PATHIAN MUAN NGAMNA

0

Saptuam masate tanchin khong i sut a i gen chiang in amaute thupina leh hangsanna gen ding a tam mahmah hi. Tunia nuam leh awngthol tak a Saptuam mite’n Pathian hoihna i muhna ziak uh gen ding chileng i mi masate, saptuam maikaite ziak, amaute hangsanna ziak ahi pen ding hi. Amau te’n Pathian a lau uh a, Amah phawk mi te ahi uh a; Amah a kinga leh muanna thupitak a neih ziak un haksatna a tuah theihna mun ua tuate thuak ngam in ana om uhi. Tulai hun in ahihleh eite bang dinmun ah i om uh a; Pathian a ding in bang zah vei haksatna i phut khak uh a om a? Ahihkeileh Toupa a muanna ngak ziakin bangzah vei i tan ngam dingte uh i tan ngam ta ua? chihte kidot tuak mahmah hi. India khopi mun khenkhat ah gingtute soisakna toh kisai zak ding hong om tou ta a, eite lak ah leng omlou ding ahi chih kuaman i gen ngam kei uh a; maban a kum hongpai toutou leh i maituah ding uh a thupi pen leng ahong hithei hi. Tuate phu ngam ding in i kiman in i kisa ngamta hia chih i ki chouna ahi.

Khovel kinoh tak a khosate a kihihlai in Toupa adia kipe khia a, Amah adia kalsuante khong ngaihtuah chiang in hampha uh kasa mahmah mai hi. Haksatna a tuahte uh theihpihlou hilou in, leitung a khosak lai a full time a Toupa adia a kizat theih pen uh manpha sa in, amaute eng vungvung a om khak hun atam sek hi. I gen ut pen i theihsiam sem na ding in, mi tengteng in Pathian nna i sem thei chiat tham uh himahleh Toupa adia kalsuante hampha sawnsawn uh hina e i chih utna ahi. Mi tamtak te khosakna ding ngaihtuahna ziak a mi mai en leh mi nuai a om a, gim tak leh tawltak a omte sang in Pathian nna mahmah sem a gim leh tawl tak a omte hampha uh hina e! Amaute bang in mi tengteng in sem theilou ding himahlehang i septheihna ding uh lampi a om chiat hi, tuate tuh mahni siamna, thilhihtheihna leh chitna i neih dan bang uh a hong hiding hi. Tuate Pathian ading in i zang khe thei hia? A hihkeileh mukhe nailou a mi dangte a kop pihpih lai i hi diam chihleng ki etna ding ua poimoh a hong suak nawn hi.

Tuni’n nang leh ken i sep ding i sep keileh a kikhel lua chih hun hongtung thei gige ahi chih phawk thakthak ni. Hebrute te ah hiai i mu hi, “Huan mihing ading in khatvei sih seh ahi, huai nung in vaihawmna a om ding hi” – 9:27. En i sep ding i seplouh ziakin kuan sihna ana maituah man a, i inkuanpihte, i lawm i vualte leh saptuamte’n sih khamuanna a nei vek ding uam? Amaute pi tu ding, lam hilh tu ding leh hotdamna lampi a hilh tu ding a nang leh ken mohpuakna i nei a tua ding a Toupa’n hon zang ut ahihdan mangngilh keini. Thugen siam i hikei maithei, laisiam le i hikei maithei, Laisiangthou thu leng eimah adia buailai i himai thei; himahleh i theih bangbang te en i hamphat pih bang in midangte i hilh sawn theih apoimoh hi. “…Thuhilhmi omlou in bangchi’n a za ding ua? Sawl ahihkei uleh bangchi’n thu a hilh ding ua? “Thil hoih tanchin kipahhuai tunte khe kilawm natel e!” chih gelh bang in.” – Romte 10:14b-15. Hiai bang a i hih theih dandan a i kalsuan chiang ua i muh theih ding tuh hiai ahi, “Huchi in ginna tuh zakna ziak in a hongom a, zakna Khrist thu kigen ziak in a hongom hi.” – v17

Tulai in Social Media i hah zat mahmah ta uh a, a diak in Status update theihna bang i hah zat mahmah uhi. Hiaite bang lam ah i zang sek uh a? Thulim lou post na ding, chiamnuih, lim hoihlou leh khovel thilte khong post na a zang sek i diam? Keilam ah hong kigen leng, atangpi in thu hoih i Khalam uh hon sukha thei dingte ka post mun zaw hi. Hiai tungtawn a kamuh khiat ahihleh midangte’n ana hamphat pih uh ahihdan ka mu tou zel hi. I thugelhte, i thu post te khong mi dangte apat i muh sawn leh i zak sawn chiang in kipahna a lian a, tuate’n tha hon guan in Toupa thu theihbeh utna, midangte piak beh utna hon guan semsem lai hi. Bangziak a hiai hon gen ka diam i chihleh houchik inleng Toupa thute i tankou pih thei ta uhi. Nang leh ken bang chi bang in i tankou pih a chih apoimoh hi. Midangte khamuantu, taihilhtu, etton ding leh sinsak tu hithei gige i hih dan ki mangngilh lou in tua ding a kisa chiat ding in i ki hasuan ahi. Hiai ding mah a Pathian in hon bawlkhol ahihdan leng i Laisiangthou ah chiangtak in a muh theih hi. “…Thil hoih hihding a Khrist Jesu ah siam a om in, amah khutsuak i hi uhi; huai thil hoih hih i khosakna dan ding in Pathian in a bawlkhol ahi.” – Ephesate 2:10.

Tukal a i Weekly Inspiration dia i thukhitna ding a i gen ut tuh tuni’n bang i kihta pen a, i thugente, i thugelhte midangte’n bangmah a hon ngailou ding ahi i chimai hia? Ahihkeileh bangmah hilou kahi, siamna chitna neilou chi’n i hih ding omte ana nawl khinkhin i hi zaw hia chih ki ngaihtuahni. Shadrach, Meshach, leh Abednego te tanchin i thei uh a, amaute bang a hangsanna nei a Toupa a i muanna uh midangte mai a lak ngam ding in kisa ni. I niteng hun zatna uah i hih ding uh Toupa tate i hihna uh lakna ding khong a om thei gige hi. Tua bang hunte ah Amah theihpihtu muanhuai hithei ding in kisa thak chiatni uh aw.

“….Hotdam a omlelte leh mangthang lellelte ah Pathian adin Khrist gimnamtui ka hi uhi; Pawl khatte adin sihna lak ah sihna ding gimnam ka hi ua, pawl khatte din hinna lak a hinna ding in gimnam ka hi uh. Hiai bangte adin kua ahia chingzou ding? Mi tampi in Pathian thu mite khem a sumsinna a a zat bang un kou zaw ka zang kei uhi; Pathian sawltak hi zaw in, chihtaktak in Pathian mitmuh in Khrist ah thu ka gen zel uhi.” – 2 Korinthte 2:15-17.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

23rd March, 2022 | Weekly-Inspiration – 94

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment