LUNGKIATNA

0

Hinkhua tuh lungkiatna toh kidim ahi chileng gen khial lolawmlawm ding in i ki gingta keihi. Lungkiatna thupi tak ana tuak kha nailou bang i hih zenzen lehleng maban a i tuah hun uh hongtung thei gige ahi mawk hi. Hinkhua kichi khatveivei gim huai mahmah abat hun hong om thei zel a, huchi sasa inleng khatveivei chouna lian tak i mai tuah hun uh a hong hithei zel hi. Lungkiatna ziakin leng genthei kisakna, haksatna leh buaina i tuak thei zel uhi. Himahleh hiai bang hunte hun hoih penpen ahih lam i theih uh a, Toupa toh i kipolh theihna uh, Amah toh hoihtak a i ki hou theih ua hun poimoh tak i zat theihna uh ahi chih i phawk thak semsem uh a poimoh mahmah hi. Amah batpih a siam i hih ziak mah tak un bangkim a hoih theipen i maituah uh Amah deih lam hi gige ahi chih leng theisiam thakthak leng i deih hi. Zawlnei Jeremia inleng hiai bang in ana chi hi, “….Nou lam a ka lungsim putdan ka kithei hi, na hun nanung tawp ua lametna leh tunung honpe ding in thil hoihlou hilou in hoihna ngaihtuah ka hi.” – Jeremiah 29:11.

Lungkiatna i maituah hun un lungsim khaatna, hehna, gitlouhna chihte apa’n i kiven uh apoimoh hi. Hiai bang a om khak nate tuh i Toupa hon deih dan leng ahi zenzen kei hi. Sam ah hiai bang in chiangtak in i mu hi, “…Ka hinna aw, Bang achia kun nilouh? Bang achia ka sung a buai? Pathian lamen in: amah ka phat ding a, hon panpihpa leh ka Pathian ahi.” – Sam 42:11. Hinkhua a lungkiatna taktak i hon maituah hun chiang un kipaktak a om pah ding leh maitai tak a om pah ding thil haksa pi leng ahong hi lotel hi. Sam a i sim bang in, ‘bang achia kun nilouh i hia?’ chih tuh i lungkiatna ziak mah ua bang teng a lunglutna i neihlouh ziak uh a hi pen hi. Himahleh aban i sim leh ‘Pathian lamen in’ a hon chi nawn hi, hiai a i muhtheih tuh hichi bang hunte i mai tuah chiang un Pathian lam enlou a mahni ngaihtuahnate sau pai sak a ut dandan a om utna lungsim i nei sek uhi. Hiai tuh Pathian deihdan hilou leh gingtute om ding dan ahi keihi. Hiai bang hunte ah Amah phawk in Amah ah kinga pahpah hileng lungkiatna i tuahte ziak ua haksatna leh buaina i maituah uh hong tawm mahmah ding in a gingtak huai mahmah hi. Hon panpihtu leh hon Khamuan tu Toupa om gige ahih dan i phawk teitei uh a, hichi bang hunte a Amah kiang i naih teitei uh a poimoh hi.

Pathian kiang a ki piak lut a, Amah a ki ngak gige tuh lungkiat hun chouh lou in hunteng in a poimoh mahmah nawn hi. Sawltak Paul in hichi’n ana gen nawn hi, “….Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen. 7Huchi in Pathian muanna, lungsim himhim a theihzoh vuallouh in Khrist Jesu ah na lungtang leh na ngaihtuahnate uh a hon kepsak ngeingei ding hi.” – Philippite 4:6-7. Buaina taktak i maituah chiang un mangbang a om na in hon zou zaw hileh kilawm in nguitak a om abaih lam mahmah hi. Himahleh hichi bang hunte ah i buainate uh Pathian kiang tung pahpah theileng a van Khamuanna hon pe ding a, haksatna ziak a lungkiatna i maituah te uh tungtawn in kipahna, lametna leh lungsimnopna hon guang ding hi. Gingtute adia poimoh mahmah nawn tuh lungkiatnate leh hinkhua a buaina i tuahte uh midangte kiang a genkhiat (share) theihna ahi. I muan mahmah te kiang hiam, ahihkeileh kuahiam i genkhiat theihnate kiang a i share zel uh apoimoh hi. Amaute’ hon thumpihna vuak hilou in ei mahmah leng tua bang a i gen khiat theihna in hon zaang khai sak mahmah lai ding hi. Banah, midangte kiang a i buainate uh i genkhiat chiang in amau lam apa’n leng hon share theih uh aom thei a, ei sang a haksatna ana maituah uh a thupi zaw thei hi. Tuate tungtawn in kihasuan tuahna, thathak lak theihna ding a hong om thei lai hi. Jakob in thuhilhna a hon piak bang in, “….Huchi in hihdam a na omtheihna ding un, na khelhnate uh thupha kitawituah unla, ki thumsak tuah un.” – Jakob 5:16.

Alai ah Jesu chihlaa ana phuak tu’n a gen bang in, niteng hinkhua a alai a Jesu a om gige ding tuh gingtute hinkhua a alou theilou ahih dan phawk thak semsem apoimoh hi. Amah Jesu hiai bang a i om sak louh chiang un lungkiatna vuak hilou in hinkhua ah haksatna i tuah louhlouh ding uh i maituah khak hun a hong tam sek hi. Bangkim a Amah i koih a, Amah toh i ton chiang un lungkiatna leh haksatnate i phut khak hun un tuate lungkim tak in i maituah thei uhi. Sawltak Paul in Kolossate kiang a ana gen bang in bangkim i hihpeuh uh mihing ading bang a hih lou a, Toupa a ding a kilawp tak a bangkim i hih uh apoimoh hi. Hiai bang a i hih theihna ding un alai a bangkim a bangkim Jesu i koih uh a, Amah a tel angai hi. “….Na hih peuhmah uh, mihing ading bang hihlou in, Toupa ading zaw in kilawp tak in hih un; Toupa a kipan in a itna gouluah ding na mu ding uh chih thei in: Toupa Khrist nasem na hi uhi. Thil diklou hihpan a thil diklou hihman a mu nawn ding hi; mi khentuamna a om ngal kei hi.” – Kolossate 3:23-25.

Lungkiatna bang chituk in tuak lehang leng bangkim a Toupa’n hon theihpih ahihdan leh Aman hon ompih ahih dan i phawk uh adeih huai hi. Melma Setan in mihingte i siat gawp theihna ding ua hiai bang hunte a ngaihtuahna tuamtuam hon neisak thei ahih dan i theih uh a, i lungsim te uh Pathian lam a i hei theih gige uh apoimoh hi. Sawltak Paul in a hon thuhilh bang in, “…Pathian in a itte, aman a seh bang a a sapte adin, a hoihna ding un bangkim in a sepsak chiat chih i thei hi.” – Romte 8:28.

Tuni’n hinkhua a bang peuh i maituahna hun un, lungkiatna hi’n haksatnate hileh hiaite beidotna himailou a; Toupa’n eite adia hun hoih hon bawlsakna, Amah toh hun zatsem theihna ding, Amah toh ki houlim sem theihna ding leh Amah deihdan a i om semna ding ua tuate a hon maituah sak hi zaw ahi chih phawk thak ni. Hiai bang hunte kingaihsiatna ding hiam lungkhamna ding hiam a la mai lou a, tuate Toupa’n i hinkhua ua Amah thupina a hon lak utna, ei adia a hoihna a hon muhsak sem utna ahi chih theisiam thakthak ni. A tawp pen in hiai bang hunte ah ei vuak in i om ngeikei a, hon theihpihtu hon muchian a bangkim i maituah uh hon phawk pih gige Pathian om gige ahi chih mangngilh mahmah keini aw.

Toupa’n simtute hon vualzawl hen!

Khalam a masawn semsem thei ding; A nuam ahaksa a Amah toh tonkhawm thei gige mite hi ding in simtute Toupa’n hon ompih chiat hen! Theihna bukim louh ziak a i  gen khelh omte Toupa ngaihdamna i ngen hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

19th July, 2022 | Weekly-Inspiration – 104.

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment