BANGZIAK A HAKSATNATE TUAK ZEL I HIA?

0

Mi kuahiam in buaina haksaksatnate leh khemnate a hon tuah khak chiang in, i kihehnepna uh lah hi, i gen mun mahmah uh aom hi. Huai tuh, ‘lungkham het ken, Pathian in na tung a na thuaktheih val ding haksatna, khemnate hon tung sak lou ding ahi’ chih ahi. Hiai thu tuh i Laisiangthou ua pat i zak ua i theih ziak uh leng ahi ngei ding hi. “…Mihing thuaktheih val khemna himhim na tuang uah a tung ngeikei hi. Pathian zaw a muanhuai hi, aman na thuaktheih val uh khemna na tuah uh a phalkei ding; na thuaktheihna ding un khemna peuh ah taikhiakna lampi a bawl zaw ding hi.” – 1 Kor. 10:13.

Bang ziak pen tak a hiai kichi sek i hi di uam chih a ziak leh asanbel i ngaihtuah sau kei maithei hi. Pathian in mihingte hiai leitung a i om lai ua haksatnate, khemnate i tuah ding uh hon phallou lua hileh kilawm a kihehnemnem kha i hih khak ding uh pilvang huai mahmah khat ahi. I Laisiangthou a akigelh dan bang in Pathian in i thuaktheih val uh khemna i tuahding uh hon phallou mah hi. Gendan tuam a gending hileng Pathian in i thuak zoh ding tan uh theilua ahi chihna ahimai hi. Huaitan pel a i Khalam dinmun leh i salam damtheihna uh hon buaisak zen ding in a honpi kei ding chih tuh kei mimal muhdan (conviction) khat leng ahi.

Haksatna leh buainate i tuah hun ua tua bang a i kihehnepna utuh hoih mahmah ahih kawmkawm in i et ding uleh i ngaihtuah ding uh om hi’n amuh theih hi. Mi teng thil et dan kibang kimvek keimahleh khenkhatte’ a ding in hiai bang a kihanthawnna in mahni kia i chi hiam, amau-le-mau a tua buainate mualsuah tupna lungsim a pe ut zaw hi. Mahni hatnate suang a, kei hithei ding kahi, zouzou ding kahi chih lungsim neih abaihlam mahmah hi. Hiai in Pathian hatna, a Amah a muanna ngak sang in mahni hatnate, ken zouzou ding kahi chih lungsim a honpe ut zaw a, mahni kia a tuate haksa sa pipi  a zoh utna i neikha sek uhi.

Bang ziak a hiai bang khemnate leh buainate thuak ka diam aw chihte ngaithuah a, Pathian deihdan lou a om kha kahi hia ahihkeileh Pathian in hiaite apat bang  ahon sinsak ut a chihte chu i thil et ding dan uleh i ngaihtuah ding dan uh ahong hi zaw hi. Mihingte i pil deuhdeuh uh a, lam tuamtuam ah siamnate i nei deuhdeuh uhi, hiai bang dinmun i hon neih chiang un i omdan uh, i khosak dante uh a hong kilamdang khasek hi. Tua mah bang in nopsaknate leh dinmun sang zaw letnate i hon neih chiang unleng i khohei dan uh ahong kilamdang pah zel hi. Hiai bang dinmun a i omnate uh Pathian apan ahi chizel mahlehang, a sung thu taktak ah i mihing hihna un ahon zou zaw a, eimah siamna leh hihtheihnate ziak i sa khazel uhi. Pathian a kinganga i kisak kal un Amah toh i kigamla deuhdeuh uhi.

Tuni’a i sinkhiat ut pen bang hiam i chihleh bang ziak a haksatnate leh khemnate om hiam? chih ahi. Haksatna tuak ngeilou mi om ding in a gingtak huai keihi. Khemna i tuah hun om tak lele ze-et a om i hi thei hi. Mi nuamsa, mi lohching i chihte’n leng haksatna, buaina leh khemna ana tuah uh tampi aom hi. Bangziak a Pathian in tua bang haksatnatna i tuah ding uh hon phal ahi di? Ahihkeileh bang ziak a hiai bang haksatnate om ahidi? A tung a i gen mah bangin mihingte’n thupina i hon neih chiang un Hon Siampa phawk haksa i sa uhi. Mahni a ki-ngak utna, mahni ki muanluatnate a hon letluat chiang in Toupa i phawk ding bang un i phawk kei sek uhi.  Hinkhua nuamsa tak a khosa den ding kihileh Toupa toh tonkhawm zou gige ding i om kei ding hi. Haksatna leh buaina i tuahte un i dinmun uh a hon hilh zaw a; Toupa lou  a bangmah hilou i hihdan uh ahon sinsak zel hi. Hiai hunte ah Toupa ngaihna, Amah naihsemna leh a ompihna i poimohdan uh i hon thei khezel uhi.

“… A gam leh a diktatna zong masa un, huchi in huai tengteng a honpiak behlap ding hi.” – Matthai 6:33. Leitung hamsiatna nuai a khosa lai i hihziak un, buaina leh haksatna i pumpelh theihlouh uh leng a om thei hi. Himahleh Toupa deihdan a khosa in Amah ah kinga zou peuhleng tua bang haksatnate a pan taikhiaktheihna lampi a hon bawl sak ding hi. Toupa’n Amah toh tonkhawm gige ding a hon deih a, huai ding a siam a om i hihziak un Amah toh iki gamlat ding uh angai theikei ding chih tuh a chiang mai hi. Amah i phawk ua i naihsemna ding ua haksatna buainate i tung ua hongtung theizel mah ahi chih pomsiam leng i ut hi. Hiai bang a ngaihtuah lou a, tua haksatnate eimah hatnate suang a i mualsuah sawm chiang un hinkhua haksa leh tawl huai ding mah ahi.  Toupa a om photphot in, Amah akinga peuh phot leng leitung khosakna ah, nek-le-tak i zongna ah beidot hun, lungkiat hun hong om zel lele tuate a puakdan i thei ding uhi. Toupa lou a bangmah kihi lou ahihdan chihte phawk chiang thakthak leng i utpen ahi.

“Kei a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi.” – Johan 15:5.

Toupa a kinga semsem thei chiat ding in simtute Toupa’n hon ompi’n hon vualzawl chiat henla, theihna bukim louh ziak a i gelh khelh omte a ngaihdamna i ngen hi.

– Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

1st February, 2022 | Weekly-Inspiration No. – 87

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment