Thumasa:
Tu kum zabi 21na ‘digital age’ ah, banglam peuh ah changkanna leh masawnna in nasatak a khovel hon noh lai in, ei Khristian kichite’n bangziak a laibu (Bible) lui mahmah khat a kinga kia hilou a kibulphuh a, huai Laibu pansan a i niteng hinkhua uh zang diing i hi ua? A dawnna ahihleh-
- Bible kingakna taak leh muanhuai hi a (infallible), a diklou omlou (without error or defect /inerrant) leh kikalh lou (non-contradictory) ahih ziak ahi (2 Peter 1:19-21).
- Bible kiching/huntawk leh thuneihna nei (sufficient and authoritative) ahihziak ahi (2 Timothi 3:16-17).
Theologiante’n Laisiangthou a huntawk (The Bible is sufficient) a chih chiang un, Pathian a om a, mihingte tel in, thilsiam tengteng A siam hi. Mihingte’n Amah a theihsiamna di uh, eimah leng i kitheihsiamna di uh, khovel omdan hi’n om didan hitaleh, Amah toh kizawitawn i hihdan uh hon hilhna di’n, Pathian in Bible hon pia hi chi uhi. Amah thupina di leh Amah toh kikholkhawm dia hon bawl ahi a, himahleh, khelhna ziak in amah toh i kizopna uh a kitanta hi. Amah toh i kizop kiik theihna di’n A tapa Jesu Khrist kipumpiakna ah hotdamna hon bawlsakta hi. Jesu Khrist ah Toupa iitna i theihsiamdan hong omta ahihman in, Pathian’ lungtaina dia i ngaihtuah/hih didan uh leng om hi. Toupa iitna tangkhatute hihna ah kipahluat ziak in Amah iit thuk leh Amah adia kipumpiak di’n i hong omta hi. Nikhat thil bangkim bukim sak nawn vek diing hi. Bible ah omlou banghiam ei theih dia poimoh ombeh nawn tuanlou a, gingtu khempeuh, nna hoih khempeuh semkhe dia Laisiangthou thopna huntawk/ kiching chihna ahi chi uhi.
I theihsiamna uleh i omdan uh pansanna di’n Bible bukim leh huntawk chihna ahi.
I theihsa mahbang un, Bible in a sipsip (exhaustively) in thil hon hilh lou mah hi. Bible ah Mehpok huandan kimu lou a, Cycle hek didan leng hon hilh lou hi. Himahleh Toupa’n lauhuaitak leh lamdangpi a hon bawl (Sam 139: 1-17), Amah thupina suutna dia ngaihtuahna khuak hoihtak honpia a, asia-apha khen theihna hon pia a, a kilawm leh kilawmlou theihtelna leng hon pia a, theihna vantaang (Common Sense) leng hon pia hi. Huai ahihman in Digital Technology zat didan Bible a i zon ualeh kimu lou dia himahleh, i zat theih di thuzuih/daan (principle) om zel ahi. Bible in i hih khempeuh Jesu Khrist min a hih di hon ngiat hi (Kolossate 3:17). Digital technology leng khovel zatdan hilou a Pathian deihbang a i zat diing uh chihna hong hita hi.
Digital Technology zat didan toh kisai in, Bible khawng pansan a ngaituankei a, i sia-le-pha theihna pansan a zat diing ahi chih ngaihdan omkha thei hi. Tulai in Khristian tampitakte ‘Progressive Christian’ kichi kei mahle uh, a ngaihdan uleh a lungsim put uh khahkol petmahta ua, Bible le khangthubu lui maimai, tulai hinkhua a zat theih ngel hilou ahi chi ut pawl leng tamtak omta uhi. Hinkhua toh kisai leh thil omdan Bible pansan sese ngai salou leng tamta uhi. Meidiil om di khawng in gingta nawnlou ua, neih kibang kingai (LGBTQ) chihte bang leng ngeina dan hileh kilawm in phungvuh mawkta uhi. Huaiban ah, khovel thil om a, Pathian thil om a, huaite helkhawm louh di ahi chih ngaihdan nei in, khotaang hinkhua (social life) atuam in om a, biakna atuam a om hi’n koih uhi. Himahleh, ei gingtute’n, atuam a khotaang hinkhua nei a, atuam a Khristian hinkhua neithei kihilou hi; Banglampeuh ah, i hinkhua uh zat diingdan pansan di Pathianthu (Bible) nei i hih ziak uh ahi.
Mihingte tawndan leh Bible thuneihna:
Mark bung 7 ah Toupa Jesu’n mihing tawndan (tradition/culture) ngaihthupi luat khawng a lauhhuaidan Pharisaite kiang ah ana gen hi. Amau (Judate’n) ann nek ma a kulmuut (ceremonously) tak a khut sil masak teitei poimoh ahi chihbang upate thugousiah chi in poimoh ngaih tak in, zui tinten sek uhi. Hiaibang thugousiahte ahihleh, Bible thuneihna toh kikim zen in thupi koih uhi. Hiai a Toupa thuhilhna pen Digital Technology toh kisai a i zat theih uh om hi:
- Digital technology i chih khovel paidan (cultural) ahi. Zatlouh theih le hinawnlou zen a i hinkhua uh toh kichimatta ahihman in, “Pathianthu pansan sese lou in i sia-le-pha theihna pansan in zang ni” chihtheih ahi. Hiai i chih leh chu, ei sia leh pha theihna pen Pathian thu pansan hilou a, Pathianthu in a thuneihdan toh kikim a koih ki hi kha dia, i mangthaina uh suak diing hi.
- Digital technology in i hinkhua uah bang dinmun i luahsak a? I hinkhua zatdan uah digital technology in vai a hawm tuk in, Bible in vai a hawm hia?
Khovel thilte tengteng leng, Pathian bawlsa vek leh Ama’n masawn A phal ziak a masawn ahihdan i thei uhi. Digital Technology leng Ama’n mihingte khuak pilna a piaksa apat, mihingte phattuamna di mah a bawlkhiak ahihziak in, Bible pansan a etdan i neih uh poimoh hi. I khovel etdan (worldview) uh Pathianthu pansan (Biblical worldview) ahih poimoh hi.
Khovel etdan i chih bang ahia? (What is a worldview?)
Worlview nei i hihlam uh kithei kei lengle worldview chu kinei chiat ahi. Worldview i chih chiang in, khovel i etdan taangpi chihna himai hi. Hinkhua i theihsiamdan, thupuukna i laakdan, thil i koih thupi leh ngaihpoimohte uh leh i gamtatdan tengteng uh riruang (framework) chihna ahi.
Khristian i hihna uah, Digital Technology (internet, social media, mobile phone, computer leh adangdangte) i zatdan uleh i hinkhua uah bang dinmun a luah chih chu, i khovel etdan (worldview) uah hong kinga diing hi. Ei gingtute’n Bible pansan a khovel etdan di uh ahihleh, Bible a huntawk (the Bible is sufficient) ahi chih pomna ah kinga hi (a bullam ah i na genkhinta hi). Bible pansan a khovel i et chiang in, niteng hinkhua i zatna uah i ngaihtuahna, kampau leh gamtat Bible ah kinga hi. A huchih chiang in, Toupa’ Thu i hinkhua uah hong gahkhe diing hi (John 15:16).
Bible pansan a Digital Technology etdan thak:
Bible pansan a thil etdan (Christian/ Biblical worldview) pansan a Digital Technology i etdan anuai ate bang in hong om diing hi:
1) Pathian koi mun peuh ah a om a (Sam 139:7-10 ; Paunaakte 15:3), thil tengteng a thei vek a (Sam 147:5 ; 1 John 3:20), digital technology zatdan leng Amah mai a kiseel khat leng omlou hi.
2) A taktak gam ah, i muh, phawk leh zaak di’n Toupa’n a thil siamte tungtawn in Amah leh Amah kipuangkhia hi (Romte 1:20). Digital technology i zatna ah leng, Toupa mai a ataktak gam ah Amah muh a i zat uh chihna ahi (Kolosate 2:17).
3) Theihna leh sinna (internet a i muhte) tengteng Pathianthu a, velchet poimoh hi (1 Thessalonikate 5:21-22).
4) Internet in gamgi le neilou a, daan kikhung hoihtak chih leng om ngellou hi. Huaiziak in, gingtute’n pilvangtak a i zat uh poimoh hi (1 John 2:15-17).
5) Gingtu kichi khempeuh in, Bible i sim chiang un, bang hun leh dinmun, kua in kua kiang a agen chihte i theihsiamna pen uh ei tulel dinmun ah i zatkhiak zel diing uh ahi (Jakob 1:22-25 ; Matthai 22:36-40).
Digital technology bang ahia?
Digital technology i chih chiang in computer toh kisai a muh theih hi’n muh theihlouh a zeneitak a vanzatte (systems, applications, computer software, hardware leh internet) tungtawn a thu (information) simsenlouh a omte tawmchik suaksak a, awlsamtak in kep theih leh kintak a tuah leh kikhaksawnsak theihna chihna ahi.
Digital Technology in mite kithuzaaktuahna, thil sinna leh nnasepdan khekdanglam lua ahihman in nasa sem a zat in om hi: A muhna (access) awlsam semsem ahihziak in Internet/gaming/mobile addiction chihte khawng hong piangkhe zel hi. Covid 19 pandemic ziak inleng lungkhamhuai di zen in digital technolgy zatna hong puangkhia hi.
Naupangte tel in, sinlaite online class, online nnasepna, online a sum kipiaktuahna (digital transaction), online a khotaang kikawmtuahna (social interaction), online nopbawlna (entertainment) chihte ziak in, kidek zoulou zen in, screen time zatna nasatak in hong puangkhia hi. Digital technology i zat uh alou theilou leng hong hita mahleh, apoimoh dan a kideek zoulou a i om pen un i hinkhua uah buaina nasatak a tun ahihdan AIIMS a BAC (Behavioral Addiction Clinic) a psychiatry professor khat in ana gen hi.
Genesis 1:28-30 kikal a mihing masa tegel kiang a leitung luah dim a, a thuthu ua omsaktheihna thu Pathian in apiak ahihman in, digital technology leng Ama’n hon vualzawlna ahi. I hinkhua uh noptuam sak, thil kinsak leh awlsamsak ahihman in manphatak in zattheih hi. Himahleh, zatdan diklou leh dukdak lou leng nasa mahmah zel ahihman in i lungsim lam damtheihna (psychological wellbeing) uh leng sukha mahmah zel hi. Digital technology haichilhna uang gawp ahihman in, i naupangte leng a hoihlou lamtak in hon khoihkhak sak hi. A laisimna lam uh bang buaisak a, ann nekdan leh ihmutdan uh natawm hihbuai a, innkuan leh khotang ah mite toh taksa a kikawmtuahna niamsak a, lungsimlam a nguaina (mood disorder) bang nei uhi. Khenkhatte bang in, mahni leh mahni kisuksiat utna nei uhi.
Digital technology in ei Khristiante’n leng ahoihlam in honna nawkkha pah a, computer leh smartphone khawng a et theih di’n digital format a Bible kephoihna diing bang in ana kizang thei pah hi. Awlawl in Labu bang leng digital format a bawl in hong om a, awlsamtak in Bible leh Labu ettheih di’n hong omta hi. Tu chiang in bel, Pathianthu toh kisai laigelh, video leh a angaihkhiak thoh di bang tam mahmahta hi. Sermon, Bible study, seminar leh sinsakna kidaihtak leh awlsamtak a muh di’n i neita uhi. Huchi ahihlai in, ahoih hetlou khat hong piangkhe zel hi. Pathian thugenna video tom chikchik (youtube videos, youtube shorts leh facebook reels) khawng tampi hong omkhia hi. Hiaite asia chi i hipah kei a, himahleh Khristian hinkhua adia poimohtak, mimal a Bible kisim a, kisuut a, thuumna kineih a, Pathian buanna (personal devotion) leh biakkhawmna (corporate worship) a tel ngetnget chihte dausak zen in, online a Pathianthu leh late in Khristian tampitakte kinga mawkta uhi. I khalam ann nekdan pilvan poimoh kha diing hi.
Social Media bang ahia?
Social media i chih chiang in digital technology khat ahi a, ngaihtuahna hi’n thu leh la hitaleh, lim leh laimalte tungtawn a lianpi huap a khotaang kikawmtuahna ahi. A zangtu (user) toh kituak in, thil muhnop zawng, thu theih ut zawng leh lungluutna tuamtuamte bawlsak in ki-om hi. ‘Status’, ‘Like’, ‘Share’, ‘Comment’ leh discussion chihte tungtawn in a zangtute’n innteek hihna kitang mahmah hi. Social media in khotaang kikawmtuahna phungvuh mahmah ahihlai in, thulimlou leh zuauthu, huatna leh simmohna kampau chihte khawng leng uangsak mahmah zel hi.
Social Media in mite a sukkhakdan:
Social media in mite bangchituk a taksa leh lungsim chidamna sukha ahia chih United Kingdom gam pansan a (kum 14-24 kikal) teltak a suina (survey) ana om hi. Huai ah, Snapchat, Facebook, Twitter, Instagram chihte’n depression, anxiety, mahni taksa put leh piandan hoih kisak louhna leh tangkhat kisakna mite guan hi. Huai ban ah, mahni kimuhdan (self-esteem) hoihloutak guan hi. Aziak ahihleh, social media ah mi’n ahoih ngen in kiphoulaak ua, thil hoihte chauh leh dinmun hoihtheipen, bukim leh hoihkimtak dan in kigen in kiphoukhe zel ua, huai in mi khenkhatte (adiak in khangdawngte) vangsia leh tansia kisakna guan thei hi. Hiaiteng ban ah, social media in taksuah theihlouh lametna mi guan thei hi. Midangte’n nuamsa tuam se uh leh hampha tuam se uh hileh kilawm dan a theihna (FOMO) bang hon guan thei a, huai in kingaihsiatna tun thei hi.
Hiaibang dinmun ah i naupang/khangdawngte i panpih theihdan khat om hi: Amau lungluutna leh siamnate phawksak a, huaite ah pahtaak diing ahi. Huchileh a kilatdan uh hiam, thil a neihte uah hiam, leh mel leh taksa put a buailou dua, amau a om siamna leh pahtakhuaite ah kipaakta theih diing ua, kipahna leng nei zaw diing uhi.
Texting toh kisai leng gen zek ni:
Khotaang ah taksa a kimu a kikawmtuahna (socialization) leng digital technology in kiamsak hiai-hiai hi. Texting ziak in phone call natawm leng tawm hiai-hiaita a, i khangdawngte’n leng texting a thazohdan uh i thih chiatsa uh ahi. Kithuzaakna dia Texting i zat chiang un, mel kimutuah leh gamtat khohei kimutuah kawm a, mitmei kivengtuah kawm a, kam kisantuahdan leh melput (facial expression) kitheihtuahna chihte pumpelh theih ahihman in, kitheihsiamlouhna tampi om kholoh thei hi. Huai ban ah, mi toh mel kimu a kithuahkhawmna pen ngaphuai lou sak in om deuhdeuh hi. Hiaibang a khotaang kikawmtuahna in, mimal kisukkhakna leh kithuzaak tuahna kiamsak a, khangthakte adi bang in thil hoih hi hetlou hi. Naupangte leh khangdawngte’n mimal leh taksa a kimaituah a kithuzaaktuahna leh kikawmtuahna a sin touh kei uleh, amaute hong piiching chiang un thakhat in hong siam guih khollou diing uhi. Khotaang leh mi toh kikal hoihna dia poimoh mahmah kithuzaaktuahna (communication) siam hetlou a om mawk theih ahihman in, hinkhua zatdan keniam mawk thei hi. Khangthakte hong piichin chiang ua mohpuakna tuamtuam leh dinmun poimoh taktakte hon let chiang un, mi toh kimaituah kawm a kikup/genkhawm/sakkhawm diing haksa hon sak diing uh thil lauhhuaipi ahi. Gingtute adi diak bang in, Khrist ziak a saptuam leh khotaang hinkhua ah hih leh sep diing poimoh taktak neite i hihman un, mite adia phatuam dia i omlouh khak uh thil lauhhuai ahi.
Internet Addiction:
Internet addiction/ mobile addiction chih zat a a-om chiang in, mobile phone haichilhna genna hisek hi. Mobile haichilh te’n ataktak gam (reality) a thil dangte limsak kha lou zen in, mobile khoih ua, kideek zou mahmah lou uhi.
Khovel a pawl lian mahmah nih, American Psychological Association (Lungsimlam toh kisai a, khovel a pawl lianpen) leh World Health Organization in Internet Addiction pen lungsim natna in simtel lou ua, himahleh, thil buaihuai mahmah leh etkai kuul thil, ban ah zat pilvanhuai thil hi’n chiamteh uhi. Hiai pawl nih te’n Game kimawl haihchilhna (gaming addiction) lungsim natnate (mental disorder) lak a khat hi’n chiamteh uhi.
Mobile phone zatna uang lawta ahihman in, kum 2008 in United Kingdom gam ah suichetna ana nei hial uhi. Huai suichetna ah a muhkhiak uh ahihleh, mobile phone leh akisaipih thilte (battery, internet pack, talktime balance leh adangdangte) a bei chiang hiam leh mobile phone zattheihlouhna munte ah omkhak chiang ua lunghimohna (anxiety) nei tampi om uh chi uhi. Hiai bang dinmun khangdawngte lak ah uang diak hi’n mukhia uhi.
Khristiante Social Media zat diingdan:
- Social media ah thu khat peuhpeuh i post chiang in, theihna hoihtak leh diktak pansan poimoh hi. Thuzuau hiam, gintak thu hiam leh mi gente enchian masalou khawng a thu leh vai gen leh thehzaak louh diing ahi. Huaidan di’n companyte’n a nnasemte uh daan in khungkhum uhi. Ei Khristiante adi diak in hiabang a pilvanna khawng i om didante lak ua aniam penpen hi diing hi. THUDIK ahi chih theichian masa lou khawng a Whatsapp a thu leh lim ki forward teng khawng gingta pah a forward pahpah louh diing ahi (Paunaakte 12:22).
- Kampau thaanghuai leh zahmoh, mi simmoh leh kouna kampau chihte zatlouh diing ahi. Hiai pen bang leng company-te’n amau nnasemte om didan in daan in bawl uhi. Ei Khristiante adi diak in chu, mite adia phatuam di chauh gen dia Pathian in hon lamette i hi uhi. Pathian tate i hihna uh i kampaute uh tungtawn a taaklang tute i hihlam uh chiamteh poimoh hi (Ephesate 4:29 Matthai 12:36 ; Paunaakte 12:18).
- Facebook leh Whatsapp tungtawn in mite baan pha (reachout) di’n pan i la thei uhi. A kuakua in, i hinkhuate uh leh dinmunte social media tungtawn a phoulaak zel i hihziak un, huaidan a meltheihte/lawmte khat khawng haksatna leh mangbatna tuak hong kigenkhia khawng a om leh, va kankhia leh limsak le’ng, i innvengte i iitna uh hong hipah diing hi (Galatiate 5:14 & 6:2).
- Bangthu hiam a kiseelnaa khawng a va pankhaktheih ahihman in, miteng theih di khawng a mi va seel ekek hiam, mi ki kawk sak ekek sang in private message ah heikhiak hoihzaw diing hi (Matthai 18:15).
- Social media a page i zuihte post (thulimlou leh thaanghuai lam thil leh limte tel in) a i reaction-te (“like”/ “comment”) i friends-te’ newsfeed ah amuh theih di ua va kilang zel ahihman in pilvan poimoh diing hi. Khristiante like/follow dia kilawmlou page om ahi (1 Korinthte 8:13 & 10:32).
- Phone khoih hetlou dia a kilawm hun om ahi chih theih poimoh hi. Phone buaipih luat ziak a kiim-kiang phawklou zen a omkha veu i hihleh, koihkhiak pah kisin diing ahi. Ataktak gam (reality) thilte limsak lou zen a smartphone a buai chih khelhna leng ahi. Aziak chu, Pathianthu in tu hun (present) a om dia hon deihte i hi uhi (Kolossate 3:1).
Kikep bit diingdan :
Internet a thilsete apat i innsung leh khotaang kepbitna dia i na kisakkhol theih diingdan uh khenkhatte:
- Nu leh Pate/ Pichingte’n internet leh social media zatdan kisin diing ahi; huchileh, i naupangte un internet a zatdan uh ki enkai thei pan diing hi. Naupangte mah in thei zaw uh ahihman in, amau mah kihilhsak le hang.
- Computer (Desk top/laptop) ahihleh common room ah koih/zat diing ahi. Naupangte toh kisai inleng, mobile leh internet amau kia a a-om chiang ua azatlouh di uh, ban ah, piiching omna a azat diing uh ahi. Parental control function leh apps tuamtuamte bang naupangte mobile zatte a activate/thuah vek diing ahi. Huchileh, lim leh video hoihlou leh amau siatna di tuntu va maikha lou diing uhi.
- Mobile phone zat kisuum zoulou piichingte’n kimohpuaktuah pih midang (accountability partner) aneih uh poimoh diing hi. Nu leh Pate’n naupangte amau mimal (personal) phone/gadget piak louh theihtan a piak louh hoih diing ahihlai in, piak louh theihlou hun leng hong om diing hi. Huai hun chiang in, ihmut hun sung leh amau lupnamun khawng a phone kep a phal louh diing uh ahi.
- Nu leh pate hi’n piichingte hitaleh, phone zatdan toh kisai a ettontaak dia i om uh poimoh ahihman in, phone khoih kisuum diing ahi. Naupangte toh kisukkhakna himhim leh amau toh hun zatna ah, amau limsak a, phone limsak hetlouh kisin thei le’ng hoih diing hi. Huai ban ah, phone/gadget dangte khoih theihna hun leh mun leng innsung ah bawlthei le’ng hoih diing hi. Digital technology zang lou theilou i hihman un, vanzat (tool) dan in neithei in, thil thak leh phatuam sinna, innkuan hun zatkhawmna leh hun awl nuamtak zatna khawng in zangthei le’ng phatuam lawtel dia, siatna di’n leng kizang lou diing.
- Nu leh Pate’n screen (smartphone, computer, tablet) toh kisai a gamgi (boundary) a bawl chiang ua, a daan (rule) bawl uh hoihtak a letkip poimoh diing hi. Naupangte screen time bawlsak chiang a, nu-le-pate mah a bottantu ahih uleh, kithunna omthei taktak lou hi. Mobile et hun pen mobile et hun a kisiamlouhtanna omlou leh phaltak a etsak di himai ahi. Screen et hun abei leh chu, bangteng hileh leng, koihkhiaksak di hong hinawn diing hi. Huai hun chiang a kiphin/nuak a aom uleh, a piiching pen in dohzoutak leh dai tak a, daan kibawl pen a etzui poimoh diing hi. Naupangte kiphin leh nuakna pen amau omdan mah a dawnna in thil phatuam tun hetlou a, pichingte’n pichinna kisam ahihna taklang zaw hi. Thil olsam hikei mahleh, Pathian toh thil hithei ahi (Matthai 19:26). Huai ban ah, a thil ette uh leng etzuipih zel poimoh hi. Amau kum leh Khristian i hihna uh toh kituak lou khovel thil a muhkhak theih di ua om tamlua ahihman in, pilvanpih poimoh lawtel hi. Screen time zatlouh diing chihna hilou in, a hunchiang leh et diingte theih diing chihna hizaw hi.
- NIMHANS (National Institute of Mental Health and Neurosciences) – lungsimlam leh khuaklam suutna toh kisai a India sung a alianpen in naupang kepna ah mobile toh kisai ana suut uhi. Naupangte kepna (nurturing) ah mobile phone heltel a aom leh, tuplouh a naupangte mobile haichilh dia chiil kha hithei i hihman un pilvanna di anuai a bang in ana suah uhi:
-Naupang a kah chiang a, a khemna dia smartphone zat louh di ahi, huai lou a lungkim theilou a hong om uh lauhhuai ahihziak in.
