KISAKTHEIHNA (Part – II)

0

Laisiangthou in, “Pathian in mi kisatheite a dou a, kingaineute hehpihna a penak” a chi hi. – Jakob 4:6b. Kisaktheihna kichi himhim i mihing hihna ua pan i deih telna ua hong suak khia ahi chih i pom masak uh i ut hi.  Bang ziak a Pathian in mi kisatheite dou ade aw chih dotna poimoh mahmah ahi. Pathian a ginna leh lametna neilou a, Pathian leng poimoh lou khop a om a, a thilhihtheihnate uleh a siamnate uh suang a kinga mite chu kisathei mite ahi ut sek uhi. Hiai bang a ngaihtuahna nei mite a ding in Pathian om theih na ding mun atawm mahmah hi. Hichibang mite’n midangte toh kal mahmah ah leng buaina a tung ut mahmah uhi. Midangte ngaihdan leng la theilou in mahni chih louh chih salou in a om belbul uhi. Hichi bang a om mite i hilh zawk ua, hiai bang a om na pen Pathian deihdan hilou ahi chih amaute i theihsak uh gingtute ading in apoimoh hi. Tua bang mite tuh Pathian deihdan a hong kikhek theihna ding ua pan i lak ding uh ei gingtute ading a i mohpuakna uh leng ahi. (Matt 28:18-20). Himahleh midangte ngaihtuahna va thuzawh theih ding tuh thil haksa pi hong hi ahih dan i thei hi. Nasepte 16:14na a i muh bang in, puan sandup zuak numei Lidia toh kisai ahi. Toupa’n Sawltak Paul thugenna tungtawn a hiai numei lungtang a hih vaksakna ahi. Tua numei nu a hong kikhek na pen amah chouh hilou in a innkuanpihte’n  leng baptisma a tan uh chih i mu theilai hi. v15. Hiai a pa’n sinlai i laktheih a i muh tuh midangte lungsim vaksak theitu tuh Toupa vuak ahihdan a chiang mahmah hi. Tua bang ahihlai in gingtute’n leng i mohpuak uh a om hi, huai tuh midangte kiang a Toupa thute hilh sawn tu hi ding, lampi dik a pi tu ding leh Pathian deihdan te sinsaktu i hih uh apoimoh hi. Hiai bang a i mohpuaknate uh ei lam a pa’n sem loupi a tua nu tua pa zaw kisatheilua chi a koihdan khat a i va koih pen uh ei lam leng ki et thak na ding om a hithei hi. Hiamahleh theih dia hoih tuh i mihinpihte ei khek zoh ding khat mahleng a om kei a, amau deihtelna in akinga hi. En i mohpuakna pen uh Toupa deihdan a thuhilhna pen bel i hih ding uh apoimoh leh alou theilou leng ahi. “Pa honsawlpan a hip kei leh kuamah ka kiang ah a hongpai theikei. Ken a hongpai mi nitawpni chiah ka kaithou ding.” – Johan 6:44. Tua nu tua pa hong kikhek theihna ding in ei mahmah in i sinsak a i taihilh hiam, i thuhilh a poimoh hi. Mahni hihna te kimu chian a, kiniamkhiatna toh mi khial ahihdan hong kiphawk chiang in Pathian lam ah ahong kihei theiding hi.

Kiliansak lou kahi, ka theihna chiangchiang a Toupa deihdan a khosa liailiai kahi i kichi maithei hi. Himahleh tunia i kidot ut chuh i lungsim uh bang in a hon luah pen a chih ahi. A poimoh penpen zaw niteng a I hunzatna ua i buaipih pen uh ahi. I nasepna, i office, i inn uh leh i vante un i lungsim a hon luah pen leh chu milim bia (idolatry) i hi zaw uhi. Sepna neite hiam innkuan vakte a ding in hiai te awlmoh theihlouh ahi a chih theihluat hi; bang ziakin i nekmuhna leh i mohpuakna mah hong hi ahihziakin. Hiai tuh i pomsiam hi, himahleh Pathian phawk ding bang a i phawk louh uh a poi mahmah hi. Hiai pen kiletsakna leh kisaktheihlouhna hilou a hi i chi ut kei hia leh? I hunte uh ahilou lou in i zang sek uh a, mahni hamphatna ding leh utna munte tung zou thei zel te i hi uhi. Hiai bang thilte a hun nei a, hohna ding thildangte a ngap lou pipi a leng hoh ut teitei te i hi uhi. Tua bang a om theite i hih lai un, Biakna hi’n Pathian adia phatuam ding te ah, ahihkeileh midangte toh Pathian min a kipolh khawmna munte leh thil dangdang te ah hileh tuate awlmohna taktak i nei mahmah kei uhi. Bang i gen sek ua le? Awle tuni zaw kangap dahni, ka omle anuam kei a; kalnawn hiam, hun dang le hong om tou ding hi i chihsek uhi. Awle theihsiam huai e! Chihleh i office nate uah, i thil utte uleh i thil awlmohna munte uah hiai bang in bangzah vei i chi ta ua? Toupa adia kizattheihna ding munte ah, Amah biakna ding munte ah ngap lou pipi leh alou theilou ahi chi’n bangzah vei i kisa kheta a? I dinmunte uleh i om dante uh kingaihtuah leng Pathian sang a thildangte koih sang zaw, thildangte’n i lungsim uh hon luah zaw ahi chilou thei ding i diam? Ahi hi in genleng i hamphatna ding uleh nuam leh kipak a i omtheihna dingte uh i be ut zaw uhi. Hiai te kisaktheihna chilou ding mah i hidi uam? Toupa deihdan a om lua kahi i kichi lai ding uam leh? Khovel thilte sang in Pathian mah amasa in koih theih hileng zaw i taksapte uh (kei hiai laigelhtu in i muhtheih uh i van neihte uh ka chi sese kei hi) lungsim chidamna, Khalam leh salam a kipahna leh lungkim theihnate hon pe zaw ding hi. A gam leh a diktatna zong masa un, huchi in huai tengteng a honpiak behlap ding hi. “…A gam leh a diktatna zong masa un, huchi in huai tengteng a honpiak behlap ding hi.” – Matthai 6:33.

Kisaktheihna i genchiang in midangte lohchinnate hiam, bang hiam a hihnate uh va kisaktheihpih a va kipahpih a poi ahi zenzen keihi. Himahleh mahni hihnate tawi sang lua a, siamna leh pilnate kia va buaipih luatna pen Toupa i biakna uleh Amah toh i kizopna uh a daal tu ahong suak sek hi. Kuamah a bukim ki omlou ahihziakin hiai bang a va om khakna mun a om thei hi; himahleh deihteelna piak a i om bang un hiai zaw hilou deuh ahi chihtheihna hunte a va om teitei pen hih khelhna lianpi, Pathian deihlouh dan leh i hinkhua ua poi mahmah ahong hi zaw ding hi. “…Kisaktheihna siatna ma ah a pai a, huan lungsim kiuangsak pukna ma ah.” – Paunakte 16:18. Hiai ah bang i mu a i chihleh siatna om ma a kisaktheihna om ahihdan i mu hi. Tua mah bang in pukna om ma in lungsim ki-ot sakna a om masa zaw hi. Hiai apa’n sinlai i lak ut ahihleh tuni’n eite tuh tua bang hilou a Pathian mai a kiniamkhiak tu leh Amah mah lungsim a koih tu hi thei gige hileng i ut hi.

I thukhitna hiding in Pathian in kisaktheihna lungsim nei mite hua ahihdan Laisiangthou mun bangzah hiam a i muh zoh omte i sim lai ding. “…Huan, khovel a gitlouhna ziak in ka gawt ding a, migilou saloute a thulimlouhna ziak un ka gawt sam ding. Mi kisathei paukhauh lah ka tawpsak ding a, mi kihtakhuai kisaktheihna lah ka niamsak lai ding hi.” – Isai 13:11.

“….Mihing kideihnate hihniam in a om ding a, mite kisaktheihna niamsak in a om ding. Huaini in Toupa kia tawisang in a om ding.” – Isai 2:17.

Kisaktheihna om chiang in kei kahi ki chihtheihna mun atam mahmah mai a, pilvang na ding atam hi. I Laisiangthou changteel masa a i sim uh Jakob 4:6na sim thak leng, Pathian in mi kisatheite a dou a, kingaineute hehpihna a penak hi. I thugelhna tungtawn a pa’n i deih pen tuh kisaktheihna apa’n kiniamkhiatna ahi. I niteng hunzatna uah, midangte toh i kisai khakna hunte uah kei kahi kichih utna, kisaktheihna neih khak abaih lam mahmah hi. Toupa’n a hon sinsak mah bang a kiniamkhiatna toh ei sang a midangte hoihsa zaw ding a i om theih uh apoimoh hi. “Kikhenna ding leh kithupisakna ziak in bangmah hih kei un; lungsim niamlak in michih in amah sang in midang hoihsa zaw hen.” – Philippite 2:3. Tua bang mite hithei chiat ding in Toupa’n hiai Amah thu mahmah sim khapeuh mah hon ompih in hon vualzawl chiat hen.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

04th May, 2022 | Weekly-Inspiration – 97

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment