Pa Lou Ngal In A Thei Kei

0

Noah tangthu a theilou om dingin I gingta kei hi. Tun na hun tomchik Noah hunlai bang a om hi’n ki ngaihsun inla’n, huai hunlai a mi te’ danin ki ngaìhsun mah di…. Noah bang chi bangin I koih in I ngaihtuah dia? Ki gen thei khang maw, ahihkeileh mihai bang in I koih kha thei hi, amah innkuan te lou ngal in hai sa vek uh chih Laisiangthou ah leng I muthei hi.

Awle, tu kal in hiai thu saulou chik in ki kumkhawm leng I chi hi. “Mihing Tapa’ hongpaina tuh Noah hunlai bangbang ahi ding. Tuichim tung ma in, Noah long a alut nitan in; mi’ te’n ane un, adawn ua, ji leh pasal in akinei ua; tuichim höngtun a, avek ua ataih mang masiah bangmah aphawk kei uhi. Huaituh Mihing Tapa hongpai nawn chiang a thil omdingdan ahi.” – Matthew 24:37-39.

Tulai khovel paidan I et a I ngaihsun chiang in, Noah hunlai bang a ki omta hileh ki lawm hi. I ut bangbang in i gamta ta ua; ki iitna omnonlou; Pathian thu te’ angaihtuah ngitngêt a atu ki tam nonlou a; sumduh na kia leh khosakna anop zawk na ding kia lam-en in I hunte ki jangta hi. Lemna leh muangna koimun peuh a om nonlou bang ta hi. Himahleh Pathian a amuan na uh nga a, Amah belte bel I omna chiat uah I lungmuang theilai hi.

Noah hunlai bangin Mihing Tapa hongpai ding tua i changtêl a I mu hi. Huai hun leh ni jaw Pa kia loungal, kuamah in, van a angelte leh Tapa nasan inleng athei kei uhi. Tua hun ngak a omta I hi diam? Ahih keileh mahni utna leh nopsakna a omlai di na chi hia? Hiai bang ngaihsutna te nei a, eimah ut bangbang a om a; Pathian phawklou a i om khakding lauh huai hi. Toupa hongpai ding kua man a theihlouh mah bang in, I hinna a bei chiang in Ei adia I khovel bei ahi chih phawk thakthak ni. Tua ahihman in, tu’n a si bang in I ki ngaihtuah dia, tua ni chiang a kaihthou a om in Pathian kiang ah I om khadiam chih eimah ki dot gige poimoh hi.

Toupa’ deihdan bang ahia, I hotdamna I ki chian ta hia chihte ngaihtuah in I thumna chiat ah kilan khia in kipe ni.

“Sapte tampi ahi ua, teelte bel tawmchik ahi uhi”. 22:14. 

Tua asapte leh A teelte lak atel samding in NANG leh KEI Toupa’ kiangah kilaan gige ni. Amen.

– Thangginom Hangshing

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment