KA HONDAMPA’N HON ZONG MUHDAN

0

(Kiphawkdan genkhiakna/testimony)

Mihing simsenlouhte lak ah, kei leng hiai khovel ah kei deihteelna pang hetlou in kana piang hi. “Bangziak a hichituk a genthei leh haksatna thuak di lel a piang kade aw?” chih khawng ka khandawng tuung a ka kingaihtuah theih tuunglai apat a lungsim a dotna hong om mun mahmah khat ahi. Mahni kipomtheih louhna (dinmun leh innsung omdan) leh omzia kitheihlouna in hun sawtpi kana zang hi. Tansia kisa tuam leh iitna leh huaina kitasamtak in kana kiphawk a, zumhuai bang kasak ziak in mi lak a om chih khawng nuam kana sakei sek hi. Kei leh kei kizumpih, ka innkuante le zumpih leh pom thei ngellou kana hi ahi.

Pawl 9 ka kailai a piangthak chu kana hisam hi. Himahleh, pawl 10 bang k’on pass leh, hel bang kong siamta hi. Eng-om leh eng-tat chihbang uthuai k’on sata a lah, phakna chiang (limit) neitak a kikoih kawm in kana gamta lou tuankei hi. Tup leh ngiim a nungzuihna ana omlou ahihziak mahtak leng ahi dia, ka pianthakna bang ka khelhkhak chiang in k’on ginglel zel hi. A thu leh laa in lungtang sukha a, Pathian deihdan a hinkhua zat diing khawng lunggulh a k’on neih chiang in, mu taktak mah kahi kachih hun bang hong om zel hi. Ahialah huai sunggiltak a thathoutak a phawkna hong daih chiang in, ka bahsuk pah zel hi. Tawp thak zel, kipanthak zel in kum tampi kana om nilouh hi.

Kingakna di taktak theilou in, ka ngaihtuahna in ahilouteng leh ahingeilou diteng khawng tawp hun chih omlou in akual in buaipih sek hi. Lungsim pai haat leh pai buai gawp sek ahihziak in ihmutheihlou chih bang naupangchik apat in ka na nei hi. Dotna lah tam, dawnna lah lungtunhuai di mu ngeilou in ka om zel hi. Atawp chiang in, ka ngaihtuahna in sukna di a theihlouh chiang in, kei ka kingoh sek hi. Kei ka kingoh utlouh chiang in Pathian kana ngoh zel a, huchi’n ka ngaihtuahna paikualkual sek a, hinkhua tawlhuaitak mai kana zang toutou hi. Dinmun hoih a ka om hunleng a om zel sam a, huai chiang in, ka ngaihtuahna tawldamhuai deuh zel hi. Himahleh, dinmun nuamlou a ka om chiang in, ka ngaihtuahna adikloulam in pai haat mahmah in ngaihtuahna damtheih huailou takte ka lungsim ah khaam vuallou hileh kilawm in luut zungzung sek hi. A huchih khak vanglak chiang in huaibang ngaihtuahna ah pawtkhiak haksa sa in, beidot luat ziak in sih ka ut thei mahmah sek hi.

Khristian khotang a piang leh khosa ka hihziak mahtak in, banghiam haksatna leh buaina ka neih chiang in Pathian’ lam ka enpah sek sam hi; thil seteng ngoh di bek in. “Hichiphet dia bang dia hiai khovel a hon piangsak nahia?”, “Om taktak nahihleh hong kilaak ve?”, “Pathian kichi chin a, hiaibang haksatna ka thuak poisak inle na neikei”, “Ka hinna lamai ve”, chih khawng leh engtatna khawng in Pathian kana tawngtawng sek hi. Bangmah ka hinkhua a kikhekna omtuanlou, thuum lengle phatuam lou, hon za utlou a ka theih chiang in, “A om taktak loupi khat khawng hi di ahi” chih peuh in ngaihsutna kiptak kana nei sek hi. Keilam a kisuukna leh pan laakna om ngellou a, Pathian in ka hinkhua hong kheksak leh chih ana ut mawkdan ana hi kahi.

Jesu Khrist thu neu apat ana za pan, banah, piangthaksa bang leng hisam inga, hilele kipahna leh khamuanna taktak neithei tuanlou in kana om nilouh hi.

Pasal bang hon nei in, kum 30 bang kong vaal leh, ka hindan ka ning kitel deuhdeuh mawk hi. Huchikawm in Pathian lunggulhna leng lianzaw zel hi’n ka thei hi. A iitna leh a muanhuaidan khawng za zel kawm in, hinkhua lampi omzia neilou ka zui tou zel hi. Amah toh mimal a kitheikha a kizopna neite’n, A iitna a thupidan leh manpha asakdan uleh, hinkhua kikhek zou hial khop in amau lungtang naaktak kheksak ahihdan khawng kiza zelzel hi. Hun hong paizel a, hinkhua haksatna leh gentheihna khat khit khat paltou in ka na om hi. Haksatna tuaklou ki omkei mahleh, kei tuahte uang lua kasak hun tam mahmah a, vangsia kisaktuamna toh, vualphalou leh lamet diing neilou a kitheihna toh, khovel siatnate ziak a thuakna tuamtuam ka tuahte ziak in sih ka ut ngoih ngoih ni khawng om tou zel hi. Milak khawng a om nuam kasa kei a, ka hinkhua a taktak di le banglou kasak hun a tam sek hi.

Ka kingaihtuah tou zel a, Jesu Khrist lunggulhhuai kasakna a lian deuhdeuh mawk hi. Ka buainateng a dawnna Amah ah om di hiveh aw chih theihna khat nei in ka kithei hi. Hilele koi a bangchi va zon a, mimaltak a kizopna neihna dia bangchi pan laak diing chih thei leng ka hituankei hi. Ni khat mangbat leh beidot tawpkhawkna in hon buak a, kithah hial di lah meidiil a lut khaak diing lauh ziak in ngamlouhna khat nei in, aloh ngaihna theilou in, Bible kava sim hi. Huchi in sim teitei kong kisin tou zel a, peihlouh leh theihsiamlouhte thukhat a koih in, ka theihsiamte zuih ka kisin tou zel hi. Haksa ka sa mahmah a, ka phawkna (feelings) le nuam tuanlou, A thu ka zuihna ah le a nuamtuam om inleng kana thei tuankei hi. Hilele, huai ka chih kawmkawm in ka ngaihtuahna leh omdan Bible k’on pansan chiang in, lamdangtak in kei leh kei k’ong kipaakta theita mawk hi. Hichia mahni kipahtat leh kingaih hoihna nei hetlou a kum tampi ana zangta kahihziak in, Pathianthu pansan a ngaihtuahna leh omdan ka heikhiak patna di’n le a kha a sim luut hi. Bible sim sunzom zel in, theihsiamna leng hong pung deuh in ka thei hi. Thuumna ah kibungkhia leh kisuut khe tou zel in, ka thuumna neihdan bang hong kikhek zel hi. Bible sim leh Pathianthu pansan a kei leh kei kisuut kawm a Pathianthu suut chih khawng in kong kibuaisak ta hi. Huai akipat in ka suahtatna di mun lam ah leng Toupa’n hon na pii den ana hidan ahi.
Suakta sa himahleng, thumanglou leh gammang leh khovel khelhnate leh nopsakna khawng a ana pialmangkha thak kana hi ahi.

Huchi’n Toupa’n hon hunkhe nawn a, mimal a kizopna ka hon neithei khong hi. Maizen! Bangchidan a ana haihkha nilouh kade aw! Naak nop in, naak lungmuanhuai in naak kithaman na e! A om taktak mah eivele! Amah toh mimal a kizopna neihtheih taktak mah eivele!
Huchi in, ka muhdan le hong chiang hiai-hiai a, ka theihna leng hong kibawl hoih hiai-hiai hi. Ka khoihkhak, muhtheih leh zaaktheih thil ataktak a omte ataktak mah ahihbang un, Amah leng ataktak mah ahi chih theihchetsak in ka omta hi. Agen sangmah unleng ataktak a kizopna i nei leh zaw, thupi in lamdang  petmah mai ana hi ahi. I hihna teng hon thei inchin, mi kiang a genkhiak ngamlouh i tuahkhak leh khelhnate leh thil zumhuai khenkhat i hihkhakte  khawng le hon thei vek eichu! Ei leh ei i kingaihdam zohlou, ngaih dam tak hilou a kitheihna teng bangleng Aman hon bawl rem a, ngaihdamna hon pia inchin, hon nulmangsak vek mawk hi. Amai ah zaw i hoihlouhna ngen, i nitna ngen kilang dundun mai a, lah hon mohpaih mahmah lou a, a sisan a hon sawpsiang in hon pom hi. Kipahluatziak a khasiatna toh, khelhna ziak a kisiikna toh kipah leh dah bang hong kigawm nak sek hi. I tha teng zoi zot zou diing khop a A iitna leng hon phawksak mawk ahihchiah, a kiang ah kipiakkhiakna kinei mawk hi. “Halleluiah!” chih louh theih ahikei! Gensuk-gentouh, kiphuul suk-touh omlou in, ngaidamna hon pe mawk hi. Banghiamkhat bek ka hihmasak zek di omleh kilawm sa in tawlkhat kana buai hi, himahleh, “om hetlou ahi” hon chi a, mihing mit a muhtheihlouh ka kol buh hon suahkhiaksakta hi. Zang zot mai! Aban awl-awl a thoveng hiaihiai mai! Om didan bang theilou phot in ki omzou hial hi. Muhtheihlouh a lungsim leh kha a ka natna, liamna leh liamna pawnte natawn hong dam hiaihiai mawk hi. Tamaizen! Hichi didan ana hi maw! Hichidan thil omthei maw! Agen uh adik taktak mah eive maw! Agen sang unle thupizaw tham vele! Ana theikhaten agen didan atheihzohlouh man uh hizaw ahihlam bang theihkhia in, ka om heuhou maimah hi. Kipahna taktak ka hon theisiamta a. Omliamluam in, ka phawkkhak ngeilou, iitna bukim k’on phawkta hi. Ka gintat theihlouh leh hitheidia ka koih louh, man neilou iitna leh ngaihdamna ka sang theita hi. Ngaihdamna i chih a petu di ditak pa’n hon piak chiang in, enle mi i pesawn theita hi.

Ka lungtang tawng leh thil ka theihsiamdan leh ka ngaihtuahnate tengteng kipheklek vek ahihman in, chimkhia (undone) in ka kithei hial  hi. Ka hinkhua a khatveina di leh akipatna di’n ka lung a muang thei mawk ta hi. Kipah toh, lamdangsak toh om siamlou in ka om hi.
Huchia hong kituakkha a, mimal a kizopna neita kahihchiang un, akiang a om nuam sak in kasa a, kizui denleh chih khawng uthuai kasa a, Aman le “Hon zui in” hon chi hi. Kipaak petmah in ka zui panta hi. Amah ka thei chian deuhdeuh a, huchi in keile ka kithei chian deuhdeuh hi. Hinkhua kikhek taktak in ka hong omta hi. Ka kingaihsiatnate awlawl in hong bei hiai-hiai hi. Ka lauhna leh ka diipkuatnate leng awlawl in hong veng hiaihiai hi. Amah kei hunkhe dia hong kuan a, kipumpiak zen a hong zongkhia ahihdan khawng tuni tan inleng ka za chim ngeikei hi. Hon tatkhiakna dia, gentheihna chiteng, simmohna, deidanna leh engbawlna chiteng banah, A hinna natan chan hial a hong kipumpiak ahihdan khawng tuni tan in ka zak thak chiang in kipahna mittui luangluang thei lai hi. “Kei kua kahia hichitel lawmlawm a genthei ka de aw?” chi a kingaihsiat ziak a dotna ka neihte a dawnna khatkhat in, hon hilh tou zel hi. Ka hihna tak kithei khia in, Ka Abba Pa’ tanu kahihlam hong kithei khia in, omze nei a siam a om a, omzeneitak a hinkhua zang diing kahihlam bang hong kiphawkkhiak beh zel in ka hinkhua Amah ka zuihpa suun thei di’n a hong kikhek zel hi. “Kareisei! Hiaidan ahih in miteng adi’n le deihsakhuai na e maw!” chihna toh ka omtou zel a, tatna tangthupha leh hon tuntu Pathian thu buaipih pen in k’on neitheita mawk hi.

Ka hihna diktak (Pathian ta) theisiam sem zel in, Amah pahtawina ah hangsanna, A thu tangkoupih a buaina leh Amah deihdan a a hinkhua zang di’n ka zuihpa’n hon pii zel hi. Amah zuihna ah zumna leng ka nei tawm hiai hiai hi.

A nung ka zuihna ah, mihinglam a haksa kasak leh ka kiphin ut hun atam sek hi. Himahleh, mihinglam a ka chan leh ka notsiat thilte kei a dia hoihlou ngen ahizel uhi. Seek in ka omtou zel hi; ka nem leh seek ka nop a, ka khauh leh hon seekna le ana hi. Sisan mantam tak a leikhiak ka hihziak in, kei utdan hilou in, Amah hoihsakdan in hon makaihta hi. Amah ah kipiakkhiak tawmtawm hon sinsak zel a, kei hon neusak deuhdeuh a, Amah ka hinkhua ah lian deuhdeuhta hi. Ka kingaihniamna di leh A Thu ka manna di’n gimthuakna tampitak thuak hon phalsak a, himahleh khawlna tuigei ah leng ahunhun in hon pii zel hi. Ahunhun in tha hon guanzel a, bahse hetlou di’n hon pii zel a, gimthuakna ah leng kipaak dia hon deihbang in hon sinsak zel hi.

Gingtu hinkhua i chih haksatna bei hinkhua hilou hi. Haksatna i tuah chiang ua, i phawkna leh dinmunte a kinga i hih uleh, dinmun hoihlou ah phawkna (feelings) hoihlou zel a, genthei kisakna in kidim sek hi. Dinmun hoihlou i tuah chiang uale Pathian hoihna kikheklou a, ei hoihna di leh Amah lemgeel toh kituak a Amah leh Amah hong kipahtawi diing ahi chih theihna ah kinga le’ng, puuksiat chih omlou hi. Haksatna leh beidot tawpkhawk hun a hon ompihlam leng phawkzoulou leh gingta zoulou a i omlai a leng, ginomtak a hon taisan ngeilou dia kichiam Pathian’ thuchiam theihna a kingak i sin diing uh ahi. Huaibang hun i tuah chiang un, chetna hun ahihlam kihilh in, ginomtak in pang ve ni!

Amah ka Hondampa’ nnasepzohsa ah kinga in, bangteng hong tung in, bangteng tuak mahleng, ka Hondampa ka zui denta dia, nikhat tei ka Pa inn nuam ka tung ngei diing hi.

2 Peter 1:3
Amah thupina leh hoihna ziak a hon sampa, a tanchin theih ziak in a Pathian thilhihtheihna in hinna leh Pathian limsak na lam thu ah thil tengteng a hon pe ngal a.

AMEN!

-Chingngaihlian Tunglut
January 8, 2022/ Nungzui Hinkhua – 24
(Laigelh toh kisai kupbeh nuam omleh, +919892316430 ah laigelhtu thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of our co-founder and our in-house counsellor. She does freelance counselling in church and community. She is also involved as a counsellor at Bombay YMCA Counselling Centre, CBD Belapur, Navi Mumbai.

Leave a Reply

Your email address will not be published.

Book Appointment