MI MUHDAH TAWPSAN DIINGDAN

Eklijiasti 3:8
It hun leh muhdah hun; kidou hun leh kilep hun.

Mi muhdah neih gimhuaidan kithei kha vek sim leh kilawm hi. Mi muhdahna i chih i meltheih tuk un, Setan in Pathian toh i kizopna a sukbuaina dia a vanzatte lak a khat ahi chih i theih poimoh hi.

Mi omdan leh a deihteelna uh a zatdan un hon hihnat hun bang om kha sek hi. Akhenchiang in, atup uh leng hikhollou thei hi. A tup mawng ua hon engbawl uh ana hihtaak leh leng, va gen theih bangmah i nei ngel kei hi. Va kinakpih/kisualpih diing i hihkei ngal leh, hihtheihluat kinei lou hi. Va huchih hial a aphatuam diing khat leng omlou ahihziak in, chiinchi hetlou zel hi.
Abang hitaleh, lungsim a liam-le-na a om i hih ziakin, huchibang a hon sukhate i mudah ek pah hi.

Mi’n hon hih-nat himhim chiang un, hon hihna ahihlam uh kithei le uh chih ki deih hi. Huai thei uh henla, amaulam a kisuanlahna/kisiamlouhtanna hong tung henla, hihkhial ahihlam uh i theih di’n hong hihlang le uh chih ki ut hi. A hong huchih louh chiang un, amau leng ei thuak bangin thuak hile uh chih kideih a, phuba laak diingdan ki ngaihtuah kha pahpah hi (phuba chih zen di utkei sek mahle’ng le). Huaiziakin, huatna leh hehna in ki thukkik pah taangpi sek hi. Suknat a om i hihlam, hon hihnatute tung ah i latsak theihlouh chiang diakdiak in bang, Pathian in phuba hon lak sak leh chih i deih tuntun zomah lai hi.

Mi’n hon hihnat chiang ua, i omdan (reaction) pen, khawphawk tak a, tum tinten a, i latsak ana hipah hikhollou hi. Lungsim a liam i hihlam a kilatkhiakna leng ahi. Huaiban ah, naa i hihlam hon thei le uh chih i ut ziak ahi a, damna diing i zon pah ziak leng hilai hi. Huaiziak a, hihnat a i omchiang a, Pathian kiang a tai pahpah poimoh petmah hi. Pathian kiang a i tai keileh, samitna ngen suak ahihman in, thil hoih himhim kingaihtuah khe theilou hi. Phuba lak ut kihizaw lou a, i natna phawksak a om i poimoh ban ah, dam ut kihi zaw ahihziak leng ahi. Damna hon pethei Pa kiang ah tai in, Amah kiang ah kipekhe le’ng, Ama’n damna leh muanna hon pe diing hi, i ut nakleh (Philippite 4:7). A huchih kei leh, phuba la ut a, khaatna a dim i hihlam leng kithei hetlou a omom khak lauhhuai hi.

Thil haihuai pi, i hihkhelh sek uh khat ahih leh, I Pathian hing leh siangthou pen, ei mihing niinte thangpaihna pansan a, mi tung a ahoihlou tungsak diing peuh a sepsak i sawm khak naak pen uh ahi hi. I hichihna pen uh, thildang bangmah hilou a, chapouna (pride) ana hi a, Pathian thangpaihna i khoihkhakna uh leng ana hi daih hi.

Mihing lungsim paidan khat ahihleh, mi omdan hoihlou leh hon engbawlnate uleh simmohnate uh limsaklou in om hita le’ng, vuallel honsa law kha diing uh, chih hi’nchin, huaiziak a, i hehna hiam, i omdan hiam bek a atheih diing ua kilangsak sek hive hang maw?

I suanlam tuamtuam om mahleh, kiniamkhiak di utlou ana kihi lim hi. Mihing mai a kiniamkhiak diing i utlouh ziak ua, Pathian mai ah leng kiniamkhiak utlou kisuak hi. Huaidan in, Pathian mai a kiniamkhiak diing hita le’ng, i huatte ngaihdamna dia amau mai a thunuailutna dia kiniamkhiak di chihna ahihziak in ki utlou zel hi. Thunuailuut ziak a vuallel i na hihtaak lehleng, poisak louh i kisin kuul hi. I Toupa Jesu in Matthai 5:5 a A gen bang a, “thunuailutte mi hampha himai uhi; lei gou luah ding ahih ziak un.” 

Huchi ahihleh, bangziak a huai huatna, ei a dia leng gimhuai leh hoih hetlou hina zen pi a paihkhe utlou ihi diing uh? Lauh khat kinei ahihziak hi’n ka thei hi. Mi’n ei tung a akhelhman uh luak lou a a-om khak diing uh kilau hi. Pathian ahoihdan kithei a, Ama’n amaute gawtlouh a akoih khak di kilau inchin, a khelhman uh a muh teitei na dua; a musaktu diing a mohpuakna ei-leh-ei kigot ana kihi dan ahi. Ei tung a zahngai dia Pathian i deih tukin mi tung a A zahngaihna asuah ding kilau hitel zel hi. I gitlouh khiak dan uh. Pathian in huchidan a Nna sem himai zen leh, hing leh dam a kuamah ki-om nawnlou ding hi.

Hichi’n ngaihtuah le’ng deihhuai kasa hi; I Pathian Amah a kivaipuakthei (Sovereign) Pathian ahia, ei mihingte hon poimoh lou hi (hon iit a chih thu hiven). Ama’n mi a gawt utte a gawt dia, a utkei leh a gawtkei dia. Ei hon gawt lou ahihna ah lungawi leh kipah kisin leng kinavaak tuan mahmah diing hi. Mi a gawt diing deih a i buai sung teng, Amah toh i kizopna buai gige diing ahi chih chiamteh le’ng poi hetlou diing hi.

