LAU KE’N!

0

Joshua 1:9
Thu ka hon pia hilou hiam? Hattak leh hangtak in om in; lau ke’n la, lunglel sam ke’n: TOUPA na Pathian na paina peuh a na kiang a om zel ding ahi, chi’n a gen a.

I chaangtel ahihleh, Khristian tamzawte’ lak a thang mahmah, mahni leh midangte khamuanna di’a kihahzat mahmah khat ahi. Pathianthu ahihleh, a chaang khat kia eukhia a ei hoihsakdan a zat khaak louhna dia pilvan poimoh hi. Bible i sim chiang in, a hun leh dinmun, kua leh bangthu toh kisai ahia chih thei kawm a, ei tulel hinkhua a dia bangchi zat diing ihia chih leng theih poimoh hi. “Na melmate iit in….” chih bang, a chaang khat kia eukhiak in zatheih mahleh, mi tamzawte’n kihasuanna di’n kizang ngellou hi. Huai sang in, “Amah hon hihhatpa ah thil tengteng ka hih thei hi” chih bang ei mimal hamphatna leh tha kigotna diing ahihziak in, eukhia in zat poi kisalou hi. “I melmate iit haksa lua himahleh, Amah hon hihhatpa ah itt-theih hi” chih khawng in zang le’ng chu, chaang khat leh nih eukhia hiam ahihke’h i deihnalai teng lakhia hile’ng le, zat dik hikha di’n i gingta hi.

I theih d’ua poimoh mahmah chu, i Toupa Jesu Khrist ngei leng Pathianthu mah pansan in Melmapa’n khem hi (Matthai 4:1-11). Huaiziakin, Setan leh a kaihzatamte’n Pathianthu mah heekkawi in, awlsamtak in eite leng hon khem zel uhi: Pathian’ thutak kimkhat zang in mi khem in kai puuk zou zel uhi. Laisiangthou suut tam a, tuipaaitak a i na omleh, khemna i tuahchiang in, Pathianthu mah zang in huai khemnate en leng ana dou zel thei diing i hi uhi.
Midang kuahiam hilou in, eimah bang gentehna’n ana kingaihtuah zual le’ng: Kisung-et a, ei-le-ei i hihna bangtak a ki-maituah ngam i hihleh, i sung a teeng Khasiangthou in hon awilouh thei kawmkawm a, i sa leh lungsim’ utna i sukbuchinna hiam ahihkeileh i gamtat a kisiamtanna diing hiam in Pathianthu kizangkha lawtel di’n i ngaihtuah hi. Khempuuk a huchia ana om maimah sek i hihlam kitheilou leng kitam di’n a gintathuai hi. Pathianthu tampi theikei le’ng le, i theihna chiangchiang suut thuuk di’n i kihanthawn hi.

Pathian thutak kia in Setan’ zuau zou thei ahihziak in, Khristian kichi i hihleh, Laisiangthou sim leh suut i chiing zongsak uh poimoh hi (Isai 28: 9-10). Pathianthu i theihkei leh, Pathianthu mah hong kiheekkawi a, khemna hong pai chiang a kihemkhe theilou diing i hi uhi. Pilvangtak a om a, melmapa khem chatvaih a i-omlouhna d’ua gul bang a pil a poimoh tuk in vakhu bang a nunnemna leng poimoh hi. I kisin touh zel diing mah uh ahi.
Bible sim ngellou a Khasiangthou piina kia a ki-nga a, gingtu hinkhua hattak zattheih hi di’n i gingta hetkei hi. Bangziak hiam i chihleh, Bible sim ngailou zen a Khasiangthou in hon luah dimna diing a Khalam thilte kia buaipih man kihi geuh lou ahihziak ahi. A thu sim a, suut a, huaite tungtawn a Khasiangthou in haatna hon gotdan dungzui a, gamtangkhe thei diing kihi zaw hi. Bible sim diing omlou/neilou chih leng kihilou zomah lai maw? Tu hun bang inchu, adiak a internet khoihthei chiang pawlte adi bang inchu, internet ziak a Bible suut bang awlsamzaw thamta ahihna toh suanlam diing kinei tawm mahmah hi. Nachi kei uh maw?

I chaangtel ahihleh, Gamchiam Gamlam zuan a Joshua’ makaih a Pathian in Israelte a pii tuunglai ahi a, Johsua A hanthawnna leh a khamuanna ahi. Mosi’ tha khekkhia a, Israelte nuaih nih phial makaih diing a hong kisa ahihziak in, kisitna leh lauhthawngna lianpi nei le’ng hi’n a theihsiam theih hi. Huaiziak mahtak le’ng ahi di’a, Pathian in Joshua nasatak in haanthawn a, naakpitak in khamuanna thu avel in gensak hi. Bung 1 chaang 1 a kipat i simsuk leh, chaang 9na i tun tan in Pathian in Joshua a khamuanna di’n 3vei tak hanthawnna gensak man hi: “Lau ke’n la, lunglel sam ke’n”  chi in.

A Gamchiam Gam zotna ah Pathian in Joshua ompih diing chiam a, laulou leh lunglel lou di’n khamuan hi chih i thei hi. Huai mahbang in eite leng, tangtawn Gamchiamlam zuan a niteng hinkhua i zatna uah, Jesu Khrist ziak in Toupa’n hon ompih den diing hi chih khamuanna i neitheita hi (Matthai 28:20). Toupa hoih hi. Huchi ahihlai in, A thu zui lou a, lungmuanna leh khamuanna kia lam-en leh gen i hihleh chu, ei-le-ei kikhem a midangte leng ei tungtawn a Setan in khem chihna hikha diing ahi. Pathianthu i chih, ei ut hunhun leh utna munmun a zuih a, peihlouh leh remchanglouh chiang a zuihlou chih omtheilou hi (Jacob 2:10-11). Zuikim zou diing kuamah omlou i hihlai un, thumanna piibawl diing ahizaw hi. I gingtu hinkhua kibulphuna Laisiangthou ahih diing chihna ahi.  Huaichu, i ngaihtuahna,  lungput, kampau leh gamtatte i Laisiangthou pansan ahihtaak diing chihna ahi. Ei peihdan leh lunglut hun chauh a Pathian limsak i hihleh zaw hattak leh hangtak a Tangtawn Gamchiamlam zuan a kipaikha mawk lou diing ahi. Toupa’n Joshua kiang ah, “Thu ka hon pe kei a hia?” chih dotna dawn ngailou toh khamuan thuah hi. Huai omdan chu, Pathian in A Thu mang diing in Joshua koih hi chih chiamteh poimoh hi. Bang thu pia ahi di’a i chihleh, i na gensa mahbang in, A thu a kibulphuh diing ahi (Joshua 1:7-8). A Thu in kibulphuh masa le’ng, zuau ngeilou Pathian in A thuchiamte tungtawn in A thupina a hunhun in hon musak zelzel diing hi (2 Korinthte 1:20). Eilam a i hih diingte hihlou a, Amah hih diing ngiat gige i hi uhia chih leng kidot poimoh kha di’n i gingta hi.

Tangtawn Gamchiamlam i zotna lampi lauhthawnghuai sek in, mangbathuai sek mahleh, laulou diing a thu hon pepa’n hon ompih a, hon tonpih diing thu hon chiam ahihziak in, khamuanhuai lua hi (Matthai 28:20; Hebrute 13:5). Himahleh, A thupiak zuilou leh hinpihlou pi a, haksatna i tuah chiang a thakhat a A Thu in hon hehnem leh tha hon pe geih di’a i lamet uh thil haihuai hikha diing hi. Pathianthu i chih niteng a i nek kei leh kibahse thei hi. Taamsawl in hon phaak man ngak sese lou in, niteng in i poimoh diing zah ana ne zel leng, khalam thagum leng ana kingah toutou di’a, i poimoh chiang in hihhat in ki-om zelzel diing hi. Niteng hinna diing a  salam ann i poimoh tuk in, niteng Khalam ann (Pathianthu) leng i hinna diing in kipoimoh hi (Matthai 4:4). Salam ann kia nesek i hihleh, khalam ah ana kikhang khollou diing a, Amah toh kizopna duk-dak leng kinei khollou diing ahi chih leng chiamteh ni. I hih diingte hih di’n kisa khe thak ni maw!

Tangtawn Gamchiamlam zuan a hiai khovel gamdaigam a hattak leh hangtak a malam i nawt theih zel na d’un Pathianthu a kibulphuh di’n niteng in pan lathak zel ni. Pathianthu i theihtam deuhdeuh leh, Toupa’n hon iitna kitheihsiam deuhdeuh hi. A hon iitna i theihsiamna in i ginlelhnate leh lauhnate a hunhun in delhmang zel hi (1 John 4:18).

 
Jesu Khrist mitsuankawm ni maw, lawmte! 

-Chingngaihlian Tunglut 
August 01, 2020/NH_16

(Laigelh toh kisai kupbeh nuam a omleh, laigelhtu +919892316430 ah thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment