NU-LE-PA MOHPUAK

0
Diuteronomi 6:7
Na tate uh phatuamngai tak in na sinsak ding ua, na inn ua na tut lai bang un, lampi a na pai lai bang un, na luplai bang un, na thoh chiang bang un na gen zel ding uhi.

 

Hiai a ei pau a thumal ‘sinsak’ pen English thumal ah ‘teach’ ahi a, ‘Teach’ thumal ahihleh Hebrew thumal ‘shanan’ a kipat ki letkhia ahi. ‘Shanan’ ahihleh, kheuh/sun/hiamsak chihna ahi. Pathian thu pen sing leh suang tung a kheuh-a-gelh bang a, ta-le-naute lungtang a kigelh di’a sinsak diing chihna hi. Huai mohpuakna midang khut hilou in Nu-le-pate leh Nu-le-pate dinmun a dingte khut ah kinga hi.
Kheuh-a-gelh bang zen a Pathianthu pen ta-le-naute lungtang a namkip a a-omtheihna dia sinsak chih pen thil olsam hihetlou napi in, Pathian in huai mohpuakna Khristian Nu-le-pate kiang a Apiak ahi. Huchibang a kisinsakna pen tup-le-ngiim a neih hileh zaw, ta-le-naute’n mangsak ngei nawnlou diing ua, ahunhun in hinkhiakpih thei diing uhi. A deihteelna uh leng, amau leh amau a ahong kizat chiang un, Pathian deihlamte mah hon teel zaw thei zel diing uhi.

 

Naupangte’n ‘Toupa ah’ Nu-le-pate a zahtat ua, thumangtak a om a, huchia vualzawlna a tan theih na du’n (Ephesate 6:1-3), Nu-le-pate leng ‘Toupa ah’ a a-om uh poimoh hi. Lungtang tengteng, lungsim tengteng leh hatna tengteng a Nu-le-pate’n TOUPA Pathian iit a hong kisin chiang un ‘Toupa ah’ omthei pan diing uhi (Diuteronomi 6:5-6). Huchibang phaakchiam delh a Nu-le-pate’n pan hon lak chiang un, Pathianthu a genthoh kia hilou in, kampaudan leh omdan in leng zui dia, huchi’n ta-le-naute’ lungtang ah Pathian deihbang sinsakna pen ana kigelh mai diing hi.

 

Nu-le-pate’ paudan leh omdan tungtawn in ta-le-naute lungtang ah kheuh-a-gelh bang zen in sinsakna kip ana kipekhe zel hi chih i theita hi. Paudan leh omdan pen lungtang leh lungsimput muhtheih leh zaaktheih diing a hong kilangkhia ahihziak in, a hoih zaak leh muh tam diing a-om leh, naupangte’n ahoih sin tam d’ua, a sia zaak leh muh tam diing a-om leh, a sia sin tam diing uhi. Huai ahihman in, lungtang enchian Pathian’ (Sam 139:1; Jeremia 17:10) deihlamte delh diing in pan lathak di’n kisa thak ni. Panpihtu nai leh mansa in Amah-mah eite a di’n om gige hi chih lungtang ah vomkip leng thathak kingah diing hi.
(Sam 145:18; Sam 46:1; Luke 11:12-13)

 

Jesu Khrist mitsuan kawm in aw, nu-le-pate!
Chingngaihlian Tunglut 
May 28, 2020/Parenting_02
(Laigelh toh kisai kupbeh nuam a omleh, +91 9892316430 ah laigelhtu thuzaak theih diing hi.)
Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment