tawptan a ginom tak leh kuhkaltak a Toupa adia hingkhe thei ding, i hih peuh uh Amah min thupi na ding a sem thei chiat ding in kisa chiat ni. Khovel thilte ah i lungput te uh nga lou in, Amah Jesu Khrist ah i lametna te uleh i ginna uh nga ni. Amah ngak a om, eite hongpi dia hongpai chiang “..na pu kipahna ah lut in…” chih thu a za mite hi thei chiat ding in Toupa’n hon ompih in hon vualzawl hen!
“A pu’n a kiang ah, sikha hoih leh muanhuai, na hihhoih hi, tawmchik tung ah na muanhuai a, tampi tung ah k’on omsak ding; na pu kipahna ah lut in, a chi hi.” – Matthai 25:21
“Tun ah zaw diktatna lallukhu kei ading in koih in a omta, Toupa vaihawmpa diktat in huai ni chiang in kei a honpe ding, kei kiang kia hilou in a kilakna it peuhmahte kiang ah a pesam ding hi.” – 2 Timothi 4:8
Amen!
Toupa’n i thugelhte tungtawn in theihsiamna leh Khamuanna i tangchiat uah honpiak i ngen a; theihna bukim louh ziak a igen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 17th February, 2021 | Weekly-Inspiration – 58)