PAEDOPHILE LEH CHILD MOLESTATION: Psychological & Christian Response

World Health Organization sui dan in, nikum 2019 sung lel in, hiamgamna tuak naupang (Child Abused) Billion khat bang om a tuat ahi. Khovel kilchih ah hiai banga naupang kumchinglou tung ah sualgamtatna na omdeuh zut hi. Huchi bang komkal ah, I gam un zong, hi bang sualna na ki maituah ta. Huaiziak in, khotang heutute, Saptuam Heutute, leh mipite mah mah in zong kitheimohbawl vual hinawnlou a, constructive tak a pan ilak uh angai hi.

Child Sexual assault toh kisai kikum ding chile, topic tuam tuam kikup theih in om ding a, tuate lak ah, kei zilna leh theihna lamdeuh chi in, “psychological perspective leh Christian response” chih thulu toh iki kum ding hi.

CHILD SEXUAL ASSULT
Child Sexual Assult toh kisai, a suisiam te’n chi nih in khen uh hi. Huaite ahihleh;
(1) Paedophile leh
(2) Child Molestation ahi hi.
Child molestation ahihleh piching leh tuailai te’n naupang tung ah sa utna pichinna dia hiamgamna genna ahi.

Pedophile ahihleh Psychological disorders diagnostic Manual (DSM-5) hilhchetna dan in, “naupang kumchinglou sa-utna toh etlahna” genna ahi. (an ongoing sexual attraction toward pre-pubertal children)

Paedophile ichih Psychological disorder khat a ana kikoih ahihi. I theih ding khat bel, Paedophile teng Child Molestation hivek lou a, Child Molestation teng Paedophile hivek lou.

Hiai bang a khen theih a bat hang in, naupang tung ah hiamgamtatna leh thangtatna ahi tuaktuak.

Statistics ki chiantak mutheih omkei mahleh, hichi bang Paedophiles leh Child Molesters khovel pumpi ah tamkhop om a theih ahi. A na suisau deuh te gen dan in, hichi bang victim thuak te 90% amelthei te khutnung thuak ahi uh, chih in na suikhia uh hi.

PSYCHOLOGICAL RESPONSE
Hiai bang Sexual Assult tuak naupang pen ahihtheih liai leh Mental Health Professional amuh ding ahi. Naupang (victim) a ding in, Psychothery phatuam mahmah a theih ahi.

Trauma-focused Cognitive Behavioral Therapy
Hiai psychological therapy in, victim (naupang) ading in, lungphawng thilsia tuahna apan kingaihsiatna dal thei a, puakdan siamna pia hi. Huai ban ah, mahni ki muangngamna zong tun hi. Victim(naupang) kia hilou lou in, anulehpate a ding a zong Psychological counselling poimoh hi.
Huai ban ah, Peadophile leh Child Molester (Naupang tung ah thangtattu) te ading in zong Psycholgical Counselling kiphamoh veve.

Mihing te, I gamtatzia a thununtu I ngaihtuahna hi a, I ngaihtuahna a diklouh chiang in, I gamtatzia zong diklou hi.

Tua ahihziak in, naupang tungah a gamta khial mipa ading in zong, Psycholgical Counselling na phoimoh hi. Huai ding in, CBT(Cognitive Behavioral Therapy) mah phatuampen a theih ahi.

Hiai bang psychotherapy in ngaituhna kawi (distorded) bawl hoih thei a, “naupang kumchinglou tung ah thangtatna” sualna kokhuk sung ah apuk nawnlouh na ding in panpih hi.(Relapse prevention)

Huai kia hilou in, Child molesters leh Paedophiles te treatment ding in, medication zong phatuam in a kigen hi. Huai ding in Psychiatrist te amuh ding uh kisam.

Gen ta maimai le, medroxyprogesterone acetate (Provera) and leuprolide acetate (Lupron) leh antiandrogens damdawi kichi sa utna dauhsak na ding in Psychiartrist te’n pia zel dan uh ahi.

CHRISTIAN RESPONSE
Hiai bang lungphawnghuai sualna I gam uah ituah chiang un, ei Christian te’n bang loh di?
Hiai bang sualna leh khelhna toh kisai ah, I laisiangthou in bang hon sinsak hiam, en dih ni.

Non-Judgemental
Amasa in, thil khat peuhpeuh I etchiang in, ei Christian te’n Jesu I limliang leh point of reference (tehna) ah ineih uh kul hi. Johan bung 8 ah I muding uh a, Jesus mai ah, mikhial angkawm numei khat hong tun uh hi. Mosi dan bangtak hileh, mohpaih a, sung ah denglup ding ahihi.(Lev. 20:10)
Huchi himahleh, Jesus in bang chi in a dawngthuk hiam ichih Johan 8:7-11 ah imu hi.

“Huan, a dot lailai ziak un amah a ding a, a kiang uah, Na lak ua khelhna neilou peuh in amah suang in deng masa heh, a chi a.
Huan, amau a thugen a zak un, upa pen in a pan a, a tawp pha in, khatkhat in a gel khe zel ua;
huchi’n Jesu kia a om a, numei a lai a a omna ngei a om toh.
Huan, Jesu a daktoua, a kiang ah, Numei, ko’h om ahi ua? Kuamah in siamlouh hon tangsak lou hia? a chi a.
Huan, ama’n, Toupa, kuamah in hon tangsak kei, a chi a. Huan, Jesu’n, Ke’n leng siamlouh k’on tangsak kei; pai inla, tunung in hihkhial nawnta ke’n, a chi a.

Hiai ah imuhtheih tuh, Pathian in khelhna hua mahleh, mi mikhial te it mahmah hi.

Luka 5:32 ah Jesu’n bang chi hiam ichih leh “Mi diktatte sam ding a hong pai ka hi kei a, mi khialte kisik ding a sam di’n hong pai ka hi zaw, chi’n a dawng hi.”

Ei Christian kichite, Bible ummi leh kisinsak ihihna uah, khelhna pen khelna mahtoh thuklou a, hehpihna toh I kep ua, a tung ah psychological help poimoh bang bang I piak uh kiphamawh zaw hi.

Johan bung 8 ah imuh mah bang in,
Pathian kia in siamlouh tansakna leh mimohpaih theihna power(thuneihna) nei a, ei Christian te’n midangte siamlouhtansak leh mohpaihthei ding in ki ding lou hi. (Ps.50:6, Is. 32:22)

Jakob:4:12 “Dan pepa leh vaihawmpa khat lel om, hondam theipa leh hihmang theipa nang na vengte vaihawmkhumpa kua na hia?”

Huaiziak in, Paul in Romte 12:21 ah, gitlouhna zoh a I omlouh ding uh, huai ban ah, hoihna toh gitlouh na I zoh zaw ding uh ana chi hi.

Ahitak in genle, angkawmna, tualthahna, zuaugenna, nekgukna, naupang kumchinglou tung ah thangtatna, leh a dang dang khelhna ah I chih teng uh, Pathian mai ah ki bangvek hi. (Is.65:6, Rom.10:1, Jakob 2:10)

Huaiziak in, michih tek in Pathian hehpihna kitasam a, Jesus Chris ah hotdamna leh ngaihdamna ki poimoh vek hi.

Counselling Helpline
Ngaihtuahna buai leh, kituplou, naupang kumchinglou etlahna a neite (Paedophiles leh Child Molesters) a dia, saptuam ahihkeileh khotang level ah, ahaksatna uh a genkhiak theih nang uh, platform I bawl uh hon kiphamoh kha ding hi.
I gamsung uah, Counselling Center omsa te iphat mahmah a, amaute’n le pan hong la ngei ding un I ging.

Huai ban ah, kei mimal muhdan hon gen leng; clients te’n a identity uh, phoulak a ngaihlouhna, Anonymous Online-based Counselling phatuam pen ding in ka gingta. Hiai bang ah pan ana lata zong om chih I theih in, a navaak huai tuanmahmah kasa hi. Amau te thuzak nuamte’n  www.theabundantlife.in  leh +919366871300 ah WhatsApp ziang theih ding hi. A nasep uh baih lou hial ding ahihna ah, phat huai kana sa mahmah.

Hi chibang panlakna, I khotang sung uah, a tamzaw hong ombeh leh….chihtuh ka duhthusam ahi.

Prevention is better than cure

THUKHITNA
Hiai ah, saulou ikikupna uah pan in, Paedophile leh Child Molester te ngaihtuahna kituplou leh psychological help poimoh uh ahihdan I gen ua. Huai kia hilou in, Pathian in khelhna ichih khentuam neilou a, zuaugenna apan tualthahna dong aki bang in ngai a, hua mahmah; himahle, mikhial te it mahmah, chihzong imu uh hi. Huaiziak in, ei Christian te’n naupang kumchinglou tung ah tatsia khate, agape itna mah toh I it ua, akhelhna uh khelhna bang ah thukmailou a, lamtuamtuam ah I panpih ua, Jesu a hotdamna leh ahehpihna huangsung ah I pilut uh, I mohpuak uh ahi.

[Agape itna toh midangte I it theih ding uh, Pathian hon deih dan ahi]

“The only difference between the saint and the sinner is that every saint has a past, and every sinner has a future.”- Oscar Wilde

Feel free to share
(Laigelh toh kisai kupbeh nuam omleh, laigelhtu +917892475073 ah thuzaak theih diing hi.)

©thangliankhup (Counselling Psychologist) 11/08/20
Email: k.neihkhup@gmail.com
https://www.facebook.com/Hand-Span-International-Ministries-283333148837348/
References:
https://theconversation.com/psychology-of-a-paedophile-why-are-some-people-attracted-to-children-59991
https://www.apa.org/pubs/books/4317136/tab2
https://www.mayoclinic.org/diseases-conditions/child-abuse/diagnosis-treatment/drc-20370867