KISIKNA

Tamtak te’n kisikna kichi thumal a kigen khak chiang in lungnoplouhna ding om bang mai in nuam lou sakna i neithei mawk uhi. Bang ziak a hiai thumal ngaihtuah mai ale nuam lou sakna neithei i hidi uam chih i etchiang in kisikna ding, huai tuh ki bawl phatna ding omte a ki bawl pha utlou; kisik ut taktak lou chihna a hong hisek hi. Bang chik khong a hi dia i kisik nanung penpen uh chih i kidotna masa uh hong hihen la, bangziak a kisikna poimoh hi hiam chihte saulou in i en ding.

Mihingte hinkhua ka ngaihsut chiang in inn step a kal toh ki bang mai in, a sang lam manoh a kal kisuang toutou toh ki bang kasa hi. Pathian deih dan a khosa ding a niteng hun i zatna uah hiai hih ding hiai hih louh ding chih leh i hinna ua dia hoih leh hoihlou ding lunggelna toh i om den uhi. I manohna lam uh Toupa deihdan a omna (siangthouna) pen i phawk gige louh chiang un, khovel thupina leh nopsakna te’n i vei lam hiam leh i taklam hiam ah a hon hip mahmah mai hi.  Hiai te a i va om khak chiang un i malam uh suang nawn lou in i khawl khasek uhi. Hiai in khelhna tuamtuam a pukna hon tung a, Pathian toh hon ki gamla sak deuhdeuh hi. Matthai 4 na a i Hondampa Jesu’n Galili gam a nasep apatna i et leh “….Kisik un! Vangam a naita chi’n thu a genta hi.” v17 chih i mupah hi. Bang ziak a kisik mawk ding i hi di uo aw chi’a iki ngaihtuah chiang un, i kisikna ding uh ngaihtuah sau ngai hetlou in i hihna uh i kithei chiat uhi. Kisikna kichi khelhna thupitak i va hih khak ziak a kisikna neih chih vuak ahi zenzen kei; ngaihtuahna mai ale Pathian deihlouh dan i suangtuah uh tamtak a om sek hi. Hiai te chu khelhna maimai ahi chi’a ngaizam tak a i koih sek te uh ahi. Hiai bang te khelhna thupitak bang a ngailou leh kibawl hoih ding ahi chih lel le ngaihtuah banlou a i om ding uh thil lauh huai tak a hong suak hi. Suangtuahna hoihlou (lust) ngaihtuahna tuh midang in hon theihpih leng ahi kei a, ei leh Pathian kal ahihziakin Amah deihdan ahi na hia ka ngaihtuahte chi a i kivel gige a poimoh hi. Muhtheih a i gamtat leh om dante uah kisikna ding om in i theithei hia chih ki et gige uh apoimoh hi. Ka kisiklua chi a kap zen hiam, po na tuntun a om a midangte hon theihpih a poimoh pen ahi kei a Toupa a i muanna a, Amah eite a dia hong sihna pen gingta a angaihdamna i nget ua, kisikna tungtawn a i kibawl hoih ding uh a poimoh pen a hong hi zaw hi. Kisikna kichi tuh etdan dang ah enleng lungsim khekna, Toupa deihdan a omna leng a chih theih hi.

‍I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi. Thil ka hihkhial kei i chih leh amah zuauthei in i bawl ua, a thu leng eimau ah a omkei hi. – I Johan 1:9-10.

Huaiziak in na pukna laitak theigige inla, kisik in, na thilhih masapente hih nawn in; huchilou in zaw na kiang ah ka hongpai dia, na kisik kei leh a omna kipan in na tuikuang koihna ka suan ding hi. – Kilakna 2:5.

Gingtute a ding a kisikna ding hong om theih i chi hiam, hiai bang kisik theihna ding hon bawl sak Toupa thilthawn piak thupi tak ahi chih phawk thak mahmah leng i ut hi. Kisikna om lou hi zenzen leh mihingte bang zah ta in khelhna ah i puk ding ua chih hon ngaihtuah sak mahmah hi. Toupa deihdan a kisik thei ding a i omna uh pen kipahthu gengen zawk ding in a hoih hi. Laisiangthou ah kisikna kichi thumal sawmguk val bang kimu thei hi’n Laisiangthou sut mite’n agen uh a, hiai in kisikna poimoh ahih dan hon gen uang mahmah hi. Kisik ding chih pen thil hoih lou va hih kha sese hi keimahlehang kisikna lungphut neih gige in mikhial i hih dan uh hon phawk sak thakthak a hiai in niteng a Toupa ompihna ngetna hon tung zaw hi. Tua in siangthouna, Amah deih dan a om na leh Amah batpih semsemna a hon tung toutou hi.

Kisikna ding leng mu mengmeng theilou i chih zaw i mihing hihna uh a hong lian zaw khanak a ahi. Hiai tuh kiletsakna chi khat leng a hong hi a; hiai te’n Pathian toh i om khawm ding bang tak un a hon om sak kei lai hi. Kingaihniamna tuh gingtu dik tak a ding in a poimoh mahmah a, mahni hihnate ki theihtheih louhna pen thil diklou a hong hi ut mahmah hi. Jakob 4:6 na a i muh mah bang in, Pathian in mi kisatheite a dou a, kingaineute hehpihna a penak hi. Tua ahihziakin kisikna dingte a kisik pahpah ni chi ut i hi. I hih nate uh kithei gige leng hiai te’n kingaihniamna leh kithupi sakna ding neilou i hih dan uh hon sinsak ding hi. A bul a i gen mah bang in kisikna kichi thumal tuh zumhuai lua hiam, vuallelh huai abatna om a bang hi. Himahleh tua bang ana hi zenzen kei a, a diak in gingtute adia thil poimoh mahmah a hong hi zaw hi. Kisikna in Setan sal a pa’n suahtakna, khelhna tuamtuam apa’n kibawl hoih na hon tung hi. I dou ding uh khelhna tuamtuam leh Pathian a pa’n hon gamla sak thei ding tampi niteng a i maituah uh om ahih dan phawk thak leng i deih mahmah hi.

“Huchi in Pathian thuthu in om un; himahleh Diabol dou un, a hon taimangsan ding hi. 8Pathian naih unla, aman a honnaih ding. Khialte aw, na khut uh silsiang un: lungsim bulbal neiloute aw, na lungtang uh hihsiangthou un. Haksa sa unla, lungkham unla, kapkhia un; na nuih uh kahna suak henla, na kipah uh lungkhamna suak hen. Toupa mitmuh in kingaineu un, huchi in a hon hihlian ding hi.” – Jakob 4:7-10.

Kisikna ding neilou a khelhna i va hih sek chiang un tua in melma nasepna hon hatsak sem in, khelh semsem na a hon tunlai hi. Laisiangthou ah hi chi’n i muthei hi, “Thil hihkhialmi Diabol a pawt ahi; Diabol in a tung a kipan thil a hihkhial hi. Pathian Tapa honglat napen Diabol nasepte a hih manthat theihna ding in ahi.” – I Johan 3:8. Tuni a eite kisik theilai dia hinna damna honpe lai Toupa kiang ah kipahthu gen in, i kisikna ding uh omte ah kisik in ki bawl pha chiat theileng i deih mahmah hi. Huaiziak in na khelhna te uh thaimangna ding in kisik unla, kihei nawn un, huchi in Toupa apat halh hun hongtung ding hi.” – Nasepte 3:19.  Kisiklou pi a niteng hinkhua hicia zangzang i hih leh bel Toupa apa’n panpihna i muhtheihna ding om lou suak hi. Laisiangthou in Khelhna man sihna ahi ngal a (Romete 6:23) a chih banah, k’on hilh ahi, nou leng na kisik kei uleh huchi mah bang in na mangthang vek ding uhi (Luke 13:3) achi hi. Tuni’n i hih nate uh ki-en in, bang dinmun ah i om a chihte kivel chiat leng i deih hi. Kisikna toh Toupa kiang zuan lehang tua in khovel khelhnate apa’n suahtakna hon pe ding a, Toupa deih dan a niteng a khosakna hon tung ding hi. “Pathian deihlama lungkhamna in hotdamna ding in, kisikna a bawl a, kisikhuai thil a tun kei; khovel lungkhamna in bel sihna a tunzaw hi.” – 2 Kor. 7:10.

Tangtawn hinna kichi i damlai a Toupa hongpai ni hiam, ahihkeileh i sihnung a Toupa hongpai ni a kipan hilou in, tu hun a kipan ahi chih thei in tunia kisikna ding i neihte uah kisikin hangsantakin Toupa kiang zuan ni. Niteng hun i zatnate uah Amah toh ton gige in, i hih khempeuhte uah Amah toh ton gige ni. Toupa toh i kinaih semna ding ua hon dal thei thil i hih khak uh bangbang a om a chih ki dong chiat in, tuate kisik a ngaihdam ngen in Amah kiang i zuan diam chih i thukhitna ahi. Toupa’n simtute a thute tungtawn in hon houpih in hon ompih chiat hen.

Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen ahi.

Toupa’n thupina tengteng tangta hen!

  • Thangginom Hanghsing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

1st June, 2022 | Weekly-Inspiration – 101

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a comment

Your email address will not be published.