Khovot hun lam a hong tun chiang in i nek-le-dawnte a sat vit-vit leh lim le lim diak eive maw? Nek-le-dawn himhim a kho omdan toh kituaktak khawng a a-om chiang in i lung leng taisak mahmah hi. Nek-le-dawn lim taktakte tungtawn a nuamna mu a, salam natawm a Toupa’n i kipahna di uh hon bawlsak ahihdan phawk utte adi’n Pathian tung ah kipahna kibehlap diing hi. Kholum hiamhuam, a huih lah gik a gik ek-uk khawng a singpi lum pelhpulh dawn sang a dawnlouh ut zaw bang mi ki tam sim di’n ka gingta hi. Tangmai bang, a vot dikdek a kholum lai a nek chu tawldam huai zezen maw? Huchi lou a nisa in a haisa, lumsim pelhpulh nek khak bang a noplouhdan leh a limlouhdan thei hunkhop i om diing un ka gingta hi. Lum lah lum lou, vot lah vot lou nek khawng a noplouhdan leh a limlouhdan kithei vek hiven maw?
I Toupa’n, Laisiangthou ah tehkhinna dia a zat himhimte i theihsiamsa thilte ahi chih ka ngaihtuah khaak teng in kipahhuai ka sa gigehi.
Kilaakna 3:16 ah, Toupa Jesu Khris in hichi’n ana chi hi, “Lum lah lum lou, vot lah vot lou a, na om pelhpulh ziak in, ka kam a kipan in k’on se khe ding.”
Hiai a i changteel, Toupa Jesu Khrist in Laodisia saptuamte kiang a A laikhaak a pat ki eukhia ahi. I theihsiamdan in Laodisia saptuamte ahihleh, khivellam ah khosakna nuam mahmah leh hithei mahmah hi diing un kilang hi. Pathian’ min a Saptuam hingal ua, khovellam leh salam thilthu kia buaipih khop hi diing un theihsiamtheih hi. “Pathian, Pathian” chi kawm a, salam cheina leh hithei kisakna a dim uh hihtuak hi. Huaiziak a Toupa’n A taihilh ahi chih leng i theisiam hi. “Pathian bia kichi minsia nahih uleh lah hoihtak in be vanglak unlan, khovel vai kia buaipih di nahih uleh lah, buaipih siang vet un” achih utna hi’n i pom hi. A min suang a, A min hinpihlouhna zaw, A min suksiatna ahi chi thei ni. Ni khat thutantu dik, Pathian mai a ding diing kihi ahi chih leng thei ni.
Ei Singtangmi, a tamzawte’n Pathian i biakdan uh toh leng kibang kasa mahmah hi: Khristian kichi ngal si, lah Laisiangthou toh kituak a Pathian belou a, mahni remchangdan, peihdan leh hoihsakdan a Pathian be mawk. Huaidan ahihleh chu, Lei leh Van Siamtu, thil tengteng tung a thunei Pathian Hing leh Siangthou, Khovel hondamtu dia A tapa iittak Jesu Khrist hon sawlpa Pathian pen be kha lou kihi maimah diing hi. Mi’n “ki Pathian’ Thu awisak” a hon chih di ki-ut hetlou, (i awi taktak louh ziak uh ahi diam?) “Pathian’ Thu awilou” a hon chih di uh le ut tuan sam lou zel (mahni khamkham a thei kisa chiat zel i hih chiang ua). I huchih uh kha, A lum lah lumlou, a vot lah votlou, hi pelh-pulh ana kihidan ahi. Jesu Khrist in huchi bangte a bawl diingdan a gen lah chizau huai lawtel si maw! Mahni kisuut zek zaw tasam hive hang aw, i ut leh utlouh, poimoh i sak leh sak louh ziak a, poimoh ahihna bei tuan hetlou aka.
Salam, lungsimlam leh khalam khanna dia mahni ki-et chet, kivel chet zelzel poimoh petmah inchin, thil haksa leh nuam hetlou khat le hi eive. Hilele, pumpi bukim a masuan/khan i ut leh i chiin di a poimoh mahmah chu ahi (a utlou bang a tamzaw kihi lai di hi a).
Ei lungawina di leh mi hon muh didan khawng ngaihtuah a, A min pu maimai a Khristian hih zaw, Toupa Jesu in, Matthai 7:23 ah, “Huai hun chiang in, Nou thil gilou hihte aw, K’ON THEI NGEI KEI, ka kiang a kipan in paimang in, chi’n, amau ka hilh ding.” a chih bang a, huai hun chiang a huai kampau za ngam di ihi diam, chih dotna nuam hetlou kidong thei le hang i chi hi. A zekai thei thil leh a taktak (reality) ahi mawk si a maw hiai kha. I kitheilouh-lemsak ziak a hiai thutak pen ana kikhek tuan hetlou aka! I sih di hun leng kigen theilou, i Hondampa leng bangchik hunlai peuh a hongpai thei hi gige ahi.
Huan ah, hi pelh pulh i hihna uh adang khat ahihleh, mi’n “Khristian na hikei” hon chi le uh, thuak hak sa mahmah dite kihi ahi. Gingloute, Pathian lem bete bang simmoh bawl sek zomah hang! Huaiziak a Khristian chih min pu se ta lawlaw a, ki Khristiansak mahmah i hihleh chu, hoihtak in, ki siing-sa thak in, a min i put hinpih (practice) in, i hinkhua a zang (apply) le anuamsa a, ‘Hinna Tampi’ nei di lah eimah ki hi zel ahi. Khantawn hinna lah ei a sa hizomahlai di maw?
A Thu i hinpih a, i zat diing bang leng, ei a hihtheihna om khel a hon lam-en lou zomah lai hi a maw, i Pathian hoihdan lawmlawm! A iitna ziak a, Jesu Khrist tungtawn a, A hehpihna leh zahngaihna toh A hon etkolna pen nelhsiah a i neih leh, tangtawn sihna hon tun thei hi bok si. Kingaihtuah a, kivel zaw i kisaan diing mah uh ana hi gige hi. Huchi lou a, bangchidan a Toupa toh i kizopna bangchi bang ahi chih theithei di la? Zekai thei ahi chih thei thak ni!
Toupa’n apoimoh bangbang a ki-en chian leh kivel chian thak thei diing leh, Amah deihbang a thutak theihtelna hon piak bangbang a hangsantak a hinkhiakpih leh kalsuanpih zel thei di’m Jesu Khrist’ Min in hon panpih chiat hen. Amen.
– Chingngaihlian Tunglut
October 25, 2019/Article No. 01
(Laigelh toh kisai kupbeh nuam a omleh, laigelhtu +919892316430 ah thuzaak theih diing hi.)