PATHIAN IN HON OMPIH

1

Thumapi:
Hiipi Coronavirus husa ging i zaak tuunglai un, hichituk tel in hong huaise dia khovel pumpi tokbuai zou hial khop in hong laang diing chih ngaihtuahphak inleng ana omkei hi.  A natna veikha a hinna ana mansuah hial i iit leh ngaihte natawm lungkimnatan bek inleng kikem thei lou in i hong omta mai uhi. Hunbi (2020-2021) lamdangtak, haksatak, khaphanghuaitak, khasiathuaitak leh thangpaihhuaitak a sihna leh manna tampi i tuah hunbi uh a hong suak tamai hi. Chimtaakhuai sa chiat mahleng, ei thu a thengsak theilou i hihziak un, Pathian samkawm zel ni uh maw?

Toupa toh ton i hihnaak uleh, Amah toh phu tou khawm i hihlam uh gengen ni hang.

Thengthei di hileh kilawm a hong om in, Vaccine bang zattheih diing in hong om panta chihlai in Covid-19 chithak; a hatzaw leh kithehdarhdan a leng kinzaw, hong suakkhia a, ‘Second wave’ i dou lellel uhi. ‘Third wave’ chihbang genlawk hial inleng hong om zomah hi. A huchihlai in, Khovel Sorkarte’n Covid-19 doudaalna leh vensakna di’n panlaak sunzom zel uhi. Curfew leh Lockdown chihte apoimoh bang in zattouh in om zel hi.

Nikum Khristmas Ni, 2020 leh Kumthak Ni, 2021 hong tung hial bang zaw, kum dang paisa a i na ngeinasehsa toh hong kibang hetlou hi. Kum dang bang hetlou in dai tuan in, chituam mahmah lel hi. Ahi bangbang a pomsiam kizil tou in i na om uhi. Khristmas leh Kumthak lopna leh kikhopkhawm theilouhna mun a omkhate a di’n nop liai kei mahleh, Internet hattaktakte leh technology ziak in online bek in program tuamtuam tampitak zattheih in hong om thouthou hi. Huaidan mah inleng sutzop theihin hong om zel tadih ahihman in, Technology ziak in Pathian i phat ahi. Mihing pilna leh masawnna, A petupa pahtawina dia kihahzat pen hunbi hizou hial di’n ka gingta hi.

Himahleh….:
Thumapi a thu nuam hetlou lah hunbi paizia  k’on taklat ziak ahihleh, hiai tengteng hong tung in paltou zel mahleng, bangkim tung a thunei leh thutawp gen diing, bangkim hihthei Pathian in hon taisan hetlou a, hon ompih den ahi chih gen utselua kahi zaw hi. Gentheihna, mangbatna, zawnna, lauhna, natna leh sihnate a taktak ahi chih kum 2020 apat in nasatak in i chiantou uhi. Tu’n ‘Second wave’ ziak in kum 2021 khauhtak in i paltou lel uhi. Bangteng hileh, Jesu Khrist, i lametna hing (1 Peter 1:3) ziakin, Pathian in siatnate leh mangbatna, natna leh sihnate lak a, hoihna suaksak zel a, siatna lak a thilhoih tampi muh diing leh kipahthu genna diing tampi hon pe zel zomahlai ahihman, A tung ah i lungdam lua hi. Lung muanna apoimoh bang in hon guantou zel a, Amah a kingak mah eite suahtatna leh nuamna ahihlam hon sinsak tou zel hi.

Tulel khovel a i tuahte uh ziak in i hinkhuate uh leh i khosakdan uh tampitak hon khek in, sihna, manna leh mansuahna chiteng paltou mahle’ng, Pathian in hon ompih ahi chih i theih kia leng hilou in, i phawktheih leh muhtheih diing in hiileng lak a tampi in kilangkhe tou zel lai hi. Khristian diktak i hihleh chu, Toupa’ ompihna leh panpihna mulou in ki-om tuanlou hi.

Mihingte’n khovel paidan i theihdan leh i muhdan uapat i phawkdan utoh Pathian nnasepdan ki lehngat nak mahmah sek hi. Thil sia a hong tun chiang in, Pathian om leh omlouh, hon ompih leh ompihlouh khawng ah i buai pahpah uhi. Thil hoihlou himhim i muh/phawk chiang un Pathian omloudan hiam hon limsak utloudan a i koih pahpah ua, huailampang dotna i neih pahpah uh leng Setan in ei a a nnasep ahi chih thei ni. Kiaksiatna khovel leh khovel lal tenna khovel ah haksatna om ahi chih i theihsa uh ahi. Gimthuakna toh Jesu Khrist hotdamna sangkhawm gingtute (Philippite 1:29) a di’n gimthuakna apoimohdan i theih uh leh i pom uh leng poimoh hi . Khemna leh douna chiteng i thuak diing uh kia hilou in, i tuah chiang ua thil kipahhuai a i pom diing uh chih Jacob 1:2 in hon hilh hi. Gimthuakna in kuhkalna sem suah diing leh Khalam a pichinna hon guan diing ahihman in (Romte 5:3 ; Jacob: 1:3-4), Toupa i belhna leh i muanna ah ma hon suansak semsem hi chih i lungtang uah kembit ni uh maw?

Khovel omdan leh i thil tuahte uh ziak in i phawkna (feelings) uh nuamkei sek mahleh, hiaite tengteng lak ah Toupa’n hon taisan lou ahi chih thutak, ei gingtute’n i pomkip ua, niteng hinkhua a i hinpih uh poimoh ahi. I tuahte uh huaise mahleh, Amah a hoih ngeingei in hoih lai a, Sihnate in i iite uh toh hon khen mahleh, A hon iitna neuchik in leng kiam tuanlou hi. Theisiam lou in kiphin in Amah ngohbawlsek mahleng, A ginom ziak in, A zahngaihna zingteng in i mu lai uhi (Kahla 3:22-23). Lauhna leh lauhthawngna in dim sek mahleng, Laisiangthou tungtawn a “Lau ke’n” chi a hon khamuan den Pathian in, A thupina leh Amah om ahihlam a thilsiamte tungtawn in hunteng in thupitak in kilangkhesak gige lai hi (Sam 19:1 ; Romte 1:20). Khovel in siatlam manoh in tatleekna uang hiaihiai mahleh, bangkim Siamtu Pathian tungnung den lai a, tungnung den diing hi. A khamuanhuai tel mai!

Immanuel (Pathian in hon ompih):
Pathian in hon ompih ahihlam i chetna ding un, A Tapa tang neihsun, Jesu Khrist, eite a di’n mikhialpen i hihlai un hong si hi (Romte 5:8). A hon iitna hiai kan a latsak diingdan om nawnlou hi.

I Toupa Jesu Khrist hong pian ma kum 700 lak vel in zawlnei Isai tungtawn in Pathian in lametna thu hon chiamte i Toupa Jesu Khrist pianna ah hong taksuah hi (Isai 7:14). I Toupa Jesu Khrist mihing a ahong pian inleng Amin diing in ‘Immanuel’ sa diing in Matthai 1:23 ah thu ana tun hi. Toupa’n hon ompih ahihlam, hawi khatleng neilou in, a latsak theihna teng ah ana langsak hi. Hon suaktasak di’a hon sawl, A tapa tang neihsun a hong pian ziak, A min put natawm ah theihtheih diing in lemgeel hi.

Mipilte’n kum a za a sim in ana suut tou ua, I Toupa hong pian diing ana suutkhia in a pian tan in leng Bethlehem tan ah ana delh tung hial uhi. Athupi leh lamdang ka sak mahmah chu, mipil, misiamte’n kum aza aza abei zen a ana sut uh, zankhat thilthu in belaam chingte kiang ah thupitak in Khovel pilna in a suut seng louh, Khovel Hondampa pianthu, Van hong kihong zen in Angel sangtampite’n ana puangzaak in Pathian pahtawina ana pia uhi. Mipil, misiam taktakte’ suutna sang in, mi mawl leh pampaih, temple khawng a leng hun zangkha ngellou belampute kiang a akipuanna thupi zaw hi. Ei mi nautaang min neilou, hihna leh thupina neiloute tung ah Toupa’n A thupina puanzaak thanuam zaw hi’n leng atheih theih hi. Khovel in a piakdan a pelou Pathian in, khovel in a theihsiamdan inleng kipuang vet lou hi. A Khasiangthou in hon sungluah ahihtak man in, Toupa’n hon taisan ngei nawnlou ahihlam theihna di’n khawvel pilna leh siamna poimoh hetlou hi.

