KHRISTIANTE SOISAKNA THU A LUNGPUT

Khristiante soisakna leh bawlsiatna khawng a vangkim in kiza zelzel hi. Huai ban ah, Bible paih, Bible haal, Bible botsia chih khawng leh Biakinn hihsiatna, luhna leh thaanghuaitak a zatna thu khawng leng kiza in media leh social mediate tungtawn in muh in hong om zelzel hi.

Huchibang thute i zaak chiang un i lungsim uah bang a hong om sek? Amasa pen in i lungtang hon hihliam pah a, ki pawna petmah hi. I lungsim nat toh kiton in thangpaihna in zui sek ahihziak in, Pathian in a khialte gawt ek in gawt pah mai leh chihhuai sa tampi ki-om di’n a gintathuai hi. Puaknak luat ziak mah in, a khialte bangchihiam khat a thukthei ahihkeileh leng theisiamsak thei bek hile’ng chih uthuai tuntun chih bang leng omthei lua hi.

Himahleh, huchi diingdan hikhin lou hial ahihdan leng i theih uh poimoh diing hi. Hiai toh kisai a, amasa pen a i theih dua poimoh mahmah khat ahihleh, ei mihingte hum (protect) Pathian in poimoh hetlou hi. I hum zoh vual diing uh leng hilou hi. I ginna leh A Thu i gup diing him himahleh Amah i hum sawm diing hilou ahi. Amah thil tengteng Siamtu leh bangkim tung a thuneitu ahihziak in ei mihingte, Asiamsate’n Amah hum na di’n bangmah hihtheih i nei kei uhi. Ei hon poimoh kei mahleh Amah ah i kipahna di leh Amah thupina di’n A seppihtute di’n hon zang hi.

‘Biakinn’ i chihchiang in, ei mihing’ khut in i bawltawm ahi. Ama’n A hon deihbang a, Amah i biakkhawmna mun ahihziak a siangthoutak leh zahtattak a i kep diing him ahi. Huai toh kiton a i theih diing ahihleh, khut a i bawltawm biakinn sang in Amah khutsuak A Biakinn, A Tempul, A sisan man tamtak a aleisa Saptuamte ah Pathian buai zaw hi. I lungtang mah buaipihzaw a Ana enchian gige ahihziak in, huchibang thute i zaak chiang in leh huchibang a khialte tunga bangchibang lungsim i na pu a chih ah leng buai zaw hi. Gingtute’ le mihing mah i hihziak un, hon sukha a lungtang hon khoih kha di thil tam thei mahmah ahihman in, thilte i dawndan mah hong poimoh zel hi.

Huchi himahleh, ei gingtute lungsim nasatak a hihkha thilte’n Amah leng sukha ahihziakin, huchia gamtaangte Ama’n ana dawng di’n koih pah thei leng, hoih diing hi. Amah vaihawm diingdan i ngaihtuahsak poimoh hetlou a (Isai 40:13-14), i lungtang put pen i na bawldik poimoh zaw hi (Paunaakte 4:23 ; Romte 12:2).

I pawna na mah ke! Himahleh, huchibang a khialte tung a thangpai a, hua a, Pathian in A gawt diingdan leh A gawt diing hun hiam ngaihtuah in buai kei thei hamham le’ng hoih pen diing hi. A thuakte i na thuakpih a, i na thuumpih a, huaite tungtawn a eimah ngei ah leng, Toupa theihna leh iitna a i na khansem leh, gah manphatak suang hizaw diing hi.

Huaibang a gamtat hoihloute siamtu Pathian in a lungtang uh A theihsuak vek ban ah,  Toupa Jesu Krist sihna leh thohnawnna ziak in amau a diing inleng Tangtawn lametna kihong hi. Pathian in thil tungtawn a hih diing thei lawtel a, a tung uah thutanna dik Ama’n tun diing ahi chi in ki lungmuangsak ni (Matthai 5:45 ; John 3:16). 

I chang tel ah, melmate iit diing kia hilou in, hon sawi te a di natawm a thumsak di’a Toupa Jesu Khrist in hon deih ahihmahbang in, a gamtatdan ua i lungtang kitamkhamsa toh amaute a di’n i na thumsak diing uh ahi zaw hi. Amau a dia i thumsak leh amaute tung a iitna suah kihi ahi chih leng chiamteh poimoh diing hi.

Pathian vaihawm diingdan ah buai pah  sawm lou in (Matthai 5:45), i melmate iit a, a hon sawite thuumsak a, vualzawl zaw geih (1 Peter 3:9) thei diing in eimah adi’n leng thuum ni.

En i hih diing hihlou zen in Toupa Pathian hih diingte buaipih nawn kei ni.

June 11, 2020/NH_13