Gingtu khat kahi kichi chiat mahlehang i Khalam dinmun uh ki-et chet gige pen thil baihlam ahi het keihi. Khalam a masawn kahi chih bang chi’n i ki theithei uh a? Bang chi bang a i om chiang un Khalam a masawnna leh halhna mu kahi i kichi a? Hiai bang dotna tuh gingtu kichi peuh ading in thil poimoh mahmah a hong suak a, i Hondampa Jesu nung i zuih na ua alou theilou leng ahi chileng genkhial ding i ki gingta keihi. Masawnna chihdi le neilou, om dan ngeingei a om sawm gige, muhkhiat thak, kipahna thak, lametna thak chihte neilou a niteng hinkhua phut khak dandan in a phut khak theih hi. Hichi bang a om nate asia leh ahoihlou pumlum chi i hikei a; himahleh Jesu nungzui khat i hihna uah i om dan ngeingei ua i om det pen un gen hon nei mahmah ding in a gingtak huai hi. Banghiam i mohpuakna uh zoulou deuh i hi ding uam? chih hon ngaihtuah sak mahmah hi. Toupa neimi leh amah toh ton gige theite’n kipahna ding, Toupa hoihna muhbehna chihte niteng hunteng in anei the in a muthei gige uhi. Ei bang ah i om a, i dinmun bang a chih ii ki-etna uh masa hong hi leh i chi hi.
Khovel thilte a i ki-et chiang un neihlelam, gou tuamtuamte i hon neih chiang un i khantouhnate uh theihtheih abaihlam mahmah hi. Mi kiang a va ki gen sese leng ngailou in midang te’n i omdan i khosak dan unleng ahon theithei mai uhi. Hiaite tuh khovel thupina lel a mangthang pah ding te ahi a, va ngaih thupi luat a tuate ka delhdelh khak ding leng thil lauh huai pi leng ahong suak hi. Khalam ah bang chi bang in i khantou uh a chih a poimoh zaw hi. Mi’n ah bang chi’n a hon mu uh a; i omdan, i gamtat dan, i pau dan natan ah bang hon chi muh ding uam? chih te khong i ki-etna ding ua poimoh mahmah ahi. I muhtheih i mihingte mitmuh a om dan kilawm a i om theih kei ung bang chi’n i muhlouh i Pathian mai a hoih leh dik kahi i kichi thei ding ua?
Khalam khantouhna i genchiang in michih i khan dan uh kibang ding ahi chih genchet ahaksa mahmah hi. Laisiangthou i simna apa’n i muhdan in michih khalam a i khandan bang uhleng aki bang ding in a gingtak huai keihi. A ziak ahihleh michih leitung a i hihna bangbang uh, ahoih hi’n asia hileh tua bang a vaihawm a om ding akihihziakin, Khanlam a i masawnna uhleng kibang vek lou ding in a gingtak huai hi.
Jesu’n ankam chi tang khat bang a gentehna tangthu a gen pen in i Khalam dinmun uh, i masawn ding dan uh toh kisai gen a nei mahmah hi. “….Gentehna dang a kiang uah a gen nawn a; “Van gam tuh ankam chi tang khat min a lak a, a lou a a theh bang ahi.” – Matthai 13:31. Khalam khanna, masawnna leng a chih theih hi, tua te thakhat a neih ahi vek kei hial hi. Evangelist Damkhothang thugen khat ka lungsim ah ahong suak den khat a om hi huai tuh, “I piangthak ni pen uh Khalam a i hatlouh ni pen uh ahi” achih leh dik leh hoih kasa mahmah hi. Toupa adia i kimuhkhiatni pen uh i hatni pen uh hiding a lak khak ding bang a kilawm mahmah leng ana hi zel hi. Himahleh hiai ni pen tuh nute gilsung a i piang khiatni apa’n nawitui i tep toh kibang hi’n ka thei hi. Thuthak theih ut semna, lampi dik zong semna, Toupa ngaihna leh Amah toh lou a bangmah hitheilou i hihdan uh aki thei semsem hi. Ankam chii tang neuchik hina pi