Huai ban ah, nuamlou leh thil nuamlou i tuahte dungzui a i phawkna (feelings) ziak in hon taisan dan khawng in koihsek mahleng, zuau ngeilou Pathian in “K’on ompih den diing” chi hi (Matthai 20:28 ; Hebrute 13:5). Huai ziakin, Amah kamsuak ngei, A Thu hing ah kinga in, ei phawkna leh theihsiamdan ah kinga kei leng ki tawldam mahmah hi.

Thil hoihloute mah Toupa’n A nna  hoih sepna in zang zel hi :
Joseph a sanggamte’n thah ana sawm uh chih i theihna tan geih ah, i lungsim nuam hetlou hi. Dotna bawl uthuai kha thei hi. Himahleh, a thah diinglai un, huatna leh haazatna a dim a, hiamgamna leh tualthah poisa lou zen a a omlai ua, thatlou di’a a lungtang uh kheksak Pathian ahi chih mangngilh kei ni. Thil sia khenkhat Pathian in a hong tung ding phal ahi. Ama’n A kheklah bangmah omlou a hihziak ahi. Pathian in Joseph’ sanggamte kiang ah huaibang a lungsim sia a pekei hial hi. Himahleh, Amau lungsim siat natawm Toupa’n poimoh asak leh a hunchiang a omsak hi. Huai phetlou in, lungsimsia leh gitlouh a suahkhum uh, a sanggampa ngoihngoih uh Joseph tung ah leh tungtawn in Toupa’n Israelte hintheihna di’a kuul leh poimoh A sepna hong hidaih mai hi.
Kum hong pai zel a, Pathian in Ami di’a a teel Israelte hondampa diing in A tapa tang neihsun a pia hi. A suahtatna diing natawm uh theilou in ana nawl in, a na that hial mahle uh, Pathian in mihingte paidan zuilou ahihman in, Nam khat in ana deihlouh ziak un, a thupizawsem a a hehpihna leh zahngaihna khovel namchih tung a atungsak daih hi. Eite suahtatna thuguuk leng, gilou tung a Pathian a tungnun ziak a hihman in, Pathian i phat ahi. Halleluiah!

Thil hoihloute Toupa’n A thupina leh A lemgeel sepkhiakna di’n naktak in zangthei hi chih Hiipi leng lak ah leng i mutou zel uhi.

Amah Pathian i kiang a om ahihman in sihna limguam tawn mahleng gilou himhim lau lou diing a kichiil theihna di’a Khasiangthou a thop ihi uhi. Khasiangthou in hon sungluah ahihtak ziak in,  i omna peuh ah, i haksatna peuh, i lauhna peuh ah leh i ginlelhna khempeuh ah Toupa’n hon taisan tuanlou hi. Amah Jesu Khrist a hong pian kipahhuai a hihkawmkawm in I khelhna ziak a Pathian thangpaihna i tung ua tung diing lai, Amah hon kidoh ahihman in, huai khelhna Van Mang thattu i huat diing uh a hita hi. I hondampa tungtawn a Khalam hinkhua a Pathian deihdan a hinna di’a hihtheihna tengteng piak a omkhin i hihman un (Ephesate 1:3; 2 Peter 1:3-10), phawkna (feelings) ah kinga lou in, Thutak ah kinga niuh hang. Toupa’n hon ompih chih thei a lungmuangtak a omthei i hihman un, sunggil kipahna alou theilou in kineita hi (1 Thessalonikate 5:8 ; Philippite 4:4; Habakuk 3:16-19). Pathian in hon thil thawn piak, ginna ziak a, hehpihna tungtawn a Hotdamna tangte i hihman un Pathian tung ah i lungdam petmah uhi (Romte 1:17; Ephesate 2:8). Halleluiah hon suaktasak Pathian ka phat ahi!

Pathian iitna lamdang hinatel e maw! A thangpaihna ziak a taangtawn gawtmun a om diinglai, Jesu Khrist ziak a suakta kia hilou in, Ta hihna kitang ta hi (Johan 1:12).
Pathian’ melma leh Sual sal a tanglai, ‘Abba’, ‘Pa’ chi a, A gouluahte hita diing a, A innsung a sunglai hon tangsak a, diktat a hon pom Pa Pathian thupi ka phat ahi.

(Romte 5:10; Romte 8:14-16; Kolossate 1:21-22)

Matthai 1:21 ah “Tapa a nei dia, a min ding in Jesu na sa ding, ama’n a mite a khelhna ua kipan a hotdam ding ziak in” chih in hon muhsak chu, eite khelhna sal a tang a, Pathian thangpaihna ziak a mangthang a tangtawn gawtmun a tung diing lai, Jesu Khrist in hong hondam a, i khelhnate ua pat ngaihdam a om in tangtawn a Pathian’ kumpigam tang diing in tangtawn sihna apat in hong hunkheta hi.
Jesu Khrist’ kipumpiakna thupi leh manpha ziak in Pathian tung ah lungdam lua hang e!
I Toupa Jesu Khrist ziak a Pathian’ melma a kipat Pathian kipahpih mihingte kisuak a hitel hi (Luke 2:14).
Halleluiah! chi zel mai ni.

Khristmas leh Kumthak hunbi hi in hitakeileh, Pathian’ Hehpihna hong kilatna Toupa Jesu Khrist’ hotdamna in Khelhna a kipat hon suaktasak a, taangtawn hinna hon pia ahihman in i nuam petmah uhi (Titus 2:11). I kipahna uh Amah thumanna suah ni uh maw, kisiik hiallou diing i hi uh! (1 Samuel 15:22 ; Mica 6:8)

Thukhitna:
Amah i Toupa Jesu hong pian ziak a Pathian leh mihing kikaal, mihing leh mihing kikaal leh Amah Hondampa di’a sang khempeuhte ah lemthu hong lengta hi. Lemna Lal, Kumpi Jesu Khrist ahihna bangtak in eite tung a hong thak zel hen aw! Khristmas chituamtak himahleh, kum 2020 in Khristmas lawmkha theilai di’n hon na pii a, Kumthak 2021  kaitou thei diing a ei mimal deihteelna neuchik leng zangtheilou i hihlai un, a hoihzaw lamen thei diing in hon na pii tou zel hi. I Kumpi Jesu Khrist pianchampha i lop ni kia hilou in niteng hinkhua ah Kumpi ahihna a thaktak in leh a thuuk zaw sem a phawk di’n, mimal chiat ah kiphahniam thak in kipumpiak thak ni uh hang. Huai kiniamkhiakna ah i deih mahmah uh Lemna, Khamuannna leh Kipahna om hi.

Toupa Jesu Khrist ah i lametna nga i hihtak man un, thil omdan theihsiam thei in, haksat hun in Toupa muan i kisin ngam ua, mangbat hun in “nang thuthu hi hen” i chi ngam samta ua, hinkhua in khimziing nuai a hon tut chiang inleng chiantak in lametna i neithei zel uhi. Lemna Kumpi a hihman in lemna delh in i delh theita ua, dahna leh mangbatna lak ah kipahna thupitak neithei in kipahthu bang i geenthei ua, hiaibang hunte ah Amah muan ngamna i teelzaw theita uhi. Toupa hoih hi.Toupa ka phat ahi. Toupa thupi hi.

A hon houpihna zathei di’n simtute khalam khawngeingaihna leh khalam mit vaakna, Pathian in i Toupa Jesu Khrist’ Min in hon pia hen. Amen.

-Chingngaihlian Tunglut

January 3, 2021/Article No. 21

(Laigelh toh kisai kupbeh nuam  a omleh, +919892316430 ah laigelhtu thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

One thought on “PATHIAN IN HON OMPIH

  1. sim nuam peetmah… Toupan ahonpina te theih thak2 in om… Toupan tampi article gelh khe thei jeel din hon haatsak ta hen

Book Appointment