Niteng Tha Ngahna Thumna Ahi

0

“Nang zaw na thum in, na dantan sunggil ah lut inla, na kongkhak khak inla, na Pa a guk a om kiang ah thum in. Huchi in na Pa a guk a om in honmu in, a hondin ding hi.” – Matthai 6:6

Thumna apoimoh dan i theih vek sa uh leh a phattuam dan a chiam kha lou om ding in a gingtak huai kei hi. Khat veivei I thumna hon dal thei ding buaina i tuak thei hi, Thumna hun hoih i neihte mah leng Melma pa’n hon suk buai na ding a ahun hoih pen ana hi zel hi. Ngaihtuahna tuam neih bang, insung a buaina leh sepna toh kisai, lawm leh vual toh kisai a lungsim noplouh na ding a om hun om zel hi. A siang siang in gen leng nikhat a nih vei vuak ka thum hun a om tam mahmah hi, zing thoh leh nitak lup chiang a thumna neih te hun sak in om kha sek hi. Hiai gel a i thumna te ahoih lou ichi het kei, himahleh ki vel chetna ding tampi ka mu hi. Kei mahmah inle kana thil tuah ahih ziak in tawmchik in kon gen ding.

Tulai in hon subuai thei ding Electronic Media/Social Media khong ah hih ding i hau mahmah ta uhi. Hiai te ziak in thumna hun i zat di bang a i zatlouh hun om lo’ ding in ka ngaihsun hi. Niteng a i thumna neih ki bang, i gen leh i nget teng ki bang sak a hucia thumna nei kisak khak theih luat hi. A khen cia lah i nna te, i social media a iki houlim na te awlmoh lua in thumna nei pahlou, ihmut hong suah sim chiang a thumna nei zual in hicia ihmu mai aki hi hi. Lungsim thuah nei a thumna nei, thumna neih khawm a thil dang ngaihtuah na a om chih bang leng i thumna neih dan uh hi kha thei hi. Vualzawlna tampi i dongte na tan a ngaihtuah na ding hun pe manlou, kipahthu gen ding le nei mahmah lou, i gen te a ngeingei, aki bang ngen ahih khak ton om ding thil lauh huai hi.

Tu dang khat nawn ah, lawm hoih leh prayer partner neih manpha in phatuam lua hi. Huchi ahih khomkhom in hiai bang thil ka tuah hun a om; Thumna point ding request/praise point na nei hia chih dotna kana mu zel hi. A khenciang in gen ut lou hi zaw lou in ka zum tha bang a suak a, omlou ka chih un a om hi. Himahleh hun hong paitou zel in hiai kana thei hi. Tup kibang a Thumna gah chih Jesu’n ana gen ka lungsim ah hong om hi.
“…Chihtaktak in k’on hilhnawn hi. Leitung ah na lak ua mi nih a thil nget ua a kithutuah uleh, ka Pa van a om hihsak in a om ding uh. Mi nih hiam thum hiam ka min a a kikhopna peuh uah a lak uah ka om zel hi” a chi hi.” Matthai 18:19-20. Mimal a i thiltuah lah hi ngal, i thumna ale phok gige hilele midang kiang a i share khiat ngam hetlou ei khomkhom a i na buaipih om hi. Tua te hon thumpih ding om gige a, i share khiat na ding om leh Toupa deihdan leng ana hi zaw hi. Laisiangthou a imuh mah bang in ki thumpih tuah apoimoh dan i thei hi.

I hin kholui te ki vel thak in, thumna apoimoh dan te ngaithuah thak ding in ki ngen hi. Niteng a ann i nek bang in Thumna tuh i hatna, Pathian toh iki zopna leh iki kal hon bawl hoih tu ahi. Haksa i na tuah te khong, ahihkeileh i ngetna te khong ki zumpih a midang kia share khe ngam lou hi zaw lou a, tua te leng share khe ngam a, thumna a khat-le-khat ki hasuan tuah chiat thei ding in simtute’ Toupa’n hon vualzawl hen.

–  Thangginom Hangshing

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment