Toupa’n I Tung A Hon Hih Sakte Ngaihtuah Thak Ni

“Nidanglai nite ka theigige a; na thilhihte teng ka ngaihtuah zel a na khut nasepte ka sut zel hi.” – Sam 143:5

Mihingte’n thil i manghilh baih dan uh, niteng a i hun man dan te uh a hi di mong isak khak uh atam zaw om ding in i ging ta hi. Pathian ompihna ziak a bang hiam thil lamdang i theih a i muh te nangawn ni bang zah hiam zoh chiang in i manghilh pah uhi. Hiaite a kipah thugenna ding le mulou a, thil haksatna buaina neukha i tuah chiang a dotna bawl pah te ihi lai uhi.

Hi chi bang a i om khak a, ngaihsutna i neih chiangin thil teng a hi di mong a hong om gige sak khak in om hi. Tua bang ana hi het kei. A Siamtu om ahi chih phok thakthak in, ki remind thakthak thei leng tua i hing dan leh omdan leng muh a kikhek na hong om ding in a gingtak huai hi.

Awle tukal sung in hiai a i Laisiangthou tangtel sim in kipahthu genna in zang leng i chi ahi. Sam Laibu ah hiai bang in i mu hi “Nidanglai nite ka theigige a; na thilhihte teng ka ngaihtuah zel a na khut nasepte ka sut zel hi.” a chi hi. Tua mah bang in Toupa’n tu hun tan a thil hon hih sak te i ngaihtuah ding a, hou chik cia i na ngaihsut khak om tele ei mihing hih zohvual ding hilou ahih dan thei thakthak in kipahthu gen leng i chi ahi. Pathian thilsiamte’ ah ngaihsutna i pe ding a, i kiim-i-pam a muhtheih te, vante’ leh muhtheihlouh A khut nasepte sut in, a thupidan puang in kipahthu gen chiat ding in iki ngen ahi.

Simtute Toupa’n hon ompihin hon Khamuan hen!

– Thangginom Hangshing