Kallui paisa ah Toupa’ gamna sem dia a sap a om I hih lam bang chi bang in I theithei dia chih thu saulou in I sut a, tukal in leng hiai behlapna hiding in bang chi in Pathian gamna sepna ah I ki hel thei dia? chih thupi a nei in saulou mah in I ki khum nawn ding.
Pathian gamna I sep theih na ding a I panlak theih nate khenpi thum in aki khen thei hi. Huaite tuh: Thumna, Thilpiak leh Kuankhiatna ahi. Hiai te sau loulou in I gen ding.
Huan, “Kua ka sawl dia, kou adia kua kuan ding ahia?” chi in, Toupa aw ka za hi. – Isai 6:8
Thumna:
Mi tamtak te’n lunglutna nei mahlehang Mission field ah I va kihel vek thei kei uhi. A ziak gen ding chileng miteng a ki bang lou ding a, a kuankhe theilou a tua I omna ziak khong le a hong hipah ding hi. Himahleh Thumna tungtawn in Mission nna hunteng in I sem thei hi. Thumna in thil ahih theih dan leh manpha ahih dan mahni a experience chiat ta ding in I kigingta hi. Endih, I haksat mahmah lai a thumsak tu ding, thum tu ding I theih a I zak naknop dan maw! Konna thumpih ding, kana thumpih uh chihte I zak in lungmuanna leh khamuanna hon pia mahmah hi. Hiai bang thumsak tu ding neih tuh Pathian gamna semte ading in apoimoh mahmah a, amau mahmah leng hanthawn na thupi tak ahi.
Pathian gamna sem a om Missionary a kuankhia kuakua om a chihte I theih kei lehleng amaute ading in I thumsak thei gige hi. Tulai in ahihleh WhasApp khong leh Social Media tuamtuam khong ah hong ki taklang gige ta a tuate ana zuitou hileng niteng a I thumpih ding a om gige diing hi. Hanthawnna laikhak I chi hiam, laithon amau te kiang a khak in leng gen anei mahmah hi. Hiai bang ana hih om ahi chih I theih man in I ki pak mahmah hi. Hiai te tungtawn in Missionary a kuankhia mi tamtakte lungmuan khamuan leh kipaktak a koih thei I hih chih phok thakthak ni.
Thilpiak:
Leitung khosakna ah chitna tampi nei mahleng sum-le-pai om louh chiangin bangtan ki tungthei tuan lou hi. I Missions nasepna te uah leng hiai bang ahi, Pathian gamna sepding bawl ding tampi om mahleh deih bang leh utbang a aseptheih louh uh tam ding in a gingtak huai hi. Hiai te panpihtu ding a kei leh nang pang thei gige I hi chih thei thakthak nawn ni. Bang chi bang a amaute kia’ng a panpihna pe thei ding I hia? Local chih leh mun chih a Missions Dept. I nei chiat uh hi. Amau te thuzak in panpihna I pia thei gige a, huchi lou in Mission Field a omte mahmah toh ki thuzak inleng a khak theih gige ding hi.
Kuankhiatna:
Hiai atung a I gen nih te chu I damsung a I hih det theih gige te ahi a. Koi mun koi gam ah om hilengle hiaite ah I ki hel thei gige hi. Bangmah hih lou na kisak lai in Pathian gamna semte panpihtu, hanthawntu leh nang mahmah inleng Pathian gamna sem na hi chih hiaite tungtawn in a theihtheih hi. Tua te banah, a nnasem a pangtu, a kuankhetu inleng I pang thei gige hi. Zanlam I Weekly Inspiration a I gelhsa mah bang in man a I kitheih a, ei a sapna taktak I muh chiang in I kuan khe thei gige hi.
Khovel a khantouh nungzui in siatlam leng a uang mahmah hi. Huchi ahihlai in Missions nasepna leng hat mahmah in a semtu ding leh sepding bawlding tampi om lai ahi chih leng phok thakthak ni. Eite hicia I om muang maimai lai’n mitamtak Khamangthang a omte’n lampi diklou tawn a hon na mualliam san om gige hi. Hiai in zekai thei I hihlouh dan, thumna, thilpiak leh asemtu ding apoimoh dan hon theisak semsem hi. Pathian thu mun chih mualchih leitung a I puangzak tuh I mohpuak ahi chih phok thakthak ni.
“…Toupa Pathian, ngai dih, thu ka gen siam kei, ka naupang ngal a” ka chi hi. Toupa’n ka kiang ah hichi in a chi a: “Ka naupang, chi ken, k’on sawlna peuhmah kiang ah na hoh ding a, k’on thupiak peuhmah na gen ding ahi. Amau ziak in lau kenla, nang hon honkhe ding in na kiang ah ka om hi” chi in. – Jeremiah 1:6-8
Theihna bukim louh ziak a gelhkhelh leh gelh kimlouh om te Toupa’n hon ngaidam henla, I thugelhte I tanchiat ua Khalam a hatsemna, Amah I naihsem na uh ahong hih theih na ding in hon vualzawlsak leh I thumna ahi. Amen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
30th September, 2020 | Weekly-Inspiration – 39.