NA LUNGTANG KEM IN

0

Mihingte’n thil tuamtuam i hih theihna ding ua ngaihtuahnate koi a hong kipan hihiam chih sut ding hileng lungtang  (heart) a pa’n hong suak ngen ahi vek hi. Hiai lungtang in bangbang nna a hon sem sak a chih tuh thil poimoh tak ngaihtuah tham ching ahi gige hi. Lungtang kichi muhtheih didan a gen ding hileng i taksa ua om ahi a; hiai lungtang a kisaai (beat) pen a tawp hunhun tuh i hinna uh bei a hong suak hi. Tunia i gen ut pen ahihleh hiai taksa a i muh theih pen hilou in, i ngaihtuahna uh huaituh lungtang a pan hong suak te gen sawm i hi zaw hi. Itna chihte ahihkeileh a selam ah lungsim i kihihliam khakna uh chih te khawng leh lungkhamna i neihsek te uh khawng hiai lungtang apa’n a hong suak leh hong kipan ahi gige hi. Lungtang in thil angaihtuah thei a, thil atheisiam thei a, utna leh utlouhna anei thei a, ginglelhna leh gingtakna hon neisak thei a, mite it theihna leh mite huat theihna hon neisak thei a, kisikna leh kisik utlouhna hon neisak thei a, nunnem tak a om theihna leh khuah tak in hon om sak thei a, dik leh diklou khenkhak theihna hon neisak in, lungsim siang leh siang lou hon neisak theilai hi. Hiai teng vuak hilou in a dang tampi gen ding leng a om tham hi. Tunia i ngim ut pen ahihleh hiai lungtang ah Pathian Khasiangthou a teng hia chih i ki-etna, Amah deihlam lungtang i nei hia chih te saulou a gen ut i hi pen hi. Pathian deihlam a omom ka hi i kichih lailai in i lungsim ah bang om a, Amah deihlouh lam bangbang i koih a, Amah toh kinai takin i om gige hia? chihte tuh i ki-etna ding ua thil poimoh mahmah ahong hi ding hi.

“Thanopna tengteng toh na lungtang kem in; huai a kipan lah hinna tuinakte a luang ngal a.” – Paunakte 4:23.

Paunakte a i muh mah bang in lungtang kep apoimoh dan i theithei pah hi. Mihingte’n thil i hih peuh uh banah i gamtat dan chiteng uh hiai lungtung apa’n hongsuak ngen ahi gige hi. Ngaihtuah khollou pi a om phutphut chih om mengmeng lou a, i gamtat dante uh ngaihtuah thakthak leng hun bangtan hiam i ngaihtuah nung ua tuate sep buching utna toh gamtang sek te i hi uhi. “Tui a maitang in maitang a muh bang in, huai mah bang in mihing lungsim ah mihinna a kimu hi” chih Paunakte 27:19 mah ah i muthei hi. Midangte mahmah inleng i omdan leh i gamtat dante apa’n in i lungsim put bang hi hiam chih ahon theithei lai ding uhi.

Alangkhat lam ah mite’n i lungtang ngaihtuahna a asung thu taktak hon theihpih hetkei mahle uh Pathian in bangkim i lunggel te uh, a hoih hi’n asia hileh a theihlouh a om kei hi. Khialsa a hiai leitung a piang i hihziak un kei zaw ka lungsim ngaihtuahnate siang leh hoih mah ahi chihtheihna ding i nei het kei uhi. Jeremiah in hiai tungtang chiang takin ana gen hi, “…Lungtang bel thil tengteng sang in khemhat pen, hoihlou pumlum ahi a; kuan ahia theithei ding? Kei Toupa bel michih a omdan bangzel uleh a thilhih gah bangzel a peding a lungsim enkhepa, lungtang enchianpa ka hi.” – Jeremiah 17:9-10. Hoih kisa tak a om sang a hoihlou i hihdan uh kiphawk sak thakthak a poimoh hi. Hiai in Pathian deihdan a om utna lungsim hon neisak a, Amah toh kinaih semna leh Siangthouna hon tung hi. Tulai in ahihleh mahni hoihlouhnate kimu a kibawl hoih sawm sang in hoih kisakna, hi kisakna a lian mahmah mai hi. Midangte’n nang zaw na huchilua, huchi neive hon chih ding bang uh sih ngaidah a ngai te i hilai uhi. Mite hon chihna leh hon muhna pen  uh dik in dik kei ta lehleng tuate va puaknat velvul ding hipah lou in i lungtang ngaihtuahna tua lam mah ahi hia chi a ki-etna a zat zawk apoimoh hi. Mite hon muhdan toh i om dan ana kigamlat tak leleng tuate’ Pathian naihsemna a i zat theih uh a deih huai hi.

“Na kivatna uh pawlam kivatna samphek leh dangkaeng khi awh hiam, puansilh kivatte hilou in, Lungtang a mihing thuguk lungsim thunuailut leh nunnem puansilh setheilou a kivat Pathian mitmuh in a manpha mahmah hi.” – 1 Peter 3:3-4.

Pathianni hongtung a nalh taktak toh Biakinn kai ding in i kisa a; i puan siang pen leh hoihpen silh in i kuankhe zel uhi. Himahleh i lungtang ah bang om a, bang lunggulhna toh kuan a Biakinn zuan i hiam chih ki theihchet masak a poimoh mahmah hi. A tung a Peter laikhak a i muh mah bang in puansilh hoih pente silh louh ding chih hilou in tuate sang mah in i lungtang deihlamte bang hi hiam chih a poimoh masa pen ahi zaw hi. “….Toupa’n mihing et bang in a enkei. Mihing in pawlam a kilat dan a en a, Toupa’n bel lungtang a enzaw hi” a chi hi.” – 1 Samuel 16:7. Tamtak te’n i gensek ulah hi, adik leh hi huaituh pathianni te a Kha mi tak bang a kilang in a zingchiang apat kiginni tan ut le dah aom thei, khovel mi tak a om tam tak i om uhi. A diktak a gen ding chileng Gingtute hinkhua taktak leh i gingtu hihna uh a kilatkhiatna ding zaw Pathianni khelkhel hilou in niteng hinkhua ah lah khiatna ahi zaw hi. Pathianni a Biakinn i zot pen uh bel munkhat a gingtute paikhawm a Toupa i Biakkhawm theihna uh hong hi a; huchi lou nite ah Toupa toh bang chi’n i hunte uh i zang uh a chih ki ngaihtuah apoimoh mahmah hi. Hiai a i hel ut mahmah khat a om a huaituh, i omdan te midangte ading in pukna tungtu, lungkiatna tuntu a hi kha hia chih ki-et a poimoh penmah hi.

Tuni a i thupi a i teel mah bang in i ‘Na Lungtang Kem In’ te bang hi hiam chih ki vel chiat leng i ut hi. Pathian bia leh Amah bia i kisak lailai in i lungtang gamla pi a om a, taksa lel a Amah bia i hih khak ding a lauh huai hi. Toupa toh kigamla tak a ana om kha i hih lehleng Amah kiang ah panpihna i ngen thei gige hi. Sam laibu a i sim mah bang in lungtang siangthou honpe theipa Pathian kiang ah hunteng in i ngen thei gige hi. “…Pathian aw, keimah ah lungtang siangthou tak siam inla; ka sung ah kha diktak siam thak nawn in.” – Sam 51:10. Lungkham mangbang tak a om hun in khatveivei Pathian naih ding bang in leng i naih zou sek kei uhi, himahleh hichi bang hunte inleng i lungtang deihlam te bang ahi dia aw chih kivel thakthak hong poimoh sem hi. Hunnuam leh hun haksa i tuah hun un Amah Toupa bel gige leng Aman hon ompih gige ding a, i liamnate uh a hon tuamsak zel ding hi. “….Khasiate a hihdam a, a liamnate uh a tuam zel hi.” – Sam 31:24.

A tawp pen a apoimoh penpen zaw Jesu hon sinsak bang in Amah mah, i Toupa Pathian i lungtang tengteng, i kha tengteng leh i lungsim tengteng a i it ding ahi. “Toupa na Pathian tuh na lungtang tengteng in, na kha tengteng in, na lungsim tengteng in na it ding ahi” – Matthai 22:37b. Tua bang a Toupa bangkim a koih a, Amah deih bang a om a, Amah amasa pen leh itpen a i koih chiang in Amah vang in hangsang takin i om thei ding uhi. “Toupa lamen tengtengte aw, hattak in om unla, na lungtang uh hangsak un” – Sam 31:24.

Toupa’n simtute tengteng theihsiama honpia henla, a thute tungtawn in michih hon vualzawl chiat hen! Toupa’n “Na lungtang deihlam honpia henla, na lunggel tengteng hon lohchingsak hen.” – Sam 20:4.

Amen!

Theihna bukim louh ziak a i  gelh khelh omte i Toupa ngaihdamna i ngen hi. Bangkim Aman thupina tengteng tang hen!

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing) 17th August, 2022 | Weekly-Inspiration – 108)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment