I TAKSAP PEN UH JESU AHI GIGE

0

Lemna leh muanna te gengen mahle hang kha gahte i muh ua, i neihma uh zaw muanna leh lemna taktak i innsung ua, saptuam sung ah, i khotang ua leh i namsung uah hongtung ngeilou ding hi.

Huan hiai gentehna a gen a: “Kuahiam in a grephuan ah theipi kung khat a suan hi. Huan a kung ah gah a hong zong a khat leng a mu kei hi. Huchi in grepgui kemmi kiang ah, ‘Ngai in, kum thum sung hiai thei kung ah a gah ka va zong zel a, khat leng ka mu kei; phuk in; bangdia mun dal a om nilouh ahia?’ a chi hi. Aman a kiang ah ’Toupa, tukum bek om henla, a kimvel in ka tou ding a, ek in ka phungvuh lai dia; Huchi a a gah leh a hoih ding, a gah keileh phuk mai in,’ ” a chi hi. – Luke 13:6-9

Laisiangthou ah mihingte tuh sing toh teh in i om uhi. Sing in mihingte hinna hon ensak ahihdan Sam 1:3 ah leng i mu hi. “Amah zaw tui luang kiang a sing suan, a hun a gahzel, a nah leng kau ngeilou bang ahi; a thilhih peuhmah a lamzang zel ding hi.”

I laisiangthou pansan Luke 13 na a i muh tuh sing (mihingte) gahsuang lou, gah neikhe lou te genna ahi hi. Bang gah ahia Toupa’n agen chih i Laisiangthou mah ah i sim nawn ding. “Kha gah ahihleh, itna, kipahna, lemna, thuaktheihna, migitna, hoihna, muanhuaina, nunnemna, kidektheihnate a hizaw uhi” – Galatiate 5:22-23a.

Hiai kha gahte tuh i hinkhua ua poimoh mahmah te lak a khat ahi a. Eimah hinkhua phetlou in midangte’n gingtu khat i hihna, Toupa neimite i hih dan uh hon theihtheih na utuh hiai kha gahte tungtawn apan ahi zaw hi. Tua kha gahte a kineih tawm mahmah ziakin buai theihna leh ki siattheihna ding i hau thei mahmah uhi. I innsung uah, i saptuam sung ua, i khotang ualeh i pawlpi sung tanpha uah tua te i neihlouh ziak un buaitheih na ding, ki lemlouhna ding niteng hunteng phial in i nei uhi. Hiai kha gahte neivek thei hileng i niteng hunzatna uah, ahihkeileh mitoh i ki kholhkhawmna te uh bangzah ta in anuam tel dia chih hon ngaihtuah sak hi. Lemna leh muanna te i gamsung uah gengen mahle hang hiai kha gahte i muh ua, i neihma uh zaw muanna leh lemna taktak i innsung ua, i saptuam sung uah, i khotang ua leh i namsung uah hong tung ngeilou ding hi.

Bang chi bang a tua kha gahte mu a neithei ding i hi di uam? Hiai dawngna tuh i Laisiangthou mah ah a om hi. “Keimah ah om gige un, keileng noumau ah ka om gige ding. Hiang, grepgui a a om gige kei leh amah in a gah theikei bang in, nou leng keimah a na om gige kei uleh, na gah theikei ding uhi. “Kei a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi.” – Johan 15:4-5.

Toupa toh i om khawm gige na in gahtampi a hon suangsak hi. Amah toh om khawm lou a, eimah utna te deihtelna te a i painak chiang un tua te’n siat theihna lampi ah ahongpi nak hi. Kha gah i neih nak sang un, ahilou lam ah i gamta uh a, itna om na di ah huatna i nei ua; kipahna om na ding a dahna i tung ua; lemna omna ding ah ki huatna in i dim uhi. I niteng hunzatna ah tua bang kha gahte toh i hinkhawm kha hia? Ahihkeileh ahi lou lam a om a, Toupa toh ton lou hinkhua zang toutou kha i hi zaw diam? chih i ki vel thak na uh hileh i chi hi. Toupa toh omkhawm lou leh Amah toh tonkhawm lou a tua kha gahte neih theihlouh adiam chi’n i ki dong thei hi. Amah lou in tua te i nei thei ngeikei ding. I dawngna tuh i Laisiangthou mah ah i mu nawn hi.

“Amah ah bangkim siam ahi a, van a omte, lei a omte toh, muhtheihte, muhtheihlouhte toh, mangtutphahte, thuneihnate; bangkim amah siam ahi, amah ading maha siam ahi. Huan amah zaw bangteng omma in leng a om hi, amah ah bangtenga dingkhawm chiat uhi.” – Kolsate 1:16-17.

Nak thupi na e maw! Toupa toh lou a bangmah hih theilou i hih dan uh chiangtak in i thei hi. Amah siamsa i hih lam leng phawk lou dekdek a khovel a thil omte ah buaitheihna ding i hau zawsop zomah ua, Toupa toh ki kholhkhawmna ding hun leng i pia man kei dekdek uhi. Hiai ah dekdek chih phetlou in nikhat a hun neukha a i piak louh hun uh atam zaw lai ding in ka gingta a, a piak sawm lou himhim leh ngaihtuahna a neilou mi tampi ki omlai ding inleng ka gingta hi. Bangziak a hiai chi thei ka hi hiam? I hunte uh hon lakmangsak thei tu melma nasepna ahat mahmah mai a, Toupa toh tonkhawm a, i hunte zang i ki chih lai inleng hon sukbuai sawm dan lampi tuamtuam ah i muthei hi. Hiai in khovel ah mitamtak mahni utdan a omte’n bang chi’n Toupa a ding a hun te uh a zang khawm theimah ding ua chih hon ngaihtuah sak mahmah hi. “…Keimah ah om gige un, keileng noumau ah ka om gige ding.” Toupa toh om khawm gige a lou theilou, apoimoh pen leh i niteng hunzatna ua amasa pen ahih dan thei thakthak leng ichi mahmah ahi.

Thilhih thei kisa a, dinmun lian taktak te leh hauhsaknate nei kisa a Toupa poimohlou i kisak khak ding alauh huai mahmah hi.  “Mi bangmah hiloupi in mi liankuama a kibawl leh amah kikhem tawm lel ahi.” – Galatiate 6:3

“Mi genthei nuamsa lou, zawng, mitdel leh vuaktang na hihlam kithei lou a, ‘ka hausa, hauhsaknate ka neita, bangmah ka kitasam kei’ na chih ziak in” – Kilakna 3:17

Tunia eite’n i poimoh pen uh leh i taksap lian pen uh zaw Jesu Khris ahi gige hi. Amah a siam i hi ua, Amah i hinna uh ahi hi. Hiang, grepgui a a om gige kei leh amah in a gah theikei bang in, nou leng keimah (Jesu) a na om gige kei uleh, na gah theikei ding uhi. “Kei (Jesu) a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi.

Tuni’n simtute i ki hanthawn ahi, bangkim a Jesu toh ton khawm gige a, Amah a om gige ding in kisa chiat ni. Amah ah i om chiangin, itna, kipahna, lemna, thuaktheihna, migitna, hoihna, muanhuaina, nunnemna, kidektheihnate a lam chiteng ah i neithei ding a, i innsung te uah, saptuam sung ah, khotang leh i nam ah muanna leh bitna te i nei ding uhi.

Toupa’n simtute hon ompihin hon vualzawl chiat hen! Theihna bukim louh ziak a gen kim louh hiam, gelhkhelh omte a hon ngaihdamna i ngen a. I gen dik sun omte a sim khempeuh ading a thathak lakna, Toupa’ deihdan a kipiak semna ahong hihtheihna ding in a vualzawlna i ngen ahi.

Amen.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 06th January, 2021 | Weekly-Inspiration – 53)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment