Na hun tomchik glass nou sung a tuisiang kikoih om bang in ana ngaihtuah inla, tua glass nou sung a tui siang om pen na lungsim na ngaihtuahna ana hisak ding in I ki ngen hi.
“Lungsim a siangthoute a hampha uh; Pathian mu ding ahi ngal ua.” – Matthai 5:8.
Mihingte a khialsa a piang I hih ziak un, Toupa a I ki ngak taktak theih ma zaw khial den ding mah ana ki hi den hi. I piang pih khelhna hilou, I niteng hun zat na uah khelh theihna ding atam mahmah mai hi. I hih peuh ah hoih hia hoih lou hia chih ngaihtuah detdet hi laileng, a hoihlou I hih ut teitei ding atam mahmah ding in I gingta hi. Tua dan inleng i ngaihtuah detdet khol kei zomah ua, i khelhna te uh zaw ana lian thei mahmah ding hi.
Khelhna I chih chiang in mit a I muhtheih te vuak gen I hi kei a, I ngaihtuahna I lungsim a I geelte, I suangtuahnate leng gen I hi chih phok ni. A tung a ngaihtuah dia I gen en zual leng, glass nou sung a tuisiang om tuh I lungsim dan in koih ta leng, hiai tuisiang nou sung ah tui dang, a nin hiam, a zia tuam dang toh I hong gawmkhawm chiang in, ama atoh a siang dan hong ki lamdang ding hi. Hiai mah bang in mihingte ngaihtuahna tuh thil tuamtuam ahi sek hi; hiai ngaihtuah te tuh mahni masialna, muhdahna, huatna, hukna leh khelh nopsakna te khong ahi vek hi. Tui siang sung a tui nin in azia a khek mah bang in, hiai ngaihtuahna te’n ei ah hong om chiang in atawp ah tua I ngaihtuahte atak in hong sem buching sak zel hi. Lungsim siangthou tak a om ding lai hiai ngaihtuahna hoihlou te’n I lungsim hon nin sak gige hi.
I thil hihte, nasepte, mizia, utdan leh I om dan te uh chu lungsim a hong ki pan masa ahi a, I ngaihtuah tam deuhte uh atak a I sepsuah te a hong hi nak hi. Hiai thu mah tuh I Laisiangthou ah leng chiangtak in I mu thei hi. “Mi hoih in a lungtang goubawm hoih a kipan thilhoihte a lakhia a; migilou in a lungtang goubawm sia a kipan thilhoihloute a lakhe zel hi; a lungtang a dim val kam in a genzel hi.” – Luke 6:45
Pathian in gingtute tuh lungsim a siangthou gige ding a ahon deihte I hi uhi. Himahleh tua bang in I om kei nak uh a, lungsima ngaithuah na hoihlou pipi toh hinkhua I na zang sek uhi. A tung a etsakna I gen bang in, tui nin lak mah ah tuisiang sungsung nawn leng hon siangthei nawn ding hi. Hiai tuh tulai khovel a mi tamtakte’ om dan hi in ka koih hi. I khelhnate uh va hih zel in, tua te hih zoh chiang a a hoih bang a om zel te I hi uhi. Pathian ngaihdamna pen ei nopsakna ding a zang in, khelh utna te I lungsim uah lian zaw hi. I utchiang ua va khial zel te I hi uh a, hiai dan hinkhua I zat toutou un zaw Pathian thangpaihna I tung uah hongtung taktak ding hi. Tua bang hongtung ma a I tawpsan ding omte I tawp a poimoh mahmah hi.
Tulai in khelh na I niam koih deuh bang a om zomah hi. Khelhna teng ki bang vek a sim lou mah I bang ta uh a, Pathian mitmuh in zaw aki bang vek hi, khelhna neu khelhna lian chih a om kei hi. Tangtak leh chiangtak in I khelhna ua pan gawtna mulou leh theilou ka hi I ki chi kha thei uhi. Ei hinna ah tua bang gawtna te hong ki lang naikei mah leh i insung a buaina tuamtuam I tuahte uh leh I khotang khong ua I buai gige nate uh tua I khelhnate uh ziak leng ahi thei hi. Jonah laibu apat I muh bang in, gawt kawm a hawidan siam tuh Pathian ahi chih thei ni. I khelhnate ua pat I ki nung hei ma uh zaw Pathian thangpaihna I tung ua hongtung thei gige mah ahi hi. Hiai I genlai in khenkhat te’n mahni hinna le poisa in hinkhua ut dandan in i zang kha thei hi, himahleh hiai bang a I gamtatna te’n I insung mite, I tu sawn leh I khang adia hamsiatna, lohsapna hontung thei ahi chih leng phok thakthak leng I deih hi.
Lungsim siangthouna taktak lou a Pathian muh ding hilou ahih dan I tangtel ah I sim a, hiai mah tuh kei leh nang in I poimoh gige ahi hi. I niteng hun zatna a khelh theihna hiai zah ta om lai a bang chi bang alungsim siangthou sak thei ding I hi hia chih I ngaihtuah a poimoh hi. Hicia om maimai a lungsim a siangthou na hong om ding ahi zenzen kei hi. Pathian thu te sim a, ala te za a ngai a, Amah toh I hunte atam thei pen I zat theih chiang in hiai bang siangthouna lungsim I hon nei thei pan ding hi. Huchi lou a hun tomchik sung Pathian ading a hun I piak ziak un lungsim a siangthou louhnate ziak in khelhna tampi tak I na hih kha uhi. Hiai khelhna lampi te zui nawn lou a, lungsim a siangthouna te nei ding in hanchiam in, I hunte uh Pathian a ding in atam thei pen zang ni. Lungsim a siangthou te a hampha uh Pathian mu ding ahi ngal ua!
Simtute Toupa’n hon ompihin hon vualzawl hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
9th September, 2020 | Weekly-Inspiration – 36.