“THILHOIH HIH DIING I THEI AKA…..”

May 30, 2020 · 2 minutes

Galatiate 6:9

Huchi’n, thil hoih hih chimtak kei ni; i lungkiak kei leh a hun tak ah i at ngei diing ahi ngal a.

Mi soisel utse lua ahihkei leh ki siamtan ut selua a thil i gen chiang un, ‘na’ leh ka’ zang lou in ‘i’ leh ‘ua’ kammalte ki zang zel hi. Mi mohsakna di tan chauh a mahni ki gentel zel i hi kha hia?

“Thilhoih hih ding i thei aka, hilehle i hih zou kei a hiven” chih kampau zat kihat thei mahmah hi. I Laisiangthou in hon sinsak zaw ‘thil hoih theih’ tan kia hilou a ‘thil hoih hih’ tan leng uapkha zaw hia maw (Jacob 1:22)?

Jacob 4:17 in ‘thil hoih hih di theih a hih louh khelhna ahi’ chi hi. Pilvan poimoh hi.

Pathianthu in hon hilh ‘thil hoih’ leh ei mihingte lungsim in i suangtuahdan ‘thil hoih’ ki lehngat daih sek hi. Huchi himahleh, Khristian i hihna ah, ‘Thil hoih hih diing i theih pen leng Pathian thu toh kituak mah hi diing in ka koih hi. Huai chu, eimah mah leh midangte a dia phatuam diing leh Pathian thupina kilatna diing thilte pen ‘thil hoih’ a hizaw hi (Romte 8:28; Philippi 2:3).

Romte 3:10 in hon hilh mahbang a, mi diktat khat lel leng ki-omlou ahih leh, diktat tak a thil khat lel leng ki hih theilou chihna himai hi. Himahleh Jesu Khrist’ Hotdamna in mi diktat hon suaksak ziak chauh in thilhoih hih utna leh hihtheihna leng kinei pan hi. Amah, i Toupa Jesu Khrist panglou a bangmah kihilou ahihdan theih chian sem in hong om hi(Johan 15:5). A khamuanhuai diak chu, Amah toh a hitheilou khat leng omlou hi (Matthai 19:26).

I chang tel a ‘Thil hoih hih chimtak kei ni’ a chihna teng kia meilet ihih khak a leh panla lelte a dia tawl-huai pi hithei a, a kipanthakte a diing in leng lit-huai kha thei hi. ‘I lungkiak kei leh a huntak a agah ki aat *ngei* diing hi’ chih thuchiam in zui ahihlam leng i meilet poimoh hi. Pathianthu zaw bukim gige hi a, eite’n i ut dandan un i paipih sek ua hiven.

Ngaihtuah sau zek dia hoih ahihleh, thilhoih i hih chiang a agah aat ngei ding ihih leh, thilsia i hih chiang a leng a gah ki aat ngei diing chihna hipah zel hi. Zahngaihna kiningching nei Pathian ahihziak in, thilsia i tuh gah aatlou a hon koih thei leh hon koih zel ahihziak in A min thupi i phat ahi.

Jesu Khrist mitsuan kawm ni maw, lawmte!

-Chingngaihlian Tunglut

May 30, 2020/NH_09

(Laigelh toh kisai kupbeh nuam a om leh, +919892316430 ah laigelhtu thuzaak theih diing hi.)

WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)