awlawl a ahong khanlet mah bang in Khalam a Toupa toh i tonkhawmna un awlawl in masawnna a hon pia hi. I Laisiangthou ua Ankam chi tang a kigen tuh tulai a eilam a ankam te toh kibang lou hiding hi. Tua i Laisiangthou a aki gen mun tuamtuam apat i etleh singkung bang hial in a muh theih hi. A chii a neu dan bel eilam ankamte toh leng kibang hiding in a gingta huai a, eilam ankamte leng lian huntawk ahihziakin i Toupa gen nop pen saupi ngaihtuah ngai lou inleng theih abaihlam mahmah hi
Khalam a i masawnnate uh hiai bang in alak theih nawn hi. Niteng a Laisiangthou i sim gige te uh hiam, thumna hun i neih gige te uh hiam leh bang hiam i tupte uh i hih zoh chiang hiam un masawnna dan in alak theih hi. Hiai te tuh adik mah ahi, tua te’n i niteng hunzatna ua a hon panpih baan ah, Toupa toh kinaih semna hon tung ahihziakin. Tuate khen a i gen ut tuh hiai ahi, masawnna dangte tuh haksatna i tuahte uh tungtawn a Toupa i belhna uh; chinlou kisakna i neihte uh tungtawn bang, hiai zaw kei di hilou hiveng aw i kichihna munte tak uh ahi Toupa’n Amah lam a i masawnna ding ua a honpi nate. Nuamtak leh tawldam tak a thil hoih i va sep gige pen uh masawnna ahi pah gige kei a, tua i gente haksatnate khong apa’n in masawnna a thupi zaw hi. I Toupa thil etdan kuaman i genthei kei ding uh, himahleh kei mimal ngaihtuah dan in thil thupi leh manpha pipi i hih zelte uh poimoh lou chihna hilou in, tuate mah sang in haksatna, buaina leh hun haksate i tuahte uh tungtawn in Amah bang i chi muh uh a, Amah toh i ton hia? bang chi’n tuate i mualsuah uh a chihte poimoh ngaih zaw ding in ka gingta hi. A ziak ahihleh haksat hunte ah Toupa ki zong hive aw! Amah deihdan ki zong a, mahni ki-et chetna hun ah ahonpi sek hi. Hiai te’n haksatna tungtawn apa’n kibawl phatna, Toupa deihdan a om na leh Amah deihdan a khosak semna hon tung hi. Hiai te tuh ahi Khalam a masawnna a gah i muh thupi pen uh.
Michih i hih theihna lam chiat uh a om hi, kei zaw hiai lam a hithei deuh kahi i kichihna uh bang aom ding hi. Tua bang a hihtheihna Toupa’n a hon piak bangbang siit neilou a i kizat kang sipsip uh apoimoh mahmah hi. Bang mah hilou kahi, zattak leng hilou kahi chi a i kikoih dapdap pen uh i masawn na ding uh hon daltu khat leng ahong suak sek hi. Hiai bang te ahi Toupa’n Khalam mahmah a i masawnna ding ua ahon zat ut nate. Tuate theisiam in Khalam a tuipai a i om theihna ding un anuam ahaksa ah Toupa aw ngaikhe thei ding in kisa chiat leng i ut mahmah hi.
“….Na hih peuhmah uh, mihing ading bang hihlou in, Toupa ading zaw in kilawp tak in hih un; Toupa a kipan in a itna gouluah ding na mu ding uh chih thei in: Toupa Khrist nasem na hi uhi. Thil diklou hihpan a thil diklou hihman a mu nawn ding hi; mi khentuamna a om ngal kei hi.” – Kolosate 3:23-25.
Toupa’n i thugelhte tungtawn in theihsiamna leh Khamuanna i tanchiat uah hon piak i ngen hi. Khalam a masawn semsem thei ding; A nuam ahaksa a Amah toh tonkhawm thei gige ding simtute Toupa’n hon ompih chiat henla, theihna bukim louh ziak a i gen khelh omte angaihdamna i ngen hi.Toupa’n hon vualzawl hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
22nd February, 2022 | Weekly-Inspiration No. – 90