I TOUPA MEL I ZONG DING UH!

0

Toupa deihdan a om ding a hiai leitung a khosa himahlehang, i lungsim uh hon buaisak thei ding thildang ngaihtuahnate leh khovel thilte a tam mahmah hi. Toupa toh kithuah a Amah toh kinai semsem a om ding lai Amah toh i ki gam la deuhdeuh zaw uhi. I Toupa Jesu’n, “….Ngai un, kei tangtawn in, khovel tawppha in leng, na kiang uah ka om ding hi” a chi hi.” Matthai 28:20b chih i mu hi. Amah i kiang a tangtawn a om ding ahihleh eite’n Amah i zong uh a ngai nawn a hia? Bangziak a Amah mel zong ding i hia? Bangziak a Amah poimoh lai i hia? Dahna leh lungkhamnate i tuah chiang un eivuak in tuate i pozou kei uh a, midang kuahiam kiang a i gen khiatna ding bang a om chiang in anuam tuan mahmah hi. Kuaman ka lungkham lua a hilele nuam kasa a chi om ding in i gingta kei hi. Lungkhamna taktak maituah a, kitamkham gop a, atawptan tung ding a i om hun chiang ua i belhpen uleh i poimoh pen uh chu i Toupa ompihna ahi gige hi. Khatveivei haksatna leh buaina i tuahte un Khalam Khanna leh Toupa toh kinaih semna a hon tung zel a kipahhuai mahmah hi. Tua bang ahihlai a i kidot ut pen chu haksat hun, buai hun leh lungkham hunte vuak a Toupa mel zong ding mah i hi di uam? Nop i sak hun uleh i kipah hun ua Amah koi a koihsek i hia? Amah i poimoh hia? chihte i kivel na ding ua thil poimoh mahmah ahi.

“…A gam leh a diktatna zong masa un, huchi in huai tengteng a honpiak behlap ding hi.” – Matthai 6:33. Hiai a Jesu’n a gen tuh tamtak te’n i zakzak sa uleh i theihchiat sa uh leng ahi. Laisiangthou thute theihmai a hun hilou a, bang gen a chihte i theih uh apoimoh hi. Hiai a a gam leh a diktatna zong masa un a chihtuh Toupa a bul a koih ding, bangkim i hih peuh uh, a neu a lian a Amah phawk det ding, Amah theihpih ding, i hinkhua ua Amah i hinkhiat pih ding uh ahi chileng gen khavek ding hi. I poimoh hun ua Amah zong zual, Amah bel zual chih hilou in hun teng a Amah toh kiton ding, Amah deihdan bang a hia chihte zong nilouh ding ahi chih houchik in phawk thakthak leng i ut hi.

Matthai 6 chang masa lam ah nungkik leng, “….Bang ahia ka nekding, bang ahia ka dawn ding, chi in, na hinna thu uh leh, bang ahia ka silh ding, bang ahia ka ten ding, chi in na sapum thu uh lunghimawh kei un. Nekding sang in hinna a thupizaw ka hia? Silhlehten sang in sapum leng a thupizaw ka hia? Tungleng vasate en un; buh a tuh kei uh, a at kei uh, buh in ah leng a seklut sam kei uh. Himahleh na Pa uh van a om in amau a vak hi. Noute amau sang a nakpitak a manpha zaw hilou na hi umaw?” – v.25-26. I niteng poimohte uh i neihna ding uleh mi om bang a i om sam theihna ding un khovel thilte ah hah takin I pang ua, himahleh i zong ding pen uh i Toupa pen a nihna (secondary) in i koih khasek uhi. Toupa a muanna taktak nei a, Amah a kinga zou taktak hilehang i poimohte uh a hunhun a honpe ding hi zaw hi. Eite’n tuate lehbulh in haksatak in niteng khosakna ding i buaipih uh a; i deihbang ua thil hong om louh chiang bang in Toupa Toupa i chisuk zel uhi. Hiai paidan i khek uh a Amah lam nga a, Amah amasa a i koihtheih uh a; i khosakna ding ua nekmuhna dingte a buaina pen poimoh tham mahleh Toupa deihdan in om in Amah zong photphot leng tuate honpe di ahi chi a tua bang a i om ngam uh apoimoh ta hi.  Hiai bang a i om chiang un, ‘kei tangtawn in, khovel tawppha in leng, na kiang uah ka om ding hi’ a chituh eite ading ahi gige ding hi.

Bangziak a Toupa’n A gam leh a diktatna zong masa un hon chi a diam? Khovel athil omte, khovel lawm hihnate leh khovel kipahnate’n mihingte hon zou lua ahihman in, hiaite apat i kiveng uh a Toupa deihlam i zong uh a ngai hi. Himahleh eite’n tua bang ngaihtuahnate neilou in, Amah a i lametnate uh nga tuan lou in khovel nopsakna leh kitaitehnate i delhdelh lai uhi. Kei mimal hinkhua ka ki-et kik chiang inleng, Toupa ka muang zohlouhna ding, muang zou deuh mah keive kaki chihna ding a om thei hi. Maban khosakna ding bang, thil hongtung dingte khong ngaihtuahna ziak bang ahi thei hi. Himahleh Toupa a bangkim i ngak a, Amah deihdan bang a chihte zong a, Amah ah muanna taktak i koih chiang in i lungkhamnate, i thil ngaihtuahte hon zau in bangkim ah Aman honpe ding ahi chihtheihna, khamuanna leh lungkimna a kinei thei hi.

“…A thu theihsakte zuite’n nuam a sa uhi, lungtang tengteng a amah zongte’n. Ka lungtang tengteng in k’on zong a; Aw, na thupiakte ka paisan zaw phal mahmah ken.” – Sam 119:2,10.

Bang chik chiang in lungsim taktak toh Toupa mel zong kahi i kichi ding ua? Bangkim a Amah amasa a koih a, i hih peuhmah ua Amah i phawk zoh gige chiang un i Toupa mel, a ompihna i thei ding uhi. Kumpi David inleng hiai theichian lua ahihziakin hiai bang in ana gen hi, “…Toupa leh a hatna zong unla: a mel zong gige un.” Sam 105:4. Zong un chih ahi kei a, zong ‘gige’ un a chih in a gen chiang mahmah mai hi. A poimoh mahmah kasak ahihleh Toupa i zong theihna ding un Amah theihchet poimoh kasa mahmah hi. Toupa hoihna, a migitna te thei a phawk gige hileng belhtak Pathian ahihdan, muantak Pathian ahihdan i theisemsem ding uhi. Tuate i theihna ding un Laisiangthou a kibulphuh a, a thute sim a tuate theih chihlouh ngal a lampi dang a om tuan kei hi. Laisiangthou ah kik in, a thute sim in thei semsem lehang Toupa mel i muhna ding uh hong om lou theilou ding hi. I hatlouh hun un a thilhihtheihna, hatna te a hon guan zel ding a, kipahtheihna, lungkim theihna leh Amah a muannate i nei semsem ding uhi.

“…Bahte kiang ah thilhitheihna a pia a, hatna himhim neiloute a hatsak hi.” – Isai 40:29

I thukhitna ding a apoimoh penpen tuh thumna tungtawn a Toupa mel zong na ahi. Thumna lou in Khalam ah ka hat e a chi om ding in i gingta kei hi. Thumna neih mun leh neih munlouh a kikhiatna a lian mahmah a, kei mimal inleng ka kithei tuan mahmah hi. Thumna neih haksa sakna, thum tamlouhna i chih hunhun zaw i bahna a om a, ki nunghei a ki etthakna ding om ana hisek hi. Pathian toh ki zopna hoihtak i neih chiang un bel thumna alou theilou ahi gige ding a, a ging a i vathum khiat louh hang un lungsim ah Toupa ompihna i phawk gige ding uhi. Tuni’n tua bang hithei gige ding in kisa in, i Toupa ompihna ngen in, A khut hat muanhuai ah kikem sak in i niteng hunte zang touni. Thil a neu hi’n a lian hileh i hihpeuh ua Toupa Khasiangthou in hon ompih gige ahi chihleng phawk thakthak ni aw.

“Huchi in na min theite’n a honmuang ding ua; nang zaw Toupa, nangmah honzongte na paisan ngei ngal kei hi.” – Sam 9:10.

Toupa’n a thu hon piakte i vek ua Amah mel i muhsemna hong hih theihna ding in hon vualzawlsak leh I thumna ahi a; theihna bukim louh ziak a i  gen khelh omte angaihdamna i ngen hi. Toupa’n simtute hon vualzawl hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)

16th March, 2022 | Weekly-Inspiration No. – 93

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment