KHRIST’ VAKNA ZUMPIH KEI NI

Matthai 5:16
Huchimah bang in, na vak uh mi mitmuh di’n vak hen, huchi’n na thilhih hoihte uh a mu diing ua, na Pa uh van a om a pahtawi thei diing uh.

Jesu Khrist’ hotdamna i saan tuung in, A sihna i theihsiamnadan khat ana om mahleh, sianthounalam a i khan zel chiang in, A sihna  i theihdan leng hong thuuk in, hong za semsem hi. Pianthakna leh nungzuihna a tuamtuam hilou hi; Nungzuihna ahihleh, ‘pianthakna ah thuukluut deuhdeuh’ chi in ka theisiam hi. I Hondampa’ tatna simthu zaak chim chih omngeilou di’a Khasiangthou in hon piina mahmah leng manpha sa in, vualzawlna tang tungtuanna hi in ka ngai hi.

Ei migiloute, khelhna ziak a si diing lai hong tankhia Toupa Jesu Khrist tung ah i kipaak petmah hi. Khelhnabei leh dembei i Toupa’n ei hihna amah kisuan in, Khros ah mualphoutak leh gimthuakna chiteng toh ei mun diing hong luah hi. Huchi in eite’n Amah kipumpiakna ziak in Amah diktatna tang in i hong omta uhi. Eite adi’n, mite kouna, demna, gawtna, chiamnuih sia, enghouna leh simmohbawlna chiteng thuak in, daan botsia, migilou leh michavaihte sihdan in hong si hi. Nang leh ke’n i khelh ziak a Pathian thangpaihna i tung a hong tung diing pen Jesu Khrist in Amah leh Amah kisuan hi. Hiai thu theisiam leh thei thuuk di’n pan la ni uh aw, lawmte. Manpha lua ahi.

Pathian in Amah hihna (iitna) eite muh diing in a Tapa Jesu Khrist tungtawn in hong hihlang a, A mel mu nai kei mahleng, ginna ziak in Amah theihtheihna, Khasiangthou piina toh i hong neithei ta uhi (Johan 20:29). Tatna thupi mahmah ahihman in, vualleltak a nungzui hinkhua zang diing kihi nawnlou ahi. Jesu Khrist tatna i san leh, miallak a i omna pen vaaklak hong suakta chihna ahihman in, khovel mial tanvaak diing a hon tatkhiakte i hihlam uh thei chian sem di’n pan la ve ni maw! (Sam 18:28). 
Vak a i omtheihna d’ua Jesu Khrist’ Sisan a tatsate i hihman un, i vak uh i sel diing uh hi nawn himhim lou hi. Mial tate i na hihman un mial a om i na ngeinaseh mahmah ua, vaak a omdan siamlou leh zumhuai sa khawng in i om sek uhi. Lunghimoh kei ni; vakna mun hon tun Pa’n, a lampi ah hon pii dia, i tunna di mun hon tun diing hi (Philippite 1:6). Mun mial leh khomialna munlak khawng i na kingeinasehsa uh ahihman in, vak hong om phut chiang in i mit hah leng anuam pah kei hi. Himahleh, i om teitei leh awlawl in i mit hah leng hong nuam a, a vak a om kingeinaseh in, mun mial ki ut nawn himhim lou hi.

Ei kia a tei sawm in, ei hatna suang kawm khawng in vak lampi ah i paikha vettak ua hiven. I theihsiam d’ua poimoh chu, vak lampi a Pathian in hon tut nung zaw, Amah Kumpigam lut kipanta i hihman un, Amah thu pansan a, Amah toh ton diing i hita uhi. A thu pen i lampaina a khawnvak diing ahihlam bang mangngilh kha sek in, ei hoihsakdan, remchandan leh nopsakdan in i na zuikha sek uhi (Sam 119:105). Athu in i paina diing salvaksak lou i hih chiang un, kipaibuai sek hi. Mi mitmuh di’n kivakkhe zou sek lou a, thilhoih i hih diingte uh guitung theilou hi. ‘Thilhoih’ i chih Pathian deihdan toh kituak thilte chihna ahi a, ei deihdan leh hoihsakte hizawlou ahi chih thei ni.

‘Piangthak kahi’ kichi nazenpi a, i vak muh diing a omlouh chiang in, kingaihtuah khial a, kipau khial a, kigamtaang khial a, gimthuakna hun leh mun kitung zel hi. Huai gimthuakna tungtawn a, Toupa zahngaihna mangtutphah zuanthei i hihleh, mi hampha kihi mai ahi. Amah thu toh kituak di’a kikheklelna hinkhua i zattheihna diing un, i hinkhua uah haksatna i tuak diing uh hon phalsak zel hi. Hun nuam a thuman haksa i sa ua, hun haksa ah thuman utna kineithei pan sek ahihman in hun haksa i tuah uh A phal zel hi. Sum leh pai hilou a, Jesu Khrist’ Sisan a tatsa i hihman un (1 Peter 1:18), huai dinmun toh kituak a i hin theihna diing un supnate, suunnate, natnate leh haksatna chi tuamtuam i tuah uh Toupa’n hon phalsak zel hi. Hiaibang i tuahte uh ei hoihna di leh Amah lemgel hong tangtunna diing ahizaw gige hi (Romte 8:28).

Kalvari mualtung a, kilangsaartak a, miteng muh di’a vuaktang pi a, mualphoutak a ei sih tang hong sihsak ahihman in, i Toupa kipiakzohna tungtawn in damna leh tangtawn hinna i ngahta uhi. I kipahna thu inleng a gen zou kei hi. Huaidan ahihman in “ke’n leng bang ade aw ka hih thuk sam diing?” (Sam 116:12) chihtheihna leh thanopna i hong neitheita uhi. Huaiziak tak in, mualtung a vak a kisel louh mahbang in enleng ngaihtak, chiangtak leh hangsantak in i vak uh a latkhiak theihdan teng a langkhe sak diing i hita uhi (Matthai 5: 14-15).

Ei thuak di taang teng a thuak ek nung a, thah a A omna mun leng mun siangthou ahikei a, mun kilawm leng ahikei hi. Himahleh huai mualtung a mualphouna huaisia, gimthuakna chiteng leh sihna mulkimhuai in eite adi’a vaak hon tun ahitel ve! Mel lawmlou Khros a Toupa’ kipumpiakna leh iitna a kinga in, ei A hotdamna sangte’n leng i vaakna uh kilawmtak a Khrist’ Khros thilhihtheihna toh i latkhiaksak diing uh ahihdan chiang lua maw!

Huai Khros’ thilhihtheihna ahihleh ei ah Khasiangthou in namkip in a omta hi. Ephesate 1:3  leh 1 Korinthte 1:5 in hon hilh mahbang in, i vak taansakna di’n, khalam  poimoh bukim piak in i omkhinta uhi. Amah pahtawi diing a, A hon siam i hihman un, a vak i taangsak chiang un, i Pa van a om mite’n pahtawi zel uhi.

Bang ahia i suanlam lailai uh?
Bang hunlem dang ahia i ngak lailai uh?

Jesu Khrist mitsuan le’ng maw, lawmte!

-Chingngaihlian Tunglut

February 27, 2021/NH_20

(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)