-Nau ann piak chiang a mobile zatlouh di. Mobile lou a ann nek didan theilou hong hihkhak diing uh thil lauhhuai ahi
-Thil hoih ahih uh pahtatna (reward) dia mobile zat louh di. Banghiam ahih khelh chiang ua le, a gawtna (punishment) dan a, a zatlai khawng uh suh mawk louh di. Screen time pen kideekna vanzat (bargaining tool) dia zat ahihleh, thilhihtheihna (power) thupitak kipia chihna hong suak diing hi.
-Om chiimthawina di hiam ahihkeileh om noplou khawng a a-om chiang ua, a khemna dia mobile zatlouh di.
- Nu leh Pate’n mobile addiction toh kisai a naupangte thuhilhna aneih chiang un, mohpaihna, ngohna, kouna kampau leh kampau sia himhim zang hetlou dia a kideek teitei uh poimoh diing hi. Naupangte hoihna dia i panpih theihna diing un naupangte dinmun a kibulhtuah theihna i neih uh leng poimoh hi. Huchia mahni innsung a kikepna a phattuam keileh, counsellor naihpih hoih diing hi.
- Naupangte’n amau et dia kilawm lou milim leh video hoihlou tuamtuamte a etsek uh chih bangchi theihtheih diing i hidia leh?
– A omdan uh etzui theih om diing hi. Zan sawt nung leh kuamah omlouhna a internet zat, mahni kia a om nuamsa leh banghiam buaina aneih chiang ua, puaksiam haksa sa a buaise pahpah chihdan khawng in sek diing uhi.
– Computer leh phone a zatchiang un, a website lutna sate (history) uh hihmang pahpah diing uhi.
Mobile leh internet haichilhna i chih, anxiety, depression leh lungsim chidamlouhna tuamtuamte ziak leng hithei a hihman in, velchet leng poimoh kha diing hi.
Thukhitna:
Bible in i hih khempeuh (nek leh dawn natawm) Pathian thupina dia (1 Korinthte 10:31), Jesu Khrist’ Min a, Toupa nna sem bang a kingai kawm a hih vek diing in hon chiil hi (Kolossate 3:17 & 3:21). Huai ban ah, 1 Peter 4:11 in hon hilh mahbang in, Jesu Khrist ziak in Pathian tuh thil bangkim ah pahtawi a a-om theihna diing in, thu i gen leh Pathian thute bang a gen a; mi kuapeuh in nna i sep leh Pathian in hatna hon piak bang zel a i sep diing uh ahi. Huchi leh, Amah a hisa, Pathian’ thupina leh vaihawmna, khantawn in, ei A tate tungtawn in puanzaak in hong om diing hi. Amen. Digital Technology leng Pathian thupina dia i zat diing uh chihna ahi.
Ephesate 2:10 in hon hilh mahbang in, thil hoih hih diing in Toupa Pathian in Amah khut ngei in, Khrist Jesu ah hon siamthak hi. Digital Technology leng Amah thupina dia i zat uleh, thil hoih hih dia honna bawl khol ahihman in, Pathian’ Mel kilawmtak taaklangtute i hong suak diing uhi. Thilhoih hih ichih, Pathian in Jesu Khrist tungtawn a itna sangpen hon piak i thukkikna uh ahi; Pathian i it thukna uh ahi.
Simtute thilhoih sinthak a zangkhe thei zel di’n Toupa’n hatna leh kuhkalna hon pe chiat hen, Jesu Khrist min in. Amen.
February 12, 2024 / Article No. 34
(Hiai Laigelh ahihleh, laigelhtu phalna lou a suah (print) phal ahi kei. Hiai laigelh ahihleh, Ruth Messenger Jan-Feb, 2024 ah leng kisuah hi. Laigelh toh kisai a laigelhtu thuzaak ut a omleh 9892316430 ah thuzaak theih hi)