PATHIANTHU ZAAKDAN

0

Nasepte 24:25
Huan, Paul in diktatna thute, kidek thute, thukhen-vaihawmna hongtung dingte a suipih detdet lai in, Felik in lauhuai a sa mahmah a, pai nawn phot tadih inla, hun lem ka neih hun chiang in k’on sam ding, a chi a.

Khristian khat kichi i hih ziak in Pathianthu theihna chiang kinei vek hi. Pathian kikhek ngei lou himahleh, ei mihingte’n niteng hinkhua a i tuahte dungzui in Amah i khekkhek uhi. Huchi ahihziakin, Pathianthu i zaak utdan leh zaakdan leng hong kibanglou sek hi. A khauh deuh a; eilam ki-etna diing hiam, eilam in i taksap leh kibawlna diing lam thute khawng ahih chiang in kiza peihlou sek hi. Huchi i hihleh bel, Sawltak Pawl in thu nuamlou Felik kiang a ava puak leh Felik in ana paisak bang a en leng Pathian thu in hon sukkhakdan a noplouh chiang a ana nawlkhin kha zel ihi kha diam?
Pathian’ vualzawlna chituamtuam, humbitna, khamuannna, iitna, hehpihna, zahngaihna leh hasotna chihte za di’n mansa in ki-om gige mahleh, eilam hon nuamlousak di zawng a Pathianthu a hong tun chiang in kiza peihlou zel hi. I samitna kilatna ahi. Gingtu hinkhua i chih, samitna om nawnlou di hilou in, samitna hong suak chiang a Toupa’ thu toh kituak a, ana nawlkhin a, Toupa thu toh kituak a Khasiangthou in hon piina ana zuih ahizaw hi (Luke 9:23).

Khelhna kiphawkna di tan chauh tung a maban a hihbeh diing kisiikna leh kiheina/kikhekna diktak i tun kei leh, Juda Iscariot bang a Pathian ngaihdamna leh A zahngaihna mukha lou a, pom theilou a Setan’ mohpaihna a leitung hinsung omze neiloutak a zattheih ahih ban ah, tangtawn hinna natawm kichaan kha diing hi. Pathianthu ahi bangbang a, a nemna leh a khauhna toh buchingtak a i saan keileh, i neihsa teng leng laak sak a kiom thei hi. Himahleh, hon hihnuamte hi’n hon hih nuamloute hitaleh, a hi bangbang a i san leh piak behlap a ki-om lai diing hi (Luke 8:18).

Akhitna di’n hiai suangtuah lai ni: Haksatna leh gentheihna tuak i kisak huntawk nak kaal a, kisiikna di thu leh eilam ki-et leh kibawlna diing thu hong tun zomah lai chiang in, kingaikhe ut mawngmawng lou hi. Hiai kha chapouna ahi chih thei ni. Jesu nungzuihna zaw, mahni kimangngihna ahihziak in khauh a, a haksat petmah hun leng tam hi. Himahleh A thuchiamte a ginom gige Pa thuman kaan a tawldam huai leh damhuai khovel thil bangmah in hon pe theilou hi (John 3:30).

Jesu Khrist mitsuan kawm zel ni maw, lawmte!

 

-Chingngaihlian Tunglut

May 23, 2020/NH_07

(laigelh toh kisai kupbeh nuam a om leh, +919892316430 ah thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of our co-founder and our in-house counsellor. She does freelance counselling in church and community. She is also involved as a counsellor at Bombay YMCA Counselling Centre, CBD Belapur, Navi Mumbai.

Leave a Reply

Your email address will not be published.

Book Appointment