Pathian pen ei deihdan a nnasem diing a i sawl vual uh hilou ahi chih leng i lungtang a vom le’ng, khalam gah manpha tak kisuang di’n a gintat huai hi. Amah zahtathuai, lauhuai, siangthou, bangkim siamtu, bangkim tung a thuneitu leh buching pumluum Pathian ahi a, ei utdan a gamtangsak zou diing kihi lou ahihdan pom le’ng, i ngaihtuahna leng ahoihlam leh Ama’ deihlam a kikhek theita di’n lam-et huai hi. I chapouna ziak un, Pathian’ thangpaihna kisukha mun thei mahmah di’n a gingtathuai a, hileh leng, zahngaihna hau Pathian ahihziak in, a suakta kihi lel hi. Mihingte ki-otsakdan chu, Pathian bang ei utdandan a gamtat sak sawm kihi tel eive. Pathian lungduaina suutthak mah ni.

Mihing kihi ven, mi huatna chih khawng hong omzel thei mah hi mawle? Hilele huai pen suanlam a nei a, i hihkhelh kithei gegu a, i hih diing hoih i theih pen i hih tuan kei leh, Pathian mai a khial kihi chih i Laisiangthou in gen hi (Jakob 4:17). Huai ban ah, Hebrute 10:26 in hichi’n gen hi, “Thutak theihna kim i tan nung a thil i hihkhelh teitei ngal in zaw, khelhnate a dia kithoihna a om tak hetlouh ziak in” chi hi. Hiai in agen ahihleh, A tawpkhawk suah a Pathian in, i suahtatna diing a Jesu Khrist a hon piak pen in hon suaktasak zoulou ahihleh, i suahtat na’ng thil dang om nawnlou chihna himai hi. Jesu Khrist’ hotdamna manpha petmah ki siikdeen chihna himai hi. Chizau huai kasa.

I lungtang khauhsak nawn kei ni, a kikhel thei thil ahihdan ngaihtuah thak ni. “Ka omdan diklou ahi” chih ngam a, mi muhdah tawpsan hun tunsak poimoh ta hi. Mi muhdah in ei ah sianthouna nna sem lou a, i kiim-kiang a mite adia vualzawlna tuntu diing a Toupa hon deihna bang a leng ki omkha lou diing hi.
Pathian mai a kiniamkhiak a, A Thu zuih diing pen i hih ding him ahi chih ei-le-ei kitheisak thak ni. Pathian’ thu mang le’ng, lungmuangtak in Ama’ kepbitna sung ah ki-omta diing a, Ama’n A Nna asep diingdan ngaihtuahsak a ki hai-buain nawnlou diing hi.

Mi huatna a kiven diingdan dang khat ahih leh, mi omdan pen poi kisaklouh sak theih a na hi, chih eive. Poi salou diing in ei-le-ei kihilh ni, mualsuah theih thil ahihziak in. Kisin zek leh kingeinaseh sak zek leng ana poimoh mah hiveh aw. Haksa mah leng ahi, hilehleng, Pathian toh thilteng hithei chih Laisiangthou ah kimu hiven mo? (Matthai 19:26)

Hiaiteng a na ki-min khit naikei leh, atawpna di’n khat kon gen beh lai diing: Jesu Khrist’ Sisan a tatsa na hihlam kithei a, A nungzuihna pi-bawl a, A thuman ngai poimoh na hihleh, Toupa’n na tung a khialte tung a phuba laak hon chiam ahi chih thei in (Romte 12:19). Huai kawm kawm in, ei tung a simsenlouh zahngaihna A hon butkhiakte ngaihtuah thak leng uthuai kasa hi. Amah a kipat a, A itna tungtawn a i muhte; hehpihna, zahngaihna leh ngaihdamnate i piaksawn diing a hon lam-en ahihlam leng chiamteh ni. Hiai i piaksawn dingte, Amah a kipat a i muhte toh teh sin mah lehang, neu law mahmah ahi chih chiamteh lai ni maw? (Luke 6:36 ; John 13:35 ; Ephesate 4:32).

Anuai a kon taaklat, Laisiangthou mun khenkhatte leng suut thak chiat nawn le’ng manpha petmah diing hi. I suut tan ah beisak mailou a, apoimoh dan a leng zangkhe zel diing in kisiingsa thak ni.

Matthai 5:38-41
[38] Mit sik in mit, ha sik in ha a kichi chih na zata uh.
[39]Ke’n zaw k’on hilh ahi. Mi gilou nang kei un; na biang taklam bengte tuh, a leh lam leng doh zaw un.
[40]Huan kuapeuh in na lak ah thusia bawl in, na puanak lak a tup leh, na puanza leng lasak ngal in.
[41]Huan mel khat pai dia hon phut teitei kiang ah mel nih paisak in.

Luke 6:27-28
[27]Himahleh, nou ka thu zate aw, ka hon hilh ahi: Na melmate uh iit unla, hon hote tung ah thil hoih hih un,
[28] Nou hon hamsiatte vualzawl unla, hon engbawlte thumsak un.

Toupa Pathian in apoimoh bang a pan lathak a, mi muhdahnate koihkhe ngam a, i tunga khialte leh hon hih-nate ngaidam thei ding in, Jesu Khrist mi’n in, i mimal chiat ah, hong sem hen aw. Amen.

– Chingngaihlian Tunglut

November 19, 2019/ Article No. 09

(Laigelh toh kisai kupbeh nuam omleh, laigelhtu +919892316430 ah thuzaak theih diing hi.)