Mahni hihnate kitheihtel theihna kichi gingtu khat ading in thil poimoh mahmah leh a lou theilou ahi. Hih na kitheilou a hai om i chi hiam, poi sakna ding le neilou; hiai zaw diklou deuh hive aw chih theihna le neilou leh ut dandan a om i chihte chu banghiam piang dan a bukim zohlouhna neite ahi ut zaw uhi. Himahleh tua bang hilou a gingtu khat lah hi ngal, sialehpha theih nung a ut dandan a gamta teitei i chih in Pathian ta taktak mah hithei ding i diam? chih hon ngaihtuah sak hi. Hiai dotna tomchik a dawng ding chileng Pathian a kinga a, Amah a lametna ngate’n a hihna uh kithei uh a, thilhoihlou bang hiam a hih khak chiang un tua te apan khial ahi uh chih kitheihtelna, kimohpaihna a neisek uhi. Hiai in tuate apa’n kibawl hoih na lampi tung in, hiai thil hoihloute apa’n kiveng bitna, tua bang a om ut nawn louhna lampi ah api hi. Thilhoihlouh hih utna te apat kibawl hoih sawm tuan lou a, ut dandan a i va gamtat teitei lai na in gingtu diktak i hih leh hihlouh a hon genchiang zaw hi.
Pathian in amah toh tonkhawm gige ding, Amah deihna bang a nungta ding a hon deih lua ahihziakin michih hon houpih dan a om sek hi. Tua tuh i ngaihtuahna uh tungtawn bang a hong hi deuh hi. Banghiam thil asia i va hih chihna hipah lou in Amah i batsemna ding un hiai zaw hoih ahi, hiai pen hoihlou ding ahi chih suangtuah theihna a honpe sek hi. Hiai te tungtawn in deihteelna Pathian deihdan a om na i nei uh a, tua in Amah deihna bang a om semsemna lampi ah ahon pi sek hi. Tamtak te’n ken Pathian hon houpihna, hon ompihna za ngeilou leh thei ngeilou kahi i chi kha maithei hi. Himahleh na hinkhua tomchik ngaihsun lete Pathian hon ompihna na mu teitei ding hi. Hiai thu na sim kawm inleng na hihna ki-en in kingaihtuah lete Toupa ompihna na theih beh hong om ding ka gingta sem lai hi. Hunteng a Pathian ompihna aw te, theihtelna a honpiak te limsak gige hileng haksatna buaina i tuah zelte uh om lou thei ahi chih phawk thakthak leng i ut lai hi. A tangpi in buaina i tuahsekte uh enleng i thumang louh ziak uh, eimah deihtelna a i na pai khak sek ziak uh ahi sek hi. Hiai bang a i om ma ua theihtelna ei ading a hoih ding, midangte adia hoih ding leh hoihlou ding chih teel theihna Khasiangthou tungtawn in aom zel hi. Hiai houpihna aw, ngaihsak lou a mahni utdan tak a i om chiang un buaina i tuak sek uhi.
Johan laibu a Khasiangthou nasep i muh tuh hiai ahi, “….Amah (Khasiangthou) a hongtun chiang in, khelhna, diktatna, leh vaihawmna thu ah khovel a siamlouh dan a theisak ding hi.” 16:8. Mi tamtak te’n kuaman hon theilou ahi, kuaman a hon mukei na chi in tuate zaw lungsim maimai ahi hon sulung nuamlou chi’n amau le mau aki sulung dam sek uhi. Himahleh hiai hunte a hon lungnuam lou saktu tuh Pathian ompihna Khasiangthou nnasep ahi chileng i genkhial ding i kiging kei hi. Siangthou ding leh Pathian batpih a om toutou ding i hihlai ua hon niin sak thei dingte apa’n i ki hepkhiat theihna ding un theihtelna leh deihteelna ding a om gige hi. Bang pen i teel a, bang chi’n i om a chihtuh mahni a kinga ahi. Mi khenkhat te lah amau khelhna midang in amuh ma uh khial ahihlam uh kiphawk lou chih bang a om lai uhi. A poi mahmah thil leh tua bang a om khak ding a lauh huai mahmah tuh thilhoihlou ahi chih thei hina pi, tuate va hih teitei khak ahi; hiai in zongsatna a hontut banah Pathian phawk nawnlouhna, ut dandan a om na ahon tung hi. Mi khenkhat poisakna himhim le neithei nawnlou i chihte tuh tua bang a ana om khak ziak ua kibawl hoihna ding mun ale kibawl thei nawn lou, Toupa aw za thei nawn lou a khovel nopsakna in a hipte ahi uhi. Eite tua bang dinmun a om ma ua Toupa aw te za thei a, kibawl hoihna ding omte a i kibawl pahpah uh gingtu khat ading in a poimoh penpen hi.
