Gingtu taktak mi’n Kha lam vai ah ka bukim lota, ka Pathian thu zuih dan a hun lua, ka lungkim lota chih neithei ngeilou hi. Toupa a kibulphuhna diktak nei a, Amah a khosa a om taktak mite tuh niteng a Toupa toh ton uh ahihziak un mahni hihnate a kithei deuhdeuh uh a, khial ahihlam uh kimu chian semsem in Khris bang a kibawl touhtouh na ding, khovel thil hoihlou te apa’n kihihsiangthouna a midangte bang lou a khosakna ding amu chian semsem uhi. Hiai apan i muhtheih om tuh, khovel paidan leh i mihinpihte khosak bang a om toutou a, a sia a pha le khenkak theilou a niteng hinkhua zangzang i hih khak leh i gingtu hihna i dinmun tuh ki-etna ding hong om thei in i ngaihtuah hi. I thupi a i teel bang in Khris batna i neihtheihna ding midangte bang a khosak louhna, mite om bangbang a om theihlouhna ding hun tam zaw a i maituah thei hi. Pathian thu a iki buah louh chiang in i lungtang te mahmah uleng khauh in, kihihsiangthouna ding haksa mahmah hi. Sawltak Paul in Toupa a kihihsiangthou gige a, Amah thute a om gige apoimoh dan tuate lunggulh a poimoh dan chiantak in a gen hi. “….Huchi in gitlouhna tengteng, zekhemna tengteng, lepchiahna tengteng, hazatna tengteng, gensiatna tengteng tawpsan unla, naungek suak thakte bang in khalam nawitui bangmah hellouh lunggulh un, huai a na khan theihna ding un.” – 1 Peter 2:1-2.
Sawltak Paul hinkhua i sut chiang in ahun masa lamte ah gingtute gawttu leh soisa tu himahleh Toupa a pianthakna a hon neih apa’n thiltamtak ah Amah tuh gingtute ading a etton ding leh khuam poimoh mahmah ahong hita hi. “….Khrist Jesu khialte hondam ding in khovel ah a hongpai chih a taksanhuai in a laktuak mahmah hi. A lak ua khialpen ka hi. Himahleh hiaiziakin ahi zahngaihna ka na muh: Jesu Khrist in a dohzohna kim a khialpen keimah a a latsak theihna ding ahi, tuban siah tangtawn hinna muhna ding a Amah hon gingta dingte adia etsakna hi ding in.” – 1 Timothi 1:15-16. A hinkhua luite a etkik chiang in mi tengteng lak a khial pen hidan in akigen hi, himahleh Jesu nung a zuih apa’n Amah tuh gingtute ading a etsakna a hong hi zaw ta hi. Tu hun a eite leng ki-en leng, Pathian thu-awi kahi i kichi chiat ding uh a, tua bang i kichih lai un mikhial i hihlam uh i kiphawk gige uhia? Ahihkeileh khial hihlam le kiphawk lou a, hoihna bukim toh om gige bang a khosa a, mahni hihnate sang a midangte khelhnate bang gengen te i hi di uam aw chih hon ngaihtuah sak mahmah hi. Sawltak Paul bang a i hinkhua uh tuh niteng a Khris batna toh khosak sawm gige na hi zaw ahi chih theichian thakthak leng deih huai hi. Paul in Philippite te kiang a alaikhakna ah hinkhua a poimoh penpen tuh, Khris bang a khosakna ahih dan a hon gen zom hi.
“A hihi hitaleh, thil kei adia punna peuhmah Khrist ziak in manna in ka simta hi. Hitaktak hi, ka Toupa theihna manpha ziak in thil tengteng ka tanta hi. Khrist ka tan theihna ding in thil tengteng ninneng bang phet in ka sim hi. Amah a ka om theihna ding in leh dan a kinga keimah diktatna hilou a, Khrist ginna ziak a om pen, ginna a kinga Pathian apan suak diktatna nei zaw in. Huchi a Amah leh a thohnawnna thilhihtheihna ka theih a, a thuaknate tanpiha, a sihna a Amah batna ka neih theihna ding in. Bang chi hiam a misi lak a kipan thohnawnna ka ngah theih khak leh chi in. Hiai tangkhin ka hi kei a, bukim khinta ka hi kei; himahleh huai mah kei a hihsak tum in ka delh teitei hi, Khrist Jesu’n kei amah a hon hihsaktak ziak in. Unaute aw, tangkhinta in ka kingai kei a: himahleh thil khat ka hih; nunglama omte mangngilh in malama ompen ka delh hi; Khurist Jesu a Pathian sapna sang kipahman mu ding in phak chiamna ka delh hi.” – Philippite 3:7-14.
Paul in Amah hihna akitheih luat man in, Amah bang a Jesu nungzui hiding leh siatna apan kihem khe ding in midangte veina liantak anei semsem hi. “Ka unaute aw, Khrist noumau a siam piching a a om masiah nauvei in ka honvei hi.” – Galatiate 4:19. Toupa gamnasem dia mitamtak i omlai un, midangte veina leh awlmohna taktak i nei uhia chih kidot tuak mahmah zel hi. Poi mahmah a muhtheih a om tuh, tamtak te’n Pathian gamna sem a omte thumsakna bang i ngai poimoh mahmah uh a, hiai bang thilte atam zaw tuh kipahthugenna ding, lohchingna dia thumna chihte, damtheihna ding chihte leh maban hoihna dingte lunggulhna chihte atam zaw hong hi gige hi. Tuate a sia i chi zenzen kei a himahleh i chitlouhnate, i khelhnate uleh i hoihlouhnate uh thupha tawina, ngaihdamna chihte ading a thumsakna i neitam ding un kakigingta kei hial hi. Toupa gamna sem a omte mah bang inleng i Saptuam pihte awlmoh i kichih lailai inleng amaute khelhna leh hoihlouhnate gen ngamlou, taihilhngam lou i hi di uam aw chih hon ngaihtuah sak mahmah hi. Paul bang a saptuamte veina i neihlai in, Khris batpih a siam piching i hihna ding un Laisiangthou pansan a kitaihilh ngam theih a poimoh mahmah hi.
Hun tam zaw a i na gelhsek bang in gingtu hinkhua ah mahni hihnate kimangngilh na omlouh chiang in Pathian thu zuih ding pen haksa mahmah hi. I mihing hihna pen i koih khiat a, mikhial i hihna uh kiphawk a Toupa lou a bukim theilou i hih dan uh kitheih apoimoh pen hi. Tua bang a i hong om chiang un Pathian deihna bang in niteng in Khris batna lungphut i nei toutou thei ding uhi. “….naungek suak thakte bang in khalam nawitui bangmah hellouh lunggulh un, huai a na khan theihna ding un.” – 1 Peter 2:2
I thupi ah lutnawn leng, Khris batna nei touzel kahi chih mahni a i kitheihtheihna ding leng tamtak a hong om hi. Tuate lak a i muhtheih om tuh Toupa thute, Laisiangthoute theih utut semna, baan ah tuate theih mai hiloua theisiam semsem a, theihthuk semsemna chihte ahi; hiaite tungtawn in Khris batna niteng in i nei toutou thei uhi. “….Huchi in eite zaw i vek un mai khuhlou in limlang bang a Toupa thupina tangsawn sak zel in, amah kibatpih ngeingei a om ding in hihlamdan in i om zel uhi; hiai Toupa a kipan i muh ahi; Amah tuh Kha ahi.” – 2 Kor. 3:18. Hiai Laisiangthou apa’n i mimal ua i kidot theih ding uh a om hi, gingtu i hihna uleh Khris nungzui ding a i om lai un i hinkhua uah bangbang kikheknate om hi’n i kitheithei a? Hihlamdang a om touzel ka hi i kichi thei hia? Kibawl hoihna ding leh kisiamphatna ding i neitou thei zel uhia? Ahihkeileh tuate leng phawk phaban lou a i om bangbang a nungta i hi uhia leh? chihte i kivel na ding uh hong hileh i kingen ahi. Khris batna dang i muhtheih om nawn tuh, Pathian itna leh ginna a hat semsem na chihte ahi. Pathian it kahi kichi mahlehang, Amah deihdan a khosa loute ading in itna taktak (Pathian itna) kichi bang hi hiam chih theihchet a haksa hi. Aminpu mai a itna nei kichih khak ding thillauh huai pi leng ahi. Pathian itna i muh theih a, Amah i hinna ua a hong om theihna ding in Khris bang a khosakna masa apoimoh hi. Tuate’n i ginna mahmah uleng hon hatsak semsem ding a, niteng in Toupa toh ton in hinkhua i zang thei ding uhi. A tawpna a Khris batna i neihna uh muhtheih a om tuh thumanna ahi. Tua thumanna kichi tuh Toupa deih bang a khosakna, a thute zuihna leh tuate niteng hinkhua a hinkhiat pih a lahna hong hita hi. A tawp pen in Khalam khanna kichi tuh Khris batna a nuntakna ahi. Tuate tuh i ngaihtuahna ah, i kampau ah, i omdan leh nasep dante Khris deihdan toh kituak a hong hih vek ding ahi.
“Huan a thupiakte i zuih leh huai ah amah i thei chih i kithei hi. A thupiakte zuilou a “Amah ka thei” chi mi mi zuauthei ahi, thutak amah ah a omkei hi. Kuapeuh a thuzui peuhmah amah ah Pathian a itna a kim petmah hi. Amah ah i om chih hiai ah i kithei ahi. Amah ah ka om gige chi mi amah om bang in a omsam ding ahi.” – 1 John 2:3-6.
Toupa’n a thu hon piakte tungtawn in simtute hon ompih chiat henla, Amah Khris bang a niteng hinkhua zang mi leh Amah adia nungzui muanhuai hithei chiat ding in hon vualzawl chiat hen! Amen!.
Theihna bukim louh ziak a i gelh khelh omte i Toupa ngaihdamna i ngen hi. Bangkim ah Aman thupina tengteng tang hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing) 16th November, 2022| Weekly-Inspiration – 114)