Laisiangthou Ah Kik Nawn Ni

0

Pathian in Amah kibat pih a asiam mihingte thilteng a hon vualzawl ut ahih chih zuau lou hi. Himahleh hiai vualzawlna i dong te uh lam chi tuamtuam ahi a, mihingte’n hiaite thei phaban lou dekdek in Pathian vualzawlna ahihlam leng i phawk kha mengmeng kei sek uhi. Pathian hoihna, a hon vualzawlnate bang adia aw chi’n tawmchik sung ngaihtuahna pia hileng le, thil tampi i muh theih banah, i ngaihtuah khiat ding a beithei kei ding hi. Naupang chik i hih hun a i khotheih a pat tuni tan hinkhua i zatsa te uh ngaihtuah kik maimai inleng Pathian ompihna tamtak i phawk thakthak hong om ding a, Amah ziak a hichi tan leh tua bang a ki om ahi maw chih phawk thakthak ding a om nilouh ding hi. Pathian hon khotuahnate i hinkhua mahmah ua suttheih ding leh theihtheih ding tampi a hong omlai in i phawk gige theihlouh uh lah a manpha penpen, kipahthugenna ding a om gige hi. Tua tuh a tapa Jesu Khrist tungtawn a a Ngaihdamna, Hotdam a i omtheihna uleh Tangtawn hinna i neih theih na uh ahi. Hiaite mahmah ahi gingtute’n i niteng khosakna ua i phawk gige ding uh. Himahleh hih bukim a ki om nailou ahihziakin hiaite hunteng a phawk zou gige ding i hi uh chih bel i genthei kei a himahleh hiaite phawk theih gige na ding alampi om den ahih dan theichian sem mahmah leng i ut hi. Amah phawk lou a om theimawk kahi i kichih leh zuau gen bang lel i hi zaw ding hi. Amah i phawk ut kei a; Amah deihdan in i om ut kei a chih a hong hizaw ding hi.

Laisiangthou a Romte laibu ah leng chiang takin i muthei hi. “….Khovel siamtung a kipan a pianken muhtheihlouh, a tangtawn thilhihtheihna leh a Pathianna, thilsiamte ah chiantak a muhtheih ahi; huaiziak in paulam ding a neikei uhi.” – Romte1:20.

Khovel a mi hiai zah tak a omlai a ei gingtute i hamphatna mahmah utuh Laisiangthou thu, Pathian thu a bul apa’n atawptan dong theihtheihna i neihtheihna uh ahi. Khatveivei hiai bang a Pathian a ginna neite, Amah a lam-etna neite i hi uh kichichi mahlehang i omdante uleh i khosak dante uh ginglou mite omdan toh aki batlouhna ding om lou khop in om thei uhi.  Bangziak a hichi bang a mi omdan leh khosak dante a om thei i hi di uam chihleng, a ziak tuh Laisiangthoute i sim ut kei ua, Pathian deihdan in i om ut taktak naikei ua hi pen ding hi.

Pathian a muanna leh ginna neite ading in Laisiangthou sim a poimoh leh alou theilou ahi chih a chian huntawk hi. Laisiangthou va haisim zualzual ding chihna bel ahikei a, himahleh ngaplou sasa a i va sim hun inleng theihsiamna thak, kipahna thak leh lungnopna a hon tung sek hi. Hichi’n genleng, Laisiangthou i simtam ziak lel hilou in, i va sim teiteina te’n muhkhiatthak ding goupmanpha a honpia hi. Bangziakin? Pathian Thu hing, a Siangthou leh Hinna bu ahihziakin tua te’n lungsim chidamna, tawldamna a honpia semsem hi. Hiaite ana chiam khanailou hiam, ahihkeileh ana chiam khata hilele Laisiangthou sim ana khawl kha zel i hihleh kisa thak in, panla thak mahmah leng i ki deihsak mahmah hi. Pathian apat lungnopna leh kipahna i kipiak sawn theihna uh alampi khatvuak a om a tuatuh Laisiangthou thu ahi; khovel ah kipahna ding, lungnopna ding leh nopsaknate zong sek mahlehang Pathian thu, Laisiangthou lou in zaw lungnopna leh kipahna taktak a om theikei ding hi.

Mihingte nuntakna sut taktak hileng Pathian in Amah deihdan a i om theihna ding ua lampi hon gel saksak ahihdan amuh theih hi. Keimah hinkhua apat inleng hiai bang a honpi na kamuh a om gige hi, khelh utna te, Amah deihlou a om theihna hunte ah lampi dang, kei lamet louhna ah ahonpi in ahon hem khezel hi.  Hiaite tungtawn in Pathian in Amah deihdan a om dia hon samsam ahihdan ka chian mahmah hi. Mitengteng in hiai sapna tang vek i hi uh chih i kitheih siamsak uh a poimoh mahmah hi. Hiai sapna pen michih a ki bang hetkei ding a, himahleh Pathian in honpi dan a om gige hi. A siangsiang a gen hileng mihingte zaw Pathian ngai a maumau i hi uh a, Amah ngai a Amah deihdan a om ding a ki sasa hihang. Himahleh khovel nopsaknate leh khelhnate i kihip sak zaw uh a, Pathian belh ding bangtan in i bel zou kei uhi. Hiai te ziak mah a Pathian lam a kihel a, Amah mah bangkim a i koihtheihna ding ua Laisiangthou thu mah theih a tuate sim hong poimoh gige hi.

A thukhitnan ding in hiai anuai a Laisiangthou thu hoihtak a ngaihtuahin i theihsiam kei lehleng sim thakthak ding in i kingen hi.

“….I omna lei a puanin pen hihsiat in om mahleh van ah inn, khut a lamlouh, tangtawn a om ding, Pathian a kipan inn kip i nei uh chih i thei uhi. Van a kipan i omna ding silhthuah ut mahmah in hiai puanin ah thum chihtak in i thum gige uhi. Huchibang a silh in omleng vuaktang in i omkei ding uhi. Eite hiai puanin a i omsung in gikpua in thum petmah in i thum ngal ua, silhlou a om i ut ziak ahi kei a, silhthuah a om i ut ziak ahizaw, sithei pen hinna valh zoha a om theihna ding in. Huan huai mahmah ding a hon sutuahpa khamna Kha hon pepa Pathian ahi. Huchi in pumpi a i omlai teng in Toupa kiang ah i omkei chih thei in, muangtakin i om gige uhi. Muthei a pailou in, ginna in i paizaw zel uhi. Muangtakin i om, huan pumpi a omlou a Toupa kiang a om i utzaw hi. Huaiziak in om in, om keileng, amah kipahpih lam mi hih i tum chinten ahi. Michih in sapum a thilhihte a sia a pha in, i hih bangbang a i muhchiat theihna ding in, Khrist thukhenna tutphah ma ah hihlat in i omvek ding uhi.” – 2 Korinthte 5:1-10.

Tuni a hiai thu kigelhte simkha na hihleh a mawk a sim kha hilou in Pathian in nang leh kei a hon muh thak sak ut leh hon theihsak om hi zaw ding hi. Hiai thute mihing apat suak hilou in Pathian in poimoh asak ziak a hiai bang a hon gelh khesak ahihziakin a gelhtu leh asimtute adia manphatna tampi hong om ding in i gingta tinten hi. Hiai te tungtawn in Pathian in hon om pih gige ahihdan, bangkim a hon khotuah ut ahihdan theisiam thak semsem in, Amah toh kigamla tak a ana vakmang kha i hihlehleng kisa thak in panla thakni. Denchiang mahmah a Khrist thukhenna tutphah ma a vaihawm a om ding i hihziakin i hinnate ki-en chian in Toupa toh kinaitak leh Amah tuak ding in mansa in omni.

Toupa Pathian in a thute i sim khiatte uh tungawn in hon vualzawl in hon ompih semsem hen!

Amen!

Theihna bukim louh ziak a i  gelh khelh omte i Toupa ngaihdamna i ngen hi. Bangkim Aman thupina tengteng tang hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing) 7th September, 2022 | Weekly-Inspiration – 109)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment