LUNGTANG SIANGTHOU

0

Tamtak te’ i thumnate uh kingaihtuah thak leng hun tam zaw ah Toupa vualzawlna i dong na ding ua i thum hun uh atam zaw sek a, Khalam damna sang mah in leng taksa damna ding leh, kipahna ding a i thumna uh atam zaw zel hi. Hinkhua a haksatna tuah ding om bangbang te maituah ngam a, tuate i mualsuah theihna ding un hatna leh Toupa ompihnate i ngen tawm mahmah lai uhi.

Niteng hun zatna ah sep ding bawl ding ki hau mahmah lehleng khatveivei bang ale ka sepkhiat chi a sep pen tak le thei zoulou lah gim agim a om chih hun leng a om tham hi. Awl moh lah tam lah sep masak ding pen le thei lou chih hun a om thei zel hi. Hichi bang hunte hongtung chiang in hun tam zaw ah i et masak ding pen uh Toupa en masa lou a thildang thupi koih masa zaw leh khovel thilte i awlmoh luatna ziak uh ana hi zel hi.

Kumpi David thumna apa’n sinlai saulou ensuk leng i chi hi. I niteng hun zatna uah bang poimoh i sa pen a? Bang in i lungsim uh a hon luah pen a chih i ki etna uh hong hi leh i chi hi.

Sam 51:10, “…Pathian aw, keimah ah lungtang siangthou tak siam inla; ka sung ah kha diktak siam thak nawn in.” Hiai tuh Kumpi David in, Bathsheba tung akilawm lou tak a agamtatna ziak a ngaihdamma thumna a ngetna thu ahi. (2 Samuel 11-12). Hiai a Kumpi David thumna apa’n bildoh huai leh chiamteh tham a i muhtheih chu, Pathian kiang a lungtang siangthou leh Kha diktak siamthakna ding a angetna ahi. Mihing lam ah i ki-et chiang in Kumpi David bang hiai bang khelhna thupitak ana hih hileng tuate apa’n ki sel theihna ding hiam, a langtang a kitheihlouhna ding in bangbang hiam hih khak abaihlam loding in a gingtak huai hi. Tua bang a om lou in Kumpi David in Toupa phawkna in a zang a, tua ziak mah in lungtang siangthou siamthak ding in a thum zaw hi.

Mihingte i ngaihtuahnate uh kitheihpih tuah hi zenzen leng hun tam tak ah i zumna ding uleh i zahlakna ding uh atam mahmah ding hi. Hinkhua siangthou tak leh Toupa deihdan a nungta i kichih hun unleng lungtang ah khelhna i pai lailai uhi. Hiai te tuh i pianken ua pa’n khelhna i pai uh himahleh hiaite apa’n suahtak theihna Pathian a om gige ahih dan chiantak in i theithei hi. Tua bang a suahtaktheihna tuh Pathian phawkna, a deih bang a khosakna leh Amah ompihna nget ngitnget na ahi zaw hi.

Khelhnate kiphawklou leh kisiklou pi in Toupa ompihna a nget theih keihi. Khial i hih dan leh diklou i hih dan i kitheih chiang in kibawl hoihna ding lampi hong om pan hi. Kumpi David dinmun bang hi a bang lungsim nei hiam chih i theikei himahleh khelhna thupitak hih ahih dan a ki thei a hiai a tua khelhna kiphawkna ziak in Toupa ompihna ngen hi ding a gingtak huai zaw hi.

Eite leng khial i hih dan uh ki phawk gige a, Toupa ompihna i nget chiang un hiai in hinkhua thak lungsim thak a hon pe thei pan ding hi. Romte 12:2 na a i muh bang in, “….Hiai khovel dan bang in omkei unla; Pathian deihlama hoih leh, lungtuahhuai tak leh hoihkim na theihtel theihna ding un, na lungsim uh a thaka om in hong lamdang zawta un.” chih i mu hi. Hiai ah lungsim thak neih ding chih Sawltak Paul inleng a hon genlang a, Kumpi David in lungtang siangthou a nget toh le hong ki bang hi.  Sam 51 bullam ah kik zual leng, Kumpi David in Pathian a hihna theichian lua ahihziakin khelhna huaise tak ana hih kha mahleh Aman ngaidam thei gige ahih dan a muchian mahmah hi. “….Ka thulimlouhnate hon silsiang vilvel inla, ka khelhna hon silsiangsak in.”v2.

Khelhna hih kha kahi kichi lah lunghei sawm lou, Pathian phawkna a le neituan lou mi tamtak i om uhi. Kibawl thakna a zat sang in tua khelhna pen maingap deuhdeuh na, nopsak deuhdeuh na in i zang lai uhi. Romte 12:2na a i sim bang in hiai te tuh Khovel dan bang ahi zaw a, hiai dan a om louh ding ahih dan chiangtak a i theih nung a i va om teitei na un denciang a  kisikna lianpi hon tung zaw ding ahih dan phawk thak semsem leng i deih hi. Tuni’n Kumpi David bang a lungtang Siangthou Toupa kiang  a ngen in, khelhna apa’n ki bawl hoih theichiat ding in sim tute Toupa’n hon ompih in hon vualzawl chiat hen! Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen ahi.

  • Thangginom Hanghsing

Laigelh toh kisai kupbeh nuam omleh, Laigelhtu +919615804759 ah thuzaak theih diing)

12th July, 2022 | Weekly-Inspiration – 103

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment