Niteng hinkhua a banghiam i lam-et louh lam ua thil hong om chiang in lamdang sakna leh kingaihtuah vungvung na a hon tut hun a om thei zel hi. Hiai bang a thil i tuah khak chiang un i pona mahmah uh a; natna bang mai a i lungtang uh hon suk khak hun leng a om zel hi. Mihing te’n duhthusam te gel in tuate delhdelh mahlehang i deih bang uleh i ut bang te uh muh theih gige leng ahi sam kei hi. Hiaite bang thilte i ngaihtuah lai un Pathian a i muanna uh bang ah akinga a chih kivelna ding tamtak hong om hi. Bang ziak a Pathian a muan ding a diam chih asan leh a ziak theihchet a poimoh hi.
Insung leh khotang khong a i ki thuhilhnate ua i zak mun mahmah utuh, mi khat in bang hiam a hinkhua a lungkiatnate a hon neih chiang in na ginna a neulua a ahi, Pathian muan zoulou deuh le hithei na hi chih hiam; na ginna hat sak in chi’n i ki thu hilh sek uhi. Hiai bang a i ki thuhilhna pen uh a hoihlou i chi zenzen kei a himahleh bang ziak a ginna neih ding, bang chi bang a Pathian a i ginna hatsak thei ding i hia chih a lampi i ki theih siam sak uh apoimoh masa hi. Ginna ziak a hotdam a ki om ding ahi chihtuh thudik ahi a himahleh bang a i ginna uh, bang a i ginna san uh chih te kichian tak a theih a ngai hi.
Ei Lamka khong a omte bel atam zaw gingtu ngen i hi uh a; i ginna uh bang a chia va kidot chih leng a om khol kei hi. Pu le pa khang apat Khristian inkuan a khanglian te ngen i hih ziak un tua ginna pen tamtak in theisiam mah lehang mi tengteng in theivek bang a ngai i hi ding uam chih kidot a poimoh mahmah hi. Khopi khenkhat a nasem a omte lak ah bel seppihte atam zaw ging lou mi ngen ahi uh a, amaute lak a i om chiang in i gingtu hihna va gen lang keimahlehang om dan, gamtat dan leh thilhih ding leh hih louh dingte ah i gingtu hihna a hong kilang khethei zel hi. Hichi bang hunte ah amaute’n bang a na ginna uh chih hon dot chiang un i ginna kichiantak a amaute theihsiam ding agen a poimoh hi. Laisiangthou thu te avek in thei zou vek kei hial ni, himahleh i ginna uh hon hatsak semtu leh hangsanna i neihsemna uh a thute sim a tuate theih a hing khiat pihna ahi. A thute sim lou leh theilou pi a Toupa Jesu eite adia a hong sihna tan lel a hun sak i hih khak ding uh alauh huai hi. Laisiangthou te mahmah sim tam lehang i ginna san mahmah uleng niteng in theihsiamna thak a hong om toutou lai ding hi. Laisiangthou thu toh kisai theihsiam louh omte Pastorte hiam, Upate hiam leng adot theih gige lai hi. Tulai in ahihleh internet tungtawn bang in i theihsiam louhte uh zong a sim theihna ding a tam mahmah hi. Hiai bang a internet i neihte uh bangleng Toupa thute theihbehna in zang thei semsem leng i kideih sak mahmah hi. Toupa thute theihsemna in Amah a muan semsemna hon tung a; Amah deih bang a khosakna leh thumangna hon tung hi. Hiai mah tuh Abraham tanchin ah chiantakin i theithei hi. (Hebrew 11:18-19; Genesis 22). Pathian a muanna pen zaw ginna thu theih a hun mai hilou in, tuate thei semsem a Toupa deihna bang a niteng hinkhua a hinkhiat pihna a hong hi zaw hi.
Neih leh lam thupi taktak leh lohchinna i dong te uh ziak a Pathian muanhuai ahi maw chi’a tuate a ziak lel a Pathian a muanna nga i hih khak ding uh kivel thak leng i deih ahi. Hiai bang a neih-le-lam leh lohchinnate tuh Toupa a i muan semna ding uleh Amah i phawk sem na ding ua hon panpihtu ahong hih zawk ding ahi. Job bang in khatvei thu in i neih i lamte uh hong bei leh Pathian ah i muanna uh koi ah a om diam chih i kivelna ding un zang leng i deih hi. Khovel thilte (lohchinna, sepna leh relationships..) te a lungsim tamtak leh ngaihtuahna i piak te sang un Toupa ei dia a hong sihna thu mah theisiam thei ding in ngen in thumthum leng, i poimoh dangte uh zaw Aman a hunhun in a hon guan ding hi.
“Tangliante a paimang ding ua, tang neute leng suan in a om ding uh; ka chitna ahihleh nang a kipan in a pai mang kei ding a, ka lemna thukhun leng suan in a omsam kei ding, Toupa hon hehpihpa’n a chi hi.” – Isai 54:10.
A tawpna ah i gen ut chu, Pathian a muanna pen a thu lel a hunsa a sep ding leh zuih ding omte hih leh zuih sawm louh na ahi. Kei mimal kimuhdan leh ngaihtuahna leng ahong hiding a, gingtu hinkhua a nungzuihna hinkhua taktak tuh haksa kasak penpen a hong suak hi. Hiai ka chihna in haksa tak a khosa den a lunggim tak a om kahi ka chihna hilou in, niteng in ka khros puak ding a om den hi ka chihna ahi. Hichi bang a niteng a Pathian deihdan a om teitei na in kipahna, lungnopna leh lungkimna khovel in a hon piak theihlouh a hon neisak hi. Gingtu hinkhua zaw kipahna om tham mahleh haksatna leh lungkhamna mun a lamen tak leh kipaktak a om theihna a hong hi zaw hi.
Naupang chik hih lai khong in laisim ding chih khong ki thadah thei mahmah in, exam hun hongtung ding hita, lai sim lou pi thum ekek in Toupa hon pass sak teitei in aw chih hun a om hi. Eilam a mohpuakna om pen sem loupi a Pathian a muanna ngak a lungmuantak a om khak ding thil lauh huai tak ahi. Pathian a muanna kichi zaw eilam ah leng i sep ding uh i bawl ding uh a om hi. Tuate tuh hiai te ahi chi’n i genthei kei; michih hihna leh om dan a leng hong kinga zaw ahihziak in, bang mohpuaknate i nei a, Pathian a i muanna ziak bang a, Amah a i muanna ziak in i hih ding bang a om a chihte i kivelna uh hong hi nawn leh i chi hi. Matthai 25:15-30 a Talent gentehna thu in i mohpuakna utoh kisai gen ding tamtak anei hi. Tuni’n Pathian in nang leh kei talent tuamtuam a hon piak a om a, tuate gen kim sipsip theikei ni himahleh hiai te bang chi’n i zang a, Pathian a i muanna ding un tuate i zang thei hia, Pathian thupi leh thilhihtheihna akilat semna ding in i zang thei hia chihte i kivelna uh hong hileh i deih pen ahi.
Pathian a muanna kichi zaw houchik leh hun tomchik a theihsiam himailou in, haksatnate tung tawn bang, ahihkeileh hinkhua a lampi tuamtuam i totkhak te uh tungtawn un Amah muanhuai ahih dan hon musak in hon theichian sak zel hi. Hiai te’n niteng a i hunzatnate ua Amah muanhuai leh muantham ahihdan hon thei chian sak tou semsem lai hi. Lamsuk lamtou i tot hun un thomhau leh bah mai aom lou in Toupa’n hon ompih den ahi chih phawk thei gige lehang Amah a i muanna uh hong lian semsem ding hi. Pathian in hong ompih gige ahih dan leh Amah bangkim a muanhuai ahih dan phawk thak semsem in tukal hunte manpha takin zang chiatni.
Toupa’n a thu hon piakte tungtawn in a sim peuhmah theihsiamna hon piak i ngen a. Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen lailai ahi.
Toupa’n thupina tengteng tangta hen!
- Thangginom Hanghsing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
25th May, 2022 | Weekly-Inspiration – 100