Kum paisate ah Hipi ziakin Khristmas leh Kumthakte i zang thei kei uh a, tukum in bel kipahhuai takin koimun peuh ah i zang siausiau thei uhi. Hiai bang hun kipahhuai i Hondampa hongpiang ni chi a i nazat zel uh tutung a zang thei nawn a i omna uh kipahhuai leh manpha bik ahihdan a hong theichian sak semsem hi. Khovel paidan i etchiang in hichi bang a hun hoih kimu gige ding mah hiam chih kuaman i genthei kei uh a; tuhun a hiai bang a zatte uh eite adia hun manpha leh hun hoih i neihlai uh hong hithei hi. Tu’n Khristmas leh Kumthakte i zang zou chiat uh a, i maban uah i nektak zong nate uh mah buaipih ding in i hong kisa siausiau nawn ding uhi. Tua bang ahihlai’n tukum thak ah bang kipahna thak toh i hingkhe ding ua? ahihkeileh bangbang thupuukna thak i la ua chihte mimalmal in nei chiat ding in iki gingta hi. Tuate Toupa hatna muang a sembuching theichiat ding in panla chiat leng i ut mahmah hi.
Tuni a i gen ut pen ahihleh bang in hon kipaksak pen a? ahihkeileh bang a i kipahna bik? Bang ah i kipahna i nga a? chih ahi. Kipahna i chih chiang in a hun leh munzil a kipahna a om sek hi. Toupa apan vualzawlna i dongte uh, lohchinna, kalsangna, neihbehnate leh midangte a pa’n phatnate i muh chiang un i kipahna uh a lian deuh hi. I niteng hinkhua a hiaite lam-en gige ding leh hiaite mah delhdelh ding mah uh i hi ding uam? Ahihkeileh hiaite ahidi mah dan a ngaihtuah i hiding uam? chih mimal a I kidawtna uh hong hi masa leh i chi ahi. Haksatna leh buaina i tuahte uh tungtawn in bangzah in kipahthu i gen ua? Hiaite kipahna dan a na la thei i om ding uam? Buaina leh haksatna i tuahte uh i ngaihtuah kik chiang un tuate’ Pathian lam hon naihsak tu, Amah deihdan a i hintheihna uh lampi ana hi zaw hi. Hiaite theisiam hileng kipahthu tamtakte’n genthei chiat ding in iki gingta hi.
Sapkangte John Piper in alaigelh thukhat in lungsim honla mahmah hi huai tuh, “God is always doing 10,000 things in your life, and you may be aware of three of them” ana chi hi. I niteng hunzatna ua i khosak dante uh bangkim ahidi mong ana hihlouh dan, Pathian ompihna ngen ahihdan i phawk zou gige het kei uhi. I gensa bang in lohchinnate hiam i hon muh chiang un Toupa apan i chithei uh a huai ah i kipahna uh alian deuh se hi. Himahleh tua i omdan te uleh i khosak dante uh ngaihtuah in neileng tu dinmun a hicia i om theihte uh Toupa’n apan hilou adiam? Ahihkeileh eite hatna leh hoihna ziak a hichitan tung a tua bang mel muthei a om i hi ding uam? Tua bang ana hi zenzen kei a Toupa kepbitna ziak ahihdan phawk thakthak leng i ut mahmah hi. Ei lawi hih bangkim ah thilteng ngaihzam na i nei deuhdeuh uh a; thilteng ahidi mah, ahidi mong a ngaihsutna i nei lian deuhdeuh uhi. Khovel siatnate eite lak a hongtung chiang bang inleng ahidi mah ahi, a khovel inle hon pokhia ahi chih bang i pau naraan uh a hong hita hi. Himahleh hiai bang thilte toh Toupa’ apan vualzawlna i dongte uh tehpihtheih ahi zenzen kei a; ahidi mong dan a ngaihtuah ding ahi zenzen keihi. I kiim-i-kiang a i muhte etmai inleng kipahna ding adim in a om hi. Bang hiam eimah deihdan a thil hong om chiang a kipahna dan theilel i hih khak ding uh alauh huai mahmah hi. Lohchin hun, nopsak hun vuak a kipahna nei hilou a bangkim a, hunteng a kipahna Toupa a neihding chu i kichouna ahi.
Sawltak Paul in Philippite tung ah akipahdan hichi’n ana gen hi, “…Taksap ziak a hiai thu gen ka hi kei a; bangchi bang in om mah leng huai a lungkima omdan ka theikheta hi. Zawn dan ka siam a, hauhdan leng ka siam, thilchih leh thil tengteng a gilvah leh gilkiala om theihna leh niang leh tasama om theihna thuguk ka thei kheta hi.” 4:11-12. Sawltak Paul in bangziak a tua bang nei hiam? A hihhatpa Toupa nei a Amah a theih ziak ahi zaw hi. “….A hon hihhatpa Khrist ah thil tengteng ka hihthei hi.” v13. Kipahna bukim zaw Toupa a om taktak mah ahi chih hiai apan in chiang takin i theithei hi. Toupa a bangkim i ngak chiang in haksat hunte inleng kipah ding dan a om a; Amah hoihna A muanhuaina i gingtak chiang in thil bangkim ah lungkimna kipahna thuguk i neithei uhi.
