I haksatnate uleh lungkhamnate uh Toupa kiang a ngak ding, Amah muan ding ahi chihtuh michih i ki hanthawnna uleh i ki hilhna uh ahi sek hi. Hinkhua ah haksa a tuak lou ki omlou hi, mi nuamsa tak a khosa i chihte’n leng amau hinkhua ah haksatna, gimthuakna atuah uh a om hi. Tua mah bang in eimahmah inleng mi hon theihpih hetlou, midang kiang ale gen ding nuam i saklouh haksatna i phut khak uleh i maituah uh a om chiat hi. A taktak nungzuihna hinkhua ah hiai bang haksatna leh gimthuaknate om zel ding mah adiam? chih tuh i gen utte lak a khat a hong hiding hi.
Jesu kiang zuan in i puakgik te’ amah kiang nga leng, i puak gikte uh a hong zang ding a; i niteng hunzatna uah nuamtakin i khosa ding uhi. Hiai tuh adik mah ahi, himahleh theihsiam ding leh lungsim a ngaihtuah ding a om hi. Hichi bang a nopsaknate, kipahnate leh nuamtak a khosaknate hunteng a lam-et gige ding gingtute om ding dan mah ahi diam? Nopsak utluatna te, nuamtak a khosak utnate zaw Satan sal a i awkna lampi uh ahong hithei hi. I hondampa Jesu’n a nungzuite kiang ah khovel a gimthuakna omlou theilou ahihdan chiangtakin ana gen hi. Hiai mah tuh eite ading ale agen ahihziakin, tua te Amah hatna toh douzou ding a i kisak uh apoimoh hi.
“….Hiai thute na kiang uah ka genta hi, keimah a na khamuanna ding un. Khovel ah gimthuakna na neiding uh, himahleh khamuangtak in om un, ken khovel ka zouta, a chi hi.” – Johan 16:33.
Ahitak in kuamah gimthuakna leh haksatna tuah ding i ut kei uhi. Bang chituk in tuate pelh sawm in panla mahlehang leng, i lampi tawtna lamlam uah haksatna phu kha hetlou ding kahi i chi thei keihi. A diak in ei lamte’n pau vangtang khat i neih khak sek uh a om hi huaituh, “thadah mehlimlim duh” chih ahi. Kuahiam i nulepa hiam, sungte hiam leh lawmte hiam in hiai bang hon chih khak uleh heh huai mahmah hi, himahleh hiai tuh adik ahi a, eilak mahmah a hiai bang thadahna atam mahmah hi. Sep sawm lou, gimsawm lou, nuamtak a khosakna kia lam enen mai, a thawn a nek muhna ding kia i delhdelh uhi. I omdan te uleh i khosak dante uh ki-en leng eimahmah leng i kisiam tan na ding uam chih hon ngaihtuah sak mahmah hi.
Khangthakte lak a dotna kana muh khak leh kana theih khakte bangzah hiam aom hi. Pathian in hon it ahihleh bangziak gimthuakna i tuah ding uh hon phal sese ahia? Pathian in kei a ahoih pen huaituh Amah ka biak ding hon deih ahihleh haksatnate omlou in nuamtakin hon omsak leh Amah lungtunna tan a bia thei ding hi’n a chih bang lungsim in anei uhi. Hiai bang ngaihsutnate bangziak a om thei hiding hiam i chihleh Laisiangthou thu i thei tam nai mahmah kei ua chihna ahong hipen mai hi. Pathian thu theitam a, simtam hilehang bel hiai bang gimthuakna leh haksatnate theihsiamna i nei ding uh a, hiai hunte a mahni a om ding dan, Toupa hon sinsaknop om a, hon pi na ahih dan i theithei ding uhi.
Gimthuakna leh haksatna chihte gen khak aom ching in Job tanchin tuh lungsim ah ahong suak sek hi. Bangziak a tua bang haksatnate thuak diam chihtuh a tanchin i theih chiat sa uh leng ahi. Job bang in gingtute hinkhua taktak leh om ding dan zaw maw, mahni hihnate ki mangngilh a, nopsakna sang a thumanna leh thuakgimna teel zawk na hi zaw eive. “….Jesu’n a nungzuite kiang ah, “Kuapeuh in a hon zuihnop leh amah ki mangngilh in, a Kros pua in honzui hen. Kuapeuh a hinna humbit ut in a tan ding a; kuapeuh keimah ziak a a hinna tan in a humbit ding hi. Min khovel a pum in nei henla, a hinna tan leh amah ading in bang a phatuam dia? Ahihkeileh min a hinna sik in bang a pethei dia?” – Matthai 16:24-26.
Hiai khovel a nuamtak a khosa ding in ki koih gige keini, Satan in i siat theihna ding uh, Toupa apan i gamlat theihna ding ua lampi nuamnuam hon gelsak leh hon ngaihtuah sak ahi chihleng phawk thakthak leng i ut hi. “….I doute zaw sa leh sisan ahi kei ua, lalnate leh, thuneihnate leh tu a omlel mial tung a khovel vaihawmte leh vanmunte a kha gilou hon omte ahizaw uhi.” – Ephesate 6:12. . Hinkhua nuam lamet gige na pen a hoihna om mahleh huntam zaw ah tuate’n siatna, Toupa toh kigamlatna hon tung ut zaw hi
Tu in tangval dinmun in ka omta a, nu-le-pa te’n hon thuhilh theilai mahle uh mahni a ki toudelh thei ding a ahong gingtak ziak un thuhilhna kaza mengmeng nawn keihi. Himahleh neulai, naupang lai khong in ahihleh a hon itna ziak un hon thuhilhna uh atam a, i utna ahoh theihlouhna ding bang, i lunglutte hon lunglut pihlouh uh bang atamsek hi. Hiaite tuh eimah hoih zawkna ding a honna pina uh ana hi zaw ahih dan theihsiam semsem in aom hi. Nuamtak alawmte toh vapawt ding chih bang khangdawn hunlai a i ut penpen ahi. Himahleh nu-le-pa’n lawmte toh siat khak ding, thilhoihlou te i va hih ding lau in pawt bang ahon kham sek uhi.Nu-le-pa deihlouh dan a i om khak hun hiam, Amau lamet i batlouh khak leh sawi na bang i tuah hun a om zel hi. Tua bang sawinate eite a hon itna uh, ahon deihsakna uleh i hoihna ding a deih luatna uh ahi zaw hi. I Toupa hon iitna tuh hiai sang mah inleng a thupi zaw ding hi. I niteng khosakna a i tuah louhlouh ding uh bangziak a sawinate khong tuak zel i hi ding ua? Bang ziak a tua bang haksatnate, gimthuaknate chihte maituah zel i diam? Chihte ngaihtuah thakthak leng, Toupa hon itna ziak, i hoihna ding, Amah deihdan a i omna ding uh na hi zaw hi.
“….Na thuak uzaw noumau ading ahi; tate tung a hihbang in Pathian in na tung uah a hih a; pa sawilouh ta kua a om ngei a? 8Ta chihna teng lawh a sawina lawhlou a na om un bel, ta tak hilou in, sawn na hi ua kei dia. 9Huailou leng eite honsawi ding, sa ah pate uh i nei uhi, huaite lah zahtak ngal hang a; huai sang a thupizaw in, i hinna ding in, khate Pa thuthu in i omkei ding ua hia?” – Hebrute 12:7-9
I thukhitna ding in leitung a nuamtak a khosak ding lamet gige sang in thumanna toh hinkhua zat ding teel zaw leng i ut pen ahi. Toupa deihdan in khosa in, Amah thute thei in tuate i hinkhua uah hinkhiat pihleng bang chituk in haksatnate thuak mahlehang leng lungkimna thuguk Toupa apa’n i neithei gige ding uhi. Khovel hoih nawnlou i chisek uh a ahi mah leng ahi, hichi bang khovel a i sihma uh, Toupa Jesu hongpai ma khosa tou den ding I hihziak un Amah a kinga a, thute thei a, Amah deihdan a hinkhua i zat uh apoimoh mahmah ta hi. Nuamtak a khosa a, meidil a i lutsang un haksatna leh gimthuakna i tuahding te uh teel zaw in Toupa melmuh ding ngaklah takin om zaw ni.
“….A tawppen in, Toupa leh a hatna thagui ah thilhihtheihna nei in hongom un. 11Diabol zekhemnate na dou zoh theihna ding un Pathian galvan kim in kivan un.“ – Ephesate 6:10
“….Huaiziak in ni hoihlou a na dou zohna ding un leh na hihzoh vek nung ua leng na din theihna ding un, Pathian galvan kim la un.” – Ephesate 6:13
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
16th February, 2022 | Weekly-Inspiration No. – 89