KISAKTHEIHNA

0

“A omkhinsa a hongom ding ahi a; hihkhitsa hih a om ding ahi a; huchi in ni nuai ah thil thak a omkei hi.” – Eklijiasti 1:9. Solomon in kum tampi paisa a hiai ana gen bang in Kisaktheihna kichi tuh thilthak hiam, tunai zek a hong om ahi keihi. Kisaktheihna chih thumal i genkhak chiang in gendan tuamtuam leh ngaihdan tuamtuam a om thei hi. Tuate tuh Ki-otsakna, kiletsakna, mahni thu kia diksaknate, mahni kingaihsangna leh kipoimohngaihna, midangte sanga  sang zaw a kikoihna chihte leng a kivek hi. Teltak a thilsui khenkhat te’n hiai bang a omnate gendan tuam ana nei uhi, tua tuh sappau ah Narcissism a kichi a, eipau a i letsawm chiang in ‘eimah lim hoihsa a etlahna’ chileng adik pen ding hi. Hiai in mihingte mahni a i kihoih sakdan uh a hon gen chiang mahmah mai hi.

“Toupa’n a muhdah thil guk a om a; ahi, amah adia kihhuai sagih a om hi: Mit ki uangsakte, lei zuauthei, mi hoih sisan suah khutte; Ngaihtuahna gilou ngaihtuah lungtang, siatna hih ding a kintaite; Zuau thugen palai taklou, leh unaute lak a kilemlouhna tuh.” – Paunakte 6:16-19. Hiai a Toupa’ adia kihhuai sagihte lak a amasa pen ah ‘Mit ki uangsakte’ a hon chipah hi. Gendan dang in genleng kisaktheihna, kithupisakna chihte a tung a i gente ngen ahong hi pah hi. Adangte le gendi tampi om mahleh tunia i gen utpen tuh hiai kisaktheihna ahi. Himahleh hiai thute i sim kawmkawm in adangte lungsim a phawk khawm ding in i ki ngen hi. Tuate tuh ‘lei zuauthei, mi hoih sisan suah khutte; Ngaihtuahna gilou ngaihtuah lungtang, siatna hih ding a kintaite; Zuau thugen palai taklou, leh unaute lak a kilemlouhna chihte’ ahi.

Hiai bang thilte a pan suahtak theihna, kiven theihna ding a poimoh pen leh galvan hoih penpen tuh Toupa thu, Laisiangthou simtam a theihtam leh hinkhiat pihna ahi. Toupa’n a muhdahte leh Amah adia kihhuai hihte a koih maimai keiding chihtuh a chiangsa ahi. Tu-le-tu in a gah munai keimahlehang denciang a i hih bangbang Toupa mai a i sel zohding uh khatmah leng a om keihi.

“Toupa kihtak a gilou huat ding ahi; kisaktheihna leh, ki-otsakna, gilou lampi leh kam hoihlou, ka hua hi.” – Paunakte 8:13. Hiai a ‘Toupa kihtakna’ kichi theisiam kihileh eite’n leng kisaktheihnate leh, ki-otsaknate i hawding ua, hiai bang lampite ah i kibual kei ding uh chihna a hong hipah hi. Toupa lauhna taktak hong om chiang in kisaktheih nak sang in mahni dinmun kitheihna, kitheihtelna i nei ding ua, kithupisakna ding a omlouhdan chihte theih semsemna nei ding uhi. Tuni’n bang dinmun ah i om kha a chihte i ki-etna uh hong hi nawn leh i chi ahi. Kuamah hoih bukim omlou ding mah ahi, himahleh Toupa ompihna toh hiai bang dinmun a om theihnate apan suahtak theihna, mualsuahtheihna i nei gige uhi, huai lampi tuh Amah phawk gige a Amah deihdan a khosakna ahong hi zaw hi. Sawltak Paul in Galatiate kiang a Puakgik kidawntuah un chi a lai a khak bang in, mi kuapeuh a omdan lek lua hiam, diklou ahi chih i theihleh ei khamite’n amaute nunnemtak a i tundiing uh i mohpuak uh ahi. Hiai bang hilou a midangte koihdan nei a, mahni kia kibuaipih leh kidiksak i hih lebel i dinmun adiklou om ahong hi zaw ding hi. “Mi bangmah hilou napi a milian kuam a akikoih leh, amah leh amah kikhem tawm lel ahi. Michih in amah thilhih enchian zaw hen, huchi in mi dang toh kiteh lou in; amah tung mah ah suan diing anei ding hi.” – Galatiate 6:4.

Romte ah leng hiai bang in i munawn hi, “…Ngaihtuah kibang in omchiat un, kingaihtuah sang lawkei unla, mi neuneu kithuahpih zaw un. Kipilsak kei un.” – Romte 12:16.  A tung a Sawltak Paul in Galatiate kiang a gen toh tua hiai Romte a i muhte ah lunggel leng, mitengteng tung a hiai kingaihtuah sangnate, kiletsaknate tung thei ahi chih a chiang huntawk mahmah hi. Kum tampi Khristian inkuan a ana khosak i hihziak ua hiai bang thilte neithei lou ding i hi uh chih ahikei hi. Bang hun peuh in hiai bang kingaihsangnate, leh kiletsaknate i neithei gige uhi. Bang chi bang a hiaite mualsuah thei mawk ding i hi ua? chihtuh i lungsim ua i kidotna uh hong hileh i chi nawn hi. A dawngna dik khatkhia a om a huaituh i Laisiangthou uh simtam ahi. Toupa thumang kichi a, Amah a kahi kichichi mahlehang leng Laisiangthou sim ngei mahmah loute i hih leh zaw, bang chi bang in ki Kha misak in, thilhoih hih kahi kichi hilengle i ngaihtuahnate leh Toupa toh i kipolhnate gamla mahmah thei hi. Laisiangthou i chih Toupa toh tangtak a i ki hou theihna uh ahi chih phawk thak mahmah leng i ut hi. Toupa toh hun zang khawm ngeilou, hunpe manlou i hih lebel a tung a i gengente Toupa kih leh a huatte toh hing khawmkhawm i hithei hi. Sawltak Paul inleng hiai bang thu ana hilhkhawl khin hi. “…gul in a zuau pil a Evi a khem bang in, Khrist lam a takna leh siangthouna a kipan bangchi hiam in na lungsim uh a hihse kha ding, chih ka lauthawng hi “ – 2 Korinthte 11:3. Kiveng na ding a om a, tua kiveng na galvan hoih pen tuh i Laisiangthou ahi. Michih in hoihna khat kinei chiat mah leh Laisiangthou sim tamlou mite i hihleh maw denchiang in Setan sal ah i awk baih mahmah ding uhi. Tuate i mualsuahna ding uleh tua bang lampi i totkhak dek chiang ua lampi dik ahonpi thei ding zaw Laisiangthou mah simtam leh theihtam a hinkhiat pihna ahi.

“Na lak uah kuamah na kilet sak ding hun val ua kiliansak lou in, Pathian in michih kiang a ginna hun a piak bangzel a diktak a ngaihtuah zaw ding in Pathian in honpiak hehpihna ziak in k’on chi chiat ahi. Sapum khat ah hiang tampi i nei ua, hiang tengteng nasep bel a kibang kei hi, huchi mah bang in, eite tampi himah lehang Khrist ah sapum khat ihi ua: a tuamtuam in i ki hiangtuah chiat uhi.” – Romte 12:3-5.

Endih, ei (nang leh kei) i hihlouh dan uh maw, Toupa itna midangte kiang a i lah ding uh i mohpuakna uh ahong hi zaw hi. Kei/Nang chihte hongtam luat chiang in i mihing hihnate’n dinmun aluah baih ut mahmah a, tuate’n i theihlouh kal un mahni kiletsakna, a dinmun sang a kikoihnate hon tung sek hi. Toupa a kinga mi leh Amah tate i hi i ki chihtheihna, a chetna tuh Amah deih bang a hinkhiatna, huaituh Kha a omna ahi. “Kha a hing i hihleh kha mah ah i om ding uhi. Kitoutuah chiat a, kihaza chiat in, i ki koihlian kei ding uhi.” – Galatiate 5:25.

Thukhitna leh Kingaihtuahna:

Pathian in michih talent tuamtuam in ahon vuk a, tuate michih in i neih uh akibang vek keihi. Himahleh hiai bang talent tuamtuam i dongte uh bang chibang in Toupa’ min thupi na ding i zang a chihtuh apoimoh pen ahi. Etsakna khat genleng, hiai Weekly Inspiration kigelh khethei zelte Toupa ompihna ziak ahi i chilou theikei hi. Hiai bang ahihlai’n kei apat hong suak ahi chi in, keimah minhoihna midang apan phatnate, thugelh hoihlua chihte aki dong chiang in Toupa ka phat hia, Amah kiang kipahthu kagen hia! Toupa phat in om hen kachi zel hia! Ahihkeileh, kei kilian muh a, midangte hon muhdan omta di chi a Toupa phawkna nei lolou a om kahi zaw hia chihtuh ngaihtuahna leh etsakna ahong hiding hi. Hiai bang in nang leh kei Toupa’n hihtheihna hon piakte laisiamnate hi’n lohchinna tuamtuam i dongte ua Toupa’n bang dinmun aluah kha diam, eimah kikoihsangna dia zang zaw i diam chihte i kingaihtuahna uh hong hileh i chi hi. Bangkim i muh uleh i dongte uh Toupa apan ahi chih phawk in, kipahthu gen dan leng kisin mahmah leng i chilai ahi, khovel pai dandan a thilteng ahidi mah bang a ngaih a lak khak ding a lauh huai mahmah hi. Siamna leh pilna i dongte uh ei apa’n hi lou ahihdan phawk thakthak in hon Siamtu, Honpetu leh Honhihsak tu om ahi chih mangngilh mahmah keini.

Atawp pen in, Kisaktheihna leh kiletsaknate mitampite tung ah om mahleh Pathian tate kiang ah hiaite’n dinmun aneithei keihi. Tua bang mite hithei ding in Nang leh kei i hihna i dinmun uh ki-en in Pathian deihdan anungta ding leh hingkhe ding in kisa ni.

“….Hichibang itna mah nei unla, tup kibang leh lungsim khat nei in ka kipahna hon hihkim sakun. 3Kikhenna ding leh kithupisakna ziak in bangmah hih kei un; lungsim niamlak in michih in amah sang in midang hoihsa zaw hen. 4Na lak ua kuapeuh in amah ading kia enlou in, midang a leng en sam hen.” – Philippite 2:2-4.

Toupa’n i thugelhte tungtawn in theihsiamna leh Khamuanna i tanchiat uah hon pia henla, theihna bukim louh ziak a i gelh khelh omte a ngaihdamna i ngen hi.

– Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

26th January, 2022 | Weekly-Inspiration No. – 86

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment