Pathian’ Ompihna Nget Poimoh

2

“Mihing lungtang in a lampi a ngaihtuah a: himahleh Toupa’n a kalsuante a bawlsak hi.” – Paunakte 16:9

Na hinkhua ah khatveivei na paina lam le thei bun zoulou, na hih di zok penle theilou in na hun na zang kha zel hia? A hih keileh na dinmun theihsiam haksa leh om didan le theilou na kisak hun a om zel sam hia? Mihing iki bat louh nungzui in i buaina leh i ngaihtuahte ki bang vek lou ding hi. Ei mah deihdan in i pai kha thei a, himahleh Pathian kiang a i nget zawk ding ana hi zaw hi. I sepna toh kisai, I laisimna ah, i lawmta kal ah, koppih ding zong na leh I innsung vai khong ziakin tua bang haksatnate i maituah thei hi. A na maituah kha nailou ihih leleng khatvei i tuah hun hong om kha thei hi. Hiai bang hunte a Toupa kiang a theihtheih na, theihsiam na leh Amah lampi te tawn a i pai theih na ding a i thum ding ahi.

Pathian in I ngetma in leng i poimohte thei khin hi, himahleh Amah toh iki naih sem ding deih in i hih na bangbang a kipuang khiatna leh i poimoh te Ama kiang tut gige ding hon deih hi.
Exodus 33 ah Mosi in Israelte’ Mount Sinai pawt san a, gamchiam gam manoh ding a thupiak a bawl lai inleng hiai bang dotna ana bawl hi. “..huaiziak in tuin, ka hon ngen ahi. Na mitmuh a hehpihna ka muh leh, nang k’on theihna ding leh na mitmuh a hehpihna ka muh theihna ding in, tuin na lampi hon ensak in. Hiai nam na mite ahi, chih ngaihtuah in” a chi hi. v13.
Hichi bang a dotna Mosi in adot in Pathian in adawng na pia in, “….Aman, “Ka ompihna nang toh a ton dia, khawlna k’on pe ding” a chi hi. v15.

I mimal hinkhua ah, ahih keileh Saptuam leh Pawlpi tuamtuam ah tup-le-ngim (Plan) tuamtuam i bawl zel uhi. Tuate i sepsuah na ding un thumna leh ngetna toh i kalsuan uhi. Huchia i sep khomkhom lai un, Pathian ompihna (presence) ngenlou leh ngaihtuah phalou a tua i thiltup te sem i hih khak ding lauh huai hi. Mosi in Pathian kiang a a nget a dawngna amuh bang in, apai na peuh a Amah ompihna leng ngen hi. “…..Aman a kiang ah, “Na ompihna kei toh a tonkei ding leh, hiai apan hon pitou ken. N’on tonpih kei leh, bangchi’n na mite leh ken na mitmuh in deihsakna ka mu uh chih kithei ding ahia?” v15,16

Tua ahihman in tup-le-ngim tuamtuam i neih omte ah Toupa ompihna ngen gige leng tua i sepsuah om sate sang inleng a gah i muh ding tam sem ding hi. Buaina haksatna leh lungkhamna i tuak vek uhi, himahleh hiai bang hunte a tha nem leh beidong a om mailou in, Toupa ompihna ngen in, i maban ding Amah khut a nga thei chiat dingin simtu Pathian in hon ompih hen.

– Thangginom Hangshing

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

2 thoughts on “Pathian’ Ompihna Nget Poimoh

  1. Thupilua… amen

Book Appointment