Mihinglam ah i ki-et chiang un kipahgige theih chihmawk thih haksa pi a hong hilotham hi. Khenkhatte damlouhna ziak bang leh mizia ziak bang in kipahmel puthei lou himhim a om a tuate i theisiam lotel hi. Kipah gige theihna in ei ah lungsim damna leh taksa damna hon tut khia hilou in, midangte toh i kikal leng a hon bawl hoih tuan mahmah hi. Hiai kipahna tuh Toupa ah a om a, Amah neimite’ i hamphatna bik uhleng ahi zaw mah hi. Khovel a kipahnate zongzong mahlehang, Toupa lou zaw kipahna taktak hon pethei ding aom kei hi.
Kipahna ding tampi om nalak a kipahhuai bik leh kipahthu gengen theihna ding a om hi. Tuate tuh Toupa a i hotdamna, Amah ziak a hotdam a i omtheihna ahi. Hiai hotdamna i tangte uh i ngaihtuah chiang in kipahthu gengen ding apoimoh phetlou alou theilou ahi zaw hi. Anihna ah a Jesu Khrist tungtawn a ngaihdamna i tangte uh ziakin kipahna ding adim in om nawn hi. Khelhna ziak a siding himahlehang, i Hondampa Jesu tungtawn in tangtawn hinna i tang uh a; Amah ziakin i khelhna tengteng uh ngaihdam in a om hi. Hiai hotdamna leh ngaihdamnate sum leh nasep a lei ding himaizen leh kuaman i leizoh ding uh ahikei hi. Hiai bang thil i tangte uh theisiam gige hileng kipahthu agengen lou ding kua i om ding ua? Kipahhuai ahihdan phawk thakthak in Toupa kakipak chichi theileng i ut mahmah mai hi. A banah Khasiangthou polhna leh ompihna i dongte uh ziakin kipahna ding atam nawn mahmah hi. Hiai tuh mi tamtak te’n i phawk theih pahpah louh uh ahi sek hi, Khasiangthou ompihna lou a bang chibang a siangthou tak a om theiding? A sia-le-pha i khenkhak theihnate uh tuh Khasiangthou polhna leh ompihna ahi i chilou theikei hi. Hiaite theisiam thei mahmah leng i niteng hunzatna mahmah uah ahon panpih mahmah ding a, thomhau kisaknate, khattang kisaknate leh kingaihsiatnate apan suahtakna i nei ding uhi. A lina ah, tangtawn hinna i neih theih ziakin. Khelhna ziaka tua i taksa pen si ding himahleh denchiang a Toupa hongpai ni chiang in hotdam a om i hihleh tangtawn hinna i nei ding uhi. Hiai mahmah ahi ei gingtute hamphatna bik. Hiai bang a hamphatna leh vualzawlna i dongte utuh Jesu Khrist a hotdamna i sangni apa’n i neipah uh a, hiai leitung i hinsung un hiate te ziakin kipaktakin i niteng hunte uh i zang thei pah uhi.
“I Toupa Jesu Khrist Pa leh Pathian phat in om hen. Aman vanmunte ah khalam vualzawlna chiteng in eite Khrist ah a hon vualzawlta hi.” – Ephesate 1:3
Salam thilte ah leng i kipahna ding uh atam nawn mahmah hi. Tuate tuh lohchin tuamtuam i ngahnate uh tungtawn bang, ittu ding inkuanpihte ziak bang, lawmhoih i neihte bang, damna i dongte uh ziak mai inleng kipahna ding atam hi. Hiai bang vualzawlnate dongtak akihi zenzen kei a himahleh Toup’n eite hon itna leh hon teelna ziak a tua bang vualzawlna toh honvuk ahihdan i theihsiam uh a kipahdan i theih semsem uh apoimoh hi. I neihlouhte kia buaipih a om hilou a, tunitan Toupa vualzawlna i dongte ngaihtuah pen in nei zaw leng i vuina ding uleh i taksap ding uh khat mahle aom kei a; ahunhun in Aman i poimohte uh ahon pe ding hi. Hichi bang a Toupa vualzawlnate i dong kawmkawm un salam thilte a vualzawlna i dongte uleng a zatdan i siam uh apoimoh nawn mahmah hi. Midangte adia mitsipna tungtu, haksatna tung behtu hilou a; amaute taksap awnghutu, panpihtu ahih ding i Toupa deihna bang ahi hi. Neihlelam leh vualzawlnate i dongte uh kisaktheihpih mailou a, midangte adia manphatna tuntu ahih behding ahi.
“…Himahleh kuapeuh in khovel sum nei in, a unau tasam in mu taleh, amah lainat tuankei leh Pathian itna amah a bangchi’n a om ding?” – 1 Johan 3:17
I thukhitna ding in Sawltak Paul in bangkim ah kipahthu gen ding ahih dan Thessalonikate kiang ah ana gen hi. “… Bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.” – 1 Thes. 5:18. Kipahthu gen zel ding, ahihkeileh bang hiam kipahna thak, thilthak i muh i neih chiang hiam a kipahthu gending chih ahikei a; bangkim ah kipahthu gen gige un. (gige un leh bangkim ah ana chi hi.) Tuni’n bang ah i kipahna i nga a chihte ngaihtuah in, Toupa neite adia bangkim a kipahtheihna leh hunteng a kipahthu gending om ahih dan phawk chiatni.
Toupa’n i thugelhte tungtawn in theihsiamna leh Khamuanna i tanchiat uah hon pia henla, theihna bukim louh ziak a i gelh khelh omte a ngaihdamna i ngen hi.
– Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
4th January, 2022 | Weekly-Inspiration No. – 83