Taksa a siangthouna i ut gige mah bang un lungsim a hunteng a siangthouna tuh i Toupa hon deihdan ahi. Kikhopna hunte hiam, biakinn te hiam a siangthouna hilou in, niteng a i hunzatnate ua siangthou semsemna a poimoh hi. Siangthouna lou pi a Toupa toh tonkhawm theih ahi chih khak ding alauh huai a, mahni hihnate ki-vel chet thakthak apoimoh hi. Lungsim nin takmai a thil hoih semsem kichi in, i nasep hoih in phattuamna tampi om mahleh Toupa toh om khawm lou i hih ziakin tuate a thon lel hikha ding a, kihih khial mahmah kha ding ahi.
“…Tua ziak in Pathian leh mihing tung a hihkhiallou ding in sialehpha siangtak nei ding in ka kibawl gige hi.” – Nasepte 24:16. Sawltak Paul hinkhua sutleng mihing ahihna ah Pathian tung khia a khiallou ding achi kei a, mihing tung ah leng achilai hi. I niteng hunzatna uah khelhna ding atam mahmah hi, khatleng neilou leh mulou kahi i kichih leh kivel na ding a tam mahmah hi. Hun paisa te a i na gen khak sek bang in lungsim a le khial theiden te i hi uhi. Sawltak Paul bang a sialehpha mi chih in kinei chiat a, a hoih leh hoihlouh theihtelna i nei uhi. Tua bang hunte ah bang chi’n i om a, Sawltak Paul bang in siangthou tak a om ding in i kithunung zou hia? I Toupa Jesu Khris nungzui kahi i kichihchih lai in tua bang hunte ah bang pen i teel a, Amah nungzui i hihna taktak midang te’n le a hon theihpih sam uh hia? chihte in ki-en chiatni. Siangthou tak a om sawm na in perfect tak a bukim tak a om ding i hih uh chihna ahi zenzen keihi. Hiai in Toupa bat semsemna, siangthou tak a om semsemna ahon tung ding hi. Leitung a khosa lai leh hih thupi a ki om nailouh ahihziakin khelhna i va hih khak na a om thei hi himahleh tua khelhna pen noptalna a i zatkhak ding thillauh huai ahi dan phawk thak semsem leng i deih hi.
Toupa akinga in Amah toh tonkhawm gige leng theihtelna siangtak toh a hon ompih gige ding a; hiai te’n siangthouna lampi ah honpi in i niteng hunzatna te uah Amah bat semsemna a hon tung ding hi. Laisiangthou te sim a, thumnate i neihlai un Toupa leitung a ka hinsan bang ahia? Ka hinkhua a bang lam ah Nang ading in nawn zang ut a? Nang bang a Siangthou semsem ding in honpi in chi’n thum leng Khasiangthou tungtawn in theihtelna Amah aw i zak ding a hong om gige ding hi. Tuni’n tua bang a kipan thak ding, hiai bang a om tou semsem ding in kisa in, Toupa toh bangkim ah tonkhawm in a hou pihna aw te limsak semsem ding in kisa ni. Toupa’n hon ompihin hon vualzawl chiat hen!
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
19th April, 2022 | Weekly-Inspiration – 95