Mihingte khialsa a piang i hih lam khatveivei ki phawk lou dekdek i hidi uam ka chih ton a om sek hi. Mahni a hoih hun tawk kisakna in i dim uh a; khelhna neilou bang in hinkhua i zang uhi. Thil hih khial ngeilou, i khelhlam le theilou i ki chih inleng a khial a piang sa i hi chih I theih a poimoh hi. Tulai a abuai mahmah khat ahih leh, diklou tak a gamta a, tua te khelhna ahih lam leng phawk lou tamtak i om uhi. Midangte’n amau hoih na ding a athuhilh chiang ua midangte hoihlouhna muh sawm, a maute diklou nate leh zong sawm a dem utna nei teitei bang i om uhi. Mahni khelhna te apat ki bawl sawm lou a midangte khelhna i va muh sawm teitei pen thil dik ahi kei hi. Nou leng hi chi’n a om ve uoi, kei hinkhua ka thuthu aka chi in mahni a siam kitansakna, dik kisakna, ki thupi sakna nei i om uhi.
Laisiangthou a i muh mah bang in, Kuamah mi diktat himhim a omkei uh, khat leng a omkei uh; Kuamah theisiam himhim a omkei uh, kuamah Pathian zong himhim a omkei uh. – Romte 3:10-11 a chi hi. Hiai ah mi tengteng khial mah i hih dan chiangtak in i mu thei hi. A chihleh khelhna a omden ding i hi diam leh? Hilou hial tua te apan i tawp thei a, i tawp apoimoh hi. Jesu kei adia hong si a, ka khelhna tengteng aman pua a, kei adia hong si ahi chih I gingtak a, Amah itna i sang chiang in hotdam in I om thei pan hi. Hiai hotdamna in neihchiang in siamtansak in i om uh a, Jesu sisan in i khelhna te hon sawpsiang sak in khiallou leh mi dik in Toupa’n hon koihta hi. Mi tengteng in thil a hihkhelh ziak ua Pathian thupina a tan zohlouh nung un, Khrist Jesu a om tatna ziak in, hehpihna a a thawna siamtansak in a om uhi. – Romte 3:23
Dotna dang khat om nawn thei chu, mahni a hoih kisate, khelhna neilou kisa a mahni ut dan a om laite la bang a chi a? Khelhna ka neikei chi lehang eimah leh eimah i kikhem a, thutak eimah ah a omkei hi. Thil ka hihkhial kei i chih leh amah zuauthei in i bawl ua, a thu leng eimah ah a omkei hi. – 1 Johan 1:8,10. Hiai bang a i om khak ding uh thil lauh huai mahmah ahi nawn hi. I kiim i kiang a i ginna hon bahsak thei ding adim in a omta hi, hunteng a Toupa thu a iki diah kei le zaw hiai bang dinmun a om khak theih gige ana hisek hi. Hiai in Toupa toh om khawm gige apoimoh dan leng ahon sinsak ngal hi.
Mi nin bang in ka na om vekta ngal ua, ka diktatna teng uh leng puansilh nin bang ahi: ka vek un nah bang in ka vuai ua; ka thulimlouhnate un huih bang in a hon mutmang zel hi. – Isai 64:6.
Eimah hoihna, i kipiak zohna te ziak a hichi tan tung thei ki sa in, mahni a dinmun khat, hihna khat nei a i ki koih let khak ding uh alauh huai nawn mahmah hi. Ahihkeileh, I innsung uah, saptuam sung ah nna hoih sem in I pang theih tawp un I pang uhi. Hiai te a poimohlou i chi het kei, ut in ut kei lenleng alou theilou a tuate i mohpuakna uh leh i sep ding mah uh ahi zaw hi. Himahleh hiai bang te i hon sep tam ua, nna hoih I hon sep tam chiang un i mihing hihna uh hong lian khadek pahpah hi. Hiai in Toupa adia semsem iki sak lai un, i ngaihtuahna uah hiai bang lungsim hon nei sak thei hi. I sep hoihna te uh ziak, I sep khiatte uh ziak, I hahpan na te uh ziak leh I septam ziak ua hotdam a om kisak khak ding aluah huai mahmah hi. Hiai ah leng pilvang na ding poimoh mahmah i mu nawn hi. Nna hoih sep ziak, sep tam ziak leh i hoihna ziak a hotdam a ki om ding hi zenzen leh eite ading in hotdamna lampi gam la mahmah lai kha ding hi. Jesu a I hotdamna, i ginna tungtawn a mi tengteng hotdam a ki omthei vek ahih zawk ziakin i kipak mahmah uhi. Toupa ompihna dongtak loute, a vualzawlna tantak lou te i hih lai ua leng hon nuse lou a, a hehpihna ziak a hotdamna a I om theih na ding ua Tanchinhoih I gam ua hon sawllut a lamdang in a thupi lua hi, Toupa Min I phat thakthak ahi.
I thukhitna in lungsim a om mahmah nawn ahih leh. Jesu leitung a hongpai lai in khelhna neite toh om khawm ahi chi in demna tamtak ana tuak hi. Hiai in ka ngaihtuahna a hon su kha mahmah hi, Jesu khelhna neilou te toh hong om khawm lou hi zenzen leh tuni in kei leh nang in Toupa thu bang chi bang in i za kha ding ua? Hotdamna kua kiang ah i nei ding ua? Ei ading in i maban uh tuh tantawk sihna a hong hi ding hi. Tua bang a i om ding uh Toupa’n phallou in, atapa tan neihsun Jesu eite toh omkhawm ding, i khelhna teng puak a, tangtawn sihna apan tangtawn hinna I neihtheih na ding ua hon sawl a, hehpihna na ziak a siamtansak a I om uh thupi lua hilou maw! Tuni’n i na khelhkhakna uh omte i Toupa mai ah thupha tawi in ki lankhe thak ni. I Toupa itna tu ahun lai a i sang khak louh ding zaw denchiang a hong haksa lokha ding hi. Toupa’ kiang kipahthu gengen ni. I hunte amah ading in atam thei pen zang in Amah ompihna ngen ni.
I thu gelh saulou te tungtawn in Toupa’n Simtute hon ompih henla. I tanchiat ua Khalam khan na ding leh salam a ki bawl hoih theihsem na hi ding in hon vualzawl in hon ompih chiat hen.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
28th October, 2020 | Weekly-Inspiration – 43